ክቡር ሚኒስትር

[ክቡር ሚኒስትሩ ለብሔር ብሔረሰቦች በዓል ዝግጅት የሚያስፈልጉትን የኅትመት ሥራዎች በሚስታቸው ስም ላለው ማተሚያ ቤት ሰጥተዋል፡፡ ሥራዎቹ ለበዓሉ ቀን እንደሚደርሱ ለማረጋገጥም ሚስታቸው ጋ ደወሉ]

 

  • ሄሎ!
  • አቤት!
  • እንዴት እየሄደልሽ ነው?
  • ምኑ?
  • ሥራዎቹ ናቸዋ፡፡
  • ጥሩ እየሄዱ ነው፡፡
  • ዋናው ጥያቄ ለበዓሉ ይደርሳሉ ወይ የሚለው ነው?
  • እንግዲህ የቻልነውን እያደረግን ነው፡፡
  • እንዲህ ዓይነት ነገር መስማት አልፈልግም፡፡
  • ምን ማለት ነው?
  • ሥራውን እንዴት እንዳመጣሁት ታውቂያለሽ አይደል?
  • እንዴት ነው ያመጣኸው?
  • ከስንት ደላላና ኪራይ ሰብሳቢ ጉሮሮ ፈልቅቄ ያመጣሁት ሥራ ነው፡፡
  • የመጣው ግን ዘግይቶ መሆኑን ታውቃለህ?
  • አንቺ ሴትዮ ምን ሆነሻል?
  • ምን ሆንኩኝ?
  • ሥራ ጠፍቷል፤ ማሽኖቹ አፋቸውን ከፍተው ነው የሚውሉት ስትይኝ አልነበር እንዴ?
  • አልተሳሳትክም፤ እውነት ነው፡፡
  • አሁን ታዲያ ሥራ ሲመጣ የምን ወደኋላ ማፈግፈግ ነው?
  • እንግዲህ የቻልነውን እያደረግን ነው፡፡
  • አሁን ይደርሳል አይደርስም?
  • ይደርሳል ብዬ በአፌ ሙሉ መናገር አልችልም፡፡
  • እናንተ ጋ ግን ትልቅ ችግር አለ ልበል?
  • የምን ችግር?
  • የመልካም አስተዳደር ነዋ፡፡
  • ምን እያወራህ ነው?
  • በስንት ትግል ባመጣሁልሽ ሥራ እኔኑ ልታዋርጂኝ?
  • ለምንድን ነው የምትዋረደው?
  • ይኼን በዓል እኮ አገር ነው የሚጠብቀው፡፡
  • አሁን መፍትሔው ላይ ማተኮር ነው የሚያዋጣው፡፡
  • እኮ ይደርሳል ወይስ አይደርስም ንገሪኝ?
  • ይኸውልህ ሥራው ይደርሳል ግን በዓሉ የሚከበርበት ቦታ ሩቅ ስለሆነ እዚያ የሚወስድልን ትራንስፖርት ነው ችግሩ፡፡
  • ስለዚህ በአጭሩ አይደርስልኝም እያልሽኝ ነው?
  • ነገርኩህ እኮ ሥራውን እንጨርሰዋለን፤ ትራንስፖርት ነው ችግሩ፡፡
  • በቃ አዋረድሽኝ፤ ሥራውን አይነጥቀኝም ብለሽ ነው አይደል?
  • ምን እያወራህ ነው?
  • አንዴ ሥራውን ስለሰጠኝ አይወስድብኝም ብለሽ ነው?
  • ከራስህ ላይ ራስህ ልትነጥቅ?
  • እ…
  • አሁን ወደ መፍትሔው ብንሄድ ይሻላል፡፡
  • ምንድን ነው መፍትሔው?
  • መፍትሔውማ እጅህ ላይ ነው፡፡
  • እኮ ምንድን ነው?
  • አንድ ስልክ መደወል ነዋ፡፡
  • ማን ጋ?
  • ሥራው እንዳለቀ ቦታው የሚያደርስልን ሔሊኮፕተር ወይም አውሮፕላን አዘጋጅ፡፡
  • እንደዚያ ከሆነ ሊደርስ ይችላል?
  • በሚገባ፡፡
  • አንቺን እኮ ከሌሎቹ ሴቶች ለይቼ የመረጥኩበት ዋናው ምክንያት ይኼ አስተሳሰብሽ ነው፡፡
  • የቱ አስተሳሰቤ?
  • ይኼ ልማታዊ አስተሳሰብሽ፡፡

[ክቡር ሚኒስትሩ አማካሪያቸውን አስጠሩት]

  • አቤት ክቡር ሚኒስትር፡፡
  • እንዴት እየሄደላችሁ ነው?
  • ምኑ ክቡር ሚኒስትር?
  • የበዓሉ ዝግጅት ነዋ፡፡
  • በዕቅዳችን መሠረት እየተከናወነ ነው፡፡
  • አንድም ችግር መስማት አልፈልግም፡፡
  • ግን ክቡር ሚኒስትር …
  • የምን ግን ነው?
  • አንዳንድ ሰዎች እየተቹን ነው፡፡
  • ምን ብለው?
  • ከደርግ ጋር እያመሳሰሉ፡፡
  • በምንድን ነው የሚያመሳስሉን?
  • ያው ደርግም 10ኛ የአብዮቱን በዓል አክብሯል፤ እኛም አሁን የምናከብረው የብሔር ብሔረሰቦች በዓል 10ኛ ዓመቱ ነው፡፡
  • ሚዲያ አትከታተልም ልበል?
  • ኧረ እከታተላለሁ ክቡር ሚኒስትር፡፡
  • እሺ አገሪቱ በስንት ፐርሰንት እያደገች ነው?
  • ከአሥር በመቶ በላይ፡፡
  • ደርግ እያለ አገሪቷ በስንት ፐርሰንት ነበር የምታድገው?
  • ከዜሮ በመቶ በታች፡፡
  • አየህ ልዩነቱ እሱ ነው፡፡
  • የሚገርም ዕውቀት ነው እኮ ያለዎት ክቡር ሚኒስትር፡፡
  • ምን ባክህ? እዚህ ቦታ ላይ ስትቀመጥ እኮ ተራ አስተሳሰብ ሊኖርህ አይችልም፡፡
  • ምጡቅ የሆኑ ሰው ነዎት፡፡
  • ለመሆኑ እንግዶቹ እየተጠሩ ነው?
  • ሰሞኑን የተያያዝነው እሱን ነው ክቡር ሚኒስትር፡፡
  • እሱ ሥራችን ከፍተኛ ጥንቃቄ ሊደረግበት ይገባል፡፡
  • ምን ዓይነት ጥንቃቄ?
  • ምንም ዓይነት ኪራይ ሰብሳቢ እዚያ ስብሰባ ላይ ማየት አልፈልግም፡፡
  • የቻልነውን እናደርጋለን ክቡር ሚኒስትር፣ በአብዛኛው የሚጠሩት ባለፈው ዓመት የመጡት ናቸው፡፡
  • እሱ ነው እኮ ችግሩ፡፡
  • እንዴት ክቡር ሚኒስትር?
  • ባለፈው ዓመት በርካታ ኪራይ ሰብሳቢና ደላላ ነበር የሞላው፡፡
  • ምን ዓይነት ሰው ይጠራ ታዲያ?
  • ልማታዊ ብቻ፡፡
  • አሁን ኪራይ ሰብሳቢውንና ልማታዊውን እንዴት መለየት ይቻላል?
  • ይህን የሚሠራ አንድ ተቋም ያስፈልገናል፡፡
  • የምን ተቋም?
  • ኪራይ ሰብሳቢን ከልማታዊ የሚለይ፡፡
  • ሌላው ክቡር ሚኒስትር፣ ለበዓሉ እያወጣን ያለው ወጪ ከፍተኛ እየሆነ መጥቷል፡፡
  • እሱ አይመለከትህም ብዬ ስንቴ ነው የነገርኩህ?
  • አይ እንዳንተች ብዬ ነው?
  • ለመሆኑ ዋነኛ ወጪያችን ምንድነው?
  • የኅትመት ወጪ ነው፡፡
  • ይኸው ለዚያ ብዬ ነው በቅናሽ የሚታተምበት ቦታ ሥራውን የሰጠሁት፡፡
  • ለነገሩ ተባብረውናል ክቡር ሚኒስትር፡፡
  • እኔ እንዲያውም ለዚህ ሥራዬ ሰርተፊኬት እፈልጋለሁ፡፡
  • የምን ሰርተፊኬት?
  • ልማታዊ ሰርተፊኬት፡፡
  • ልማታዊ ባለሀብት ነዎት ልበል?
  • ምን አልከኝ?
  • ማለቴ ልማታዊ ባለሥልጣን፡፡
  • እህሳ፡፡
  • ለማንኛውም ከሠራተኛው ጋር ስብሰባ ማድረግ አለብን፡፡
  • የምን ስብሰባ?
  • የሩብ ዓመት አፈጻጸማችንን አስመልክቶ መሰብሰብ አለብን፡፡

[ክቡር ሚኒስትሩ የመሥሪያ ቤታቸውን የሩብ ዓመት የሥራ አፈጻጸም አስመልክቶ ከሠራተኞች ጋር ስብሰባ እያደረጉ ነው]

  • የዛሬው ስብሰባችን ዋነኛ ትኩረት የመልካም አስተዳደር ችግሮችን ይመለከታል፡፡ አስተያየት ያለው ይቀጥል፡፡
  • ክቡር ሚኒስትር እኔ አስተያየት አለኝ፡፡
  • የሥራ መደብሽን ንገሪኝ፡፡
  • እኔ የቅሬታ ሰሚ ኮሚቴ አባል ነኝ፡፡
  • ምንድነው አስተያየትሽ?
  • ክቡር ሚኒስትር የሰው ምሬት ብሷል፡፡
  • እንዴት?
  • ይኸው በየጊዜው የሚመጣው ቅሬታ እጅጉን እየጨመረ ነው፡፡
  • ቅሬታው ምንድነው?
  • በዋናነት የመልካም አስተዳደር ችግር ነው፡፡
  • ምንድን ነው የሚሻለው?
  • ቅሬታዎቹ በአብዛኛው የሚያጠነጥኑት፣ ወሬ ብቻ ምን ያደርጋል ተግባር ላይ ዜሮ ናችሁ የሚሉ ናቸው፡፡
  • በቃ አሁን ወደ ተግባር መሄድ አለብን፤ ምን ይሻላል?
  • እኔማ ምን አውቃለሁ?
  • ያ ያቆምነውን ነገር መቀጠል አለብን፡፡
  • ምኑን ክቡር ሚኒስትር?
  • ጣት መቁረጡን፡፡

[ክቡር ሚኒስትሩ አማካሪያቸውን አስጠሩት]

  • አቤት ክቡር ሚኒስትር፡፡
  • ይኼ የመልካም አስተዳደር ችግር እየተባባሰ ነው፡፡
  • እሱማ አፋጣኝ መፍትሔ የሚያሻው ጉዳይ ነው፡፡
  • መፍትሔውማ መቁረጥ ነው፡፡
  • ተስፋ መቁረጥ ክቡር ሚኒስትር?
  • ጣት መቁረጥ ነው እንጂ፡፡
  • ይሻላል ክቡር ሚኒስትር?
  • አዲሱ አቅጣጫችን እሱ ነው መሆን ያለበት፡፡
  • ምን ይደረግ ታዲያ?
  • ጨረታ ይውጣ፡፡
  • የምን ጨረታ?
  • ዓለም አቀፍ ይዘት ያለው ጨረታ ነው መሆን ያለበት፡፡
  • እኮ የምን ጨረታ ነው?
  • የጣት ቆራጮች ጨረታ፡፡
  • ያው እንደለመዱት ጨረታ ከሚወጣ እርስዎ ቢያመጧቸው አይሻልም?
  • መመርያውን መከተል አለብን፡፡
  • ሌላ ጊዜ ያለጨረታ እርስዎ ስለሚያመጡልን ብዬ ነው፡፡
  • እዚህ ላይ ልምድ ስለሌለን እንዳንሳሳት መጠንቀቅ አለብን፡፡
  • እንዴት ማለት?
  • ያው ጣት የሚቆርጥ ብለን እጅ የሚቆርጥ እንዳይመጣ ብዬ ነው፡፡
  • ለነገሩ እውነትዎትን ነው፡፡
  • ስለዚህ በአፋጣኝ ጨረታው ይውጣ፡፡
  • ከየት አገር ግን ልናገኝ እንችላለን?
  • ያው ከወዳጃችን ቻይና ነዋ፡፡
  • ለነገሩ እነሱ የማይሳተፉበት ዘርፍ የለም፡፡

[የክቡር ሚኒስትሩ ወዳጅ ሚኒስትር ደወሉ]

  • ጤና ይስጥልኝ ክቡር ሚኒስትር፡፡
  • እንዴት ነህ ወዳጄ?
  • ሥራው እንዴት ይዟችኋል?
  • ይኸው ቀና ደፋ እያልን ነው፡፡
  • መቼም አሪፍ በዓል እናከብራለን ብዬ እጠብቃለሁ?
  • ለዚህ እኮ ነው ሌት ተቀን እየለፋን ያለነው፡፡
  • የልፋታችሁን ፍሬ በቅርቡ እንበላዋለና፡፡
  • ምን እያሳሰበኝ እንደሆነ ታውቃለህ?
  • ምን ያሳስብዎታል ክቡር ሚኒስትር?
  • እዚህ በዓል ላይ ደላላና ኪራይ ሰብሳቢ እንዳይገኝ እፈልጋለሁ፡፡
  • እሱን ማድረግ ይቻላል ብለው ነው?
  • ለምን አይቻልም?
  • ደላላ ያልገባበት ቦታ የለማ፡፡
  • እንዴት?
  • ባለሥልጣኑ ጋ፣ ባለሀብቱ ጋ በቃ ሁሉም ጋ ነው ያለው፡፡
  • ታዲያ ምንድነው የሚሻለው?
  • ማደራጀት ነዋ፡፡
  • በምን?
  • በአንድ ለአምስት፡፡
  • ምኖቹን?
  • ደላሎቹን ነዋ፡፡
  • ምን ለማድረግ?
  • ልማታዊ ደላላ፡፡
  • ይሻላል ብለህ ነው?
  • ሌላ ምንም መፍትሔ የለውማ፡፡
  • ለነገሩ ልማታዊ ሆነው ደላላም ቢሆኑ ችግር የለውም፡፡
  • እሱን እኮ ነው የምልዎት፡፡
  • ልማታዊ ከሆኑ በኋላ ደግሞ እንዲመሠርቱ እናደርጋለን፡፡
  • ምን?
  • የደላሎች ፎረም፡፡