ክቡር ሚኒስትር

[ክቡር ሚኒስትር መሥሪያ ቤታቸው በቀሪ የበጀት ዓመቱ የያዛቸውን ዕቅዶች ለማስፈጸም የተለያዩ ጨረታዎች ሊያወጡ ነው፡፡ በዚህ ጉዳይ ላይ ለመወያየትም የፋይናንስ ክፍል ኃላፊውን አስጠርተዋል]

- ፈለጉኝ ክቡር ሚኒስትር?
- ስለቀሪ ዕቅዶቻችን እንወያይ ብዬ ነው፡፡
- ያው የበጀት ዓመቱን አጋምሰነዋል፡፡
- እኔም የምለው’ኮ እሱን ነው፡፡
- ታዲያ ምን ማድረግ አለብን?
- የግማሽ ዓመቱን አፈጻጸም እንገምግም፡፡
- ለግምገማውማ በፓርላማም ተገምግመናል፡፡
- እሱንማ አውቃለሁ፣ ፓርላማው እኮ አፈጻጸማችን ደካማ ነው ብሏል፡፡
- ልክ ነው ክቡር ሚኒስትር፡፡
- ስለዚህ ካለፈው ግማሽ ዓመት ምን ተማርን?
- ብዙ የተማርነው ነገር አለ፡፡
- እኮ ምን?
- በዕቅዳችን መሠረት የጠየቅነውን ገንዘብ አልተጠቀምንበትም፡፡
- ይህ ለምን ሆነ?
- መሥሪያ ቤታችን ማውጣት የነበረበትን ጨረታዎች አላወጣም፡፡
- ምክንያት?
- ያው መሥሪያ ቤታችን የሰው ኃይል እጥረት አለበት፡፡
- እሺ፡፡
- በዚህም ምክንያት ለዚህ ዓመት የያዝናቸውን ዕቅዶች ለማስፈጸም እንቅፋት ሆኖብናል፡፡
- ታዲያ እኛ ምን እያደረግን ነው?
- ይህ አንገብጋቢ የሰው ኃይል እጥረት በአፋጣኝ ለመመለስ እየሠራን ነው፡፡
- እሺ፡፡
- ይህ ችግራችን ከተፈታ በአፋጣኝ ጨረታዎቻችንን ማውጣት እንችላለን፡፡
- በቃ በፍጥነት እናድርገው፡፡
- መልካም፡፡
- በቃ ቻው፡፡
[የክቡር ሚኒስትሩ ጸሐፊ ገባች]
- እንግዶች ይፈልጉዎታል ክቡር ሚኒስትር፡፡
- የሉም በያቸው፡፡
- መጀመርያ ስብሰባ ላይ መሆንዎን ነግሬያቸው ነበር፡፡
- እና?
- አሁን የፋይናንስ ኃላፊው ሲወጣ አይተው ካልገባን እያሉ ነው፡፡
- ከየት ነን ነው የሚሉት?
- የውጭ ኩባንያ ተወካዮች ነን ነው የሚሉት፡፡
- አስገቢያቸው በቃ፡፡
[እንግዶቹ ገቡ]
- ጤና ይስጥልን ክቡር ሚኒስትር?
- ምን ልርዳችሁ?
- ያው አንዳንድ ነገሮች ላይ እንድንወያይ ነው፡፡
- የምን ነገር ላይ?
- መሥሪያ ቤታችሁ የግንባታ ጨረታዎች እንደሚያወጣ እናውቃለን፡፡
- ታዲያ እኔ ምን ልርዳችሁ?
- ጨረታውን ለእኛ እንድትሰጡን ፈልገን ነው፡፡
- ጨረታ እኮ የምናወጣው አወዳድረን ለማሠራት ነው፡፡
- እሱንማ እናውቃለን፣ ጨረታው ግን ለእኛ ቢሰጠን ሁላችንም እንጠቀማለን ለማለት ነው፡፡
- እንዴት እንጠቀማለን?
- እኛ በጣም ልማታዊ ኩባንያ ነን፡፡
- እሺ፡፡
- ለግድቡ የሚገባንን አዋጥተናል፡፡
- ጥሩ፡፡
- የመንግሥትንም የፖለቲካ አቅጣጫ እንደግፋለን፡፡
- የፖለቲካ ፓርቲ ናችሁ እንዴ?
- አይ እንደዚያ ማለታችን ሳይሆን መንግሥት በኢኮኖሚው ላይ የሚከተለውን መርህ እንደግፋለን ማለታችን ነው፡፡
- ጐሽ፡፡
- ከዚያም ባለፈ ጨረታውን ካሸነፍን እርስዎንም ለመጥቀም አስበናል፡፡
- እ…
- አዎ ክቡር ሚኒስትር፡፡
- እንዴት ነው የምትጠቅሙኝ?
- መንግሥት በሽልማት መልክ የሰጠዎት 500 ካሬ ሜትር ቦታ እንዳለዎት ሰምተናል፡፡
- ልክ ነው፡፡
- ባዶ ቦታ ብቻ ምንም ስለማይጠቅም እኛ ቤት ልንገነባልዎት አስበናል፡፡
- እ…
- አዎ ክቡር ሚኒስትር፣ የሕዝብ አገልጋይ ስለሆኑ ይህ ሲያንስብዎት ነው፡፡
- ይሻላል ብላችሁ ነው?
- እስከመቼ ታዲያ ባዶ ቦታ ይዘው ይቀመጣሉ?
- እሱስ ልክ ነው፡፡
- ስለዚህ ክቡር ሚኒስትር እኛንም ይጥቀሙን እርስዎም ይቀጠሙ፡፡
- ኧረ እንጠቃቀማለን፡፡
- ብቻ ባፋጣኝ ጨረታውን ይስጡን፡፡
- በቃ እናሳውቃችኋለን፡፡
- በሉ ቻው፡፡
- ቻው፡፡
[ክቡር ሚኒስትሩ የፋይናንስ ክፍል ኃላፊውን አስጠሩት]
- አቤት ክቡር ሚኒስትር?
- በአስቸኳይ ይውጣ፡፡
- ምኑ?
- የግንባታ ጨረታው፡፡
- እንዴት ክቡር ሚኒስትር፣ ቅድም ተነጋገርንበት አይደለም ወይ?
- ምኑን ነው የተነጋገርንበት?
- መጀመርያ የሰው ኃይል ችግራችንን መፍታት እንዳለብን፡፡
- ጨረታ የምናወጣው እኮ ሌሎች ድርጅቶች እንዲሠሩልን ነው፡፡
- ልክ ነው ክቡር ሚኒስትር፡፡
- ታዲያ የምን የሰው ኃይል ነው የምንፈልገው?
- ያው ያወጣነውን ጨረታ የሚያሸንፈውን ድርጅት ለመቆጣጠር ነዋ፡፡
- ለእሱማ አታስብ እኛ አለን፡፡
- እ…
- አዎ ልማታዊ ለሆነ ድርጅት ስለምንሰጠው ብዙ አታስብ፡፡
- ጨረታ እኮ የምናወጣው ለማወዳደር ነው፡፡
- ታዲያ የፈለገ ብናወዳድር ልማታዊ ላልሆነ ድርጅት ጨረታው ይሰጣል ብለህ ታስባለህ?
- አይ እንደሱ ማለቴ ሳይሆን ጥሩ ዋጋ ያቀረበ ያሸንፋል ማለቴ ነው፡፡
- ዋጋው ችግር የለውም፣ ዋናው ልማታዊ ድርጅት ማግኘታችን ነው፡፡
- ጨረታ ታዲያ ለምን ይወጣል?
- አሠራሩ ነዋ፡፡
- እ…
- በል በቃ አሁን ቶሎ የጨረታ ሰነዱን አዘጋጅ፡፡
- እርስዎ ካሉማ ምን ይደረጋል?
- በቃ ቶሎ ሂድ፡፡
- እሺ፡፡
[ክቡር ሚኒስትሩ ቤታቸው ገብተው ከባለቤታቸው ጋር እራት እየበሉ ነው]
- ዛሬ በጣም ደስ ብሎኛል፡፡
- ደግሞ ምን አገኘህ?
- የዚያ የባዶ ቦታ ጉዳይ ሁሌም ያሳስበኝ ነበር፡፡
- እና አሁን ምን ተገኘ?
- የሆኑ ሰዎች ቤት ሊሠሩልኝ አስበዋል፡፡
- ምን?
- አዎ፣ የሆነ ጨረታ አውጥተን ነበር፡፡
- እሺ፡፡
- ጨረታውን የምንሰጣቸው ድርጅት ቤት እንደሚሠራልኝ ቃል ገብቶልኛል፡፡
- በጣም ደስ ይላል፡፡
- እኔም ደስ ብሎኛል፡፡
[ክቡር ሚኒስትሩ በጠዋት ቢሯቸው ገብተዋል፡፡ ጸሐፊዋ እንግዶች ሊያናግሯቸው እንደሚፈልጉ ነግራቸው እንግዶቹ ገቡ]
- ጤና ይስጥልኝ ክቡር ሚኒስትር?
- ምን ልርዳችሁ?
- አንዳንድ ነገሮች ላይ መወያየት ፈልገን ነው፡፡
- የምን ነገር ላይ?
- መሥሪያ ቤታችሁ ስለሚያወጣው የቢሮ ዕቃዎች ጨረታ ጉዳይ፡፡
- ታዲያ እኔ ምን ልርዳችሁ?
- ያው ጨረታውን ለእኛ እንድትሰጡን ነዋ፡፡
- ጨረታ እኮ የምናወጣው እንድትወዳደሩ ነው፡፡
- እሱማ መቼ ጠፋን? ለሁላችንም የሚበጀውን መንገድ በማሰብ ነው፡፡
- ምንድነው ለሁላችንም የሚበጀው መንገድ?
- እንደሚታወቀው እኛ ለበርካታ የመንግሥት መሥሪያ ቤቶች የቢሮ ዕቃዎች እናቀርባለን፡፡
- እሺ፡፡
- በመንግሥት በሚቀርበው የልማት ጥሪ ላይም ሁሌም ተሳታፊ ነን፡፡
- ጐሽ፡፡
- ከዚህ ባለፈ እንደርስዎ ያሉ ባለሥልጣናትን በሚገባ እንጠቅማለን፡፡
- እኮ እንዴት ነው የምትጠቅሙት?
- አሁን ይህን ጨረታ ለእኛ ከሰጡን፣ እኛ ደግሞ ሙሉ የቤት ዕቃ እናቀርባለን፡፡
- እ…
- አዎ ክቡር ሚኒስትር፣ ከእርስዎ የሚጠበቀው ጨረታውን ለእኛ ብቻ መስጠት ነው፡፡
- ከእናንተ የሚጠበቀው ደግሞ ሙሉ የቤት ዕቃ ማለት ነው፡፡
- ልክ ነው ክቡር ሚኒስትር፡፡
[ክቡር ሚኒስትሩ የፋይናንስ ኃላፊውን አስጠሩት]
- አቤት ክቡር ሚኒስትር?
- የግንባታው ጨረታ ተዘጋጀ፡፡
- አዎን ክቡር ሚኒስትር፣ ለጋዜጦች ልከነዋል፡፡
- መልካም፡፡ አሁን የፈለግኩህ ለሌላ ጉዳይ ነው፡፡
- ለምን ጉዳይ?
- የቢሮ ዕቃዎች አያስፈልጉንም?
- በዚህ ዓመት መግዛት አያስፈልገንም፡፡
- ለምን?
- በቂ የቢሮ ዕቃዎች ስላሉን ነዋ፡፡
- ቢሆንም እኮ በስድስት ወሩ ውስጥ ያልተጠቀምንበት በጀት አለን፡፡
- መኖርማ አለን፡፡
- ስለዚህ ይህ በጀት ተመላሽ መሆን ስለሌለበት የቢሮ ዕቃ ጨረታ ይውጣ፡፡
- እ…
- ምን እ ትላለህ?
- ገዝተነው የት እናደርገዋለን ብዬ ነዋ?
- ግምጃ ቤትም ቢሆን ይቀመጣል፣ መቼም በጀት አንመልስም፡፡
- እኔ ግን ቢመለስ ይሻላል ባይ ነኝ፡፡ ካለሆነ ደግሞ ለሌላ ጠቃሚ ነገር ብንጠቀምበት፡፡
- ከተለመደው ውጪ በጀት መጠቀም ሊያስጠይቀን ይችላል፡፡
- ካልሆነ በቃ ይመለስ?
- ለምክር አይደለም ያስጠራሁህ፡፡
- ይቅርታ ክቡር ሚኒስትር፡፡
- በቃ አሁኑኑ ጨረታ ይውጣ፡፡
- እሺ፡፡
[ክቡር ሚኒስትሩ ቤት ሄደው ከባለቤታቸው ጋር እያወሩ ነው]
- ዛሬም ደስ ብሎኛል፡፡
- ሰሞኑን እንዴት ነው ደስታህ ተደጋገመ?
- እውነትሽን ነው ደስታ ተደጋገመ፡፡
- ዛሬ ደግሞ ምን ተገኘ?
- ለአዲሱ ቤታችን ሙሉ የቤት ዕቃ አገኘን፡፡
- ምን?
- አዎ አንኳን ደስ ያለሽ፡፡
- እንዴት?
- አንድ ጨረታ አውጥተን ያሸነፈው ድርጅት ሙሉ የቤት ዕቃ ቃል ገባልኝ፡፡
- በጣም ይገርማል፡፡
- ከመግረምም አልፎ ያስደንቃል እንጂ፡፡
- ወይ ጉድ፡፡
[ክቡር ሚኒስትሩ አዲሱ ቤት አልቆ ተሰጣቸው፡፡ ቤቱ በሙሉ የቤት ዕቃ ተሞልቷል፡፡ ክቡር ሚኒስትሩ ለቤቱ ምርቃት በርካታ ወዳጆቻቸውንና ዘመድ አዝማዶቻቸውን ጋብዘዋል፡፡ ግብዣው ላይ ከአንድ ወዳጃቸው ጋር እያወሩ ነው]
- የሚገርም ቤት ነው፡፡
- እኔ በዚህ በአጭር ጊዜ ያልቃል ብዬ አላሰብኩም ነበር፡፡
- ታዲያ እንዴት ሠሩት ክቡር ሚኒስትር?
- ለሰው ጥሩ መሆን ሁሌም ጥሩ ነው፡፡
- እንዴት?
- ውለታህን መቼ እንደሚከፍልክ አታውቅማ፡፡
- ኧረ እንዴት? ያስረዱኝ ክቡር ሚኒስትር፡፡
- ያው መሥሪያ ቤታችን የ50 ሚሊዮን ብር የግንባታ ጨረታ አውጥቶ ነበር፡፡
- እሺ፡፡
- እናም ለአንዱ ድርጅት ሰጠነው፡፡
- እሺ፡፡
- ከዚያም ከመንግሥት በተቀበልኳት በዚህች 500 ካሬ ሜትር ላይ ይህን የሚያህል ቤት ሠራልኝ፡፡
- እ…
- ምን እሱ ብቻ?
- ደግሞ ሌላ ምን አለ?
- መሥሪያ ቤታችን የ10 ሚሊዮን ብር የቢሮ ዕቃዎች ጨረታ አውጥቶ ነበር፡፡
- እሺ፡፡
- ጨረታውን የሰጠነው ድርጅት ይኸው ይህን ቤት በሙሉ የቤት ዕቃ ሞላው፡፡
- እ…
- ስነግርህ፣ ጥሩ ነገር መሥራት መቼ እንደሚያስፈልግ አታውቅምና ሁሌም ጥሩ ሁን፡፡
- እ…
- ጥሩ ሁን፡፡
- ጥሩ ሲሠሩ እስር ቤት እንዳይጠሩ፡፡

Leave a comment

Filtered HTML

  • Web page addresses and e-mail addresses turn into links automatically.
  • Allowed HTML tags: <a> <em> <strong> <cite> <blockquote> <code> <ul> <ol> <li> <dl> <dt> <dd>
  • Lines and paragraphs break automatically.
  • Each email address will be obfuscated in a human readable fashion or, if JavaScript is enabled, replaced with a spam resistent clickable link. Email addresses will get the default web form unless specified. If replacement text (a persons name) is required a webform is also required. Separate each part with the "|" pipe symbol. Replace spaces in names with "_".

Plain text

  • No HTML tags allowed.
  • Web page addresses and e-mail addresses turn into links automatically.
  • Lines and paragraphs break automatically.