​ከጥቂት ቀናት በፊት በሰሜናዊ ጃፓን ከሚገኝ የእንስሳት ማቆያ ያመለጠው የ24 ዓመቱ ቺምፓንዚ ቻቻ ሴንዳይ በተሰኘችው ከተማ የተለያዩ አካባቢዎች እየዘዋወረ ከኤሌክትሪክ ፖል ወደ ኤሌክትሪክ ፖል እንዲሁም ከሕንፃ ሕንፃ ሲዘል ታይቶ እንደበር ሮይተርስ ዘግቧል፡፡

ከጥቂት ቀናት በፊት በሰሜናዊ ጃፓን ከሚገኝ የእንስሳት ማቆያ ያመለጠው የ24 ዓመቱ ቺምፓንዚ ቻቻ ሴንዳይ በተሰኘችው ከተማ የተለያዩ አካባቢዎች እየዘዋወረ ከኤሌክትሪክ ፖል ወደ ኤሌክትሪክ ፖል እንዲሁም ከሕንፃ ሕንፃ ሲዘል ታይቶ እንደበር ሮይተርስ ዘግቧል፡፡ ወደነበረበት ከፍታ በመውጣት ከፖሉ ጫፍ የነበረውን ቻቻ ለአፍታ ለማደንዘዝ የሞከሩት የእንስሳት ሐኪምን ቺምፓንዚው አስደንግጧቸዋል፡፡ በመጨረሻ ቺምፓንዚው ማደንዘዣ ተወግቶ ሊያዝ ችሏል፡፡ 

******************

እናትና እድሜ
.
ዝናቡ ይዘንባል..... . . . . . . . . . . .
በር ላይ ቆሜያለሁ፤
የደጁ ወጨፎ ያንዘፈዝፈኛል፣
ብልጭታ - መብርቁ፣ ከሰማዩ ጋራ፣ ከመንደሩ ጋራ፣ ይሰነጥቀኛል፡፡
.
አወይ እናት ማጣት!
አይ ልጅ መሆን መጥፎ፤
ዛሬም ባምሳ አመቱ፣ በደመነ ቁጥር፣ በዘነበ ቁጥር፣ ደጃፍ ተደግፎ፤
ምን መብረቅ ቢወርድ፣ ምን ቆፈን ቢይዘው፤
‹‹ደጃፍ ላይ አትቁም፣ መብረቅ ትጠራለህ፣
ወጨፎ ይመታሀል፣ ለሊት ታስላለህ፡፡››
ካላለችው እናቱ፤
አይገባም ከቤቱ፡፡
.
ይኸው ክረምት መጣ፣ ዝናቡ ዘነበ፣
መብረቁ ይወርዳል፣
አድባር ይታረሳል፤
በር ላይ ቆሜያለሁ፤
ሞቴ ላይ ቆሜያለሁ፤
ከቆፈኑ በላይ፣
ከመብረቁ በላይ፣ . . .ሳጣሽ ያስፈራኛል፤
እማ ‹‹ግባ›› በዪኝ፣ ቃልሽ ያድነኛል፡፡

  • በድሉ ዋቅጅራ ( ሚያዝያ፣ 2008)
     

****************

የዶላር ላይ ምስል በጥቁሯ የነፃነት ታጋይ ሀሪየት ቱብማን ሊተካ ነው

የአሜሪካ የባንክ ገዢዎች እንዳስታወቁት በ20 ዶላር ላይ ያለው የፕሬዚዳንት አንድሪው ጃክሰን ምስል የጥቁር መብት ትግል ተምሳሌት በሆኑት ሀሪየት ቱብማን እንዲተካ ተወስኗል፡፡

የዘ ኢንዲፔንደንት ዘገባ እንደሚያመላክተው፣ ይህ ለውጥ በቀላሉ የተሳካ ሳይሆን ለጥቁር መብት ታጋዮች ዕውቅና ይሰጥ በሚሉ ጠንካራ ሕዝባዊ ቅስቀሳዎች ነው፡፡ በአምስት ዶላር ላይም ተመሳሳይ ለውጥ በማድረግ ለጥቁር ነፃነት ታጋዮች ዕውቅና እንደሚሰጥም ተገልጿል፡፡

በአሥር ዶላር የፊት ገጽ ላይ ያለው የአሌክሳንደር ሀሚልተን ምስል ግን ባለበት የሚቀጥል ሲሆን ከወራት በፊት ይህ የአሌክሳንደር ሀሚልተን ምስልም እንደሚቀየርና በሴት እንደሚተካ ተገልጾ ነበር፡፡ በአሜሪካ ዘመናዊ የፋይናንስ ሲስተም የዘረጉት ሀሚልተን ምስል ይነሳል የሚለው ነገር ግን አድናቂዎቻቸውን አስቆጣ፡፡ ተንታኞችም ሀሚልተን ከአሥር ዶላር ላይ የሚነሱ ከሆነ ቀደምት አሜካዊያንን ከመሬታቸው ያፈናቀሉት አንድሪው ጃክሰን ከሀያ ዶላር ላይ ተነስተው የሀሚልተን ምስል መተካት መሆን አለበት የሚል አስተያየት ሠንዝረው ነበር፡፡

ዘገባው እንደሚያመለክተው ምናልባትም ይህ ለውጥ የአንዲት ሕፃን በአሜሪካ የዶላር ቅጠሎች ላይ የሴት ምስል አለመኖሩን በሚመለከት ለባራክ ኦባማ የጻፈችውን ደብዳቤ ተከትሎ የመጣ ነው፡፡ በሌላ በኩል 20 ዶላር ላይ ያሉት ጃክሰን በሴት ይተኩ የሚለው የማኅበራዊ ድረ ገጽ ዘመቻም ተፅዕኖ አሳድሯል፡፡

******************

የሥራ ማስታወቂያ፣ የንግሥት ኤልሳቤትን ትዊተር ገጽ ማስተዳደር

የእንግሊዝ ጋዜጦች እንደዘገቡት ባለቀው ሳምንት የ90ኛ ዓመት የልደት በዓላቸውን ያከበሩት የእንግሊዟ ንግሥት ኤልሳቤት ሁለተኛን የትዊተር ገጽ የሚያስተዳድር ሰው ፍለጋ የሥራ ማስታወቂያ ወጥቷል፡፡ እንደ ሮማው ጳጳስ ፍራንሲስና ሚሼል ኦባማን ያሉ በማኅበራዊ ድረ ገጾች ላይ የጎሉ ታላላቅ ሰዎችን ለመወዳደር የሚያስችላቸው በሚመስል መልኩ የትዊተር ገጻቸውን ለሚያስተዳድረው ሰው ንግሥቷ በዓመት እስከ 50 ሺሕ ፓውንድ እንደሚከፍሉ አስታውቀዋል፡፡

የንግሥቲቱን የትዊተር ገጽ የሚያስተዳድረው ኤክስፐርት የንጉሣዊያኑን የፌስቡክና የትዊተር ገጾችን ከማስተዳደር በተጨማሪ በማኅበራዊ ድረ ገጾች ላይ የንግሥቲቱ ተከታዮችን የሚያበዛ አዲስ መንገድም እንዲፈጥር ይጠበቅበታል፡፡

የሥራ ማስታወቂያው የወጣው በንጉሣውያኑ ድረ ገጽ ላይ ሲሆን ዓላማው የንግሥቲቱን የማኅበራዊ ድረ ገጽ ጉልህነትን መጨመር ነው፡፡

ንግሥቲቱ መጀመሪያ ትዊት ያደረጉት እ.ኤ.አ. በ2014 ነበር፡፡ በአሁኑ ወቅት 2.16 ሚሊዮን ተከታዮች ሲኖሯቸው የራሳቸው ድረ ገጽና ዩቲውብ ቻናልም አላቸው፡፡