ያላወቁ አለቁ

ያላወቁ አለቁ

ዋ! ብሎ ለመቅረት

አንድ አሞራ ድንገት፤

ቀን ቢያገጣጥመው ካየር ክንፍ ጥሎት

ማየቱ ደነቀው እሱን መሳይ ፍጥረት፡፡

መንቁሩን አሹሎ እየቆረቆረው

አንድ ሁለት እያለ የልቡን ሊነግረው፤

አሞራ ዋ! ብሎ አሞራን ተጠጋው፡፡

ምን ያለኸው ጉድ ነኽ ለጉድ የፈጠረኽ

በተመላለጠው ላባ ባጣው ገላኽ፤

ከእኔ በላይ ገዝፈኽ

ከእኔ በላይ ጮኸኽ፤

መድረሻኽን እንዳይ እስኪ ልከተልኽ፡፡

እናትኽ ከየት ናት አባትክስ ማነው

ኧረ ምን ብትበላ ምን ብትጠጣ ነው፤

ካሞራም አሞራ እንዲኽ የገዘፍከው?

ድምጽኽ ቢሰማኝም የሚያስገመግመው

እንግዳ ሆነብኝ አፍኽን አላውቀው፤

በምን ሆድ ብሶኽ ነው

በምን ተከፍተኽ ነው፤

ብቻኽን ጨክነኽ የምትኮበልለው

እያለ የልቡን እየወረወረ

ሆድና ጀርባውን እየቆረቆረ፤

ይሰማው አስቦ ከክንፉ ቢጠጋው

አሞራን አሞራ ቅርጥፍ አርጎ በላው፡፡

2014 ኤ/አ ለንደን

*****

ቀራፂ እና ጎብኚ

- ይቅርታ ይህን ቅርጽ የሠራኸው አንተ ነህ?

* እኔ ነኝ

- ሰውየው…

* ያው ወታደር ናቸው

- ማለቴ..

* መነሻ ሐሳቡን ሊጠይቁኝ ነው?

- የለም! ማዕረጋቸውን ለመለየት…

* ጄኔራል ናቸው

- ምነው ታዲያ?!

* ምነው?

- ሽብረክ ማለታቸው ትንሽ ፈገግ አላሰኘም

* ጉዳዩ ሌላ ነው

- እንዴት?

* ሥራው ሲጀመር ፈረሰኛ እንዲሆኑ ነበር

- ታዲያ?!

* አሠሪ ኮሚቴው ገንዘብ ስለ አጠረው ፈረሱ ቀረ

- ‹‹ጠብታ›› (1999)

****

ሒል ጫማ ባለማድረግ ከሥራ የተባረረችው ሴት

ትልቅ ሒል ያለው ጫማ ባለማድረግ የተቀመጠውን የአለባበስ ሥነ ሥርዓት አጓድለሻል ተብላ ከሥራ የተባረረችው እንግሊዛዊቷ ኒኮላ ትሮፕ ጉዳይ ትልቅ ትኩረትን አግኝቷል፡፡ የ27 ዓመቷ ኒኮላ ትሮፕ ለነገሩ እጅ ሳትሰጥ የኩባንያው የቢሮ አለባበስ ሥርዓትን የሚመለከተው ሕግ ላይ ማሻሻያ እንዲደረግ ፊርማ ማሰባሰብ እንደጀመረች የጋርዲያን ዘገባ ያመለክታል፡፡ በእዚህም ፊርማ ማሰባሰብ በጀመረች 48 ሰዓት በማይሞላ ጊዜ ውስጥ 110,000 ፊርማ ማሰባሰብ ችላለች፡፡

ፊርማ ማሰባሰቡ ያለመው ሴት ሠራተኞች ሒል ጫማ እንዲያደርጉ የኩባንያዎች መጠየቅን ሕገወጥ ማድረግ ነው፡፡ መሀል ለንደን ላይ በሚገኘው ኩባንያ እንግዳ ተቀባይ ተደርጋ ተቀጥራ የነበረችው ትሮፕ የተጠየቀችው ከሁለት እስከ አራት ኢንች ርዝመት ያለው ሒል ጫማ እንድታደርግ ነበር፡፡

ዘገባው እንደሚያመለክተው በእንግሊዝ ኩባንያዎች ሴት ሠራተኞች ትልቅ ሒል ያላቸው ጫማዎች እንዲያደርጉ መጠየቅ ይችላሉ፡፡ በመጨረሻ ከቢቢሲ ጋር ቃለ ምልልስ ስታደርግ ያገኘችው ምላሽ ከጠበቀችው በላይ እንደሆነ ትሮፕ ተናግራለች፡፡

*****

ዛፎቹ

ከዕለታት አንድ ቀን በዓለም ዙሪያ ያሉ ዛፎች ተሰባስበው ስለ ችግሮቻቸው ይወያዩ ነበር፡፡ ከመሃከላቸውም አንዱ እንዲህ አለ “የእኛ ትልቁ ችግር የደን መመንጠር ነው፡፡ ይህም ድርጊት የሚፈጸምብን መጥረቢያ በተባለ መሣሪያ ነው፡፡ ስለዚህ ጠላታችን የሆነውን መጥረቢያን ማጥፋት አለብን፡፡”

ብዙዎቹም በዚህ ሐሳብ ዙሪያ አስተያየት በመስጠት መጥረቢያ ነው የሁልጊዜ የስቃያችን ምንጭ ይቆርጠንና ቢያሻው ለማገዶ አሊያም ለቤት ዕቃ መሥሪያ፤ ኧረ ምኑ ቅጡ! ስለዚህ አንድ መላ ፈልገን ይህንን ጠላታችንን ማጥፋት አለብን፡፡ ብለው መከሩ፡፡

አንድ ባህር ዛፍም እጁን አውጥቶ “ጠላታችን ግን መጥረቢያ አይመስለኝም፡፡” አለ፡፡ በዚህን ጊዜ ሁሉም ዛፎች ወደርሱ ዞረው እንዴ! ምን ማለትህ ነው? እሱ ካልሆነ ታዲያ ማን ሊሆን ይችላል?” ብለው ጮኹበት፡፡

ባህር ዛፉም ንግግሩን እንዲህ ሲል ቀጠለ “አያችሁ እኔ ከልቤ ነው የምላችሁ ጠላታችን መጥረቢያ አይደለም እኛው ራሳችን ነን፡፡ ሁላችንም መጣመም ትተን ቀጥ ብለን ብናድግ ኖሮ መጥረቢያ አጀታ አይኖረውም፤ እኛም ከመቆረጥ እንድን ነበር፡፡

ስለዚህ ከዚህ በኋላ ሁላችንም ሳንጣመም ቀጥ ብለን በማደግ መጥረቢያውን እጀታ መሳሳት አለብን፡፡”

በዚህም ጊዜ ሁሉም ዛፎች አጨበጨቡለት፡፡

  • በችሎት አማረ የተተረከ የአማራ ተረት

*****

ፎቶ ካፕሽን

‹‹አንድ ትልቅ ዛፍ የቆረጠ አንድ ትልቅ ሰውን እንደገደለ ይቆጠራል››

  • የዋግና ኽምራ ብሔረሰብ አባባል

 

በሰቆጣ ከተማ የሚገኝ ዋርካ። የዋርካው የአንድ ጎን ቅርንጫፍ 22 ሜትር አካባቢ ይረዝማል። (ፎቶ በአብዱልፈታህ አብደላህ )