ክቡር ሚኒስትር

[ክቡር ሚኒስትሩ የሚያስገቡት ዕቃ ኬላ ላይ ተይዞባቸዋል፡፡ ሚስታቸው ደወሉላቸው]

  • ሰላም ዋልሽ?
  • ምን ሰላም አለ?
  • ምን ሆንሽ ደግሞ?
  • ምን የማልሆነው ነገር አለ?
  • ጠዋት ሰላም አልነበርሽ እንዴ?
  • የዚህ አገር ሰላም እኮ እንደ ስቶክ ኤክስቼንጅ ይወጣል ይወርዳል፡፡
  • ሴትዮ አትሳሳቺ፡፡
  • እንዴት ባክህ?
  • በአሁኑ ወቅት እንደ ኢትዮጵያ ሰላም የሰፈነባት አገር የትም የለም፡፡
  • አትቀልድ ባክህ፡፡
  • እውነቴን ነው፡፡
  • አሁን የምነግርህ ዜና ሰላምህን ይነሳህ የለ እንዴ?
  • ምንድን ነው እሱ?
  • ዕቃው ተወረሰ?
  • ልጆቼ እያሉ ማን ነው የሚወርሰኝ?
  • መንግሥት ነዋ፡፡
  • መንግሥት እኮ እኔ ነኝ፡፡
  • ለማንኛውም አሁን ስልክ ተደውሎልኝ ነበር፡፡
  • ማን ነው የደወለልሽ?
  • ዕቃው ተወረሰ ብለው ነው የደወሉልኝ፡፡
  • የትኛው ዕቃ?
  • ሳሙናና ዲተርጀንት የጫኑት መኪኖች ተይዘዋል፡፡
  • ብረት የጫኑትስ?
  • እነሱ አልተያዙም፡፡
  • ሞባይል የጫኑትስ?
  • እነሱም እስካሁን አልተያዙም፡፡
  • እፎይ፡፡
  • እፎይ ትላለህ እንዴ?
  • እነዚህስ ተይዘው ቢሆን ኖሮ ምን ይውጠኝ ነበር ብዬ ነዋ፡፡
  • ቂሊንጦ ነበራ የሚውጥህ፡፡

[ክቡር ሚኒስትሩ የኬላው ኃላፊ ጋ ደወሉ]

  • ማን ልበል?
  • ጭራሽ ማን ልበል ትለኛለህ?
  • የደወልከው እኮ አንተ ነህ፤ ማን ልበል?
  • ተናንቀናል ማለት ነው፡፡
  • ምን አልከኝ?
  • ክቡር ሚኒስትር ነኝ፡፡
  • ውይ ውይ በሞትኩት፤ ወሳኝ ሰዓት ላይ ነው የደወሉት ክቡር ሚኒስትር፡፡
  • የምን ወሳኝ ሰዓት?
  • ይኸው ሁለት አይሱዙ ዕቃ እንደያዝኩ ነው የደወሉት፡፡
  • የምን ዕቃ ነው?
  • የሌቦች ዕቃ ነዋ፡፡
  • እንዴት?
  • ይኸው ታክስ ሳይከፍሉ ሊያሳልፉ ሲሉ እኮ ነው የያዝኳቸው፡፡
  • ምንድነው የጫኑት ዕቃ?
  • ዲተርጀንትና ሳሙና ነው፡፡
  • እ…
  • ለማንኛውም ክቡር ሚኒስትር ይቅርታ ቅድም ሌላ ሰው መስሎኝ ነው፤ ይኸው ከመቀመጫዬ ተነስቼ ሰላምታ ሰጥቻለሁ፡፡
  • ገና ከወንበርህ ለዘለዓለም አነሳሃለሁ፡፡
  • ምን አሉኝ?
  • ሰምተሃል፡፡
  • እኮ ምን አደረግኩ?
  • ያደረግከውንማ ታውቃለህ፡፡
  • ዲተርጀንትና ሳሙና ስለወረስኩ?
  • ለመሆኑ ገላህን ታጥበህ አታውቅም አይደል?
  • እንዴት ክቡር ሚኒስትር?
  • ይኼን ሁላ ሳሙና እወርሳለሁ ስትል አታፍርም?
  • ታክስ እኮ ስላልተከፈለ ነው፡፡
  • እኔ ለሁሉም ነገር ታክስ ከፍዬ እችለዋለሁ?
  • የእርስዎ ነው እንዴ ክቡር ሚኒስትር?
  • እና የአንተ ነው?
  • ላውንደሪ ቤት ከፈቱ እንዴ?
  • እሱን ደግሞ ማን ነገረህ?
  • አሁን ምን ይሻላል?
  • የዘራሃውን ታጭደዋለህ፡፡
  • እንዴት ማለት ክቡር ሚኒስትር?
  • ዕቃዬን እንዳሰርክ …
  • እ…
  • አንተም ትታሰራለህ፡፡

[የክቡር ሚኒስትሩ አማካሪ ቢሯቸው ገባ]

  • ምነው ክቡር ሚኒስትር የተቆጡ ይመስላሉ?
  • ምን ሰይጣን ብቻ የተሰበሰበበት አገር?
  • ምን ተፈጠረ?
  • ዕቃዬን ይዘውብኝ ነዋ፡፡
  • ማን ነው የያዘብዎት?
  • ኬላ ላይ ነዋ፡፡
  • የምን ዕቃ ነው?
  • ዲተርጀንትና ሳሙና፡፡
  • የማን ዕቃ ነው?
  • የእኔ ነዋ፡፡
  • ክቡር ሚኒስትር የድግስ ዕቃ ያከራዩ ጀመር እንዴ?
  • ምን ማለት ነው?
  • ኬላ ላይ ከተያዘብዎት በመኪና የሚገባ ነው ብዬ ነዋ፡፡ ያ ሁሉ ሳሙና ምን ያደርግልዎታል?
  • መቼም ልታጠብበት ነው አልልህም?
  • ለነገሩ እርስዎ ቢታጠቡም አይፀዱም፡፡
  • ከምን?
  • ከሙስና!

[አንድ ባለሀብት ለክቡር ሚኒስትሩ ደወለላቸው]

  • ሰላም ወዳጄ፡፡
  • እንዴት ነዎት ክቡር ሚኒስትር?
  • አለሁ አንተ እንዴት ነህ?
  • ኧረ ክቡር ሚኒስትር እጅግ እኮ እየተማረርኩ ነው፡፡
  • ምን አማረረህ?
  • ምን የማያማርር ነገር አለ ብለው ነው?
  • አንተ እኮ ደረጃ አንድ ግብር ከፋይ ነህ፡፡
  • ለዛውም ዋንጫ ተሸላሚ እንጂ፡፡
  • በዚህኛውም ዓመት ደግመህ ዋንጫውን ከወሰድከው እኮ ሐትሪክ ነው የምትሠራው፡፡
  • ምን ዋጋ አለው ክቡር ሚኒስትር?
  • ዋንጫውን ታስቀረዋለሃ፡፡
  • አይመስለኝም ክቡር ሚኒስትር፡፡
  • ምን ሆነሃል?
  • እኔ በቃ የመልካም አስተዳደር ችግሩን አልቻልኩትም፡፡
  • እንዴት ማለት?
  • ሠራተኞቼ አቅተውኛል፡፡
  • ምን አደረጉህ?
  • ግብር አይከፍልም ብለው ይጠቁማሉ፡፡
  • ለምን?
  • ምቀኝነት ይዟቸው ነዋ፡፡
  • እሺ፡፡
  • በዛ በኩል የእናንተ ሰዎች ኪራይ ሰብሳቢ ነህ ይሉኛል፡፡
  • ምቀኞች በላቸው፡፡
  • በጐን ሠራተኞቼ ፍርድ ቤት ሲያመላልሱኝ ነው የሚውሉት፡፡
  • ምን ሆንኩ ብለው?
  • እየተበደልን ነው ብለው ነዋ፡፡
  • ወይ ጣጣ፡፡
  • እና ክቡር ሚኒስትር እኔ በጣም ተማርሬያለሁ፡፡
  • ቆይ ተረጋጋ፡፡
  • ፍትሕ አጥቻለሁ ነው የምልዎት፡፡
  • መላ አለው ስልህ፡፡
  • እኔ ፍርድ ቤትም መመላለስ ሰልችቶኛል፡፡
  • እኔ አሪፍ መፍትሔ አለኝ፡፡
  • ምን ክቡር ሚኒስትር?
  • በራስ ለምን አታቋቁምም?
  • ምኑን ክቡር ሚኒስትር?
  • እስር ቤቱንና ፍርድ ቤቱን!

[የክቡር ሚኒስትሩ ጸሐፊ ቢሯቸው ገባች]

  • ሰው ይፈልግዎታል፡፡
  • የምን ሰው?
  • አስቸኳይ ጉዳይ ገጥሞኝ ነው ይላል፡፡
  • ተራ ሰው አደረግሽኝ እንዴ መንገደኛው ሁሉ የሚያገኘኝ?
  • አይ ክቡር ሚኒስትር አጣዳፊ ጉዳይ ገጥሞዎት ነው፡፡
  • ሴትዮ ሥራ ላይ ነው ብለሽ አባሪልኝ፡፡

[የክቡር ሚኒስትሩ ጸሐፊ ባለጉዳዩ መግባት እንደማይችል ብትነግረውም አልፏት ገባ]

  • ሰላም ክቡር ሚኒስትር፡፡
  • ምን ፈልገህ ነው?
  • መግባት አትችልም ብላኝ ነበር፣ ግን ጉዳዬ አጣዳፊ ስለሆነብኝ ነው፡፡
  • በጥበቃ እንዳስወጣህ ፈልገህ ነው ታዲያ?
  • አይደለም ክቡር ሚኒስትር አንዴ ያድምጡኝ፡፡
  • ምንም አላዳምጥም፡፡
  • ችግር እየፈጠረ ያለው እኮ አለማዳመጥዎት ነው፡፡
  • እሺ ምንድን ነው ችግርህ?
  • እኔ ሳሙና አስመጪ ነኝ፡፡
  • አንተ ነሃ ተፎካካሪዬ፡፡
  • አንዳንድ ነጋዴዎች ታክስ ሳይከፍሉ እያስገቡ ከገበያ እያስወጡን ነው፡፡
  • እና ምን ላድርግልህ እኔ?
  • መንግሥት ጣልቃ ይግባልንና ይቆጣጠራ፡፡
  • ሰውዬ ታመሃል፡፡
  • እንዴት ክቡር ሚኒስትር?
  • ይኼ እኮ ነፃ ገበያ ነው፡፡
  • እሱንማ አውቃለሁ፡፡
  • ስለዚህ መንግሥት ጣልቃ አይገባም፡፡
  • ለነገሩ እርስዎ በደንብ ጠልቀው መግባትዎን ሰምቻለሁ፡፡
  • ምን ውስጥ?
  • ኮንትሮባንዱ ውስጥ!

[የክቡር ሚኒስትሩ የእህት ልጅ ደወለላቸው]

  • ሄሎ ጋሼ፡፡
  • እንዴት ነህ ታዳጊው ባለሀብት?
  • ኧረ ጋሼ አላሠራ አሉኝ እኮ?
  • እነማን?
  • የእናንተው ሰዎች ናቸዋ፡፡
  • ምን አደረጉህ?
  • ይኸው ሱቄን አሸጉት፡፡
  • ለምን ተብሎ?
  • ሕገወጥ ነህ ብለው ነዋ፡፡
  • የሱቪኒር ዕቃ መሸጥ ማን ነው ሕገወጥ ያደረገው?
  • አይ ያው በጐን ዶላር እሸጥ አይደል?
  • ዶላር እጥረት ስላለ አይደል እንዴ የምትሸጠው? ማን ነው እሱንስ ቢሆን ሕገወጥ ያደረገው?
  • እሱማ ጋሼ ለባንክ ብቻ የተፈቀደ ሥራ ነው፡፡
  • አንተ ካደግህ እኮ ባንክ መሆን የምትችል ልጅ ነህ፡፡
  • ብቻ ጋሼ እኔን ያሳሰበኝ የልጆቼ ጉዳይ ነው፡፡
  • እነሱማ ምን ይሆናሉ?
  • እንዴት አይሆኑ?
  • በስማቸው ያስቀመጥክላቸው ገንዘብ እኮ እነሱንም ባንክ መሆን ያስችላቸዋል፡፡
  • እ…
  • እንደውም ባንኮች መዋሀድ አለባቸው እየተባለ ስለሆነ አንድ ላይ ተዋህዳችሁ ትልቅ ባንክ መመሥረት ነው፡፡
  • እዚህ አገር ግን ሠርቶ ማደግ ቀረ ማለት ነው?
  • እሱ ቀርቶ እኮ ሌላ ስትራቴጂ መጥቷል፡፡
  • ምን የሚሉት?
  • ሰብስቦ መጥፋት!