ክቡር ሚኒስትር

[የክቡር ሚኒስትሩ ወዳጅ የሆነ ነጋዴ ደወለላቸው]

 

  • ሄሎ!
  • እንዴት ነዎት ክቡር ሚኒስትርዬ?
  • አለሁልህ ወዳጄ፡፡
  • ክረምቱ እንዴት ይዞዎታል?
  • በጋው ማለትህ ነው?
  • ለምን እንደዚያ አሉ?
  • ያው ዝናብ የለም ብዬ ነዋ፡፡
  • እርስዎ ይፈልጉ እንጂ ማስመጣት እንችላለን፡፡
  • ምኑን?
  • ዝናቡን፡፡
  • ከየት?
  • ከቻይና ነዋ፡፡
  • ቀልደኛ ሆነሃል ልበል?
  • ለፈገግታ ብዬ ነው፡፡
  • ታዲያ ምን ልርዳህ?
  • ክቡር ሚኒስትር ዕቃዎቼ ወደብ ደርሰዋል፡፡
  • ምን ትቀልዳለህ?
  • አዎን ክቡር ሚኒስትር፣ ባይሆን ዝናቡ ለእኛ ሊዘንብ ነው፡፡
  • ምን ዝናብ ብቻ በረዶ ነው በለኝ እንጂ፡፡
  • ልንበሸበሽ ነው ክቡር ሚኒስትር፡፡
  • አሁን ታዲያ ምን ያስፈልጋል?
  • ክቡር ሚኒስትር ቀረጡ እጅግ ከፍተኛ ነው የሚሆነው፡፡
  • ምን ችግር አለ ይቀነሳላ?
  • እሱን ነው የምልዎት፡፡
  • በዚያ ላይ አንተ ደንበኛ ነህ፡፡
  • አይደል?
  • ለዚያውም የ24 ዓመት ደንበኛ፡፡
  • እሱማ ልክ ነው፡፡
  • ቅናሽ ብቻ ሳይሆን ሌላም ነገር ሊኖር ይችላል፡፡
  • ሌላ ምን?
  • በነፃስ ቢገባ?
  • አድርገውት ነው፡፡
  • ብቻ የምንችለውን ሁሉ እናደርጋለን፡፡
  • እኔም ሐሳቤን እፈጽማለሁ፡፡
  • ምንድን ነው ሐሳብህ?
  • ክቡር ሚኒስትር የእርስዎ ነገር ሁሌም ያሳስበኛል፡፡
  • እንዴት?
  • ይህቺን አገር እኮ ደከመኝ ሰለቸኝ ሳይሉ ነው የሚያገለግሉት፡፡
  • ምን ላድርግ ብለህ ነው?
  • አንዳንዴ ደግሞ ዕረፍት ያስፈልግዎታል፡፡
  • እሱማ ያስፈልጋል፡፡
  • ስለዚህ እኔም ማረፊያ ነገር እሠራልዎታለሁ፡፡
  • ማለት?
  • ጥሩ ቤት እሠራልዎታለሁ፡፡
  • የት? እዚህ?
  • ምን በወጣዎት ክቡር ሚኒስትር?
  • ታዲያ የት ነው?
  • ከፈለጉ ዱባይ፣ ከፈለጉም አውሮፓ ወይም አሜሪካ፡፡
  • እ…
  • ብቻ ይህቺን ጉዳይ ያስጨርሱልኝ፡፡
  • ሌላ ምን ሥራ አለኝ አሁንማ?
  • በቃ እሱን ነው የምልዎት፡፡
  • አታስብ ስልህ?
  • እርስዎም አያስቡ ክቡር ሚኒስትር፡፡
  • ሰው ሁሉ እንዲህ ቢተሳሰብ ይህቺ አገር የት በደረሰች?
  • ምቀኛ ብቻ በዛ፡፡
  • አያልፍላቸውም ተዋቸው፡፡
  • እኛም ሳያልፍብን መረዳዳት ነው፡፡
  • እንደ አንተ ዓይነት ቀና ልብ ያላቸውን ነው የምንፈልገው፡፡
  • ቆንቋና ከመሆን ቅን መሆን ይሻላል፡፡

[ክቡር ሚኒስትሩ ስልኩን ዘግተው ቢሯቸው ተክዘው ቁጭ ብለዋል፡፡ አማካሪያቸው በድንገት ቢሯቸው ገባ]

  • ምነው ክቡር ሚኒስትር?
  • ምን ሆንክ?
  • ተክዘዋል፡፡
  • ስንት የሚያስተክዘኝ ጉዳይ አለ እባክህ?
  • ምርጫውን አሸንፈን በምንደሰትበት ወቅት የምን ትካዜ ነው?
  • የዚህች አገር ጉዳይ ያሳስበኛል፡፡
  • እንዴት ክቡር ሚኒስትር?
  • ይህ ሕዝብ እኮ አደራ ነው የሰጠን፡፡
  • ታዲያ ሁሌም አደራችንን እንደተወጣን ነው፡፡
  • ለነገሩ አራዳ አደራ አይፈራም፡፡
  • ምን አሉኝ?
  • የድሮ አራዳ ነኝ እኮ፡፡
  • ክቡር ሚኒስትር አሁን አደራ መጠበቅ ነው እንጂ የሚያዋጣው አራዳ መሆን አያዋጣም፡፡
  • ለምን?
  • ግምገማ ደርሷላ፡፡
  • እ…
  • ምነው ደነገጡ?
  • እሷ ነገር ደስ አትለኝም፡፡
  • ምን ችግር አለው ክቡር ሚኒስትር?
  • ብዙ ችግር ነው ያለው፡፡
  • ዋናው እኮ ንፁህ መሆን ነው፡፡
  • እ…
  • እርስዎ ደግሞ በዚህ አይጠረጠሩም፡፡
  • አይደል?
  • የንፁሆች ንፁህ ነው እኮ የሚባሉት፡፡
  • ግን ግምገማ አልወድም፡፡
  • ለምን?
  • በኔትወርክ ነዋ የሚያጠቁህ፡፡
  • እርስዎ የሙስና ኔትወርክ ውስጥ አሉበት እንዴ?
  • አይደለም ግምገማም የሚካሄደው በኔትወርክ ነው፡፡
  • እኔ እኮ የድርጅቱ አባል ስላልሆንኩ አይገባኝም፤ ምን ማለት ነው?
  • ግምገማ ሲካሄድ በቡድን ተደራጅተው ነው የሚያጠቁህ፡፡
  • ልክ እንደ ሙስናው፡፡
  • ለዚያ እኮ ነው አራዳ መሆን አለብህ የምልህ፡፡
  • ለማንኛውም እንግዲህ ይቅናዎት፡፡

[ክቡር ሚኒስትሩ የመሥሪያ ቤታቸው የድርጅት ክንፍ መሪ ጋ ደወሉና ቢሯቸው እንዲመጣ ነገሩት]

  • ፈለጉኝ ክቡር ሚኒስትር?
  • ለሁለት ነገር ነው የፈለግኩህ፡፡
  • ምን ልታዘዝ?
  • የወዳጃችን ዕቃ ወደብ ደርሷል፡፡
  • አይሉኝም?
  • ደርሷል ስልህ?
  • ተተኮስና?
  • ሕይወታችን ሊቀየር ነው፡፡
  • ታዲያ ምን ላድርግ?
  • ታክስ አካባቢ ያሉ ሰዎቻችንን ንገራቸው፡፡
  • ሌላ ምን ሥራ አለኝ ክቡር ሚኒስትር?
  • ስለዚህ ዕቃው ቶሎ እንዲለቀቅ ይደረግ፡፡
  • ምንም አያስቡ ክቡር ሚኒስትር፡፡
  • ታክሱ ላይ የሚደረገው ነገር ይደረግለት፡፡
  • እሱ እኮ ደንበኛ ነው ክቡር ሚኒስትር፡፡
  • ስለዚህ ለደንበኛ ደግሞ ቅናሽ መደረግ አለበት፡፡
  • በነፃስ ቢደረግለት ክቡር ሚኒስትር፣ ምን ችግር አለው?
  • ሁሉም ሰው እንደ አንተ ቢሆን የት በደረስን ነበር?
  • ክቡር ሚኒስትር አያስቡ፣ እንደ ጀመርን እንጨርሰዋለን፡፡
  • ምኑን?
  • ሁሉንም ነገር፡፡
  • ዋነኛው ነገር ሁለተኛው ነው፡፡
  • ምንድን ነው ክቡር ሚኒስትር?
  • ግምገማችን፡፡
  • እ…
  • አካሄዳችን ጥንቃቄ የተሞላበት መሆን አለበት፡፡
  • ክቡር ሚኒስትር እውነቱን ልንገርዎት፡፡
  • ንገረኝ፡፡
  • እንቅልፍ ከወሰደኝ ቆየሁ፡፡
  • ለምን?
  • ግምገማውን ሳስበው ነፍሴ ትጨነቃለች፡፡
  • የሰማሃው ነገር አለ እንዴ!
  • ምን የማይሰማ ነገር አለ ብለው ነው?
  • ስለማን ነው የሰማሃው?
  • ስለራሴ ነዋ፡፡
  • ምን ይባላል?
  • ቤት አለው፡፡
  • እ…
  • መኪና አለው፡፡
  • ወይ ጉድ፡፡
  • ኧረ ስንቱ አለ፡፡
  • ስለእኔስ ምን ሰምተሃል?
  • ስለ እርስዎ እንኳን ብዙም አልሰማሁም ግን መጠንቀቁ አይከፋም፡፡
  • ወይ ጣጣ፡፡
  • ግምገማው ደግሞ ያው በኔትወርክ ነው የሚካሄደው፡፡
  • ስለዚህ እኛም የራሳችንን ኔትወርክ እናዘጋጅ፡፡
  • እሺ ክቡር ሚኒስትር፡፡
  • ያው ሁሌም የምናቀማምሳቸው ሰዎች ስለእኔም ሆነ ስለአንተ መልካም ነገር እንዲያወሩ ይደረግ፡፡
  • እሺ፡፡
  • እሱ ብቻ ሳይሆን እኔንም ሆነ አንተን ሊገመግሙ የሚችሉ ሰዎችን አስቀድመው አንገታቸውን እንዲደፉ ማድረግ አለባቸው፡፡
  • እሺ፡፡
  • ለመሆኑ ሊገመግሙን የሚችሉ ሰዎች ይታወቃሉ እንዴ?
  • እሱ እንኳን አይታወቁም ግን የምጠረጥራቸው አሉ፡፡
  • ስለዚህ እነዚህ ሰዎች ላይ የምናቀርበውን ወቀሳ እዚያው ግምገማው ውስጥ በቴክስት እንላላካለን፡፡
  • እሺ ክቡር ሚኒስትር፡፡
  • አንተም ላይ ክስ ከቀረበብህ እዚያው በቴክስት የምልክልህን ነገር ታወራለህ፡፡
  • አደራዎትን ክቡር ሚኒስትር፡፡
  • ብቻ በቻልከው መጠን ኔትወርካችንን አጠናክር፡፡
  • የሚቻለኝን አደርጋለሁ ክቡር ሚኒስትር፡፡

[ክቡር ሚኒስትሩ ወደ ግምገማ ከመግባታቸው በፊት ጸሐፊያቸው ቢሯቸው ገባች]

  • ምን ፈለግሽ?
  • ስልክዎትን ልቀበልዎት ነው፡፡
  • ለምን ሲባል?
  • አይ ያው ወደ ግምገማ ሊገቡ ነው ብዬ ነዋ፡፡
  • ከቻልሽ እንዲያውም ሌላ ስልክ ብትጨምሪልኝ ደስ ይለኛል፡፡
  • ግምገማ ውስጥ ደግሞ ስልክ ምን ያደርግልዎታል?
  • ግምገማችንም እንደ አገራችን ትራንስፎርም አድርጓል፡፡
  • እንዴት?
  • ስልካችን ለግምገማ ወሳኝ ነው፡፡
  • ግምገማ በስልክ?
  • ለማንኛውም ኔትወርኩ እንዳይጠፋ ፀልይልኝ፡፡

[ክቡር ሚኒስትር ግምገማው አስጀመሩት፣ የድርጅት ክንፍ መሪው ክፉኛ እየተገመገመ ነው]

  • እሺ አንተ፡፡
  • ክቡር ሚኒስትር ሰውዬው አደገኛ ነው፡፡
  • እንዴት?
  • ደመወዙ መቼም ይታወቃል፡፡
  • በሚገባ ነው የሚታወቀው፡፡
  • የራሱ የግል ቤት አለው፡፡
  • እሺ፡፡
  • በዚያ ላይ ሚስቱ ዘመናዊ አውቶሞቢል ነው የምትነዳው፡፡
  • ሌላስ?
  • በእናቱ ስምም በባንክ የተቀመጠ ከፍተኛ ገንዘብ አለ፡፡
  • እሺ ሌላስ?
  • በሚስቱ ስም የተመዘገበም ሱቅ አለ፡፡

[ክቡር ሚኒስትሩ በግምገማው ወቅት ለድርጅቱ ክንፍ መሪ ምን ብሎ መናገር እንዳለበት ቴክስት አደረጉለት፡፡ የድርጅቱን ክንፍ መሪ የሚገመግመው ሰውዬ መናገር ካቆመ በኋላ ተገምጋሚውን መጠየቅ ጀመሩ]

  • የሚባለውን ክስ እየሰማህ ነው?
  • አዎን ክቡር ሚኒስትር፡፡
  • የሚባለው እውነት ነው?
  • እ…
  • መልስልኝ እንጂ?

[ተገምጋሚው ግራ ተጋብቶ ያለቅሳል]

  • ለቅሶውን ትተህ ለምን አትመልስልኝም?

[ተገምጋሚው አሁንም ለቅሶውን ቀጠለ]

  • ምላሽ የለህም?
  • እእእ…

[ክቡር ሚኒስትሩ ግምገማው ሲያልቅ የድርጅቱ ክንፍ መሪውን አገኙት]

  • ጉድ አደረጉኝ ክቡር ሚኒስትር፡፡
  • ምን ሆነህ ነው ምላሽ ያልሰጠኸው?
  • ምን ምላሽ ልስጥ?
  • በቴክስት የላኩልህን ነዋ፡፡
  • አልደረሰኝም፡፡
  • ለምን?
  • ኔትወርኩ አይሠራም!