ክቡር ሚኒስትር

[ክቡር ሚኒስትሩ የቀላል ባቡር ፕሮጀክት ጅማሬ ሥነ ሥርዓት ላይ ተገኝተው ከተጋባዥ እንግዶች መካከል ከአንደኛው ጋር እያወሩ ናቸው]

 

  • አንተ ለመሆኑ እዚህ አገር አለህ እንዴ?
  • አለሁ ክቡር ሚኒስትር፣ የት እሄዳለሁ ብለው ነው?
  • እኔማ አይቼህ ስለማላውቅ ከአገር የወጣህ መስሎኝ ነው፡፡
  • አገሬን ጥዬማ የትም አልሄድም፡፡
  • አዎ አገራችን እያደገች ስለሆነ ጥሎ መሄድማ ጥሩ አይደለም፡፡
  • ከአገር ጥፉ ጥፉ የሚያሰኙ በርካታ ችግሮችማ አሉ፡፡ ግን…
  • ግን ምን?
  • እየታየ ባለው የልማት ጅማሬ ባንፅናና ኖሮ መጥፋታችንማ አያስገርምም፡፡
  • ምን ችግር ኖሮ ነው እንዲህ የተመረርከው?
  • ራሳችሁ በግልጽ ያመናችሁዋቸው ችግሮች ምን ሊባሉ ነው?
  • በእርግጥ ችግሮች ቢኖሩም እነሱን በቆራጥነት ለመፍታት ወስነናል፡፡
  • ቆራጥነቱ እኮ ከወሬ አላልፍ እያለ ነው፡፡
  • ይኼው ባቡሩን ሥራ እንዳስጀመርነው ሌላውንም እናቀላጥፈዋለን፡፡
  • የዘገየው ባቡር ሥራ መጀመሩ ደስ ቢልም፣ የእናንተ ቆራጥነት ግን ያሳስበኛል፡፡
  • ለምን ያሳስብሃል?
  •  ከስብሰባ የመግለጫ ጋጋታ በስተቀር ተግባራዊነቱ ላይ ታጠራጥራላችሁ፡፡
  • ስብሰባዎቻችን እኮ የስትራቴጂዎቻችን መቀመሪያ ናቸው፡፡
  • ብዙዎቹ ስብሰባዎቻችሁ ደግሞ ዴሞክራሲና ፍትሕን ማዳፈኛ እየሆኑ ነው፡፡
  • ምሳሌ አቅርብልኝ፡፡
  • ለምሳሌ ከመቐለው ጉባዔ በኋላ ቴሌቪዥኑን ሳየው ወሬው ሁሉ ዴሞክራሲ አይሸትም፡፡
  • ምንድነው የሚሸተው?
  • የተለመደው የጎረና ፕሮፓጋንዳ፡፡
  • የአንተ አፍንጫ ታሞ ቢሆንስ?
  • ይኼ እኮ ነው ችግራችሁ፡፡
  • ምኑ?
  • ተቃውሞ ሲቀርብ ለማረም ከመሞከር ይልቅ ማጣጣል፡፡
  • ስለዚህ?
  • ስለዚህማ ዛሬ በደስታ የተጀመረው የባቡር ትራንስፖርት ዓይነት በሕዝብ ተቀባይነት ያለው ሥራ አሳዩ፡፡
  • ተቃዋሚ ትመስላለህ፡፡
  • መደገፍም መቃወምም መብት መሰለኝ፡፡
  • አንዴ እንኳ ምሥጋና ከአፍህ አይወጣም?
  • ምሥጋና ለሚገባው ይቀርባል፡፡ የሚወቀሰው ደግሞ በደንብ ይቀጠቀጣል፡፡
  • ምን ይሻልሃል?
  • ወቀሳ ማቅረብ፡፡
  • ወቀሳ ምን ያደርግልናል?
  • በአድርባዮች ሽንገላ የሞቀ ልባችሁን ቀዝቀዝ ያደርገዋል፡፡
  • እንዲያው ምን ቢደረግ ይጥማችኋል?
  • ልባችንን ማሸነፍ ከቻላችሁ በቂ ነው፡፡
  • አሁንስ?
  • አሁንማ ሩብ መንገድ አልደረሳችሁም፡፡
  • ተሳስተሃል፡፡
  • አንድ ነገር ልንገርዎት?
  • ምን?
  • ከውዳሴ ይልቅ ለወቀሳ ትኩረት ስጡ፡፡
  • እስቲ ይሁና!

[ክቡር ሚኒስትሩ ከሾፌራቸው ጋር ወደ ቤት እየተመለሱ ነው]

  • የባቡሩን ሥራ መጀመር እንዴት አገኘኸው?
  • ደስ ይላል… ግን…
  • ግን ምን?
  • በቻይና የሚነዳ ባቡር ማየት ይገርማል፡፡
  • የእኛዎቹ እኮ እስከሚሠለጥኑ ነው፡፡
  • ቻይና ለወራት ሠልጥነው ተመለሱ ተብሎ እኮ በቴሌቪዥን ሲታዩ ነበር፡፡
  • ቢሆንም የሥራ ላይ ልምምድ ማድረግ ይገባቸዋል፡፡
  • የሚገርመው የፌርማታዎቹን ስያሜ አየተንተባተበች የምትጠራው ሴት መንገደኞችን ታሳስታለች፡፡
  • ምን ብላ ጠራች?
  • ስለ ምትኮላተፍ አይሰማም፡፡
  • ለጊዜው መቻል ነው፡፡
  • ክቡር ሚኒስትር በአማርኛ ባይነገረን እኮ ሁላችንም ቃሊቲ ገብተን ነበር፡፡
  • ምን ልትሆኑ?
  • ሳንዘጋጅ እስረኞችን ልንጠይቅ፡፡
  • አሹፈህ ሞተሃል፡፡
  • እውነቴን ነው እኮ?
  • ሌላስ?
  • ለዘመናት አንበሳ አውቶቡስ በኢትዮጵያውያን እንዳልተነዳ ለባቡራችን ቻይና መሆኑ አናዶኛል፡፡
  • ለጊዜው ነው ሲባል አልሰማህም እንዴ?
  • ለጊዜው ነው እየተባለ ስንቱ ዘለዓለማዊ ለመሆን ሲታገል እያየን?
  • ማነው እሱ?
  • እሱን ሆድ ይፍጀው፡፡
  • ከማን ጋር ነው የምትውለው?
  • ከጓደኞቼ ጋር፡፡
  • ስንተዋወቅ?
  • ምኑን?
  • ውሎህን ነዋ፡፡
  • ሆሆሆ ክቡር ሚኒስትር፡፡
  • አይዞህ ለጨዋታ ያህል ነው፡፡
  • አዎ ቻይናም በሰፊው እየተጫወች ነው፡፡
  • ምን ዓይነት ጨዋታ?
  • በባቡር ፌርማታዎች ላይ የተጻፉትን አይተዋል?
  • ምን ተጻፉ?
  • ቻይንኛ ይሁኑ አማርኛ የማይገቡ ነገሮች በሽ ናቸው፡፡
  • ወሬኛ!

[ክቡር ሚኒስትሩ ቤታቸው ገብተው ከባለቤታቸው ጋር ምሣ ለመብላት ገበታ ቀርበዋል]

  • የባቡሩን ሥራ መጀመር በአካል ተገኝተሽ ብታይው ጥሩ ነበር፡፡
  • ሥራ አላጣሁም እባክህ፡፡
  • ምነው?
  • ቴሌቪዥኑ እየደጋገመ ካሳየኝ በቂ ነው፡፡
  • ምን ምን አየሽ?
  • ሕዝቡ ተሳፍሮ ሲጓዝና በየፌርማታው ሲወርድ አየሁ፡፡
  • ምን ተሰማሽ?
  • ከእኔ ይልቅ ወይዘሮ ስርጉት ያሉት ይሻላል፡፡
  • እሳቸው ደግሞ ምን አሉ?
  • ለዚህ ትውልድ ነው እንጂ ለእኛ ብርቅ አይደለም አሉ፡፡
  • ምን አልሻቸው?
  • እኔ ምን እላለሁ? እሳቸው ከአዲስ አበባ ድሬዳዋ የተንፈላሰሱበትን ዘመን እያስታወሱ ብዙ አወሩ፡፡
  • ምንድነው የሚሉት?
  • ለትውልዱ ዘመናዊ ባቡር ሥራ መጀመሩ ጥሩ ነው፡፡ ነገር ግን የበለጠ መሥራት እንጂ  በአንድ ጅምር መኩራራት አይገባም ነው ያሉት፡፡
  • ይኼው ከአዲስ አበባ - አዋሽ - ጂቡቲ፣ ከመቐለ - ወልዲያ - አዋሽ - ጂቡቲ ሥራው ቀጥሏል፡፡ ወደ ደቡብና ምዕራብ ኢትዮጵያም እንዲሁ ይቀጥላል፡፡
  • እሳቸው ይኼንን አላጡትም፡፡
  • ታዲያ ምን እያሉ ነው?
  • አንድ ነገር ከያዘ የማይለቀው ቴሌቪዥን በወሬ እንዳያደነቁረን ነው የሚሉት፡፡
  • ተደጋግሞ ቢወራ ምን ይላል?
  • እጅ እጅ ይላል ነው የሚሉት፡፡
  • ምኑ ነው እጅ እጅ የሚለው?
  • ድግግሞሹ፡፡
  • ወይ ጣጣ?

[ክቡር ሚኒስትሩ በጠዋት ቢሮአቸው ገብተው ጸሐፊያቸው አማካሪያቸውን እንድትጠራ ባዘዙዋት መሠረት መጣ]

  • እንዴት አደሩ ክቡር ሚኒስትር?
  • ምን ሰላም አለ ብለህ ነው?
  • ምን ሆኑ?
  • ትናንት ባቡሩ ሥራ ከጀመረ ጊዜ ጀምሮ ጨቅጫቂዎች በዝተውብኝ ስናደድ ነው ያደርኩት፡፡
  • አይ ክቡር ሚኒስትር ምድረ ኪራይ ሰብሳቢ የፈለገውን ቢያወራ ለምን ይናደዳሉ?
  • እንደሱ ነው ብለህ ነው?
  • አልገባኝም?
  • ዙሪያችንን ያሉ ሰዎች እኮ ናቸው በነገር የሚሸነቁጡን፡፡
  • እነሱ ያውሩ እኛ ሥራ ላይ ነን፡፡
  • ይኼም አባባል እያስተቸን ነው፡፡
  • ለምን?
  • ተቃውሞ መስማት አትፈልጉም እየተባለ፡፡
  • ክቡር ሚኒስትር ምድረ ኪራይ ሰብሳቢን ዝም በሉዋቸው፡፡
  • ሥራ ላይ ነን እያላችሁ አበዛችሁት እያሉን ነው እኮ?
  • ምን እንበል ታዲያ ክቡር ሚኒስትር?
  • እኔም ግራ ገብቶኛል እባክህ፡፡
  • ምኑ?
  • ይህ ሕዝብ ምን እንደሚፈልግ?
  • መንጌም ያለው ይኸንን ነበር እኮ?
  • የእሱን ስም አታንሳብኝ፡፡
  • ለምን ክቡር ሚኒስትር?
  • ያቅለሸልሸኛል፡፡
  • እውነት ነው ክቡር ሚኒስትር ወደ ጉዳያችን እንግባ፡፡
  • የእነዚያን ሰዎች ፕሮፖዛል አየኸው?
  • ክቡር ሚኒስትር የየትኞቹን?
  • የአርቲስቶቻችንን ነዋ?
  • የሚገርሙ ፕሮፖዛሎችን ነው ያቀረቡት፡፡
  • ጠቅለል አድርገህ ንገረኝ እስቲ፡፡
  • ሲጀምሩ “እኛ ልማታዊ አርቲስቶች …” ነው ያሉት፡፡
  • እሺ?
  • የፕሮጀክቶቹ ጨረታዎች “ውስን ይሁኑልን” ብለዋል፡፡
  • ምን ማለት ነው?
  • ግልጽ ጨረታ እንዳይሆን፡፡
  • በጄ?
  • በ“ውስን” ጨረታዎች መሳተፍ ያለባቸውን የልማታዊ አርቲስቶችን ስም ዝርዝሮችም አቅርበዋል፡፡
  • እነ ማንን?
  • “ልማታዊ” የሚባሉትን ዋነኞቹን ነዋ፡፡
  • ከዚያስ?
  • እንደየፍላጎታቸው ፕሮጀክቱ ከተሰጣቸው በኋላ የድጋፍ ደብዳቤ እንዲጻፍላቸው፡፡
  • ለማን?
  • የድጋፍ ደብዳቤው ለየመንግሥታዊ መሥሪያ ቤቶች ተልኮ ስፖንሰርሺፕ እንዲጠይቅላቸውም ይፈልጋሉ፡፡
  • ይህንን ሁሉ ትብብር ምን ስለሆኑ ነው የሚጠይቁት?
  • “ልማታዊ አርቲስቶች በመሆናችን ነው” ብለዋል፡፡
  • የእኛ ጥቅም ምንድነው?
  • ክቡር ሚኒስትር መደራደር ነዋ፡፡
  • እኛው የራሳችንን ፕሮጀክትና የድጋፍ ደብዳቤ እየሰጠን እንደራደር?
  • ክቡር ሚኒስትር ዘመኑ እኮ የጥበብ ነው፡፡
  • የምን ጥበብ?
  • “ልማታዊ አርቲስቶች” የሚተውኑት ነዋ፡፡
  • እኛም ከእነሱ ጋር እንተውን እንዴ?
  • የግድ ይላል ክቡር ሚኒስትር፡፡
  • እኛ የምንተውነው ለምንድነው?
  • በዚህ ዘመን ማንም በድፍረት መተወን ስለሚችል፡፡
  • ያለ ሙያችን?
  • ክቡር ሚኒስትር ማን ሙያ ኖሮት ነው የሚተውነው? ለምሳሌ ልማታዊ የሚባሉት አርቲስቶቹም በጨበጣ እኮ ነው የሚተውኑት፡፡
  • እነሱ እኮ መድረኩን፣ ቴሌቪዥኑን፣ ሬዲዮኑን፣ ፊልሙን ሳይቀር በሙያቸው ተቆጣጥረውታል፡፡
  • ክቡር ሚኒስትር አይመኗቸው፡፡ በጨበጣ መተወን ስለቻሉ እኮ ነው እኛንም…
  • እኛንም ምን?
  • በቁጥጥር ሥር ያዋሉን፡፡
  • በል ዝም በል!

[የክቡር ሚኒስትሩ አማካሪ ከወጣ በኋላ ጸሐፊያቸው የዳያስፖራ እንግዳ እንዳለ ነግራቸው እንዲገባ ተደረገ]

  • እስካሁን ወደ አሜሪካህ አልተመለስክም እንዴ?
  • አለሁ ክቡር ሚኒስትር፡፡
  • ምነው እዚህ ቆየህ እባክህ?
  • አዲሱን ዓመት ከቤተሰብና ከወዳጆቼ ጋር አክብሬ ልመለስ ብዬ ነው፡፡
  • በዓል አገር ቤት ማክበር ደስ ይላል አይደል?
  • በጣም እንጂ፡፡ ባቡሩን ባየንበት ዓይን ሌላው ግን…
  • ሌላው ምን?
  • አንዳንድ የማያቸውና የምሰማቸው ነገሮች ግን እርምት ያስፈልጋቸዋል፡፡
  • ለምሳሌ?
  •  በአዲሱ ዓመት ዋዜማ የሰማሁት አናዶኛል፡፡
  • ምን አናደደህ?
  • ጠቅላይ ሚኒስትሩን ጨምሮ ከፍተኛ የመንግሥት ባለሥልጣናት በተገኙበት ሥነ ሥርዓት ላይ የሰማሁት ነገር አበሳጭቶኛል፡፡
  • እስኪ ንገረኝ፡፡
  • መድረኩን የሚመሩት አስገራሚ ጉዶች አዲሱ ዓመት የሚጀምረው ከሌሊቱ ስድስት ሰዓት ነው ብለው አረፉት፡፡
  • እነማን ናቸው?
  •  “ልማታዊ አርቲስቶች” የምትሉዋቸው፡፡
  • ዘመኑ የሚቀየረው መቼ ነበር?
  • አገሪቱ በራሷ ካላንዴር መሠረት ቀኗ የሚቀያየረው ሁሌም ከንጋቱ አሥራ ሁለት ሰዓት ነው፡፡
  • ነው እንዴ?
  • አዎን፡፡
  • ማረጋገጫ አለው?
  • መንግሥት ለበዓላት መድፍ የሚተኩሰው በዚያ ሰዓት መሆኑ እኮ የአገሪቱ ልዩ መታወቂያ በሆነው ካሌንደር ምክንያት ነው፡፡
  • ልማታዊ አርቲስቶቹ ከየት አመጡት ታዲያ?
  • የዘንድሮ ‘ዕውቀት’ እኮ እንትን ሆኗል፡፡
  • ምን ሆነ?
  • ኮንትሮባንድ፡፡
  • ማለት?
  • ከየትም እየቃረሙ ማውራት የአዋቂነት ምልክት ከሆነ ከኮንትሮባንድ ዕቃ ተለይቶ አይታይም፡፡
  • ይኼ ነው ያበሳጨህ?
  • ሌላም አለ፡፡
  • ምንድነው እሱ?
  • እነዚህ “ልማታዊ …” የምትሉዋቸው ሰዎች በጣም አብዝተውታል፡፡
  • ምንድነው ያበዙት?
  • ጨረታ በውስን እየተባለ ያለ ውድድር ይሰጣቸዋል፡፡ በመንግሥት ስፖንሰርሺፕና በመሳሰሉት ሁሉንም ነገር መቆጣጠራቸው ብዙዎችን ቅር አሰኝቷል፡፡
  • እነሱ በትጋት ሲንቀሳቀሱ መደገፍ ተገቢ አይደለም ነው የምትለው?
  • ድጋፍ ሁሉንም አሳታፊ፣ ትክክለኛ፣ ፍትሐዊና ከሙስና የፀዳ ሲሆን ጥሩ ነው፡፡
  • አሁንስ?
  • አሁንማ የሚታየው አድልኦና መጥፎ መንፈስ የከበበው ድርጊት ነው፡፡
  • መጥፎ መንፈስ ስትል አልገባኝም?
  • ይኼንንማ እርስዎም ያውቁታል፡፡
  • ምኑን ነው የማውቀው?
  • በልማት ስም ከሚያጭበረብረውና ከሚያወናብደው ጋር አብሮ እፍ ማለቱን፡፡
  • ለመሆኑ ልማታዊ ማለት ምን እንደሆን ታውቃለህ?
  • ልማታዊ ማለት በሚገባ ይገባኛል፡፡ አልገባህ ያለኝ ሌላው ነው፡፡
  • ምኑ ነው የማይገባህ ታዲያ?
  • “ልማታዊ አርቲስት፣ ጋዜጠኛ፣ መሐንዲስ፣ ነጋዴ…” ብሎ ነገር ግን አይገባኝም፡፡
  • ለምን አይገባህም?
  • “ልማታዊ እስስት” ማለት ስለሚመስለኝ፡፡
  • እንዴት እባክህ?
  • እስስት በየደረሰበት አይደል ቀለሙን የሚቀያይረው?
  • እና?
  • እነዚህም ልማታዊ የምትሏቸው አካላቸው ከእናንተ ጋር ይምሰል እንጂ ልባቸው ሌላ ጋ ነው፡፡
  • የት?
  • ልባችን እያወቀው?
  • ልብህ ካወቀው ንገረኛ?
  • ሞቅ ሲላቸው ምን እንደሚሉዋችሁ ማየት ይፈልጋሉ?
  • የት?
  • ቺቺኒያ!
  • የባሰ አታምጣ!