ክቡር ሚኒስትር

[ክቡር ሚኒስትሩ አማካሪያቸው መኪና እየነዳ ሲገባ አዩትና አስጠሩት]

 

  • እንዴት ነው እባክህ?
  • ሰላም ነኝ ክቡር ሚኒስትር፡፡
  • ተለውጠህልኛላ አንተም?
  • በምን ክቡር ሚኒስትር?
  • ለመሆኑ መቼ ነው የገዛኸው?
  • ምኑን ክቡር ሚኒስትር?
  • መኪናውን ነዋ፡፡
  • እ…ሰሞኑን ነው፡፡
  • እኮ እንዴት?
  • ቆጥቤ ነዋ፡፡
  • ቀሽቤ ማለትህ ነው?
  • ኧረ ክቡር ሚኒስትር እኔ እኮ ሱስ የለብኝም፡፡
  • የሲጋራ፣ የጫትና የመጠጥ ላይኖርብህ ይችላል፡፡
  • ታዲያ ሌላ የምን ሱስ አለ?
  • የሙስና ነዋ፡፡
  • ኧረ ክቡር ሚኒስትር ከደመወዜ የተረፈኝን አጠራቅሜ ነው የገዛሁት፡፡
  • ታዲያ መቼ ነው የምታስመርቀኝ?
  • ዛሬ ምሳ ልጋብዝዎታ፡፡
  • የት ነው የምትጋብዘኝ?
  • እዚሁ ክበብ ነዋ፡፡
  • ምን?
  • ቀይ ወጥ፣ ከፈለጉም ቅቅል፡፡
  • ሚኒስትር መሆኔን ረሳኸው?
  • እኔስ የመንግሥት ሠራተኛ መሆኔን ረሱት?
  • ታዲያ መኪናህን በደመወዝህ ነው የገዛኸው?
  • ክቡር ሚኒስትር መኪናዋ እኮ አሮጌ ናት፡፡
  • ቢሆንም በደመወዙ ማን መኪና ይገዛል?
  • እርስዎ በደመወዝዎ አይደለም እንዴ መኪና የገዙት?
  • ምን አልከኝ?
  • ለነገሩ ያ ሁሉ መኪና እንዴት በደመወዝ ይገዛል?
  • እ…
  • ይተውት ወዲህ ነው፡፡
  • ለእኔማ መንግሥት ነው የገዛልኝ፡፡
  • ምኑን?
  • መኪናውን ነዋ፡፡
  • መኪኖች እኮ ነው ያሉዎት፡፡
  • እ…
  • ቤቱስ?
  • ቤቱንም መንግሥት ነው የሰጠኝ፡፡
  • ሁሉንም ቤቶች?
  • ስንት ቤት ነው ያለኝ?
  • ከባለቤቱ ያወቀ ምንድን ነው አሉ፡፡
  • ሰላይ ነዋ፡፡
  • ኧረ ይኼን ለማወቅ ሰላይ መሆን አያስፈልግም፡፡
  • ሁሉም ነው እንዴ የሚያውቀው?
  • ምኑን?
  • እኔ እንጃ፡፡ አናግረህ ታናግረኛለህ አይደል?
  • ባይናገሩም ይታወቃል፡፡
  • እኮ ማን ነው የሚያወራብኝ?
  • ሥራዎት፡፡

[ክቡር ሚኒስትሩ ወደ ምሳ ቀጠሯቸው ከሾፌራቸው ጋር እየሄዱ ነው] 

  • ምን ሆነሃል?
  • ምን ሆንኩ?
  • ፊትህ ጠቋቁሯል፡፡
  • ከበደኝ እኮ ክቡር ሚኒስትር፡፡
  • ሰውነትህ ነው?
  • እርስዎ ምን አለብዎት?
  • እንዴት?
  • መረረኝ እኮ ክቡር ሚኒስትር፡፡
  • የቢሮው ቡና ነው?
  • ቀልዱ እርስዎ፡፡
  • የምን ቀልድ ነው? የምሬን ነው፡፡
  • አሁንስ ብረር ብረር እያለኝ ነው፡፡
  • በቃ ቀኑን ሙሉ ናሽናል ጂኦግራፊ እያየህ ትውላለህ፣ ከዚያም ወፍ መሆን ያምርሃል፡፡
  • አሁንስ ወፍ ብሆን ይሻለኛል፡፡
  • ለምን?
  • እነሱ ታክስ የለባቸው፣ ቫት የለባቸው፣ የቤት ኪራይ የለባቸው፡፡
  • እንዴ ኪራይ ሰብሳቢ ሆነህልኛላ?
  • እንዴት ክቡር ሚኒስትር?
  • ታክስ ላለመክፈል ብለህ ወፍ መሆን አማረህ?
  • በእኔ ጫማ ሆነው ባዩት?
  • እኮ እኔ የአንተን ጫማ ላደርግ?
  • ለነገሩ የአገር ውስጥ ጫማ አያደርጉም፡፡
  • ምን ነካህ በዲዛይነር የተሠራ ጫማ ነው የማደርገው፡፡
  • አውቃለሁ ክቡር ሚኒስትር፣ እኔ እንኳን ያልኩት ኑሮዬን በተመለከቱት ለማለት ፈልጌ ነው፡፡
  • ኑሮህ ምን ሆነ?
  • ክቡር ሚኒስትር ገና የብቃት ማረጋገጫ አላገኘም፡፡
  • ምኑ?
  • ኑሮዬ፡፡
  • የምን የብቃት ማረጋገጫ?
  • ኑሮ ለመባል ገና ብዙ ይቀረዋል፡፡
  • አሁን ምን ሆንኩ ብለህ ነው የምታማርረው?
  • ክቡር ሚኒስትር ደመወዜን እኮ መንግሥትና የቤት አከራዬ ናቸው የሚቀራመቱት፡፡
  • እንዴት?
  • ከግብር የሚተርፈኝን አከራዬ ይወስዱታል፡፡
  • አሁን ቢራ አልጠጣም ልትል ነው?
  • አይ ክቡር ሚኒስትር፣ ቢራን በቲቪ ማስታወቂያ ነው የማየው፡፡
  • በቅርቡ አይደል እንዴ ደመወዝ የተጨመረው?
  • ለማን?
  • ለአንተው ነዋ፡፡
  • እኔም መስሎኝ ነበር ግን አይደለም፡፡
  • እንዴት?
  • በደመወዝ ጭማሪዬ ለመንግሥት የምከፍለው ታክስና የቤት ኪራዬ ነው የጨመረው፡፡
  • እና ታክስ እንዲቆም ነው የምትፈልገው?
  • መቼ ወጣኝ?
  • ታዲያ ምን ይደረግ?
  • ከመጠን በላይ በዛ፡፡
  • ወይ ጣጣ፡፡
  • ተደራራቢ ታክስም መፍትሔ ይበጅለት፡፡

[ክቡር ሚኒስትሩ ከአንድ ኢኮኖሚስት ጋር ምሳ ከበሉ በኋላ ሒሳቡ መጣ] 

  • እንዴ ምንድነው ይኼ?
  • ምኑ ክቡር ሚኒስትር?
  • ሒሳቡን አይተኸዋል?
  • ምን ሆነ ክቡር ሚኒስትር?
  • በጣም ከፍተኛ ነዋ፡፡
  • ምን ይደረግ ብለው ነው?
  • ይኼ እኮ የአንዳንድ ሰዎች የወር ደመወዝ ነው፡፡
  • መቼም ክቡር ሚኒስትር እርስዎን ክበብ ወስጄ አልጋብዝዎትም፡፡
  • አይ ያው ሒሳቡን ሳየው ገርሞኝ ነው፡፡
  • ምኑ ነው የገረምዎት?
  • ሰው እንዴት ይኖራል ብዬ ነዋ፡፡
  • በአስማት ነዋ የሚኖረው፡፡
  • እውነትህን ነው፤ እንዴ ይኼማ ጉድ ነው፡፡
  • አልገባኝም ክቡር ሚኒስትር?
  • እኔ መሥሪያ ቤት እኮ አሁን ከከፈልነው ሒሳብ በታች ደመወዛቸው የሆኑ በርካቶች ናቸው፡፡
  • በነገራችን ላይ ክቡር ሚኒስትር…
  • ምን?
  • የታክስ ሥርዓታችን ማሻሻያ ያስፈልገዋል፡፡
  • ምን ዓይነት?
  • ተቀጣሪዎች ላይ ከፍተኛ የታክስ ጫና ነው ያለው፡፡
  • ምን ነካህ ታክስ እኮ የዕድገታችን መሠረት ነው?
  • አውቃለሁ፤ ግን…
  • የምን ግን ነው?
  • ዕድገታችን ውድቀት እንዳያመጣ መጠንቀቅ አለብን፡፡
  • እንዴት ማለት?
  • ታክስ ለአገር ዕድገት ወሳኝ መሆኑን አውቃለሁ፤ ደግሞም እደግፋለሁ፡፡
  • ታዲያ ምን ይሁን ነው የምትለው?
  • ነገር ግን አገሪቱ ውስጥ ያለው የታክስ ሥርዓት መሻሻል አለበት፡፡
  • እኮ እንዴት?
  • ተቀጣሪዎች ላይ ያለው የታክስ ጫና መቃለል አለበት፡፡
  • መንገድ አይሠራ ነው የምትለኝ?
  • አይደለም፤ በመጀመሪያ ሕጉ የወጣው በንጉሡ ጊዜ ነው፡፡
  • ቢሆንስ?
  • እኮ ያኔ ለኑሮ አስፈላጊ የሆኑ ነገሮችን በ150 ብር ማግኘት ይቻል ነበር፡፡
  • ልክ ነው፡፡
  • ለዚያም ነው ከ150 ብር በታች የሆኑ ሰዎች ታክስ የማይከፍሉት፡፡
  • እሱን አውቃለሁ፡፡
  • አሁን ግን ክቡር ሚኒስትር በአንድ ሺሕ ብር ራሱ ከወር እስከ ወር ለመቆየት ልዩ ፍጡር መሆን አለብዎት፡፡
  • ምን ዓይነት ልዩ ፍጡር?
  • በቀን አንዴ የሚበላ የሰው ዘር፡፡
  • አትቀልድ እባክህ?
  • በዚያ ላይ ከአምስት ሺሕ ብር በላይ የሚያገኝ 35 ፐርሰንት እንዲቆረጥበት ሲደረግ፣ በወቅቱ ያን ያህል የሚያገኝ ሰው ብዙም ስላልነበር ነው፡፡
  • እሱስ አልነበረም፡፡
  • ሌላው ደግሞ በወቅቱ የእኛ ብርና የአሜሪካ ዶላር የተቀራረበ አቅም ነበራቸው፡፡
  • እና አሁን በዚያ ካሰብነው እኮ ከመቶ ሺሕ ብር በላይ የሚያገኝ ነው 35 ፐርሰንት ሊቆረጥበት የሚገባው ልትለኝ ነው?
  • እህሳ?
  • ይኼማ የማይሆን ነው፡፡
  • ለማንኛውም የታክስ ሕጉ ሊሻሻል እንደሆነ ሰምቻለሁ፡፡
  • መሻሻሉ አይቀርም፡፡
  • ስለዚህ በደንብ ይታሰብበት፡፡
  • ታክስ ከተቀነሰ ዕድገቱም ይቀንሳል፡፡
  • መሠረቱን ማስፋት ነዋ፡፡
  • ወዴት?
  • ወደ አርሶ አደሩም ይገባ፡፡
  • እ…
  • ተረቱን ረሱት እንዴ?
  • የቱን?
  • ሃምሳ ሎሚ ለአንድ ሰው ሸክሙ፣ ለሃምሳ ሰው ጌጡ፡፡
  • እሱማ ልክ ነው፡፡
  • ስለዚህ ታክሱን ጌጥ እናድርገው፡፡
  • እንዴት?
  • ለሁሉም በማካፈል፡፡

[ክቡር ሚኒስትሩ አማካሪያቸውን አስጠሩት] 

  • አቤት ክቡር ሚኒስትር፡፡
  • አዲስ የሥራ ዘመን ከፊታችን ተደቅኗል፤ ምን እያሰብክ ነው?
  • የተወሰኑ ነገሮችን በማድረግ መጀመር አለብን፡፡
  • እኮ ምን?
  • ዕቅዶቻችን ላይ ከሠራተኛው ጋር መወያየት አለብን፡፡
  • እሺ፡፡
  • ቀጣዩን ትግል ለመታገልም ዕቅዳችን ከሠራተኞቻችን ጋር መዋሀድ አለበት፡፡
  • እስማማለሁ፡፡
  • ሌላው ፕሬስ ኮንፈረንስ መጥራት አለብን፡፡
  • የምን ፕሬስ ኮንፈረንስ?
  • የምንሠራውን ሥራ ለሕዝቡ ማስታወቅ አለብን፡፡
  • በቃ እናንተው ስጡ፡፡
  • እንዴ እርስዎ እያሉ እኛ እንዴት እንሰጣለን?
  • እሺ በቃ የመንግሥት ሚዲያዎች ይጠሩ፡፡
  • የግል ሚዲያዎችም መካተት አለባቸው፡፡
  • እነሱ እኮ አፍራሾች ናቸው፡፡
  • ኃላፊነታቸውን በሚገባ የሚወጡ እንዳሉም አይርሱ፡፡
  • ነገረኞች ናቸው ብዬ ነው፡፡
  • በዚያ ላይ መንግሥትም ትኩረት እየሰጠው ነው፡፡
  • ምኑን ነው ትኩረት የሰጠው?
  • የምርመራ ጋዜጠኝነትን፡፡
  • ለምንድነው የምንመረመረው?
  • እንዳንሰርቅ!