ክቡር ሚኒስትር

[ክቡር ሚኒስትሩ ፓሪስ ላይ በደረሰው የአሸባሪዎች ጥቃት ተደናግጠው በፈረንሣይ የምትገኘው የእህታቸውን ልጅ ደኅንነት ለማረጋገጥ ስልክ ደወሉ]

 

  • ሄሎ ጋሼ፡፡
  • ተመስገን ነው፡፡
  • ምን ተገኘ?
  • ደህና መሆንሽ ነዋ፡፡
  • ምን እሆናለሁ ብለህ ነው?
  • ይኸው አገራችሁ በአሸባሪዎች ጥቃት እየተናወጠች አይደለ እንዴ?
  • በጣም አሳዛኝ ጥቃት ነው የተፈጸመው፡፡
  • አንቺ ግን ተርፈሻል?
  • ለነገሩ እኔ ያለሁበት ከተማ አይደለም ጥቃቱ የተፈጸመው፡፡
  • አንቺ ፓሪስ አገር አይደል እንዴ የምትኖሪው?
  • አይ እኔ ደቡብ ፈረንሣይ ውስጥ የምትገኝ ኒስ የምትባል ከተማ ውስጥ ነው የምኖረው፡፡
  • እኮ ያው ፓሪስ አገር ውስጥ ናት አይደል?
  • ጋሼ ፓሪስ እኮ አገር አይደለችም፡፡
  • እና ምንድን ናት?
  • ፓሪስ እኮ የፈረንሳይ ዋና ከተማ ናት እንጂ አገር አይደለችም፡፡
  • ይኸው በየዜናው የፓሪስ አታክ እየተባለ አይደል እንዴ የሚዘገበው?
  • እኮ ልክ እንደ አዲስ አበባ የፈረንሣይ ዋና ከተማ ነች፡፡
  • እኔ እኮ የአውሮፓ ነገር ብዙ አይገባኝም፡፡
  • እንዴት?
  • አንዳንዴ EU ምናምን ብለው አንድ አገር ነን ይላሉ፡፡
  • እንዴ ጋሼ EU እኮ ልክ እንደ AU ማለት ነው?
  • እኛ ግን ለEU ልክ እንደ አገር አምባሳደር ልከናል፡፡
  • አይ ጋሼ ትገርማለህ ግን፡፡
  • ምኔ ነው የሚገርመው?
  • ይኼን ሳታውቅ ሚኒስትር መሆንህ ነዋ፡፡
  • ቆይ ይኼ ከእኔ ሥራ ጋር በቀጥታ ምን ያገናኘዋል?
  • ለነገሩ አይፈረድብህም የሳይንስ ተማሪ ነበርክ፡፡
  • ለመሆኑ ስንት ሰው ነው የተገደለው?
  • ከ120 ሰው በላይ ነው የተገደለው፡፡
  • የት ሄደው ነበር?
  • እነማን?
  • የአገሪቷ ሴኪዩሪቲዎች ናቸዋ፡፡
  • አያድርስ ነው ባክህ ጋሼ?
  • ምን አያድርስ ነው? ሥራቸውን ቢሠሩማ ይህ ሁሉ አይደርስባቸውም ነበር፡፡
  • አሁን ኢትዮጵያ እንዲህ ዓይነት ነገር አይደርስም ብለህ ነው?
  • አንድ ነገር ልንገርሽ፡፡
  • ምን ጋሼ?
  • እዚህ አገር መርፌ ራሱ ሲወድቅ እንሰማለን፡፡
  • ኧረ ተው ጋሼ፡፡
  • ለመሆኑ አልተደራጃችሁም እንዴ?
  • በምን?
  • በአንድ ለአምስት ነዋ፡፡
  • ምንድን ነው አንድ ለአምስት?
  • በቃ ተይው ገባኝ ለዚህ ነዋ፡፡
  • ምኑ ነው የገባህ?
  • ጥቃቱ የደረሰው፡፡
  • እንዴት?
  • ጥቃቱን መከላከል ይቻል ነበር፡፡
  • በምን?
  • በአንድ ለአምስት አደረጃጀት፡፡

[ክቡር ሚኒስትሩ ቢሮ አንድ ባለሀብት ገባ]

  • በሰዓት ነው የደረስከው ልበል?
  • አዎን ክቡር ሚኒስትር፡፡
  • እሺ ምን ልርዳህ?
  • ኧረ ክቡር ሚኒስትር በጣም ተቸግሬያለሁ፡፡
  • ምንድን ነው የተቸገርከው?
  • ምንም ነገር የለም፡፡
  • ምንድን ነው የሌለው?
  • የውጭ ምንዛሪ፡፡
  • ባንክ አትጠይቅም?
  • ከስድስት ወራት በኋላ ጠይቀን ነው ያሉኝ፡፡
  • የዓለም ንግድ ስለተቀዛቀዘ ነው፡፡
  • ክቡር ሚኒስትር ከ400 በላይ ሠራተኛ ልበትን ነው፡፡
  • እኛ እያደራጀን ባለንበት ወቅት አንተ ልበትን ነው ትለኛለህ?
  • ተቸግሬ ነው እኮ ክቡር ሚኒስትር ይኸው ሥራ ካቆምን ወራት ተቆጠሩ፡፡
  • ለምን?
  • ከውጭ ዕቃ ማስገባት አልቻልንም፡፡
  • በአገር ውስጥ ምርት መጠቀም ነዋ፡፡
  • ክቡር ሚኒስትር ቢኖርማ ኖሮ ደስ ይለኛል፡፡
  • እና ምን ተሻለ?
  • እርስዎ እኮ አባ መላ ነዎት ብዬ ነው የመጣሁት፡፡
  • አሁን ልክ ብለሃል፡፡
  • እና ክቡር ሚኒስትር በቃ መላ ይበሉኝ፡፡
  • ለመሆኑ ስንት ነው የምትፈልገው?
  • አንድ አምስት ነው የምፈልገው፡፡
  • አምስት መቶ ሺሕ ዶላር?
  • ኧረ አምስት ሚሊዮን ዶላር ነው፡፡
  • እሱማ ትንሽ ይከብዳል፡፡
  • ክቡር ሚኒስትር እርስዎ ብቻ ይኼን ያስፈጽሙልኝ እኔም ደህና ነገር አስብልዎታለሁ፡፡
  • ምንድን ነው የምታስብልኝ?
  • ከማገኘው ትርፍ አንድ ሦስተኛው የእርስዎ ይሆናል፡፡
  • እኔ እኮ አንተ ድርጅት ላይ ድርሻ የለኝም፡፡
  • ይኼን ካስፈጸሙ እኮ ለድርጅቴ ከፍተኛ ውለታ ዋሉ ማለት ስለሆነ ከትርፌ ተጠቃሚ ይሆናሉ፡፡
  • ለነገሩ ፈረንጆች ‹‹There is no free lunch›› አይደል የሚሉት?
  • ክቡር ሚኒስትር በቃ ነገሩን በእርስዎ ጥዬዋለሁ፡፡
  • አሁን ለዚህ ሥራ ወሳኝ ኔትወርክና ደላሎች ያስፈልጋሉ፡፡
  • እሱን እርስዎ ያውቁበታል፡፡
  • እስቲ ብቻ እንደሚሆን አደርገዋለሁ፡፡
  • ምነው ተከዙ?
  • አይ ሰሞኑን ማስፈራሪያ ስላበዙብን ብዬ ነው፡፡
  • ደግሞ ምን አሉ?
  • መሰቀል ያለበት ይሰቀላል እያሉ ነው፡፡
  • ታዲያ ለዚህ እናንተም ምላሽ መስጠት ነዋ፡፡
  • ምን ብለን?
  • ባንዲራ ስቀሉ፡፡

[ክቡር ሚኒስትሩ ጋር አንድ ሚኒስትር ወዳጃቸው ደወሉ]

  • ሰላም ክቡር ሚኒስትር፡፡
  • እንዴት ነህ ወዳጄ?
  • ሥራ እንዴት ይዟችኋል?
  • ይኸው ይኼን ልማት ለማሳለጥ ደፋ ቀና እያልን ነው፡፡
  • ለነገሩ የእናንተ መሥሪያ ቤት በዕድገቱ ላይ ወሳኝ ሚና እየተጫወተ መሆኑን አውቃለሁ፡፡
  • ገና ከዚህ የበለጠ ሚና እንጫወታለን፡፡
  • ሰሞኑን ቲቪ ስከታተል ነበር፡፡
  • እሺ፡፡
  • የG20 ስብሰባ ላይ አልተሳተፍንም እንዴ?
  • አዎ አልተሳተፍንም፡፡
  • ለምን ክቡር ሚኒስትር?
  • አልጋበዙንማ፡፡
  • እንዴት አልተጋበዝንም?
  • የእኛ ዕድገት ልዕለ ኃያላን አገሮቹን እያስደነቃቸው ነው፡፡
  • እና ለዛ ነው ያልተጋበዝነው?
  • እህሳ? የዕድገታችንን ሚስጥር እየተመራመሩበት ነው፡፡
  • በጣም አስገራሚ ነው፡፡
  • አሁን እንደገባኝ ልዕለ ኃያላን አገሮቹ ከምርጫችን ብቻ ሳይሆን ከዕድገታችን ብዙ የሚማሩት ነገር ይኖራል፡፡
  • ስለዚህ የራሳችን ቡድን መመሥረት እንችላለና፡፡
  • ምን የሚሉት?
  • G1!

[የክቡር ሚኒስትሩ ጸሐፊ ቢሯቸው ገባች]

  • ክቡር ሚኒስትር የአገራችን ሁኔታ አሳስቦኛል፡፡
  • እንደዚህ እየተመነደግን ባለንበት ወቅት ደግሞ ምን ያሳስብሻል?
  • አይ ማለቴ የድርቁ ነገር ነው የምልዎት፡፡
  • እንግዲህ የወገን ደራሽ ወገን ነው ብለን እየተረባረብን ነው፡፡
  • በውጭ ሚዲያ የምሰማውና እዚህ የሚወራው ቁጥር ግን በጣም የተራራቀ ነው፡፡
  • እኔ የሚገርመኝ ግን አንድ ነገር ነው፡፡
  • ምን ክቡር ሚኒስትር?
  • ሒሳብ ስለሚባለው ትምህርት ምንም የሚያውቁ አልመሰለኝም፡፡
  • አልገባኝም ክቡር ሚኒስትር?
  • ሚሊዮኑን እንደፈለጉ ነው የሚጨምሩት፡፡
  • የእኛ ቁጥር ትክክል ነው እያሉኝ ነው?
  • ይኸው ውሸታሞች መሆናቸውን ያወቅኩት እኮ መቼ ዕለት ፓሪስ ውስጥ ከ150 ሰው በላይ ሞቷል ሲሉ ቆዩና ከዛ ደግሞ 128 ነው አሉ፡፡
  • እሱማ የአሸባሪዎች ጥቃት ስለነበር ነው፡፡
  • ከጥቃቱ በኋላ የሞቱት ሰዎች ተነሱ ማለት ነው?
  • እኔ እንጃ እኔ አላውቅም፡፡
  • እሱን ነው የምልሽ፤ እነሱ ሚሊዮኑን እንደፈለጉ ሲጨምሩት ምንም አይሰማቸውም፡፡ ሰው የሚፈጠረው የእነሱ ሪፖርት ላይ ነው እኮ የሚመስለው፡፡
  • ለማንኛውም ግን ሁሉም የኅብረተሰብ አካል ግዴታውን መወጣት አለበት እላለሁ፡፡
  • እንዴት ማለት?
  • ከመንግሥት ባሻገር የግል ዘርፉም ሆነ ኅብረተሰቡ የሚችለውን ዕርዳታ ለተጠቂዎቹ ማድረግ አለበት፡፡
  • ልክ ብለሻል፡፡

[የክቡር ሚኒስሩ አማካሪ ቢሯቸው ገባ]

  • አንድ ጉዳይ ነበረኝ ክቡር ሚኒስትር፡፡
  • የምን ጉዳይ?
  • በጀት ላስፈቅድ ነው የመጣሁት፡፡
  • የምን በጀት?
  • ለአዳዲሶቹ ሚኒስትር ዴኤታዎችና የቢሮ ኃላፊዎች መኪና ለመግዛት፡፡
  • ስንት መኪና ነው የሚገዛው?
  • አሥር መኪና፡፡
  • ምን ዓይነት መኪና?
  • ያው ኃላፊዎቻችን ከቪ8 ውጪ መቼ ይነዳሉ፡፡
  • እኮ አንዱ ስንት ነው?
  • አምስት ሚሊዮን ብር፡፡
  • አሥሩ ስንት ሆነ ማለት ነው?
  • ሃምሳ ሚሊዮን ብር ነዋ፡፡
  • ለመኪና ብቻ ሃምሳ ሚሊዮን ብር?
  • ክቡር ሚኒስትር ባለፈው እኮ አዲስ አደረጃጀት ስናመጣ ወጪው ከፍተኛ ይሆናል ብዬዎት ነበር?
  • ይኼ ግን በጣም በዛ፡፡
  • እና ይቅር ክቡር ሚኒስትር?
  • ለነገሩ ለልማቱ መሳለጥ መከፈል ያለበት ዋጋ ይከፈል፡፡
  • ያው ኃላፊዎቹም ቢያንስ እንኳን በዚህ ይጠቀሙ እንጂ?
  • ከዚህ ባለፈ ቤትስ ይሠራላቸዋል አይደል እንዴ?
  • ቤትማ የሚሠራው ለከፍተኛ ባለሥልጣናት ብቻ ነው፡፡
  • ታዲያ እኛ አነስተኛ ባለሥልጣናት ነን?
  • እንደዚያ ማለቴ አይደለም፡፡
  • ይኸው በ25 ሚሊዮን ብር ቤት እየተሠራ አይደል እንዴ?
  • እሱ እኮ ለፕሬዚዳንቱ፣ ለጠቅላይ ሚኒስትሩና ለምክትሉ እንዲሁም ለጠቅላይ ፍርድ ቤት ፕሬዚዳንትና ለሁለቱ የምክር ቤት አፈ ጉባዔዎች ነው፡፡
  • እና ለእኛ ቤት አይሠራም?
  • እኔ የነገርኩዎት ሕጉ ላይ የተቀመጡትን ነው፡፡
  • ባለፈው ምርጫ ጡረታ ወጥቼ ቢሆን ኖሮ እዚያው የኪራይ ቤቶች ነበር የምኖረው?
  • እዛ ውስጥም ስለመኖርዎት እርግጠኛ መሆን አይቻልም፡፡
  • ስለዚህ በቀጣዩ አምስት ዓመት ጠንክሬ መሥራት አለብኛ?
  • ክቡር ሚኒስትር ለአገሪቷ ዕድገት ጠንክረን መሥራት አለብን፡፡
  • ጠንክሬ ከሠራሁ በአምስት ዓመት ውስጥ እኔም መገንባት እችላለሁ፡፡
  • ምኑን?
  • ቤቴን!