​ያኔ ነው የማዝነው

​ያኔ ነው የማዝነው
የለምና ሽቅብ የማይስፈነጠር፣
የለምና ቁልቁል የማይንደረደር፣
የለምና ቱባ የማይተረተር፣
የለምና ምንም ባለበት የሚቀር፣
አያስገርመኝም፦
ዛሬ ሕፃን ሆኖ ነገ ቢሸመግል፣
የገበያ ሌባ ችሎት ቢያገለግል።
አያስቀኝምም፦
ዶክትሬቱን ይዞ ባያቅ ስሙን መጻፍ፣
እግሩ እያለለት ቢጓዝ በጁ መዳፍ።
አያሳስበኝም፦
ኦዞን ተበሳስቶ ብናልቅ በቃጠሎ፣
ሰማይና ምድር ባንድ ተጠቃሎ።
አያሳዝነኝም፦
ሰው ነው ሲሉት አፈር የሚሆነው ሥጋ፣
ሳያርፍ የሚሞተው ሲላጋ ሲላጋ።
የሚያሳዝነኝ ግን፦
ሞቆኝ፣
ተመችቶኝ፣
ከገንዘቡ ብዛት ለመቁጠር አታክቶኝ፣
ከዓይነቱ ብዛት ለመብላት ሰልችቶኝ፣
ሠፍ ሠ……………………..ፍ ብየለት፣
በሕልም ያየሁትን ስባንን ያጣሁ ለት።
ያኔ ነው የማዝነው!

በአጸደ ውድነህ

* * *

እኛ ሰፈር ውኃ ዓርብ ዓርብ ትመጣለች

የዐውድ ዓመት ያህል በጉጉት የምንጠብቃት ቀን ዓርብ ነች። ምክንያቱም ውኃ ቀጠሮዋን ጠብቃ ትመጣለችና። እኛ ሰፈር ወኃ ጠፋች የሚባለው ዓርብ ካልመጣች ብቻ ነው። ከዓርብ ውጪ ከመጣች ደግሞ የኮንደሚንየሙ ነዋሪዎች በሙሉ ሲጠያየቁ ይውላሉ።
"ተረፋችሁ?"
"እኛ ቤትስ ቧንቧን ዘግተን ስላደርን አልፈሰሰችም። ግን ላይኛው ቤት ሌሊቱን ሙሉ ሲፈስ አድሮ ይኸው የኛ ጣሪያ ውኃ ሲያዘንብ አደረ።"

ችግር ሲለመድ መፍትሔ ችግር ይሆናል።

በሰፈራችን ከቁራሌው በላይ ቁጥራቸው የሚበዙት ልዌዎች ናቸው።

"ልዌ....ልዌ... አሮጌ ጫማ ጠርሙስ ያሌ...ው" ሲሉ ይዞሩና በርካታ የፕላስቲክ ባሊዎችን እና ለውኃ ማጠራቀሚ የሚጠቅሙ የፕላስቲክ ዕቃዎችን ሲለውጡ ይውላሉ።

የቤቴ የገላ መታጠቢያ ማሞቂያ ሶኬት ላይ ላለፉት ጥቂት ዓመታት ሞባይሌን እየሳካሁ ቻርጅ አደርግበታለሁ።

የኒውዮርኩን የነፃነት ሐውልትና የኛ አገሩን የእናሸንፋለን ምልክት አሁንም ተግባራዊ በማድረግ ወደር የማይገኝለት የኛ ሰፈር ሰው ብቻ ይመስለኛል።

ባለፈው ሳምንት ወደ ፍል ውኃ ሄጄ ከላይ ተምዘግዝጎ የሚወርድ ውኃ ናፍቆቴን ተወጣሁ። የእውነት አብዛኞቻችሁ ምንም ሳይመስላችሁ ሁል ቀን የምታደርጉትን ሁሉ የኛ ሰፈር ሰው አሁንም እንደተቸገረ ብርቅ ሆኖበታል።

የውኃ ያለህ!? ብሎ መጠየቅ ፖለቲከኛ ስለሚያስብል የግቢያችን ኮሚቴዎች አንድም ቀን በየሳምንቱ ሲሰበሰቡ አንስተው የተወያዩበት አይመስለኝም። ታዲያ ባለፈው ፍል ውኃ በወረፋ ምክንያት አምሽቼ ወደ ግቢዬ ልገባ ስል አንዱ ነውጠኛ ዘበኛ "ኮሚቴው አምሽቶ መግባት ከልክሏል" አሉኝ።

ኮሚቴው ግን ለምን ስለ ውኃ ችግር መፍትሔ አይመክርም? የኮሚቴ ሥራ "መከልከል" ብቻ ነው እንዴ?

የውኃ ያለህ?

- ያሬድ ሹመቴ

* * *

የህንድ አስፋልቶች ቀለጡ

ህንድ በታሪኳ ከፍተኛ ሙቀት የሆነውን 51 ዲግሪ ሴልሽየስ ባስመዘገበችበት ባለፈው ዓርብ፣ ፋሎዲ በተሰኘችው ከተማ የአስፋልት ሬንጅ በመቅለጡ እግረኞችም ተሽከርካሪዎችም ሲፈተኑ መዋላቸውን ዘ ኢንዲፔንደንት ዘግቧል፡፡ በዕለቱ ሰዎች አስፋልት ሲያቋርጡ በቀለጠው ሬንጅ እንዳይያዙ ጫማቸውን እንዲያወልቁ ተገድደው ነበር፡፡ በአገሪቱ ከዚህ ቀደም የተመዘገበው ከፍተኛ ሙቀት ዲግሪ 50 ሴልሽየስ ነበር፡፡ ከፍተኛው ሙቀት ያስከተለው ቀውስ ይበልጥ የታየው በፋሎዲ ይሁን እንጂ በሌሎች ከተሞችም ሙቀቱ ያስከተለው ተመሳሳይ ችግር መስተዋሉን ዘገባዎች ያመለክታሉ፡፡ በሌላ በኩል ቫልሳድ በተባለች ከተማ የተመዘገበው ሙቀት ምንም እንኳ 36 ዲግሪ ሴልሽየስ የነበረ ቢሆንም፣ በቀለጠ የአስፋልት ሬንጅ ነዋሪዎች ሲሰቃዩ ነበር፡፡ ህንድ በተደጋጋሚ በእንዲህ ያለ ሙቀት በሚያስከትለው ቀውስ የምትፈተን ሲሆን፣ ከዚህ ቀደም ተመዘገበ የተባለው ከፍተኛ ሙቀት 50 ዲግሪ ሴልሽየስ የተመዘገበው እ.ኤ.አ. በ1956 አልዋር በተባለ ከተማ ነበር፡፡ በአገሪቱ አሁንም ከፍተኛ ሙቀት የተለያዩ ችግሮችን ሊያስከትል እንደሚችል ባለሥልጣናት አስታውቀዋል፡፡ የዚህ ዓይነቱ ከፍተኛ ሙቀት በርካታ ገበሬዎች ከማሳቸው እንዲፈናቀሉ እንዲሰደዱም ምክንያት ሆኗል፡፡ ወንዞች፣ ሐይቆችና ግድቦችም ውኃ አልባ ሆነዋል፡፡