ክቡር ሚኒስትር

[ክቡር ሚኒስትሩ ጽንፈኛ የማንቸስተር ዩናይትድ ደጋፊ ናቸው፡፡ ቢሯቸው ተናደው ገብተው አማካሪያቸው አገኛቸው]

  • ምነው ክቡር ሚኒስትር?
  • ምን ሆንክ?
  • የተናደዱ ይመስላሉ፡፡
  • ተሸንፈን ነዋ፡፡
  • ምርጫ ነበር እንዴ?
  • የምን ምርጫ ነው የምታወራው?
  • ያው ሰሞኑን አገሪቷ ውስጥ ብጥብጥ ስለነበር ምርጫ ሳልሰማ ተካሂዶ ከሆነ ብዬ ነው፡፡
  • ቡድናችን ነው የተሸነፈው እባክህ፡፡
  • ኢሕአዴግ?
  • ኧረ እግር ኳስ ነው የምልህ?
  • ብሔራዊ ቡድናችን ጨዋታ ነበረው እንዴ?
  • የለም የለም፣ ማንቸስተር ዩናይትድ፡፡
  • የማንቸስተር ደጋፊ ነዎት እንዴ?
  • ያውም ቀንደኛው ነኛ፡፡
  • የአፍሪካ ቀንድ ላይ ስላሉ ነው ቀንደኛ የሆኑት?
  • ምን ይላል ይኼ? ስለኳስ ምንም አታውቅም እንዴ?
  • ብዙም አይደለሁም፡፡
  • ለማንኛውም ችግሩን ደርሼበታለሁ፡፡
  • የምኑን ችግር?
  • የማንቸስተር ዩናይትድን ችግር ነዋ፡፡
  • ምንድን ነው ችግሩ?
  • ከፍተኛ የኪራይ ሰብሳቢነትና የመልካም አስተዳደር ችግር አለ፡፡
  • እንዴት ማለት?
  • አሠልጣኙ ኪራይ ሰብሳቢ ናቸው፡፡
  • እንዴት?
  • ተጨዋች በውድ ዋጋ ይገዛሉ እንጂ ውጤት ሊያመጡ አልቻሉም፡፡
  • ተጨዋች እንዴት ነው የሚገዙት?
  • በደላላ ነዋ፡፡
  • የደላላነት ችግርም አለ እያሉኝ ነው?
  • ዋነኛው ችግር እንዲያውም እሱ ነው፡፡
  • የሚገርም ነው፡፡
  • ከዚያም በላይ ግን የመልካም አስተዳደር ከፍተኛ ችግር አለ፡፡
  • ምን ዓይነት ችግር?
  • አንዳንድ አላስፈላጊ ወጪዎችን ያወጣሉ፡፡
  • ለምሳሌ ምን?
  • የተጨዋቾች የልምምድ ሜዳ ላይ የሴኪዩሪቲ ካሜራ አስገጥመዋል፡፡
  • ሀብት ያለአግባብ ያባክናሉ እያሉኝ ነው?
  • ምናልባትም በካሜራው ግዢ ኮሚሽን ያገኛሉ፡፡
  • ሌላስ ምን ችግር አለባቸው?
  • በክለቡ ውስጥ ከፍተኛ የሆነ የዋጋ ግሽበት አለ፡፡
  • የምን የዋጋ ግሽበት?
  • ባለፈው 20 ፓውንድ የገዛሁት ማሊያ አሁን 100 ፓውንድ ገብቷል፡፡
  • እውነትዎትን ነው?
  • እሱ ብቻ መሰለህ?
  • እሺ ሌላ ምን አለ?
  • የትኬት ዋጋ ራሱ በከፍተኛ መጠን ጨምሯል፡፡
  • ስታዲየማቸውም ይገባሉ እንዴ?
  • እዚያ ስሄድ ጨዋታ ሳላይ አልመጣም፡፡
  • ለስብሰባ መስሎኝ የሚሄዱት?
  • ያው ከስብሰባው ጐን መዝናናት መቼ ይቀራል?
  • ለማንኛውም አደገኛ ደጋፊ እንደሆኑ ገብቶኛል፡፡
  • ጽንፈኛ ደጋፊ ነኝ፡፡
  • አለብዎት እንዴ?
  • ምን?
  • አክራሪነት!

[የክቡር ሚኒስትሩ ወዳጅ ባለሀብት ደወለላቸው]

  • እንዴት ነዎት ክቡር ሚኒስትር?
  • እንዴት ነህ ወዳጄ?
  • እንኳን አደረሰዎት፡፡
  • ለምኑ?
  • ለክሪስመስ፡፡
  • እኔ መቼ የእነሱን በዓል አከብራለሁ ብለህ ነው?
  • ምን አለበት ክቡር ሚኒስትር?
  • የኒዮሊብራሎች ምንም ነገር አይመቸኝም፡፡
  • ታዲያ ልጅዎትን ለምን ላኳት?
  • የት?
  • እነሱ ጋ ነዋ፡፡
  • እ…
  • ነገሩ ለትምህርት እንደላኳት አውቃለሁ፡፡
  • ምን ላድርግ ብለህ ነው?
  • ለማንኛውም ዛሬ የደወልኩት በእሷ ምክንያት ነው፡፡
  • እንዴት?
  • የትምህርት ቤት ክፍያዋ እኮ ደርሷል፡፡
  • ማን ብዬ ልጥራው ስምህን?
  • አስታዋሼ ነዋ፡፡
  • ይኼ ነው እኮ ቁም ነገሩ፡፡
  • እንዴት?
  • አንተ የእኔን ጉዳይ ስታስታውስ፣ እኔ ደግሞ የአንተን ጉዳይ አስታውሳለሁ፡፡
  • ክቡር ሚኒስትር፣ እንደ እርስዎ ዓይነት ባለሥልጣን ነው እኮ የጠፋው?
  • ይታደሉታል እንጂ አይታገሉትም ይላሉ፡፡
  • ልክ ነዎት ክቡር ሚኒስትር፡፡
  • ታዲያ እኔ ምን ልርዳህ?
  • ያው በአዲሱ ዓመት አዳዲስ ፕሮጀክቶች ይዤ እመጣለሁ፡፡
  • ምን ችግር አለው ታዲያ?
  • ስለዚህ ለፕሮጀክቶቹ የሚያስፈልጉኝ ነገሮች እንዲጨርሱልኝ እፈልጋለሁ፡፡
  • ምንድነው የምትፈልገው?
  • በዋናነት መሬት ነው፡፡
  • ከአንተ የሚፈለገው ይኼን ያህል መሬት ብቻ ማለት ነው፡፡
  • እኔ እኮ አንዳንዴ ሳስበው ይገርመኛል፡፡
  • ምኑ ነው የሚገርምህ?
  • እርስዎ ባይኖሩ የመልካም አስተዳደር ችግር እንዴት ሊቀረፍ ይችላል ብዬ ሳስብ ይገርመኛል፡፡
  • እዚህ ያለሁት እኮ እሱን ለመፍታት ነው፡፡
  • ስለዚህ የመሬቱ ጉዳይ ችግር የለውም እያሉኝ ነው?
  • የምትፈልገው ኪስ ቦታ ነው?
  • ምን አሉኝ?
  • ወይስ ግንባር ቦታ ነው የምትፈልገው?
  • ወይ ክቡር ሚኒስትር?
  • ወይስ ዓይን ቦታ ነው የምትሻው?
  • ምን ላድርግዎት?
  • ንገረኝ ወይስ ገዢ ቦታ ልስጥህ?
  • ገዢው ፓርቲ ነው ያሉኝ?
  • በእሱ አትምጣብኝ፡፡
  • ይቅርታ ስላልሰማሁዎት ነው፡፡
  • ገዢ ቦታ እሰጥሃለሁ፡፡
  • እኔም ምላሹን እሰጣለሁ፡፡
  • ምን?
  • ገዢ ገንዘብ!

[ክቡር ሚኒስትሩ ልማታዊ ነው ብለው የሚያስቡት ተቃዋሚ ደወለላቸው] 

  • ክቡር ሚኒስትር አገሪቷ ውስጥ ምን እየተሠራ ነው?
  • ግድብ፡፡
  • የለም የለም፡፡
  • ባቡር፡፡
  • አልገባዎትም፡፡
  • የሲሚንቶ ፋብሪካዎች፡፡
  • ምን ይላሉ?
  • የከረጢትና የስኳር ፋብሪካዎች፡፡
  • ደግሞ እናንተ ስኳር መላስ እንጂ ስኳር ፋብሪካ መገንባት ታውቃላችሁ እንዴ?
  • እየተሳደብክ ነው?
  • መተንፈሻ አሳጣችሁን፡፡
  • የምን መተንፈሻ?
  • ፓርላማውን መቶ ፐርሰንት ያዛችሁት፡፡
  • ተመርጠን፡፡
  • ሚዲያውን ሙሉ ለሙሉ ተቆጣጠራችሁት፡፡
  • የራሳችሁን ማቋቋም ነዋ፡፡
  • ለማንኛውም የሰሞኑም ብጥብጥ እኮ የተነሳው ሕዝቡ መተንፈሻ ስላጣ ነው፡፡
  • ምነው ሩጫ ጀመርክ እንዴ?
  • ለምን እንደዚያ አሉ?
  • ስለትንፋሽ ብዙ አወራህ፡፡
  • ለማንኛውም ክቡር ሚኒስትር በሚገባ ይታሰብበት፡፡
  • ምኑ?
  • የመልካም አስተዳደር ችግሩ፡፡
  • እያሰብንበት ነው፡፡
  • ማሰብ ብቻ ሳይሆን መፍታትም ያስፈልጋል፡፡
  • እኔ እኮ ፖሊስ አይደለሁም የማስረው የምፈታው፡፡
  • ክቡር ሚኒስትር እየቀለድኩ አይደለም፡፡
  • እኔ በእናትህ አታስጨንቀኝ፤ ጭንቀት አልወድም፡፡
  • እኔ አይደለሁም ያስጨነኩዎት፡፡
  • ታዲያ ማን ነው?
  • ሥራዎት!

[ክቡር ሚኒስትሩ አማካሪያቸውን አስጠሩት] 

  • ፈለጉኝ ክቡር ሚኒስትር?
  • የሰሞኑን የመንግሥት መግለጫ ተከታትለሃል?
  • የትኛውን መግለጫ?
  • በወቅታዊ ጉዳይ ላይ የተሰጠውን፡፡
  • አዎን ተከታትዬዋለሁ፡፡
  • ተወረናል እኮ፡፡
  • ጦርነት ተጀመረ እንዴ?
  • የለም የለም፡፡
  • ወረርሽኝ በሽታ ገባ?
  • አንተንስ የፀረ ልማት ኃይሎች ይውረሩህ፡፡
  • ማን ነው የወረረን ታዲያ?
  • ጋኔኖች፡፡
  • የምን ጋኔን?
  • የተለያዩ ዓይነት ጋኔኖች አሉ፡፡
  • እስቲ ይንገሩኝ፡፡
  • የሙስና ጋኔን አለ፡፡
  • እሺ፡፡
  • የኪራይ ሰብሳቢ ጋኔን አለ፡፡
  • ሌላስ?
  • የደላሎች ጋኔን አለ፡፡
  • ጉድ ነው፡፡
  • የጽንፈኛና የአክራሪዎች ጋኔን አለ፡፡
  • ቀጥሉ፡፡
  • የተቃዋሚዎች ጋኔን አለ፡፡
  • ስለዚህ ብዙ ዓይነት ጋኔኖች አሉ እያሉኝ ነው?
  • እሱን እኮ ነው የምልህ፡፡
  • የመንግሥትስ ጋኔን አለ?
  • አይጠፋም ሊኖር ይችላል፡፡
  • ፈርቼ እኮ ነው፡፡
  • ምንድን ነው የፈራኸው?
  • እርስዎ እንዳይኖርብዎት፡፡
  • ወሬኛ ያልተጠየከውን አታውራ፡፡
  • ይቅርታ ክቡር ሚኒስትር፡፡
  • ለማንኛውም በሁለተኛው ጂቲፒ ውስጥ መካተተ አለበት፡፡
  • ምኑ?
  • ይኼ ጋኔን የማስወጣት ሥራው፡፡
  • ክቡር ሚኒስትር እየቀለዱ አይደለም አይደል?
  • ስማ ጋኔን ማስወጣት ቀልድ አይደለም፡፡
  • ስለዚህ ምን ይደረግ?
  • አንድ አዲስ ዳይሬክቶሬት ይቋቋም፡፡
  • ምን የሚሉት?
  • ጋኔን አስወጪ!