ክቡር ሚኒስትር

[ክቡር ሚኒስትሩ የግምገማ አዳራሹ ውስጥ ከመግባታቸው በፊት ከሌላ ሚኒስትር ጋር እያወሩ ነው]

 

  • ምነው ክቡር ሚኒስትር?
  • ምነው?
  • ፊትዎ ጠቋቁሯል፡፡
  • ሰሞኑን ግምገማም አይደል እንዴ?
  • ቢሆንስ ታዲያ?
  • እንቅልፍ ተኝቼ አላውቅም፡፡
  • ግምገማና እንቅልፍ ምን አገናኘው?
  • እንዴት አያገናኘው?
  • ንፁህ ሕሊና መልካም ትራስ ነው ሲባል አልሰሙም?
  • አልጋማ እንቅልፍ እንደማያመጣ አሁን ነው የተረዳሁት፡፡
  • እንዴት ክቡር ሚኒስትር?
  • አልጋ እንቅልፍ ቢያመጣማ ኖሮ ዋናው ሥራዬ እንቅልፍ ነበረ፡፡
  • አልገባኝም ክቡር ሚኒስትር?
  • አልጋዬ ዋተር ቤድ ነው፡፡
  • ዋተር ቤድ?
  • አዎና፡፡
  • ከየት አምጥተው?
  • እ…
  • ማለቴ ውድ ነው ብዬ ነው?
  • አዎ ስጦታ ተሰጥቶኝ ነው፡፡
  • ይቻላል እንዴ?
  • ምኑ?
  • ስጦታ መቀበል፡፡
  • መቼም እምቢ አይባል?
  • ለነገሩ እርስዎ ገር ነዎት እኮ፡፡
  • እንዴት?
  • እሺ ባይ ነዎት ማለቴ ነው፡፡
  • እምቢ የሚለው ቃል ይከብደኛል፡፡
  • ሁሌ እሺ ማለት ግን ጉዳት አለው፡፡
  • የምን ጉዳት?
  • እምቢ ማለት ያለብዎት ነገሮች አሉ፡፡
  • ለምሳሌ?
  • ሙስና፡፡
  • እ…
  • ለማንኛውም ንፁህ መሆን ነው የሚያዋጣው፡፡
  • አሁን አንተ ንፁህ ነህ?
  • ንፁህ ራሱ በእኔ ዓይን ሲታይ ቆሻሻ ነው፡፡
  • እና ንፁህ ነኝ እያልክ ነው?
  • እንዴታ?
  • እኔ አላምንህም፡፡
  • ለምን?
  • በአሁን ዘመን እንደዚህ ዓይነት ሰው አለ?
  • እኔ የምመራው በዘመን አይደለም፡፡
  • ማነው መሪህ?
  • ንፁህ ሕሊናዬ፡፡
  • ወይ ሕሊና?
  • ምነው ክቡር ሚኒስትር?
  • በአሁን ዘመን ሰው ሕሊና የለውም፡፡
  • እንዴት?
  • ቢኖረውም ደግሞ ደንዝዟል፡፡
  • በምን?
  • በገንዘብ፡፡
  • በገንዘብ እኮ አይኖርም ክቡር ሚኒስትር፡፡
  • ታዲያ በደመወዝ ነው የሚኖረው?
  • ገንዘብማ ሕይወት እንደማያመጣ ቅድም እኮ ሲነግሩኝ ነበር፡፡
  • ምን ብዬ?
  • ውድ ዋጋ የሚያወጣ አልጋ ቢኖርዎትም፣ እንቅልፍ ግን ሊያመጣልዎት አልቻለም፡፡
  • እ…
  • ለማንኛውም ንፁህ መሆን ያዋጣል፡፡

[ክቡር ሚኒስትሩ ወደ ግምገማ አዳራሹ ገቡ፡፡ ግምገማውም ተጀመረ፡፡ ክቡር ሚኒስትሩ መገምገም ጀመሩ]

  • ክቡር ሚኒስትር፡፡
  • አቤት፡፡
  • ግምገማችንን በእርስዎ ነው የምንጀምረው፡፡
  • እሺ፡፡
  • ክቡር ሚኒስትር አድሮ ቃሪያ ሆነዋል፡፡
  • ደግሞ ማንን አቃጠልክ ልትሉኝ ነው?
  • ባለፈው ጉባዔያችን ክፉኛ ተገምግመው ነበር፡፡
  • እ…
  • አሁንም ከስህተትዎ ሊታረሙ አልቻሉም፡፡
  • ምን አጠፋሁ?
  • ይህን ዶክመንት ይመለከቱታል?
  • ምንድነው እሱ?
  • እርስዎ ላይ የቀረበ ክስ ነው፡፡
  • የምን ክስ?
  • አይቸኩሉ፤ አንድ በአንድ ይሰሙታል፡፡
  • እሺ ቀጥል፡፡
  • ከአልጋዎት እንጀምር፡፡
  • አልጋዬ ደግሞ ምን ሆነ?
  • አልጋዎት ዋተር ቤድ ነው፡፡
  • ታዲያ መደብ ላይ ልተኛ?
  • ሰርቀው ውኃ ላይ ከሚተኙ፣ ሰርቀው መደብ ላይ ቢተኙ ይሻላል፡፡
  • ማን መደብ ላይ ተኝቶ አሳየን?
  • ለመሆኑ ከየት አመጡት?
  • ወዳጆቼ ስጦታ ሰጥተውኝ፡፡
  • እርስዎስ ምን ስጦታ ሰጧቸው?
  • የምን ስጦታ?
  • የ50 ሺሕ ብር ስጦታ ተቀብለው የ50 ሺሕ ዶላር ስጦታ እኮ ነው የሰጡት?
  • ኧረ እኔ ምንም አልሰጠኋቸውም፡፡
  • ማስረጃ እኮ እዚህ አለ፡፡
  • ወይ ጣጣ፡፡
  • ሒስዎትን ይውጣሉ?
  • ሌላ ምን ምርጫ አለኝ?
  • ልቀጥል?
  • እሺ ቀጥል፡፡
  • የባለቤትዎ መኪና ከየት ነው የመጣው?
  • ከጀርመን፡፡
  • የጀርመን መኪና መሆኑንማ አውቃለሁ፤ ጥያቄዬ ማን ነው የሰጣቸው?
  • ዘመዶቿ ነው የላኩላት፡፡
  • ውሸት!
  • የምን ውሸት ነው?
  • ማስረጃው እኮ እጄ ላይ ነው፡፡
  • ምን ይላል?
  • መኪናውን እዚህ አገር ያስገባው ድርጅት እዚህ ማስረጃ ላይ አለ፡፡
  • እ…
  • እርስዎም በምትኩ ትልቅ መሬት ድርጅቱ እንዲያገኝ አድርገዋል፡፡
  • እ…
  • ሒስዎትን ይውጣሉ አይውጡም?
  • ቆይ መጀመሪያ መድኃኒቴን ልዋጥ፡፡
  • ክቡር ሚኒስትር ከጊዜ ወደ ጊዜ እየጨመሩ ነው እኮ የመጡት?
  • ኧረ እኔ ክብደት ብቻ ነው የጨመርኩት፡፡
  • ከክብደት ውጪ ሀብትና ሌብነትም ጨምረዋል፡፡
  • እ…
  • ሒስዎትን ይውጣሉ አይውጡም?
  • እውጣለሁ፡፡
  • እንቀጥል፡፡
  • እሺ፡፡
  • ፋብሪካ ያለው ሚኒስትር ሳውቅ እርስዎ የመጀመሪያዬ ነዎት፡፡
  • የምን ፋብሪካ? በስሜ ምንም ፋብሪካ የለም፡፡
  • በስምዎትማ አይደለም፡፡
  • ታዲያ በማን ስም ነው?
  • በአክስትዎት ልጅ፡፡
  • እ…
  • ገጠር ያለ ገበሬ እንዴት ነው ፋብሪካ ሊኖረው የሚችለው?
  • እኔ ምን ላድርግ? ራሳችሁ ናችኋ፡፡
  • ምን ማለት ነው?
  • መንግሥት ኢኮኖሚያችን ከግብርና ወደ ኢንዱስትሪ መቀየር አለበት ይላል፡፡
  • ታዲያ ቢልስ?
  • ስለዚህ ዘመዶቼ ከግብርና ወጥተው ወደ ኢንዱስትሪ ዘርፉ እንዲቀላቀሉ አድርጌያለሁ፡፡
  • ውሸት ነው!
  • እ…
  • ሁሉም ማስረጃ በእጄ አለ፡፡
  • ምን ተሻለኝ?
  • ሒስዎትን ይውጣሉ ወይስ አይውጡም?
  • እንዳያንቀኝ እኮ ፈርቼ ነው፡፡
  • ማወራረጃ ይፈልጋሉ?
  • እህሳ?
  • ከፈለጉ በውኃ አሊያም በሌላ ነገር ያወራርዱት፡፡

[ግምገማው ለሻይ ዕረፍት ተቋረጠ፡፡ ክቡር ሚኒስትሩም ሚስታቸው ጋ ደወሉ]

  • ዛሬ አዋረድሽኝ፡፡
  • ምን አድርጌ?
  • በሰው ፊት ነው መሳቂያ ያስደረግሽኝ፡፡
  • እኮ ምን አድርጌ?
  • በመኪናሽ አስገመገምሽኝ፡፡
  • አንተ ግን ትንሽ አታፍርም?
  • በምኑ?
  • ለነገሩ ስትሰርቅ ካላፈርክ አሁን እንዴት ታፍራለህ?
  • ምን እያልሽ ነው?
  • ድሮስ ስትሰርቅ አልገመግምም ብለህ አስበህ ነበር?
  • የዛሬ ግን ባሰብኝ፡፡
  • በሌላ በምን ተገመገምክ?
  • በአልጋዬ በይ፣ በፋብሪካው በይ፡፡
  • በቃ?
  • አሁን ለሻይ ዕረፍት ወጥተን ነው፡፡
  • በል በዚሁ እንዲያልፍልህ ፀልይ፡፡
  • ምን ብዬ ልፀልይ?
  • በምታምንበት ነገር ፀልይ፡፡
  • ያመንኩት ነገር አይደል እንዴ እየጨፈጨፈኝ ያለው፡፡
  • ይህ ጥሩ ጊዜ ነው፡፡
  • ምን ለማድረግ?
  • ወደ እግዚአብሔር ለመቅረብ፡፡

[የሻይ ዕረፍቱ አልቆ ግምገማው ቀጠለ]

  • ክቡር ሚኒስትር ግምገማችንን እንቀጥላለን፡፡
  • አሁንም እኔው ነኝ?
  • እርስዎ ከተገመገሙ፣ ሌሎችም በእርስዎ ውስጥ ይገመገማሉ ማለት ነው፡፡
  • ወይ ጣጣ፡፡
  • ፓርቲያችን ውስጥ ዲሲፕሊን ከፍተኛ ቦታ ይሰጠዋል፡፡
  • አውቃለሁ፡፡
  • የፓርቲያችንን የዲሲፕሊን መመርያ ካረቀቁት ሰዎች መካከልም አንዱ እርስዎ ነዎት፡፡
  • ልክ ነው፡፡
  • እርስዎ ደግሞ ባለትዳርና የልጆች አባት ነዎት፡፡
  • እውነት ነው፡፡
  • በየሄዱበት ከተማ ግን ይማግጣሉ፡፡
  • ቢራም አትጠጣ እያላችሁኝ ነው?
  • ቢራ መጠጣት ይችላሉ፤ አርዓያ የሌለው ተግባር ግን መፈጸም አይችሉም፡፡
  • ይህ እኮ ግላዊ ሕይወቴ ነው፡፡
  • የተቀመጡት ግን ግላዊ ቦታ ላይ አይደለም፡፡
  • ወይ ጣጣ፡፡
  • ልቀጥል?
  • እሺ ቀጥል፡፡
  • ልጅዎት የት ነው የምትማረው?
  • ውጭ አገር፡፡
  • እንዴት ውጭ አገር ልትማር ቻለች?
  • ስኮርላርሽፕ አግኝታ፡፡
  • ውሸት!
  • እ…
  • ማስረጃ አለኝ፡፡
  • ምን ይላል?
  • እዚህ አገር በቀላሉ የገባ የውጭ ኩባንያ የልጅዎን የትምህርት ቤት ክፍያ እንደሚከፍል እናውቃለን፡፡
  • የውጭ አገር ኩባንያም አገር ውስጥ አይግባ እያላችሁኝ ነው?
  • መግባት ይችላል፤ አላግባብ ግን እንዲገባ አይፈቀድለትም፡፡
  • አሁንስ አልበዛም?
  • ግምገማው ገና ይቀጥላል፡፡

[ክቡር ሚኒስትሩ ሒሱ ስለበዛባቸው መበሳጨትና መሳደብ ጀመሩ]

  • አሁን እናንተ ጤነኛ ሆናችሁ ነው?
  • የታመመ ካለ ዛሬ ይመረመራል ክቡር ሚኒስትር፡፡
  • እዚህ ውስጥ አንድም ንፁህ ሰው የለም፡፡
  • እሱን እርስዎ አሉ፡፡
  • ሁሉም ሌባ ነው፡፡
  • እርስዎ ግን ከዚያም በላይ ነዎት፡፡
  • ምንድን ነኝ?
  • የሌባ ፈልፋይ!