​የዘንድሮ የፋሲካ በዓልን ምክንያት በማድረግ ‹‹እዮሀ ፋሲካ›› በሚል ስያሜ በኤግዚቢሽን ማዕከል በተዘጋጀው ባዛር ላይ የቀረበው ትልቅ መሶብ፡፡

የዘንድሮ የፋሲካ በዓልን ምክንያት በማድረግ ‹‹እዮሀ ፋሲካ›› በሚል ስያሜ በኤግዚቢሽን ማዕከል በተዘጋጀው ባዛር ላይ የቀረበው ትልቅ መሶብ፡፡ ከአጠገቡ ባለው መጠነኛ መሶብ የባዛሩ አዘጋጆችና የክብር እንግዶች ዳቦ ሲቆርሱ፡፡ ባዛሩ የተከፈተው መጋቢት 30 ቀን 2008 ዓ.ም. ሲሆን እስከ ሚያዚያ 22 ይቆያል (ፎቶ መስፍን ሰለሞን)

* * *

የሕይወት እምብርት

ከግጥም ጥግ

ከቅኔ ማህፀን ሙቀት

ተወልጄ

በቀን ብርሃን - በቀለም ዥረት

ያደፈውን ገላዬን ሳለቀልቅ 

በወርቃማው ብርሃን ውቅያኖስ

…….. ስመላለስ

አይገርምሽም ምቾቱ?

አያስደንቅሽም ድሎቱ?

ቀይ- ቢጫ - ነጭ

ጥቁር - ጭቃ

የቡሆ - ቃ

የአለቃ

የቀራጺ - የሠዓሊ - የገጣሚ

የሰው ጣጣ - የሰው ዕቃ

የሰው - ዕቃ

ቀይ ቢጫ ነጭ ጥቁር - ጭቃ

የቦይ- ውኃ - የቡሆ - ቃ

የቀለም - ቀለም

የሌሊት - ህልም

አይገርምሽም!!!

  • አገኘሁ አዳነ ድልነሳሁ  ‹‹ጨለማን ሰበራ›› (1997)

* * *

ልጇን እንደ ክብደት የምትጠቀመው ስፖርተኛ እናት

የአካል ብቃት እንቅስቃሴ አሠልጣኟ እናት ክርስቲ አርዶ የአንድ ዓመት ከሰባት ወር ሕፃን ልጇን እንደ ክብደት እንደምትጠቀምበት ዘሚረር ዘገበ፡፡ ኦንላየን የአካል ብቃት ሥልጠና የምትሰጠው ክርስቲ ምንም እንኳ የሕፃን ልጅ እናት ብትሆንም ሕፃን ልጇ ከአካል ብቃት እንቅስቃሴዋ እንዲገታት አልፈለገችም፡፡ ለዚህ ደግሞ ዘዴ ያለችው ሕፃን ልጇ ተከርን እንደ ክብደት መጠቀምን ነው፡፡ በዚህ እናትና ሕፃን የድረ ገጽ ኮከቦች መሆናቸውን ዘገባው ያመለክታል፡፡

ይህች እናት ሁለት ልጆች ሲኖሯት መልሶ መነሳት በቤት ውስጥ ልጅ ማሳደግም ክብደቷ እንዲጨምር አላደረገም፡፡ እንዲያውም ዕድሜ ለልጆቼ ክብደቴ የሰውነት ቅርጼም እንደተጠበቀ እንዲሆን አግዘውኛል ትላለች፡፡ ቢሆንም ግን ነገሩ ቀላል አለመሆኑን ትናገራለች፡፡

* * *

አንድ ወንድ ሦስት ፍቅረኞች የሚይዝበት ከተማ

ለብዙዎች ግራ የሚያጋባና ተቀባይነት የሌለው ቢመስልም በቻይናዋ ደንግዋን ከተማ የአንድ ወንድ ሦስት ፍቅረኞችን መያዝ የተለመደ እንደሆነ የዘ ኢንዲፔንደንት ዘገባ ያመለክታል፡፡ ይህ የሆነው በከተማዋ የወንዶች ቁጥር በጣም አነስተኛ በመሆኑ ነው፡፡

ያለፈው ዓመት የአገሪቱን የሕዝብ ቁጥር የሚመለከት መረጃ እንደሚያሳየው የወንድና የሴት ልዩነት 89 ለ100 ነው፡፡ ለመገናኛ ብዙኃን አስተያየታቸውን የሰጡ ወንዶች እንደገለጹት ኢንዱስትሪ በተስፋፋበት በዚህ ከተማ ሥራ ከማግኘት ይልቅ የሴት ጓደኛ ማግኘት ቀላል ነው፡፡ ‹‹ሦስት ፍቅረኞች አሉኝ፡፡ ይተዋወቃሉም፡፡ ብዙ ጓደኞቼም እንደ እኔው ሦስት ፍቅረኞች አሏቸው፤›› ብሏል አንዱ አስተያየት ሰጪ፡፡

* * *

ቻይና የታዋቂ ሰዎች ልጆች በቲቪ እንዳይታዩ አደረገች

ቻይና የታዋቂ ሰዎች ልጆች በተከታታይ የቴሌቪዥን ዝግጅቶች እንዳይታዩ ማገዷን ከሁለት ቀናት በፊት አሳውቃለች፡፡ የአገሪቱ የመገናኛ ብዙኃን ሕግ የታዋቂ ሰዎች ልጆችን በቴሌቪዥን ማሳየት ያገደው፣ ሕፃናቱ ያለዕድሜያቸው ከመጠን በላይ እውቅና አግኝተው ሕይወታቸውን መምራት እንዳይቸገሩ በሚል ነው፡፡

ዥኑአ እንደገዘበው፣በአገሪቱ የታዋቂ ሰዎችን ልጆች ሕይወት ከሚያሳዩ ተከታታይ የቴሌቪዥን ዝግጅቶች አንዱ ‹‹ዌር አር ዊ ጐይንግ ዳድ?›› ይሰኛል፡፡ ዝግጅቱን በአንድ ምሽት ከ75 ሚሊዮን ሰዎች በላይ ይመለከቱታል፡፡ ይህ ፕሮግራምና ሌሎችም ተመሳሳይ ዝግጅቶች የታዋቂ ሰዎች ልጆች መደበኛ ሕይወት እንዳይኖራቸው እንደሚያደርጉ ታምኖ በሕግ መከልከሉ ድጋፍም ተቃውሞም ገጥሞታል፡፡

የታዋቂ ሰዎች ልጆች ያሉባቸው ዝግጅቶች ከፍተኛ ተመልካች እንዳላቸውና አዝናኝ እንደሆኑ የሚገልጹ ግለሰቦች ሕጉን ተቃውመዋል፡፡ ሌሎች አስተያየት ሰጪዎች ደግሞ ሕጉ ጠቃሚ እንደሆነና የቴሌቪዥን ጣቢያዎቹ በልጆቹ ላይ የሚያሳድሩት ተፅዕኖ ቀላል እንዳልሆነ ገልጸዋል፡፡ ቻይና በዚሁ ዓመት ከአሥር ዓመት በታች የሆናቸው ልጆች ማስታወቂያ እንዳይሠሩ ማገዷ ይታወሳል፡፡