ክቡር ሚኒስትር

[ክቡር ሚኒስትሩ አማካሪያቸው አርፍዶ ቢሮ ሲገባ አገኙት]

 

  • አንተ?
  • አቤት ክቡር ሚኒስትር፡፡
  • ሰዓቱን አይተኸዋል፡፡
  • አዎን ክቡር ሚኒስትር፡፡
  • ታዲያ አሁን ነው ሥራ መግቢያ ሰዓት?
  • ምን ላድርግ ተቸግሬ ነው?
  • የምን ችግር ነው?
  • የትራንስፖርት ነዋ፡፡
  • ሕፃን ልጅ አደረከኝ እንዴ?
  • ኧረ ክቡር ሚኒስትር እርስዎ ሕንፃ አለዎት እንጂ ሕፃን እንኳን አይደሉም፡፡
  • ምን አልክ አንተ?
  • ኧረ እርስዎ በፍጹም ሕፃን አይደሉም፡፡
  • ይኸው አንተ ግን እንደ ሕፃን ልጅ ልታታልለኝ ሞከርክ፡፡
  • ምን አድርጌ?
  • የትራንስፖርት ችግር አለብኝ ብለህ ነዋ፡፡
  • ታዲያ እውነቴን እኮ ነው፡፡
  • ቀጣፊ ደግሞ እውነቴን ነው ስትል ትንሽ አታፍርም፡፡
  • እንደ እናንተ የሆንኩ መስሎዎት ነው አይደል ክቡር ሚኒስትር?
  • እንዴት ማለት?
  • ያው እናንተ እየዋሻችሁም አታፍሩማ፡፡
  • እኔ ጠፋሁ?
  • ተሳሳትኩ ክቡር ሚኒስትር?
  • ጭራሽ ውሸትህ አልበቃህ ብሎ ስድብ ጨመርክበት፡፡
  • ክቡር ሚኒስትር እየተሳደብኩ ሳይሆን እውነቱን እያወራሁ ነው፡፡
  • ለመሆኑ ከእውነታ ጋር ትተዋወቃላችሁ?
  • ሰው ሁሉ እንደ እርስዎ ይመስሎዎታል አይደል?
  • ያልተጠየከውን አታውራ፡፡
  • ለጠየቁኝማ ምላሽ ሰጠሁ፡፡
  • እኮ የምን የትራንስፖርት ችግር ነው የምታወራው?
  • ክቡር  ሚኒስትር ከተማው ውስጥ አይደል እንዴ የሚኖሩት?
  • እሱንማ አንተ ታውቀዋለህ፡፡
  • ለነገሩ ከተማው ውስጥ ቢኖሩም መቼ የከተማውን ችግር ያውቁታል?
  • የምን ችግር ነው የምታወራው?
  • ብዙ ችግር አለ፤ አንዱና ዋነኛው ደግሞ የትራንስፖርት ነው፡፡
  • እኔም ውሸታም ያልኩህ እኮ የትራንስፖርት ችግር አለ ስትለኝ ነው፡፡
  • እንዴት?
  • የትራንስፖርት ችግርማ ተቀረፈ፡፡
  • በምን?
  • በባቡሩ ነዋ፡፡
  • አያስቁኝ እስቲ፡፡
  • እንዴት?
  • በምን ቤት አንድ ጣት ብርቅ ናት አሉ፡፡
  • አሽሙርህን ተወው፤ የትራንስፖርት ችግሩ ግን ተቀርፏል፡፡
  • አንድ ነገር ልንገርዎት ክቡር ሚኒስትር?
  • ምን?
  • በእርግጥ ይህ የባቡር ፕሮጀክት የሚደነቅ ነው፡፡ ግን…
  • የምን ግን ነው?
  • የትራንስፖርት ችግሩ ገና አልተቀረፈም፡፡
  • እኮ እንዴት ሆኖ?
  • የተጠቃሚው ቁጥርና የባቡሩ ቁጥር የሚጣጣም አይደለም፡፡
  • እንዴት ማለት?
  • ባቡሩ ቢኖርም ተጠቃሚው ከፍተኛ ስለሆነ ሠልፍ አለ፡፡
  • የምን ሠልፍ?
  • ባቡሩ ውስጥ ለመግባት ነዋ፡፡
  • እና አሁንም ሠልፍ አለ እያልከኝ ነው?
  • አዎና፡፡
  • ይኼ ሕዝብ ግን ሠልፍ ይወዳል ልበል?
  • ወዶ አይደለም፡፡
  • ምን ወዶ አይደለም ትለኛለህ? ሕዝቡማ ሠልፍ ይወዳል፡፡
  • ለዚያ ነው የከለከላችሁት?
  • ምን?
  • ሰላማዊ ሠልፍ!

[የክቡር ሚኒስትሩ ጓደኛ ሚኒስትር ስልክ ደወሉ]

  • ሄሎ ክቡር ሚኒስትር!
  • ሰላም ወዳጄ፡፡
  • ምን እየተደረገ ነው ክቡር ሚኒስትር?
  • ምን ተደረገ?
  • መፈንጫ እኮ ሆነ፡፡
  • ምኑ?
  • ይኼ የፋይናንስ ሴክተር፡፡
  • እኔ እኮ ተናግሬ ነበር፡፡
  • ምን ብለው?
  • ሴክተሩን ለኪራይ ሰብሳቢዎች መልቀቅ የለብንም ብዬ፡፡
  • እርስዎ እኮ ክቡር ሚኒስትር፣ ሚኒስትር ብቻ አይደሉም፡፡
  • ታዲያ ምንድን ነኝ?
  • ነብይም ነዎት፡፡
  • ልክ ብለሃል፡፡
  • ስለዚህ ምን ተሻለ?
  • በአፋጣኝ ዕርምጃ መውሰድ አለብን፡፡
  • ምን ዓይነት ዕርምጃ?
  • ፖሊሲ መረቀቅ አለበት፡፡
  • የምን ፖሊሲ?
  • የፋይናንስ ሴክተሩን በጥብቅ የሚቆጣጠር ነዋ፡፡
  • ክቡር ሚኒስትር ከፖሊሲ በላይ ግን የሚያስፈልገን ነገር አለ፡፡
  • ምን?
  • የማስፈጸም ብቃት፡፡
  • እሱማ ሳይታለም የተፈታ ጉዳይ ነው፡፡
  • ከፍተኛ አደራ ነው የተሸከምነው፡፡
  • ስለዚህ በሸክማችን ላይ ሸክም የሆኑ ኪራይ ሰብሳቢዎችን ማራገፍ አለብን፡፡
  • እኮ እንዴት?
  • መጀመር ያለብን ከራሳችን ነው፡፡
  • ምኑን?
  • ማራገፉን፡፡
  • ሁላችንም ተራገፍን በሉኝ፡፡
  • መጀመሪያ ከፍተኛ ክብደት ያላቸውን ማራገፍ፡፡
  • እኮ እሱ ነው ችግሩ?
  • ምኑ ነው ችግሩ?
  • እነሱ በቀላሉ አይራገፉም?
  • ለምን?
  • ኔትወርካቸው ውስብስብ ነው፡፡
  • ውስብስቡን ኔትወርክ መበጣጠስ ነዋ፡፡
  • ቢቻልማ ደስ ይለኛል፡፡
  • አይቻልም የሚባል ነገር የለም፡፡
  • እንዴት ክቡር ሚኒስትር?
  • የኢትዮጵያን ዕድገት እስቲ ተመልከት፡፡
  • እንዴት ማለት?
  • ብዙዎች ይህ ዕድገት ዕውን ይሆናል ብለው አያምኑም ነበር፡፡
  • እርሱስ ልክ ነዎት፡፡
  • ከአንጀት ካለቀሱ እንባ አይገድም አይደል የሚባለው?
  • እና ሁላችንም ልናለቅስ?
  • የሚያለቅሰው ያለቅሳል፤ የሚስቀውም ይስቃል፡፡

[አንድ ኢንቨስተር ክቡር ሚኒስትሩ ቢሮ ገባ] 

  • እንዴት ዋሉ ክቡር ሚኒስትር?
  • እንዴት ዋልክ?
  • ቢዚ እንደሆኑ አውቃለሁ ግን ተቸግሬ ነው፡፡
  • ምን ልርዳህ?
  • ክቡር ሚኒስትር እርስዎ ጋ የመጣሁት ጨንቆኝ ነው፡፡
  • እኮ ምንድን ነው የሚያስጨንቅህ?
  • ይኼ የውጭ ምንዛሪ ጉዳይ ነዋ፡፡
  • ይኸው ዕርምጃ መውሰድ ጀምረናል፡፡
  • አውቃለሁ ግን ችግሩ ዘርፈ ብዙ ነው፡፡
  • የምን ችግር ነው?
  • ይኸው እኔ የውጭ ምንዛሪ ማግኘት አልቻልኩም፡፡
  • ለምን?
  • መክፈል አልቻልኩም፡፡
  • ምንድን ነው መክፈል ያልቻልከው?
  • ጉርሻውን ነዋ፡፡
  • የምን ጉርሻ?
  • የዶላር ጉርሻውን፡፡
  • አልገባኝም አብራራልኝ፡፡
  • ክቡር ሚኒስትር ለአንድ ዶላር ሦስት ብር መክፈል አለብኝ፡፡
  • ለምን ሲባል?
  • ዶላሩን ለማግኘት ነዋ፡፡
  • ካልከፈልክስ?
  • ዶላሩ አይታሰብም፡፡
  • ትቀልዳልህ?
  • እኔም አንዳንዴ ቀልድ ቢሆን ደስ ይለኝ ነበር፡፡
  • ወይ ጉድ፡፡
  • ግን የምር ነው?
  • አገሪቷ የኪራይ ሰብሳቢ ሆናለቻ፡፡
  • እኔም ይኼ አሳስቦኝ ነው የመጣሁት፡፡
  • ምኑ? ኪራይ ሰብሳቢነቱ?
  • አዎ ክቡር ሚኒስትር በሚቀጥለው ሳምንት ሊጀመር ነው አይደል?
  • ምኑ?
  • ፓርላማው፡፡
  • አዎን፡፡
  • ብዙ ኃላፊነት አለባችሁ፡፡
  • አውቃለሁ፡፡
  • ሙሉ ፓርላማው የእናንተ እንደሆነ ይታወቃል፡፡
  • እ…
  • ስለዚህ ቅንና ቆራጥ አመራሮች ከሌሉን አለቀልን፡፡
  • እንዴት ማለት?
  • አንድ የሰማሁትን ነገር ላጫውትዎት፡፡
  • እሺ፡፡
  • የኬንያ ኤርዌይስን ያውቁታል?
  • በሚገባ፡፡
  • ከጥቂት ዓመታት በፊት ከእኛም አየር መንገድ የተሻለ ነበር፡፡
  • አውቃለሁ፡፡
  • አሁን ግን በአፍ ጢሙ እያሽቆለቆለ ነው፡፡
  • ምን ይደረጋል?
  • ለምን እንደሆነ ያውቃሉ?
  • አላውቅም፡፡
  • መንስዔው ሙስና ነው፡፡
  • እንዴት?
  • አየር መንገዱ እየከሰረ ያለው ሆን ተብሎ ነው፡፡
  • ለምን?
  • የኬንያ ባለሥልጣናት ከባለሀብቶች ጋር ተመሳጥረው አየር መንገዱ ከከሰረ በኋላ ባለሀብቶቹ እንዲገዙት ለማድረግ ነዋ፡፡
  • ይኼማ ግፍ ነው፡፡
  • ሙስና ግፍ አያውቅም፡፡
  • እውነት ነው፡፡
  • ስለዚህ እኛም ጋ እያቆጠቆጠ ያለው ሙስና ከአሁኑ ሃይ ካልተባለ መዘዙ የከፋ ነው፡፡
  • ልክ ብለሃል፡፡
  • ስለዚህ ሳይቃጠል በቅጠል ነው፡፡
  • ሙሰኛማ ቅጠል ሳይሆን ቅጣት ነው የሚያስፈልገው፡፡

[ክቡር ሚኒስትሩ ጸሐፊያቸው ጋ ሄዱ]

  • ጨረሽልኝ?
  • ምኑን?
  • ሪፖርቱን፤ ለስብሰባው እፈልገዋለሁ እኮ?
  • አሁን እጨርሰዋለሁ፡፡
  • እስካሁን ምን እያደረግሽ ነው?
  • ኢንተርኔት ላይ እያየሁ፡፡
  • ምንድን ነው የምታይው?
  • አይድል ሾው፡፡
  • አይድል እንዳትሆኚ መስሎኝ ይኼን ሥራ የሰጠሁሽ፡፡
  • ሁሉም ሰው የሚከታተለው ሾው ነው እኮ?
  • የምን ሾው ነው ያልሽኝ?
  • ባላገሩ ሾው፡፡
  • የከተማ ልጅ ትመስሊኝ ነበር እኮ?
  • ክቡር ሚኒስትር አልገባዎትም፣ የዘፋኞች ውድድር የሚካሄድበት ሾው ነው፡፡
  • ዘፋኝም ልትሆኚ አስበሽልኛል?
  • አይ ክቡር ሚኒስትር፣ የአሸነፈውን ዘፋኝ በጣም ስለምወደው ነው፡፡
  • ማን ነው ያሸነፈው?
  • ዳዊት ፅጌ፡፡
  • ማን ፅጌ? የአሸባሪዎች ውድድር ነው እንዴ ያልሽኝ?
  • አይደለም አይደለም ክቡር ሚኒስትር፣ ዳዊት ፅጌ ነው ያልኩት፡፡
  • ለመሆኑ እንዴት አሸነፈ?
  • ሕዝብ መርጦት ነዋ፡፡
  • ከኢሕአዴግ ሌላ ሕዝብ የመረጠው አለ?
  • ይኼ እኮ የሙዚቃ ውድድር ነው፡፡
  • አሁን አሸናፊው ምን ይሆናል?
  • ንጉሥ ነዋ፡፡
  • እኛ የዘውድ አገዛዙ አገሪቷን ወደኋላ አስቀርቷታል እያልን፣ እናንተ በጐን ንጉሥ ልታነግሡ?
  • የሙዚቃ ንጉሥ ነው ያልኩት፡፡
  • ለመሆኑ ሕዝብ በነቂስ ወጥቶ ነው የመረጠው?
  • በጣም በርካታ ሕዝብ ነው የመረጠው፡፡
  • የምርጫ ኮሮጆዎቹስ የታሸጉ ነበሩ?
  • በሞባይል ቴክስት ነው የሚመረጠው፡፡
  • የአመራርጥ ሒደቱ ከእኛ ይለያላ?
  • በዚህ ብቻ ሳይሆን በሌላም ይለያል፡፡
  • በምን?
  • ምርጫው ፍትሐዊና ነፃ ነበር!