ክቡር ሚኒስትር

[የክቡር ሚኒስትሩ አማካሪያቸው ቢሯቸው ገባ]

 

  • ደህና አደሩ ክቡር ሚኒስትር?
  • እንዴት ነህ እባክህ?
  • እግዚአብሔር ይመስገን፡፡
  • አሁን ምን እያደረጋችሁ ነው?
  • አንድ ወሳኝ ፕሮግራም ለማዘጋጀት ደፋ ቀና እያልን ነው፡፡
  • የምን ፕሮግራም ነው?
  • ያው የሚቀጥለው ሳምንት ያለብን ወሳኝ ፕሮግራም ነዋ፡፡
  • እሱማ ትልቅ ፕሮግራም ነው፡፡
  • የቱን ፕሮግራም ነው የሚሉት?
  • የኦባማን መምጣት ነዋ፡፡
  • ኧረ እኔ እሱን አይደለም የምልዎት፡፡
  • ከኦባማ መምጣት ውጪ ምን አዲስ ፕሮግራም አለ ብዬ ነዋ፡፡
  • ከኦባማ መምጣት ይልቅ እኛን የሚመለከተን ወሳኝ ፕሮግራም የሚቀጥለው ሳምንት ይካሄዳል፡፡
  • እኔ የማላውቀው?
  • ክቡር ሚኒስትር እርስዎማ ያውቁታል፤ ግን መዘንጋት ጀመሩ ማለት ነው፡፡
  • ምንድነው የዘነጋሁት?
  • ዕድሜዎም የምር እየገፋ ነው ማለት ነው?
  • ምንድነው የምታወራው?
  • የሚቀጥለው ሳምንት እኮ የእርስዎ ልደት ነው፡፡
  • እረስቼዋለሁ፡፡
  • እኮ ዕድሜዎ እየገፋ ነው አልኩዎት፡፡
  • ታዲያ ምን ልታደርጉ ነው?
  • ክቡር ሚኒስትር እርስዎ እኮ ነዎት፡፡
  • እኮ ምን ሊደረግ ነው?
  • ምን የማይደረግ ነገር አለ?
  • አልገባኝም?
  • እርስዎ ለዚህች አገር ምሰሶ ማለት ነዎት፡፡
  • ምን ምሰሶ ብቻ?
  • ማገርም ነዎት፡፡
  • ሙገሳው ይቆይ እስቲ፡፡
  • ክቡር ሚኒስትር ይህ የልደት በዓል በጣም ልዩ ነው፡፡
  • እኮ እንዴት?
  • አንደኛ አገራችን በዕድገት ጐዳና ላይ እየተንፈላሰሰች ነው፡፡
  • እሱስ ልክ ብለሃል፡፡
  • ለዚህ ዕድገት ደግሞ እርማስዎ ዋነኛ ነዎት፡፡
  • እንዴት?
  • ምን እንዴት አለው? እርስዎ ሥልጣን ከያዙ በኋላ አይደል እንዴ አገሪቷ እየተመነደገች የመጣችው?
  • ልክ ብለሃል፡፡
  • ደከመኝ ሰለቸኝ ሳይሉ አይደል እንዴ አገሪቷን እዚህ ያደረሷት?
  • እህሳ፡፡
  • ሌላው ልደቱ ለየት የሚልበት ምክንያት ደግሞ ምን እንደሆነ ያውቃሉ?
  • እስቲ ንገረኝ፡፡
  • 60ኛ ዓመትዎን ነው የምናከብረው፡፡
  • ደግሞ እሱን በምን አወቅህ?
  • ያው ባለፈው 59ኛ ዓመትዎን አክብረናል ብዬ ነዋ፡፡
  • ለነገሩ እውነትህን ነው፡፡
  • ስለዚህ የዚህን ዓመት የልደት በዓል ለየት የሚያደርገው እነዚህ የነገርኩዎት ምክንያቶች ናቸው፡፡
  • ታዲያ ምን አሰባችሁ?
  • እስከዛሬ ከተደገሱ ልደቶች ሁሉ ቁንጮው የልደት በዓል ነው የሚሆነው፡፡
  • ለመሆኑ ትልቁ የልደት በዓል የማን ነበር?
  • ለምሳሌ የቦብ ማርሊ ሊጠቀስ ይችላል፡፡
  • እና የእኔም እንደሱ መስቀል አደባባይ ሊከበር?
  • መስቀል አደባባይ ማክበር አይደለም ሰው ራሱ ቢሰቀልልዎትስ?
  • የተሰቀለው አይበቃንም ብለህ ነው?
  • ለእርስዎ የማይደረግ ምንም ነገር የለም፡፡
  • ሐሳቡ ጥሩ ነበር ግን…
  • የምን ግን ነው ክቡር ሚኒስትር?
  • ያው ኢሕአዴግ ግለሰቦች ገነው እንዲታዩ አይፈልግም ብዬ ነው፡፡
  • ክቡር ሚኒስትር አሁን እርስዎ ለዚህች አገር ከቦብ ማርሊ ያነሰ ሠርተዋል?
  • ለመሆኑ ቦብ ማርሊ ለዚህች አገር ምን ሠርቷል?
  • ክቡር ሚኒስትር እኔ ሙዚቃ እንደማልወድ ያውቃሉ፤ ስለዚህ ምንም አላውቅም፡፡
  • ስለዚህ የት እንዲከበር ወሰናችሁ?
  • ያው በከተማችን አለ በተባለው ሆቴል ነዋ፡፡
  • ስለዚህ የሆቴል ወጪም አላባችኋ?
  • እሱን በእኔ ተውት፡፡
  • እንዴት?
  • ስንቱ ባለሀብት ይህን ጊዜ በጉጉት ሲጠብቀው አይደል እንዴ የቆየው?
  • ለምን?
  • ለእርስዎ ያጠራቀመውን ምሥጋና ሊያቀርብ፡፡
  • እውነት?
  • ክቡር ሚኒስትር ስንቱን ከመሬት አንስተው የከተማችን ባለፀጋ እንዳደረጉ እንዳይረሱ፡፡
  • እሱስ ልክ ብለሃል፡፡
  • ስለዚህ ድል ያለ ድግስ ይደገሳል፤ በዚያውም ውለታዎ ይመለሳል፡፡
  • ለመሆኑ እንዴት ነው የምታከብሩት?
  • እርስዎ እንዴት እንዲከበርልዎ ይፈልጋሉ?
  • በመጀመሪያ ኮሚቴ ይዋቀር፡፡
  • ኮሚቴው ከየት ይዋቀር?
  • ያው ከሴቶች፣ ከወጣቶች፣ ከባለሀብቶችና ከዚህ መሥሪያ ቤት አባላትን የያዘ ኮሚቴ ይዋቀር፡፡
  • ክቡር ሚኒስትር ለእርስዎ ልደት አይደለም ኮሚቴ ድርጅት መቋቋም ካለበት ይቋቋማል፡፡
  • ይህን ኮሚቴ አንተ ትመራዋለህ፡፡
  • እሺ፡፡
  • እኔ ደግሞ በበላይነት እቆጣጠረዋለሁ፡፡
  • ደስ እያለኝ ክቡር ሚኒስትር፡፡

[ክቡር ሚኒስትሩ ከሾፌራቸው ጋር እያወሩ ነው]

  • ምነው ፈዘሃል?
  • መሥሪያ ቤት አንድ መዋጮ መኖሩን ሰምቼ፡፡
  • የምን መዋጮ?
  • በሚቀጥለው ሳምንት አንድ ትልቅ ድግስ ስለሚኖር ለእርሱ እንደምናዋጣ ሲወራ ሰምቼ ነው፡፡
  • ድግስ በመዋጮ?
  • አዎን ክቡር ሚኒስትር፣ ያው ሰው ሠርግ፣ ድግስ ምናምን ሲኖር ስለምናዋጣ አሁንም ማዋጣቴ አይቀርም ብዬ ነው፡፡
  • በፈቃደኝነት ላይ የተመሠረተ ከሆነና አንተም ከሌለህማ አላዋጣም በላ፡፡
  • አይ ክቡር ሚኒስትር፣ ለዚህ ካላዋጣሁ እኔም እወጣለኋ፡፡
  • ምን አልከኝ?
  • እስቲ ይተውት፣ በዚያ ላይ ደግሞ ከአሥር ቀናት በኋላ የልጄ ልደት አለብኝ፡፡
  • ልደት ስትል የሚቀጥለው ሳምንት የእኔም ልደት ነው፡፡
  • መዋጮው ለእሱ አይደል እንዴ?
  • ምን አልከኝ?
  • ድል አድርገን ነዋ የምንደግሰው፡፡
  • ለመሆኑ ሱፍ አለህ?
  • ኧረ በፍጹም ክቡር ሚኒስትር፡፡
  • በቃ ግዛ፡፡
  • ይገዙልኛል?
  • ራስህ ግዛ እንጂ፡፡
  • ከየት አምጥቼ?
  • የልጅህ ልደት ቢቀርስ?
  • ለነገሩ እርስዎ እንደ ልጄ ነዎት፡፡
  • እ…
  • ከቦታ ቦታ የማመላልስዎት እኔ አይደለሁ?
  • ጥፋልኝ ከፊቴ፡፡

[ክቡር ሚኒስትሩ ከአንድ ነጋዴ ወዳጃቸው ጋር ምሳ እየበሉ ነው]

  • የሚቀጥለው ሳምንት ያለውን ፕሮግራም አውቀሃል አይደል?
  • ኧረ በፍጹም ክቡር ሚኒስትር፡፡
  • ምንም ፕሮግራም እንዳትይዝ፣ የምትጠራበት ፕሮግራም ላይ መገኘት አለብህ፡፡
  • ክቡር ሚኒስትር እንኳን ጠርተውኝ ይኸው እየለመንኩዎት አይደል እንዴ የማገኝዎት?
  • ለማንኛውም የሚቀጥለው ሳምንት ልደቴ ይከበራል፡፡
  • ስንት ሞላዎት?
  • 60፡፡
  • ኧረ ሌላ 60 ይጨመርልዎት፡፡
  • አሜን፡፡
  • ስጠብቀው የነበረው ጊዜ ደረሰ፡፡
  • እንዴት?
  • ክቡር ሚኒስትር እርስዎ እኮ…
  • የምን ማልቀስ ነው?
  • ለእኔ ሁሉ ነገሬ ነዎት፡፡
  • እንዴት?
  • ይኸው ልዝናና ስል አንዴ አውሮፓ፣ ሲያሻኝ አሜሪካ አይደል እንዴ የምመላለሰው?
  • ልክ ብለሃል፡፡
  • እርስዎ እኮ ከጭቃ ቤት አውጥተው ይኸው አሁን ሦስት ሕንፃዎች እንዲኖሩኝ አድርገዋል፡፡
  • እውነት ነው፡፡
  • በነጠላ ጫማ ከመሄድ ይኸው በዘመናዊ መኪኖች እንድንቀባረር አስችለውኛል፡፡
  • አውቃለሁ፡፡
  • ታዲያ ለእርስዎ ውለታ መክፈያ ወሳኝ ጊዜ ይኼ አይደል እንዴ?
  • እንግዲህ ዕድልህን ተጠቀምበት፡፡
  • አያስቡ ክቡር ሚኒስትር፣ ጓደኞቼን ሁሉ አስተባብሬ ሰርፕራይዝ ነው የማደርግዎት፡፡
  • እስቲ እናያለን፡፡

[ክቡር ሚኒስትሩ ቢሯቸው ሲገቡ፣ ጸሐፊያቸው በርካታ ካርዶች ይዛ ገባች]

  • ምንድነው ይህ ሁሉ ካርድ?
  • የስጦታ ካርድ ነው፡፡
  • የምን የስጦታ ካርድ?
  • ጊፍት ካርድ ነዋ ክቡር ሚኒስትር፡፡
  • ይኼ ሁሉ?
  • አዎን፣ ይኼ የ100 ሺሕ ብር ጊፍት ካርድ ነው፡፡
  • እሺ፡፡
  • ይኼ የ80 ሺሕ ብር ጊፍት ካርድ ነው፡፡
  • ኧረ እባክሽ?
  • ብቻ ይህ ሁሉ በአጠቃላይ የ800 ሺሕ ብር የጊፍት ካርድ ነው፡፡
  • በጣም ደስ ይላል፡፡
  • አንድ ነገር ሳስብ ነበር፡፡
  • ምን?
  • ለምን ለህዳሴ ግድቡ ስጦታ አይሰጡትም?
  • ምኑን?
  • ጊፍት ካርዱን፡፡
  • ለምን ተብሎ?
  • ያው ለስምዎትም ጥሩ ነው ብዬ ነው፡፡
  • በፊትም እኔ ስሜ ጥሩ ነው፡፡
  • ቢሰጡት ደግሞ የበለጠ ጥሩ ይሆናል፡፡
  • በዚህ ጉዳይ ላይ ከባለቤቴ ጋር ማውራት አለብኝ፡፡
  • ለምን?
  • ከእሷ ጋር ሳልማከር መወሰን አልችልም፡፡
  • እንዴ እኛ ከቤተሰባችን ሳንማከር አይደል እንዴ ዝም ብላችሁ የምትቆርጡት?
  • ለአገር ነዋ፡፡
  • እርስዎ ለአገር እንዲሰጡ ነው እየነገርኩዎት ያለሁት፡፡
  • አንቺን ማን ነጋሪ አደረገሽ? ዋናዋ ሚስቴ ናት፡፡

[ክቡር ሚኒስትሩ ቤት ሲገቡ ሚስታቸውን አገኟቸው]

  • የሚቀጥለው ሳምንት ትልቅ ድግስ አለብኝ፡፡
  • የምን ድግስ?
  • ልደቴ ነዋ፡፡
  • ነው እንዴ?
  • የእኔው ጉድ ረስተሽዋል፤ ለማንኛውም ትልቅ ድግስ ስለሆነ ተዘጋጂ፡፡
  • እሺ፡፡
  • ዛሬ ጸሐፊዬ ምን እንዳለችኝ ታውቂያለሽ?
  • ምን አለች?
  • የተሰጠኝን የ800 ሺሕ ጊፍት ካርድ ለህዳሴ ግድብ ስጠው፡፡
  • ታዲያ ምን ችግር አለው?
  • ተነጋግራችሁልኝ ነበር እንዴ?
  • ሐሳቧ እኮ ጥሩ ነው፡፡
  • ይኸውልሽ እኔ በዚህ ጊፍት ካርድ ቤታችንን የሆሊውድ አክተር ቤት ነው የማስመስለው፡፡
  • እውነት?
  • ምን ይኼ ብቻ፣ ይኼ እኮ መጀመሪያው ነው ገና ይቀጥላል፡፡

[የክቡር ሚኒስትሩ ጥበቃ ገባ]

  • ክቡር ሚኒስትር መኪና ይዘው የመጡ ሰዎች እንግባ እያሉ ነው፡፡
  • የምን ሰዎች?

[የቤቱ ስልክ ሲጠራ ሚስታቸው አነሱት]

  • የክቡር ሚኒስትሩ ቤት ነው?
  • አዎን ነው፡፡
  • እኛ መኪና አስመጪዎች ነን፡፡
  • እሺ፡፡
  • ያው ለልደታቸው ስጦታ አዲስ መኪና መላካችንን ለመናገር ነው፡፡

[ስልኩ ተዘግቶ፣ ክቡር ሚኒስትሩ ከሚስታቸው ጋር ወሬያቸውን ቀጠሉ]

  • ማን ናቸው?
  • ለልደትህ መኪና የላኩት ሰዎች ናቸው፡፡
  • ገና ይቀጥላል አላልኩሽም?
  • ምኑ?
  • የጊፍት ካርዱ፡፡
  • ሌላው እንዳይቀጥል ፍራ፡፡
  • ምኑ?
  • የእስር ቤቱ ካርድ!