ክቡር ሚኒስትር

[ለክቡር ሚኒስትሩ አንድ ጋዜጠኛ ደወለላቸው]

 

  • ሰላም ክቡር ሚኒስትር፡፡
  • ሰላም እንዴት ነህ?
  • እግዚአብሔር ይመስገን፡፡
  • መቼም ጥሩ አድርጋችሁ ነው የምትዘግቡት?
  • ምኑን?
  • የኦባማን ጉብኝት ነዋ፡፡
  • ለእሱማ እናንተን እየጠበቅናችሁ ነው፡፡
  • ደግሞ ከመቼ ጀምሮ ነው ዘገባ ለመዘገብ እኛን የምትጠብቁት?
  • ማለቴ ሥልጠናውን እየጠበቅን ነው፡፡
  • የምን ሥልጠና?
  • የውጭ ሚዲያዎች የሚሰጡንን ሥልጠና ነዋ፡፡
  • የምን ሥልጠና ነው የሚሰጧችሁ?
  • ዘገባውን እንዴት መዘገብ እንዳለብን ነዋ፡፡
  • እናንተ ደግሞ ለሌላው ታስተምራላችሁ እንጂ ትማራላችሁ እንዴ?
  • እኛማ እንደዚያ ነበር የሚመስለን እንደዚያ እንዳልሆነ ግን አሁን አወቅን፡፡
  • እንዴት?
  • ሰደባችሁን እኮ ክቡር ሚኒስትር፡፡
  • እኛ?
  • እህሳ፡፡
  • ምን ብለን?
  • የኢትዮጵያ ሚዲያ ሥነ ምግባር የለውም ብላችሁ ሞለጫችሁን እኮ፡፡
  • ኧረ እኛ እንደሱ አላልንም፡፡
  • አላችሁ እንጂ፣ እንዲያውም የውጭ አገር ሚዲያዎች ለእኛ ሥልጠና እንዲሰጡን ተማጸናችሁ፡፡
  • እ…
  • እኔ የምለው ክቡር ሚኒስትር፡፡
  • ምንድነው አንተ የምትለው?
  • ማያ ነገር ናችሁ ልበል?
  • የምን ማያ ነው የምታወራው?
  • ስፔስ 99 የሚለውን ፊልም አያስታውሱትም?
  • ኧረ አላስታውሰውም፡፡
  • ለነገሩ ያኔ በኢቲቪ ሲተላለፍ እናንተ በረሃ ነበራችሁ፡፡
  • ምን ለማለት ፈልገህ ነው?
  • ማያ የምትባል አክተር ፊልሙ ላይ ነበረች፡፡
  • እሺ፡፡
  • እና ማያ ስትፈልግ ጭራቅ፣ ስትፈልግ ቆንጆ ሴት፣ ስትፈልግ ወንድ፣ ኧረ ስንቱን ነበር የምትሆነው፡፡
  • ታዲያ እዚህ ምን አመጣት?
  • እናንተም ማያ ሆናችሁብን እኮ፡፡
  • እንዴት?
  • ከዛሬ አራትና አምስት ዓመት በፊት የውጭ ሚዲያውን ኒዮሊብራሊስትና የግል ኩባንያዎች ተቀጣሪዎች ናቸው ትሉን ነበር፡፡
  • አዎን ልክ ነው፡፡
  • አሁን ደግሞ ተቀይራችሁ ለአገራችን ሚዲያዎች ሥልጠና ስጡልን አላችሁ፡፡
  • ታዲያ ምን ችግር አለው?
  • እኮ እንደ እስስት እየተቀያየራችሁ የራሳችሁን ጥቅም ለማስከበር ትቆማላችሁ፡፡
  • እኛ እኮ እንዲያግዟችሁ ብለን ነው፡፡
  • ከእነሱ ይቅል እናንተ ብታግዙን ይጠቅመናል፡፡
  • እንዴት እናግዛችሁ?
  • ሚዲያውን አበረታች የኢንቨስትመንት ዘርፍ አድርጉት፡፡
  • እ…
  • ጋዜጠኞች እንደ ልባቸው እንዲጽፉና እንዲናገሩ አድርጉ፡፡
  • እንደ ልባቸው ከጻፉና ከተናገሩማ ዕድገት አይኖርም፡፡
  • ታዲያ ምንድነው የሚኖረው?
  • ውድቀት፡፡
  • ይኼ ነው ችግራችሁ፡፡
  • እንዴት?
  • ሰዎች ሮቦት አይደሉም፡፡
  • እሱንማ አትነግረኝም፡፡
  • ስለዚህ ሁሉም ሰው የተለያየ አመለካከት አለው፡፡ ከእናንተ ስለተለየ ብቻ ማጥላላት ተገቢ አይደለም፡፡
  • ለማንኛውም ሥልጠናው ያስፈልጋችኋል፡፡
  • ለመሆኑ እኛን ማን ነው የሚያሠለጥነን፡፡
  • አንዳቸው ናቸዋ፡፡
  • የአሜሪካው ኒውዮርክ ታይምስ ማለት ነው? ወይስ የእንግሊዙ ዘ ሰን ነው? ወይስ የቻይናው ፒፕልስ ዴይሊ ነው?
  • ምን ልዩነት አላቸው?
  • ትልቅ ልዩነት አላቸው፡፡ ሁሉም የራሳቸው የሆነ ርዕዮተ ዓለም ያራምዳሉ፡፡
  • ለእኛ ርዕዮተ ዓለም የትኛው ይቀርባል፡፡
  • የቻይናው ይመስለኛል፡፡
  • እንዲያውም እነሱ ናቸው ሥልጠናውን የሚሰጧችሁ፡፡
  • የአሜሪካኖቹን እኮ ስጡልን ብላችሁ ተማጽናችሁ ነበር፡፡
  • ተሰርዟል እንላቸዋለን፡፡

[የክቡር ሚኒስትሩ አማካሪ ቢሯቸው ገባ] 

  • እንዴት አለፈ እባክህ?
  • ስኬት ብቻ ነበር ክቡር ሚኒስትር፡፡
  • አንተስ እንዴት ገመገምከው?
  • አስፈነደቅነው አይደል እንዴ?
  • እንዴት?
  • ቅድመ አያቱን አገናኘነው፡፡
  • የኦባማ ቅድመ አያት ኢትዮጵያዊ ናት እንዴ?
  • አይ ማለቴ ሉሲን ልልዎት ፈልጌ ነው፡፡
  • እኔ ደግሞ ይኼንን እስከዛሬ እንዴት ሳላውቅ ብዬ ልቆጭ ነበር፡፡
  • ቡናም አስጠጣነው፡፡
  • ልክ ነው፡፡
  • ጭፈራም ቢሆን አስጨፈርነው፡፡
  • ተጠምቆ ነዋ፡፡
  • በምን?
  • በአብዮታዊ ዲሞክራሲ፡፡
  • ሰው እኮ ገርሞታል፡፡
  • ምኑ ነው የገረመው?
  • ያው ስለኢትዮጵያ ሰብዓዊ መብት ምናምን አደገኛ ትችት ይሰጣል ተብሎ ነበራ የሚጠበቀው፡፡
  • በመርፌ እኮ ነው የሰጠነው፡፡
  • ምኑን?
  • አብዮታዊ ዲሞክራሲን፡፡
  • አንድ ግን ቅር ያለችኝ ነገር ነበረች፡፡
  • ምኑ ነው ቅር ያለህ?
  • የእሱ ሴኪዩሪቲዎች ናቸዋ፡፡
  • ምን አደረጉ?
  • እኛ እኮ ቅኝ ግዛት ያልተገዛን አገር ነን፡፡
  • አውቃለሁ፡፡
  • የእኛን ጥበቃዎች እኮ አላስጠጋ ብለው እነሱ ነበሩ ሲራወጡብን የነበረው፡፡
  • ያው ለደኅንነት ብለው ነዋ፡፡
  • እኛ እኮ ክቡር ሚኒስትር፣ አይደለም ኦባማን ዳር ድንበራችንን ከጥንት ጀምሮ ሳናስነካ የቆየን ኩሩ አገር ነን፡፡
  • እሱማ ልክ ነው፡፡
  • ቅኝ ግዛት የማያውቁት ጠባቂዎቻችን እኮ ቅኝ ተገዙ፡፡  
  • በማን?
  • በኦባማ ሴኪዩሪቲዎች ነዋ፡፡
  • እ…
  • ከዚህ በኋላ ከመጣ ይኼ መደገም የለበትም፡፡
  • እውነትህን ነው፡፡

[የክቡር ሚኒስትሩ ወዳጅ የሆኑ ነጋዴ ደወሉላቸው] 

  • ከአሜሪካ ከመጡት ኩባንያዎች ጋር ተፈራረምክ እንዴ?
  • በየትኛው ዕድሌ ክቡር ሚኒስትር?
  • ለምን አልተፈራረምክም?
  • መንግሥት ሁሉን ነገር ጠራረገው እኮ፡፡
  • ምን?
  • እንዲያው ለእናንተ ሲዘንብ ለእኛም ቢያካፋ ጥሩ ነው፡፡
  • ምን ማለትህ ነው?
  • ለመሆኑ የኦባማ መምጣት ጥቅሙ ምንድነው?
  • በንግድና ኢንቨስትመንት ልንተሳሰር ነዋ፡፡
  • እንዴት ማለት?
  • በርካታ የአሜሪካ ኩባንያዎች ወደ ኢትዮጵያ ሊጐርፉ ነዋ፡፡
  • ምን ሊያደርጉ?
  • ሊነግዱ ነዋ፡፡
  • እ…
  • እንደ ድሮው ለምነን ሳይሆን ሠርተን ማደር ልንጀምር ነው፡፡
  • ግን ይታሰብበት፡፡
  • ምኑ ነው የሚታሰብበት?
  • ዕድገታችን ተቀልብሶ ልመና ውስጥ እንዳይከቱን፡፡
  • እንዴት?
  • የአሜሪካ ኩባንያዎች እኮ እዚህ መጥተው ቢነግዱ፣ የሚያገኙትን ትርፍ ጠራርገው ነው የሚወስዱት፡፡
  • እ…
  • እኛ ግን ብናተርፍ እዚሁ ነው ኢንቨስት የምናደርገው፡፡
  • ስለዚህ?
  • ይህ ጉዳይ በሚገባ ሊታሰብበት ይገባል፡፡
  • አሁን ጥቅሜ ይነካል ብለህ ነው አይደል?
  • አይደለም ክቡር ሚኒስትር፣ በደንብ አስቡበት ብዬ ነው፡፡
  • እንዲያውም ሥልጠና የሚያስፈልጋቸው ጋዜጠኞች ሳይሆኑ እናንተ ናችሁ፡፡
  • የምን ሥልጠና?
  • የውጭ ኩባንያዎች ለእናንተ ሥልጠና መስጠት አለባቸው፡፡
  • በምን ጉዳይ?
  • በሁሉም ጉዳይ፡፡
  • ብቻ አስቡበት፡፡

[የክቡር ሚኒስትሩ ጓደኛ ሌላ ሚኒስትር ደወሉ] 

  • እንዴት አየኸው የኦባማን ጉብኝት?
  • አጨራረሱ ጥሩ አይደለም ክቡር ሚኒስትር፡፡
  • እንዴት?
  • የአፍሪካ ኅብረቱን ንግግር አልሰሙም እንዴ?
  • ሰምቼዋለሁ፡፡
  • በአሽሙር እኮ ነው የነገረን፡፡
  • ምን ብሎ?
  • ምርጫ ማድረግ ዴሞክራሲ አለ ማለት አይደለም ብሎ ነዋ፡፡
  • እ…
  • የአፍሪካ መሪዎች ሥልጣን ለምን አለቅም እንደሚሉ እኮ አይገባኝም ነው ያለው፡፡
  • አገርን ማገልገል ስለምንወድ ነዋ፡፡
  • ሥልጣን ለቃችሁ አገር ማገልገል ትችላላችሁ ብሎ እኮ ነው ወረፍ ያደረገን፡፡
  • እ…
  • በዚያ ላይ ደግሞ ያንን ሁላ ገንዘብ ይዘው ለምን ሥልጣን እንደማይለቁ ነው ግራ የሚገባኝ እኮ ነው ያለው፡፡
  • አፍሪካዊ መሪ ቢሆን ይገባው ነበር፡፡
  • ደግሞ የእኛም ባለሥልጣናት ሲያጨበጭቡለት ነበር፡፡
  • አሽሙሩ ስላልገባቸው ይሆናላ፡፡
  • ለማንኛውም አጨራረሱን አልወደድኩትም፡፡
  • ምን ታደርገዋለህ?
  • በአፍሪካ አስመስሎ እኛን በአሽሙር ወግቶን ነው የሄደው፡፡
  • የወጋ ቢረሳ የተወጋ አይረሳም አሉ፡፡

[ክቡር ሚኒስትሩ ቤት ሲገቡ ሚስታቸውን አገኟቸው] 

  • ነይ ተመልከቺ ይኼን ፎቶ፡፡
  • የምን ፎቶ ነው?
  • ከኦባማ ጋር የተነሳሁት፡፡
  • ምን ያደርግልሃል?
  • ይኼ እኮ ቅርሴ ነው፡፡
  • የምን ቅርስ?
  • ለልጆቼ አሳልፌ የምሰጣቸው ቅርስ፡፡
  • ፎቶ ከምትሰጣቸው መርህ ብትሰጣቸው የበለጠ ይጠቅማቸዋል፡፡
  • ለማንኛውም ይህ ታሪክ ነው፡፡
  • ለመሆኑ እንዴት አለፈ?
  • ስኬት በስኬት ነበር፡፡
  • ደግሞ ብላችሁ ብላችሁ የሰፈር ሴቶችንና ወጣቶችን ቲሸርት አስለብሳችሁ አዘመራችኋቸው አይደል?
  • እንግዳ ተቀባይ መሆናችንን አትርሺ፡፡
  • ያ ሁሉ የአንድ ወር በሥራ መጠመድ ለዚሁ ነው?
  • ምናለ ማመስገን ብትለምጂ?
  • ለማንኛውም ይኼ ደብል ዲጂት ዕድገታችሁ ሰለቸኝ፡፡
  • ለምንድነው የሚሰለችሽ?
  • በየሚዲያው እሱን እኮ ነው የምትለፍፉት፡፡
  • አሜሪካ ራሷ በደብል ዲጂት እያደገች አይደለም፡፡
  • ሌላው የረሳሁት ደግሞ፡፡
  • ደግሞ ምን ረሳሽ?
  • ጂምናስቲክ ጀምረሃል እንዴ?
  • ጠዋት ጠዋት ስፖርት እሠራለሁ እንጂ የምን ጂምናስቲክ አመጣሽ?
  • አይ ፕሬዚዳንቱ ከአውሮፕላን ሲወርድ እንደዚያ ወገባችሁ እስኪሰበር ድረስ ምን ሆናችሁ ነው ብዬ ነዋ፡፡
  • እሱ ለየት ያለ አቀባበል ነው፡፡
  • ምን የሚሉት አቀባበል?
  • ልማታዊ አቀባበል!