ክቡር ሚኒስትር

[ለክቡር ሚኒስትሩ ሚስታቸው ስልክ ደወሉላቸው]

  • በአስቸኳይ እንድትደርስ፡፡
  • የት ነው የምደርሰው?
  • ሆስፒታል ነው ያለሁት?
  • ምነው ምን ሆንሽ?
  • ልጅህ ተፈንክቶልሃል፡፡
  • የትኛው ልጅ?
  • የመጀመርያ ልጅህ ነዋ፡፡
  • ምን ሆኖ?
  • ከሰዎች ጋር ተጣልቶ፡፡
  • የእኔ ልጅ እኮ ሰላማዊ ነው፡፡
  • ወይ ሰላማዊ?
  • ምን እያልሽ ነው?
  • ሰክሮ እኮ ነው የተጣለው፡፡
  • እያሾፍሽ ነው?
  • ቢሆን ይሻለኝ ነበር፤ ብቻ ተዋርደናል፡፡
  • የእኔ ልጅማ ሊሰክር አይችልም፡፡
  • ይኼን እኮ ነው የምልህ፤ ልጆቹን አታውቃቸውም፡፡
  • ልጆቼንማ በደንብ ነው የማውቃቸው፡፡
  • ከእነሱ ጋር መቼ ነው ጊዜ አጥፍተህ የምታውቀው?
  • እኔ እኮ አገር የማስተዳድር ሰው ነኝ፡፡
  • ቤተሰብህን ሳታስተዳደር አገር እንዴት ልታስተዳድር ትችላለህ?
  • አገሪቷማ ይኸው እየተመነደገች ነው፡፡
  • አትሳሳት፣ ውስጡን በደንብ አጢነህ መመልከት አለብህ፡፡
  • ለማንኛውም አሁን መጣሁ፡፡

[ክቡር ሚኒስትሩ ልጃቸው የተኛበት ሆስፒታል ገቡ]

  • አጅሬ፡፡
  • አቤት ዳዲ፡፡
  • ምን ሆነህ ነው?
  • ዳዲ በጣም ነው የተናደድኩት፡፡
  • ለምንድን ነው የተናደድከው?
  • ይኼ እናንተ ምንድን ነበር የምትሏቸው?
  • ምኖቹን?
  • ኪራይ ቤቶች ነው የምትሏቸው?
  • እ… ኪራይ ሰብሳቢዎች?
  • አዎ ኪራይ ሰብሳቢዎች፡፡
  • ምን ሆኑ?
  • ከእነሱ ጋር እኮ ነው የተጣላሁት፡፡
  • እንዴት?
  • በቃ ኢትዮጵያ እያደገች ነው ስላቸው ሊሰሙኝ አልቻሉም፡፡
  • እነሱ መቼ የሚሰማ ጆሮ አላቸው?
  • ከእነሱ የባሰው ደግሞ የእነዛ የደላሎች ነገር ነው፡፡
  • እንዴት?
  • ለኪራይ ሰብሳቢዎቹ ተደርበው ነዋ የደበደቡኝ፡፡
  • ዛሬ አኮራሃኝ ልጄ፡፡
  • እንዴት ዳዲ?
  • ለአገሪቷ ዕድገት ስትል ከኪራይ ሰብሳቢዎችና ከደላሎች ጋር ቡጢ በመግጠምህ ተደሰትኩ፡፡
  • የአባቱ ልጅ ነኛ፡፡

[ክቡር ሚኒስትሩ ከሚስታቸው ማውራት ጀመሩ]

  • አየሽ አይደል የልጃችንን ጀግንነት?
  • የምን ጀግንነት?
  • ልጃችን ምን ሆኖ ነው የተፈነከተው?
  • ሰክሮ ነዋ፡፡
  • አትሳሳቺ ሰክሮ አይደለም፡፡
  • እና ምን ሆኖ ነው?
  • ከኪራይ ሰብሳቢዎችና ከደላሎች ጋር ፊት ለፊት በመጋፈጡ ነው፡፡
  • ኧረ ኡኡኡ…
  • ምን ሆነሻል?
  • ልጅህ እኮ ከቁጥጥር ውጪ ሆኗል፡፡
  • እንዴት ሆኖ?
  • ይኸው ሰካራም ሆኖ በጣም አሳፍሮኛል፡፡
  • እኔ በእጅጉ ነው የኮራሁበት፡፡
  • በምኑ ነው የኮራኸው?
  • እያፈራነው ያለው ትውልድ የእኛን አርዓያ እየተከተለ ያለ ትውልድ ነው፡፡
  • ምን አልከኝ?
  • ይህ የተባረከ ትውልድ ነው፡፡
  • የተረገመ ትውልድ ነው ያልከኝ?
  • የለም፤ ልማታዊ ትውልድ!

[የክቡር ሚኒስትሩ ሁለተኛ ልጅ ትምህርት ቤት ወላጅ አምጪ ስለተባለች፣ ክቡር ሚኒስትሩ ዳይሬክተሩን ለማናገር ሄዱ]

  • ይቅርታ ክቡር ሚኒስትር፡፡
  • ለምኑ ነው ይቅርታው?
  • ያው ቢዚ እንደሆኑ አውቃለሁ፡፡
  • የልጄ ጉዳይ አይደል እንዴ? ምን ችግር አለው?
  • እኔም ጉዳዩ አንገብጋቢ ስለሆነብኝ ነው ያስጠራሁዎት፡፡
  • ምን ነበር ታዲያ?
  • ልጅዎት ከቁጥጥር ውጪ ሆናለች፡፡
  • እንዴት ሆኖ?
  • ትምህርት ቤቱን እየበጠበጠች ነው፡፡
  • ከፀረ ሰላም ኃይሎች ጋር ገጥማለች እያልከኝ ነው?
  • የምነግራትን ነገር አትሰማም፡፡
  • ማን አለብኝነት ሰፍኖባታል ነው የምትለኝ?
  • አዋዋሏም ጥሩ አይደለም፡፡
  • ምነው ከኪራይ ሰብሳቢዎች ጋር ገጠመች እንዴ?
  • ክቡር ሚኒስትር ሺሻ ቤት ነው የምትውለው፡፡
  • ዋናው ጥያቄ ሺሻ ቤት ምን ልታደርግ ሄደች የሚለው ነው?
  • ያው ልታጨስ ነዋ፡፡
  • መጀመርያ ራሷን መጠየቅ አለብን፡፡

[የክቡር ሚኒስትሩ ልጅ ተጠርታ መጣች]

  • ምንድን ነው የምሰማው?
  • ምን ሰማህ ዳዲ?
  • ከፀረ ልማት ኃይሎች ጋር ገጥመሻል አሉ?
  • ምን?
  • ማን አለብኝነት ሰፍኖብሻል ተብሏል፡፡
  • ኦ ማይ ጋድ!
  • ከኪራይ ሰብሳቢዎች ጋር ሳትገጥሚ አልቀረሽም?
  • ዳዲ እኔ እኮ የአንተ የፖለቲካ ጃርገኖች አይገቡኝም፡፡
  • ሺሻ ቤት ነው የምትውይው አሉ፡፡
  • ዳዲዬ ለሚሽን እኮ ነው የምሄደው፡፡
  • እኔም ብያለሁ፡፡
  • በየሺሻ ቤቱ ያሉት ወጣቶች እኮ ጨለምተኞች ናቸው፡፡
  • እንዴት?
  • በቃ በአገሪቱ ዕድገት ተስፋ ስለቆረጡ ነው በየሺሻ ቤቱ የሚውሉት፡፡
  • ልክ ነሽ ልጄ፡፡
  • በቃ እኔ ደግሞ አገሪቷ ውስጥ ያለውን ዕድገት ዓይናችሁን ከፍታችሁ ተመልክቱ እያልኳቸው ነው፡፡
  • ዛሬ በቃ አንጀቴ ቅቤ ጠጣ፡፡
  • የአንተ ልጅ ነኝ እኮ ዳዲ፡፡
  • እሱን ዛሬ አረጋገጥኩ፡፡

 [ክቡር ሚኒስትሩ ወደ ዳይሬክተሩ ዞሩና]

  • አየህልኝ አይደል?
  • ምኑን ክቡር ሚኒስትር?
  • ልጄ ምን ያህል ልማታዊ እንደሆነች?
  • እ…
  • ከዚህ በላይ ምን እፈልጋለሁ?
  • በሚገባ መቆጣጠር፡፡
  • ማንን?
  • ልማታዊ ሺሻ አጫሿን!

[የክቡር ሚኒስትሩ አማካሪ ቢሯቸው ገባ]

  • ዛሬ ምን ያህል እንደተደሰትኩኝ አትጠይቀኝ?
  • ምን ተገኘ ክቡር ሚኒስትር?
  • ልጆቼ አኮሩኝ፡፡
  • ትምህርት ቤት አንደኛ ወጡ?
  • ትልቁ ልጄ ተፈንክቶ ሆስፒታል ነው፡፡
  • ውይ ውይ ተርፏል? ምን ሆኖ ነው?
  • ከሰዎች ጋር ተጣልቶ ነዋ፡፡
  • ታዲያ መፈንከቱ ነው ያኮራዎት?
  • ከኪራይ ሰብሳቢዎችና ከደላሎች ጋር ተጣልቶ እኮ ነው የተፈነከተው፡፡
  • የት ነው የተጣላው?
  • መጠጥ ቤት፡፡
  • በዚህ ዕድሜው ይጠጣል?
  • የተጣላው እኮ ስለአገሪቱ ዕድገት በአደባባይ በመናገሩ ነው፡፡
  • ወይ ግሩም፡፡
  • ምን እሱ ብቻ?
  • ሌላ ምን አለ?
  • ታናሽ እህቱም አኩርታኛለች፡፡
  • በምን አኮራችዎት?
  • ዛሬ ወላጅ አምጪ ተብላ ነበር፡፡
  • ለምን?
  • ሺሻ ቤት ገብታ ለጨለምተኞች ስለአገሪቷ ዕድገት በመስበኳ፡፡
  • በዚህ ዕድሜዋ ሺሻ ታጨሳለች?
  • ያጨሰችው ለአገሪቷ ዕድገት መስዋዕትነት ለመክፈል ነው፡፡
  • ለማንኛውም ዛሬ የፈለኩዎት ለአንድ ጉዳይ ነበር፡፡
  • ለምን ጉዳይ ፈለከኝ?
  • ፓርላማ የቀረበውን ሪፖርት አልሰሙም?
  • የምን ሪፖርት?
  • ፀረ ሙስና ባለሥልጣናትን እየከሰሰ አይደለም ተብሎ ተተችቷል፡፡
  • እና ሥራው መክሰስ ነው?
  • ምክር እያበዛ ነው ተብሏል፡፡
  • እኔ እንደውም ምክር አንሷል ባይ ነኝ፡፡
  • እንዴት ክቡር ሚኒስትር?
  • መመካከር አለብን፡፡
  • የመልካም አስተዳደርና የሙስና ችግር እኮ እየጨመረ ነው፡፡
  • አየህ ይህ ሁሉ ችግር የመጣው ካለመመካከር ነው፡፡
  • እንዴት ክቡር ሚኒስትር?
  • ብንመካከር ኖሮ…
  • ከዚህ በላይ ይዘረፍ ነበር?
  • ምን አልከኝ?
  • ብቻ ቢያስቡበት ብዬ ነው፡፡
  • ለመሆኑ እኔ የምከሰስ ይመስልሃል?
  • ኧረ በፍጹም፡፡
  • ስለዚህ ምክሩን አጠናክረን መቀጠል አለብን፡፡
  • እና ምን ይደረግ?
  • መዋቅራችን ላይ አንድ ክንፍ መጨመር አለብን፡፡
  • ምን የሚሉት?
  • መካሪ ክንፍ!

[ክቡር ሚኒስትሩ ከአንድ ቴሌቪዥን ጣቢያ ስልክ ተደወለላቸው]

  • ክቡር ሚኒስትር በእናንተ ዕርዳታ ነው እዚህ የደረስነው፡፡
  • ሁሌም ከጎናችሁ ነን አታስብ፡፡
  • እንግዲህ 50 ዓመት ሞልቶናል፡፡
  • ገና እንደ እኛ ትደፍኑታላችሁ፡፡
  • ምኑ?
  • መቶውን ነዋ፡፡
  • አሜን ክቡር ሚኒስትር ያድርግልና፡፡
  • በእኛ እኮ ነው የወጣችሁት፡፡
  • ያው ዛሬ አደዋወሌ መቼም ገብቶዎታል?
  • ምን ፈልገህ ነው?
  • ስፖንሰር እንዲሆኑን ነው፡፡
  • ምን ችግር አለ?
  • ታንኪው ክቡር ሚኒስትር፡፡
  • እናንተ ያለእኛ፣ እኛስ ያለእናተ ማን አለን?
  • ልክ ብለዋል ክቡር ሚኒስትር፡፡
  • ታዲያ ምንድን ነው ስፖንሰር የሚያደርጉን?
  • የፕላቲኒየሙን ነዋ፡፡
  • ክቡር ሚኒስትር በጣም ነው የማመሰግነው፡፡
  • ምን ነካህ? ድጋፋችንን እኮ በተግባር መግለጽ አለብን፡፡
  • በጣም ልክ ነዎት፡፡
  • እናንተ እኮ የዕድታችን ማብሰሪያ ናችሁ፡፡
  • ልክ ብለዋል ክቡር ሚኒስትር፡፡
  • ስለዚህ ሁሌም ከጎናችሁ ነን፡፡
  • በድጋሚ ታንኪው ክቡር ሚኒስትር፡፡
  • ምንም አይደል፡፡
  • ለመሆኑ የትኛውን ፕሮግራም ነው የሚከታተሉት?
  • ማን እኔ?
  • አዎን፤ ፕሮግራማችንን አይከታተሉም እንዴ?
  • ሥራም አላጣሁ!