ክቡር ሚኒስትር

[ክቡር ሚኒስትሩ አማካሪያቸውን ቢሮ አስጠሩት]

 

  • ፈለጉኝ ክቡር ሚኒስትር?
  • ያዘዝኩህን ሪፖርት ከምን አደረስከው?
  • ትንሽ ነው የቀረኝ፡፡
  • ለነገሩ የፈለኩህ ለሌላ ነገር ነው፡፡
  • ለምን ፈለጉኝ?
  • ለመሆኑ የዓለም አቀፍ ሚዲያ እየተከታተልክ ነው?
  • አዎን እከታተላለሁ ክቡር ሚኒስትር፡፡
  • እሱ ጉዳይ እኛንም ይመለከተናል፡፡
  • የቱ ጉዳይ?
  • በሚዲያ እየተላለፈ ያለው ነዋ፡፡
  • የተለያዩ ዜናዎች ናቸው እኮ የሚተላለፉት፤ የትኛውን ነው የሚሉኝ?
  • የአሸባሪነቱን ነዋ፡፡
  • በጣም ነው እኮ የሚያሳዝነው፡፡
  • ማዘን ምን ያደርጋል? ዋናው መጠንቀቅ ነው፡፡
  • አሁን እኛ ከእነሱ በላይ ተጠንቅቀን ነው ብለው ነው ያው እግዚአብሔር ጠብቆን ነው እንጂ?
  • ልታጣላኝ ፈልገህ ነው?
  •  ከማን ጋር?
  • ከእግዚአብሔር ጋር ነዋ፡፡
  • መቼ ተስማምተው ያውቃሉ ብዬ ነው?
  • ምን ለማለት ፈልገህ ነው?
  • የእርስዎ አምላክ አብዮታዊ ዲሞክራሲ ነው ብዬ ነው፡፡
  • እኔ የምለው ስለእምነቴም አማክረኝ ብዬሃለሁ እንዴ?
  • ኧረ እንዲሁ ጨዋታውን ነው፡፡
  • የጠራሁህ ለሥራ መስሎኝ የምን ጨዋታ ነው?
  • ይቅርታ ክቡር ሚኒስትር፡፡
  • ለማንኛውም ለፈረንሣይና ለሩሲያ ካልተመለሱ ለእኛም አይመለሱም፡፡
  • ዋናው ጥያቄ እኮ ሌላ ነው ክቡር ሚኒስትር፡፡
  • ምንድነው ጥያቄው?
  • መግባት ወይም አለመግባት?
  • ምን አልከኝ?
  • ምነው ደነገጡ ክቡር ሚኒስትር?
  • የት ፓርላማ ነው?
  • የለም የለም፤ ሶሪያ ነው እንጂ፡፡
  • እኔ እኮ መግባት ወይም አለመግባት ስትለኝ ፓርላማ መስሎኝ ልቤ ደነገጠ፡፡
  • ለምን ደነገጠ?
  • ምን ይታወቃል እኛ ሳናውቅ ምርጫ ተካሄደ ብዬ ነዋ፡፡
  • ይኼማ እንዴት ሊሆን ይችላል?
  • አይሆንምን ትተህ ይሆናልን አስብ፡፡
  • እንዳሉ ክቡር ሚኒስትር፡፡
  • ለዚህ ነው እኮ መጠናከር አለበት የምልህ፡፡
  • ምኑ?
  • የፀረ ሽብር ሕጉ፡፡
  • ከዚህ በላይ እንዴት ይጠንክር?
  • የእያንዳንዱን ዜጋ እንቅስቃሴ መቆጣጠር አለብን፡፡
  • እንዴት አድርገን?
  • ስማ የሁሉም ሰው ስልክና ኢሜይል ይጠለፍ፡፡
  • እሱማ ያስጠይቀናል፡፡
  • ለምንድንው የምንጠየቀው?
  • ዜጐች በሕገ መንግሥቱ የተሰጣቸውን መብት የሚጋፋ ነው፡፡
  • ይህ መብትን መጋፋት አይደለም፡፡
  • ታዲያ ምንድን ነው?
  • ደኅንነታቸውን መጠበቅ፡፡
  • ሕግ እየጣስን?
  • ፈረንሣይን ያየ በሽብር አይቀልድም፡፡
  • ይህን ማድረግ እኮ ከአቅማችን በላይ ነው፡፡
  • ለበላይ አካልም ቢሆን ሐሳቡን ማቅረብ አለብን፡፡
  • ብቻ ቢታሰብበት ጥሩ ነው፡፡
  • ለመሆኑ ዲሽ አለህ?
  • አዎን ክቡር ሚኒስትር፡፡
  • ዲኤስቲቪ ነው ዲሽህ?
  • እሱማ የሀብታሞቹ ነው፤ እኔ ዓረብ ሳት ነው ያለኝ፡፡ ለምን ጠየቁኝ ግን?
  • አይ እኔ የምመለከተው ቢግ ብራዘርስ የሚባል ቻናል አለ፡፡
  • እኔማ ኢሳት ነው የማየው፡፡
  • ጭራሽ እሱን ነው የምታየው?
  • አይ ባላንስ ለማድረግ ብዬ ነው፡፡
  • ማንን ነው ባላንስ የምታደርገው?
  • ኢቲቪን ነዋ፡፡
  • ብቻ ለማንኛውም ቢግ ብራዘርስ የሚባለው ቻናል የሰዎቹን እያንዳንዱን እንቅስቃሴ ይቆጣጠራል፡፡
  • ስለዚህ ምን ይደረግ እያሉ ነው?
  • እኛም የእያንዳንዱን ሰው እንቅስቃሴ መቆጣጠር አለብን፡፡
  • ለምን?
  • የአገሪቱ ቢግ ብራዘርስ ስለሆንን፡፡
  • የእኛ አገር ሰላም ለመሆኑ እኮ ሰሞኑን የተካሄደው ሩጫ ይመሰክራል፡፡
  • የትኛው ሩጫ?
  • ታላቁ ሩጫ ነዋ፡፡
  • ሮጠህ ነበር?
  • አዎን ክቡር ሚኒስትር፡፡
  • እንዴት ነበር ታዲያ?
  • ቢያንስ የራሴን ሰዓት ማሻሻል ችያለሁ፡፡
  • አንተም እንደ ኢሕአዴግ የሚፎካከረኝ ስለሌለ ከራሴ ጋር ነው የተወዳደርኩት እያልከኝ ነው?
  • አይ ባለፈው ዓመት ከገባሁበት ሰዓት በተሻለ ነው የገባሁት ለማለት ፈልጌ ነው፡፡
  • ለመሆኑ ሩጫው የኪራይ ሰብሳቢዎችና የአፍራሽ ኃይሎች መፈንጫ ነበር?
  • ኧረ በፍጹም በሰላማዊ መንገድ ነው የተካሄደው፡፡
  • ስለዚህ የአሸባሪዎች ጥቃት አያሠጋንም እያልከኝ ነው?
  • ይልቁኑ አንድ ያሳሰበኝ ነገር ነበር፡፡
  • ምንድነው ያሳሰበህ?
  • በዚህ ዓመት ውድድሩ የተጀመረውና የተፈጸመው በመስቀል አደባባይ ነበር፡፡
  • ምን ችግር አለው ታዲያ?
  • አይ ያው አደባባዩ መፈቀዱን ተመልክተው ሠልፍ እንዳይጠሩ ብዬ ነው፡፡
  • እነማን?
  • ተቃዋሚዎች፡፡
  • ምንድን ነው እሱ ነገር አስታውሰኝ እስቲ?
  • እየቀለዱ ነው ክቡር ሚኒስትር?
  • ምን እቀልዳለሁ እውነቴን ነው እንጂ፡፡
  • እንዴት ክቡር ሚኒስትር?
  • ይህን ቃል የምትሰማው ምርጫ ሲመጣ ብቻ ነው፡፡
  • ለነገሩ እውነትዎን ነው፡፡
  • በነገራችን ላይ አሁን አሁን ዓለም ላይ የምንታወቅበት ሌላው ነገር እየሆነ መጥቷል፡፡
  • ምኑ?
  • ምርጫ ሲደርስ ብቻ ተቃዋሚዎች መንቀሳቀሳቸው ነዋ፡፡
  • ስለዚህ አያሳስበንም እያሉኝ ነው?
  • ቢያንስ ለሚቀጥሉት ሦስት ዓመታት ሩጫው መስቀል አደባባይ መካሄዱ ችግር የለውም፡፡
  • ከዚያ በኋላስ?
  • ምርጫውማ ሲደርስ ሰበብ ፈልገን እንመልሰዋለን፡፡
  • ወዴት?
  • ወደ ጃንሜዳ!

[ክቡር ሚኒስትሩ የፋይናንስ ኃላፊውን አስጠሩት]  

  • አቤት ክቡር ሚኒስትር፡፡
  • በአስቸኳይ ይውጣ፡፡
  • ምኑ ክቡር ሚኒስትር?
  • ጨረታው፡፡
  • የምን ጨረታ?
  • በሪስትራክቸሩ ምክንያት አዳዲስ የሥራ ኃላፊዎች ወደ መሥሪያ ቤታችን እንደሚመጡ ታውቃለህ አይደል?
  • አውቃለሁ ክቡር ሚኒስትር፡፡
  • ስለዚህ እስካሁን የተገዙላቸው መኪኖች ብቻ ስለሆኑ ሙሉ የቢሮ ዕቃ መገዛት አለበት፡፡
  • ክቡር ሚኒስትር አሁን የሚሉኝ ነገር እኮ በሚሊዮኖች የሚቆጠር ገንዘብ ያስወጣናል፡፡
  • ለሥራው አስፈላጊ እስከሆነ ድረስ ማንኛውም ነገር መደረግ አለበት፡፡
  • ጊዜው ጥሩ አይደለም ብዬ ነው፡፡
  • ጊዜው ምንድን ነው?
  • ያው ወገኖቻችን በድርቅ የተጐዱበት ጊዜ ነዋ፡፡
  • እና አሁን ይኼ ከዚህ ጋር ምን ያገናኘዋል?
  • ያው በጀቱ ከመንግሥት ካዝና ውስጥ ነው የሚወጣው ብዬ ነው፡፡
  • ለመሆኑ አንተን ማን ነው አማካሪዬ ያደረገህ?
  • ኧረ ማንም አላደረገኝም ክቡር ሚኒስትር፡፡
  • ስለዚህ አድርግ የተባልከውን ነገር ብቻ አስፈጽም፡፡
  • እሺ ክቡር ሚኒስትር፡፡
  • ጨረታው ውስን ጨረታ ነው የሚሆነው፡፡
  • እንዴ ክቡር ሚኒስትር?
  • የምን እንዴ ነው?
  • በሚሊዮን የሚቆጠር ገንዘብ ስለሆነ ውስን ጨረታ ማድረግ አንችልም፡፡
  • ለምንድን ነው የማንችለው?
  • መመርያው ይከለክለናላ፡፡
  • ለመሆኑ መመርያውን ማን ነው ያወጣው?
  • መንግሥት ነዋ፡፡
  • እኛስ ምንድን ነን?
  • እ…
  • እኛም መንግሥት መሆናችንን አትርሳ፡፡
  • ተጠያቂነትን ያስከትላል ብዬ ነው እኮ፡፡
  • ስነግርህ አትሰማም እንዴ?
  • ምኑን?
  • የአንተ ሥራ የማዝህን ብቻ ማስፈጸም ነው፡፡
  • ይቅርታ ክቡር ሚኒስትር፡፡
  • ስለዚህ ለተለመዱት ተጫራቾች ሰነዱ ይላክ፡፡
  • እሺ ክቡር ሚኒስትር፡፡

[ክቡር ሚኒስትሩ አንድ ባለሀብት ወዳጃቸው ጋ ደወሉ] 

  • እንዴት ነዎት ክቡር ሚኒስትር?
  • እንዴት ነህ ወዳጄ?
  • አለን ክቡር ሚኒስትር፡፡
  • ሥራ እንዴት ይዞሃል?
  • ሥራ ተቀዛቅዟል፡፡
  • ይኸው ዛሬ ደረስኩልሃ እኔ፡፡
  • እንዴት ክቡር ሚኒስትር?
  • መሥሪያ ቤታችን አንድ ጨረታ እያወጣ ነው፡፡
  • ፈጥኖ ደራሽ እኮ ነዎት ክቡር ሚኒስትር፡፡
  • እዛው የፈርኒቸር ቢዝነስ ውስጥ ነው ያለኸው አይደል?
  • አዎን ክቡር ሚኒስትር ዋናው ሥራዬ እሱ አይደል?
  • በቃ የብዙ ሚሊዮን ብር ጨረታ ነው፤ ተዘጋጅ፡፡
  • የፀሎቴ መልስ ነዎት ክቡር ሚኒስትር፡፡
  • የምን ፀሎት?
  • በቃ ይኸው አሁን ሌት ተቀን የምፀልየው የመልካም አስተዳደር በአገሪቷ ላይ እንዲሰፍን ነው፡፡
  • እንግዲህ ፀሎትህ ተሰምቷል፡፡
  • አሁንማ ስለቴን አስገባለሁ፡፡
  • ለማን ነው የምታስገባው?
  • ለታቦቱም ለእርስዎም ነዋ፡፡
  • በል እንግዲህ ስለቱን አታዘግየው፡፡
  • ታዲያ ዛሬ ምሳ ልጋብዝዎታ?
  • የት ነው የምትጋብዘኝ?
  • ፆም ሊገባ ስለሆነ ሥጋ ልጋብዝዎታ?
  • በጣም ሰው የሚበዛበት ቦታማ መታየት እኮ የለብኝም፡፡
  • ምን ችግር አለው ክቡር ሚኒስትር?
  • ያው በአገሪቷ ድርቅ ስላለ እኔ ሥጋ ቤት ስታይ ጥሩ አይደለም ብዬ ነው፡፡
  • የኢሕአዴግን ሲስተም እንጠቀማለን፡፡
  • ምን ዓይነት ሲስተም?
  • ሥጋ ቤቱን አዘግተን እንቆጣጠረዋለን፡፡
  • ማለት?
  • 100 ፐርሰንት እንቆጣጠረዋለን፡፡