ክቡር ሚኒስትር

[ክቡር ሚኒስትሩ የኦባማን መምጣት አስመልክቶ የተቋቋመውን ኮሚቴ እንዲመሩ ተሹመዋል፡፡ ክቡር ሚኒስትሩ አማካሪያቸውን አስጠሩት]

 

  • አቤት ክቡር ሚኒስትር፡፡
  • የፋይናንሱ ስብሰባ እንዴት እየሄደ ነው?
  • አሁንማ ወደ ማብቂያው እየተቃረበ ነው፡፡
  • ስለዚህ በሰላም አልፏላ?
  • በሚገባ ክቡር ሚኒስትር፡፡
  • አሁን ቀጣዩ የቤት ሥራችን ላይ ነው ማተኮር ያለብን፡፡
  • የትኛው የቤት ሥራ?
  • ትልቁ የቤት ሥራ ነዋ፡፡
  • ጂቲፒ 2 ነው የሚሉኝ?
  • ከሱ የማይተናነሰው ሌላው የቤት ሥራ፡፡
  • ደግሞ ጂቲፒ 2ን የሚያክለው የቤት ሥራችን ምንድነው?
  • የኦባማ መምጣት፡፡
  • ምን አሉኝ?
  • ሰምተሃል፤ የኦባማ መምጣት፡፡
  • እሱ ምን አዲስ ነገር አለው?
  • ምን እያልከኝ ነው? እንዴት የለውም?
  • በርካታ መሪዎች መጥተው አስተናግደናል እኮ?
  • እሱ እኮ ለየት ያለ መሪ ነው፡፡
  • ቢሆንስ?
  • ለየት ያለ ዝግጅት ያስፈልገዋል፡፡
  • እኮ ምን ይደረግ?
  • አንተ የኮሚቴው ጸሐፊ አይደለህ እንዴ? ምን ይደረግ ትላለህ?
  • ክቡር ሚኒስትር ተሰብስበን እኮ አናውቅም፡፡ ስለዚህ አቅጣጫ ሳይሰጠኝ ምን ማድረግ እችላለሁ?
  • ለአንተ አቅጣጫ ሳይሆን መቀጫ ነበር መስጠት፡፡
  • ምን አደረግኩ?
  • ሁሌ ምሪት የምትፈልግ ዜጋ ነሃ፡፡
  • መሮኝ እኮ ነው ክቡር ሚኒስትር፡፡
  • አገሪቷ በማደጓ ነው የመረረህ?
  • አይ ስብሰባ በዛብኝ፤ እንዲያው አንዳንዴ ያደገችው በስብሰባ ይመስለኛል፡፡
  • በሚዲያው ስለዕድገታችን እየተዘመረ አይደል እንዴ? ዜና አትከታተልም እንዴ?
  • ኧረ እከታተላለሁ፡፡
  • እኮ ዜናው ምን ያወራል?
  • ስለግሪክና ስለኢራን ነዋ፡፡
  • የትኞቹን ነው የምትከታተለው?
  • ዓለም አቀፍ የዜና ተቋማትን ነዋ፡፡
  • እ… ኒዮሊብራሎቹን፡፡
  • እርስዎ የቱን ተከታትለው ነው ስለዕድገታችን እየተዘመረ ነው ያሉት?
  • ኢቢሲን ነዋ፡፡
  • እሱማ ከመዘመር ውጪ አያለቅስ?
  • አንዳንዴ እንኳን ያለቅሳል፡፡
  • መሪ ሲሞት ነዋ፡፡
  • አሁን ለማንኛውም በኦባማ መምጣት ላይ የታችኛው የኅብረተሰብ ክፍል ድረስ መሥራት አለብን፡፡
  • ታዲያ ምን ይደረግ?
  • ሁሉንም ጥራልኝ፡፡
  • እነማንን ልጥራ?
  • የሴቶች ሊግ፣ የወጣቶች ሊግና የደጋፊ ነጋዴዎች ማኅበርን፡፡
  • መቼ ይጠሩ?
  • አሁኑኑ፡፡

[የክቡር ሚኒስትሩ አማካሪ የሴቶች ሊግ ተወካይን ጠርቷቸው ሚኒስትሩ ጋ ገቡ]

  • ጤና ይስጥልኝ እሜቴ፡፡
  • ጤና ይስጥልኝ ክቡር ሚኒስትር፡፡
  • እየተዘጋጃችሁ ነው?
  • ያው ይህቺ የፍልሰታ ጾም ትለፍ ብለን ነው፡፡
  • ለምንድነው የምትዘጋጁት?
  • ለአዲሱ ዓመት ነዋ፡፡
  • አይደለም እሜቴ፣ እኔ የምልዎት ለኦባማ መምጣት ነው፡፡
  • ለእሱ መምጣት የተለየ ነገር ያስፈልጋል እንዴ?
  • አዎ ለየት ያለ ዝግጅት ያስፈልጋል፡፡
  • የእኛ ወዳጆች እኮ ቻይናዎች ናቸው ስለምትሉን ነው፡፡
  • እኛ ወዳጅ ለመሆን ለሚፈልግ በራችን ክፍት ነው፡፡
  • ዝግ የሆነው ለሚቃወም ነው ማለት ነው?
  • እኛን መቃወም ክልክል ነው!
  • እኛስ የምንደግፈው ወደን ነው?
  • ለማንኛውም አሁን ለእሱ ምን አዘጋጅታችኋል?
  • ፈንዲሻ፣ ቡና፣ ዳቦ ነዋ፡፡
  • ለኦባማ?
  • እህሳ? እሱ ከጠቅላይ ሚኒስትራችን ይለያል? ለእሳቸውም እሱን ነው ያቀረብነው፡፡
  • እሱ እንግዳ ነው ብዬ ነው፡፡
  • እንግዳም ቢሆን ቤት ያፈራውን ነዋ የሚቀርብለት፡፡
  • ለማንኛውም አሁን አንድ ነገር እንዲያደርጉ ነው የጠራሁዎት፡፡
  • ምን ላድርግ?
  • ሙሉ ከተማዋ መፅዳት አለባት፡፡
  • ለምን?
  • ለኦባማ፡፡
  • እሺ ክቡር ሚኒስትር፡፡
  • ስለዚህ እርስዎ ሴቶቹን ሁላ አስተባብረው መንደሩን ሁሉ ያፀዱት፡፡
  • ብዙ ወጪ ግን ይኖረዋል፡፡
  • የሚያስፈልገው በጀት ሁሉ ይመደባል፡፡
  • በጀት ካለማ አይደለም ማፅዳት አቆሽሹ ብትሉንስ ማድረጋችን መቼ ይቀራል?
  • በቃ ወደ ፅዳት፡፡

[ክቡር ሚኒስትሩ አማካሪያቸውን አስጠሩት] 

  • አቤት ክቡር ሚኒስትር፡፡
  • አሁን ደግሞ የወጣቶችን ሊግ በአስቸኳይ አስጠራልኝ፡፡
  • እሺ ክቡር ሚኒስትር፡፡

[የወጣቶች ሊግ ተወካይ ክቡር ሚኒስትሩ ቢሮ ገባ]  

  • አቤት ክቡር ሚኒስትር፡፡
  • አምሮብሃል እባክህ?
  • ዕድሜ ለጂቲፒ 2 እንዴት አያምርብኝ?
  • እየተዘጋጃችሁ ነው?
  • ይኸው የአንድ ለአምስት አደረጃጀቱን ወደ አንድ ለሦስት ለመቀየር ተግተን እየሠራን ነው፡፡
  • ማን አዘዛችሁ?
  • ጂቲፒ 2 ነዋ፡፡
  • እኮ እንዴት?
  • ያው ለወጣቱ የሥራ ዕድል ለመፍጠር ነዋ፡፡
  • ለማንኛውም እኔ ያልኩህ ለኦባማ መምጣት ነው፡፡
  • ምን ይደረግ? እዘዙኝ አስፈጽማለሁ፡፡
  • ችግኞች ይተከሉ፡፡
  • ለምን?
  • ኦባማን በቀይ ምንጣፍ ሳይሆን በአረንጓዴ ምንጣፍ ነው የምንቀበለው፡፡
  • እንዴ ችግኞቹ እኮ በአንዴ አያድጉም፡፡
  • አንተ ምን ቸገረህ? ትከል ብቻ ነው የተባልከው፡፡
  • በኋላ ይነቀላሉ?
  • ስለመንቀሉ በስብሰባ ይወሰናል፡፡
  • ለዚህ ግን ከፍተኛ በጀት እኮ ያስፈልጋል፡፡
  • የሚያስፈልጋችሁ በጀት ሁሉ ይመደብላችኋል፡፡
  • በጀት ካለውማ አይደለም ትከሉ ንቀሉ ብትሉንስ አናደርገውም እንዴ?
  • በቃ አሁን ወደ ችግኝ ተከላ፡፡

[ክቡር ሚኒስትሩ ጸሐፊያቸው የደጋፊ ነጋዴዎች ተወካይን እንድትጠራቸው ነገሯት] 

  • ፈለጉኝ ክቡር ሚኒስትር?
  • እየተዘጋጃችሁ ነው?
  • ለምኑ ክቡር ሚኒስትር?
  • ለኦባማ መምጣት ነዋ፡፡
  • አልተዘጋጀንም፣ ግን አሁን ከነገሩኝ መዘጋጀት እንችላለን፡፡
  • ያው እንደተለመደው ፈሰስ ማድረግ አለባችሁ፡፡
  • ኧረ ክቡር ሚኒስትር እሱንማ አሁን ማድረግ አንችልም፡፡
  • ለምን?
  • የታክስ መዓት ነው የተቆለለብኝ፡፡
  • ያለታክስም መሥራት አስበህ ነበር?
  • ለመሆኑ ለምንድነው ፈሰሱ የተፈለገው?
  • መንገድ ላይ ያሉት ለማኞች ሁሉ አዲስ ልብስ መልበስ አለባቸው፡፡
  • ለምን?
  • ለኦባማ ነዋ፡፡
  • ወይ ይኼ ኦባማ?
  • ለአንተም በሰማይ ቤትም፣ በእኛም ዘንድ ያፀድቅሃል፡፡
  • መፅደቅማ ማን ይጠላል ብለው ነው?
  • አንተ አሁን ልብስ ትነግዳለህ አይደል?
  • አዎን፡፡
  • በቃ አንድ አሥር ኮንቴይነር ልብስ ለለማኞቹ ለግስ፡፡
  • ከየት አምጥቼ?
  • ከቻይና ነዋ፡፡
  • ለኦባማ ግን ከቻይና ትቀበላላችሁ?
  • አሜሪካዊ ነው ብለህ ነው? እነሱም እዛው አይደል እንዴ የሚያሠሩት?
  • ክቡር ሚኒስትር ለእኛ እናንተ ስትኖሩ ነው ጥቅማችን፣ ስለዚህ ያሉኝን ሁሉ አደርጋለሁ፡፡
  • በል ይህን የከተማ ለማኝ ሁላ በአዲስ ልብስ አሳምርልኝ፡፡
  • በሉ እርስዎም የታክሱን ጉዳይ ያሳምሩልኝ፡፡

[ክቡር ሚኒስትሩ አማካሪያቸውን አስጠሩት] 

  • አቤት ክቡር ሚኒስትር፡፡
  • ሌላ ምን መሠራት አለበት ትላለህ?
  • ለመሆኑ እስካሁን ምን ተሠራ?
  • ችግኝ ተተክሏል፣ ከተማ ፀድቷል፣ ለማኝ ተለውጧል፣ ሌላ ምን ቀረ?
  • ለመሆኑ የሚጐበኛቸው ቦታዎች ይታወቃሉ እንዴ?
  • ለምን ጠየቅከኝ?
  • ያረጁና አሮጌ ቤቶች በሚበዙባቸው ሠፈሮች እንዳያልፉ ብዬ ነው፡፡
  • እስኪ መንገድ ዳር ያሉ አሮጌ ሠፈሮችን አጣርተህ አምጣልኝ፡፡
  • እሺ ክቡር ሚኒስትር፡፡

[አማካሪያቸው በክቡር ሚኒስትሩ ጥያቄ መሠረት ጥናት አድርጐ ውጤቱን ነገራቸው፡፡ አሮጌ ቤቶች የሚበዙበት ሠፈር የክፍለ ከተማ ኃላፊ ጋ ደውሉ] 

  • አቤት ክቡር ሚኒስትር፡፡
  • እነዚህ አሮጌ ቤቶች ለምን አይፈርሱም?
  • ደሃው የት ይሂድ ክቡር ሚኒስትር?
  • አገራችን እያደገች ስለየትኛው ደሃ ነው የምታወራው?
  • ዕድገቱ እኮ ለደሃው እየደረሰ አይደለም፡፡
  • ሀብት እኮ እንደ ውኃ ነው፡፡
  • እንዴት?
  • ከላይ ወደ ታች ነው የሚፈሰው፡፡
  • እኮ ታች አልደርስ አለ፡፡
  • አንድ ቀን ይደርሳል፡፡
  • እንዲህ እያልን ሕዝቡ እንዳይደርስብን፡፡
  • ለማንኛውም አሁን ቤቶቹ ፈርሰው በግንብ ይሠሩ፡፡
  • ያው በመልሶ መልማቱ ሁሉም በግንብ መሠራታቸው አይቀርም፡፡
  • እኔ እያልኩ ያለሁት መንገድ ዳር ያሉት ቤቶች ፈርሰው በግንብ ይሠሩ፡፡
  • ከኋላ ያሉት ለእኛም ሥሩልን ቢሉንስ?
  • እነሱ ወጥቶላቸው ነው በሏቸው፡፡
  • ምን?
  • ዕጣ፡፡
  • ለመሆኑ ለምንድነው በግንብ የሚሠሩት?
  • ለኦባማ፡፡
  • ሰውዬው እዚህ የሚመጣው ሊኖር ነው እንዴ?
  • ያልተጠየቅከውን አታውራ፡፡

[ክቡር ሚኒስትሩ አማካሪያቸውን አስጠሩት] 

  • ይኸው አንተ ቁጭ ብለህ እኔ የአንተን ሥራ እሠራለሁ፡፡
  • ምን ሠሩ ክቡር ሚኒስትር?
  • ከተማዋን ቀያየርኳት፡፡
  • እኮ ለምን?
  • ለኦባማ ነዋ፡፡
  • ምነው ለሕዝቡ እንዲህ ቢቀያይሩለት?
  • ለሕዝቡም በ2025 ይቀየርለታል፡፡
  • እንዴት ሆኖ?
  • ሒሳብ አትችልም እንዴ?
  • እኮ እንዴት?
  • ለኦባማ በሦስት ቀን እንደዚህ ከቀየርነው፣ ለ90 ሚሊዮን ሕዝብ በ2025 እናደርሳለን፡፡
  • እንዲህ ዓይነት ሒሳብ ሰምቼ ባላውቅም፣ ግን ይሁንልዎት፡፡
  • አሁን ሌላ ምን ይቀረናል?
  • የሰብዓዊ መብት ጉዳዩን ምን እናድርገው?
  • ደግሞ የምን የሰብዓዊ መብት ጉዳይ ነው?
  • ያሰርናቸው ፖለቲከኞችና ጋዜጠኞችስ?
  • ይፈቱ፡፡
  • ምን?
  • አሁኑኑ ይፈቱ፡፡
  • ለምን?
  • ለኦባማ ነዋ፡፡
  • ወይ ኦባማ?
  • ለኦባማ አይደለም ጋዜጠኛና ፖለቲከኛ አንበሶቹም ይፈታሉ፡፡
  • ምኖቹ?
  • አንበሶቹ፡፡
  • የትኞቹ?
  • የስድስት ኪሎዎቹ፡፡
  • እኔ ደግሞ ሌሎቹ አንበሶች መስለውኝ ነበር፡፡
  • ስለዚህ በአፋጣኝ ይፈቱ፡፡
  • መልሰው ግን ይታሰሩ እንዳይሉኝ፡፡
  • ለምን?
  • ኦባማ ሲሄድ ነዋ፡፡
  • ድሮስ?
  • ለመሆኑ ለስንት ጊዜ ነው የሚመጣው?
  • ለአንድ ቀን ነዋ፡፡
  • እዚህ ትንሽ ቢቆይ ግን ጥሩ ነው፡፡
  • ለምን?
  • አገሪቱ በአጭር ጊዜ ትቀየር ነበር፡፡
  • እ…
  • ከጂቲፒ 2 እንዲያውም እሱ እዚህ ቢቆይ ፈጣን ለውጥ ሳይመጣ አይቀርም፡፡
  • ወሬኛ ቢጤ ነህ፡፡

[ክቡር ሚኒስትሩ ከቢሮ ሲወጡ ጸሐፊያቸው ጠረጴዛ ላይ ወረቀቶች ተበታትነው አዩ] 

  • ምንድነው አንቺ?
  • ወረቀት ነዋ ክቡር ሚኒስትር፡፡
  • በአፋጣኝ ይፅዳ፡፡
  • አፀዳዋለሁ ክቡር ሚኒስትር፡፡
  • ጊዜ የለም፣ መምጫው ደርሷል፡፡
  • የማን?
  • የኦባማ፡፡

[ክቡር ሚኒስትሩ መኪናቸው ጋ ሲደርሱ ከሾፌራቸው ጋር ማውራት ጀመሩ] 

  • መኪናው እኮ ቆሽሿል፡፡
  • ኧረ ጠዋት ነው ያጠብኩት ክቡር ሚኒስትር፡፡
  • ጐማው እኮ ጭቃ ነው?
  • ክረምት መሆኑን ረሱት እንዴ? መንገዱ ሁሉ ጭቃ ነው እኮ?
  • ከአሁን በኋላ ጐማው በየአምስት ደቂቃው ይታጠብ፡፡
  • እየሄድን ቢሆንም?
  • አቁመህ ማጠብ አለብህ፡፡
  • ለምን ክቡር ሚኒስትር?
  • ኦባማ ሊመጣ ነዋ፡፡
  • የውጭ አልጋ የውስጥ ቀጋ አሉ፡፡

[ክቡር ሚኒስትሩ በመንገድ እየሄዱ አቧራ የለበሱ ልጆች አዩና ሾፌሩ እንዲያቆም ነገሩት] 

  • እናንተ ልጆች ምን ሆናችኋል?
  • ምን ሆንን?
  • እንዲህ ነጫጭባ የሆናችሁት፡፡
  • የደሃ ልጆች ነና፡፡
  • በሉ ቤተሰቦቻችሁ ሰሞኑን ይህን ክሬም እንዲቀቧችሁ አስጠንቅቋቸው፡፡

[ከኪሳቸው ክሬም አውጥተው ሰጧቸው]

  • ለምን?
  • ኦባማ ይመጣላ፡፡

[የክቡር ሚኒስትሩ ሾፌር ተናዶ ጥያቄ ይጠይቃቸው ጀመር] 

  • ሰሞኑን ምነው ፅዳት ላይ አተኮሩ?
  • እሱ ፅዳት ይወዳላ፡፡
  • ማን?
  • ኦባማ፡፡
  • ጉድ ፈላ በሉኝ፡፡
  • ለምን?
  • አንድ የጨቀየ ነገር አለና፡፡
  • ምኑ?
  • ፖለቲካው!