ክቡር ሚኒስትር

[ክቡር ሚኒስትሩ ጸሐፊያቸውን ጠሯት]

 

  • ማስታወቂያው ወጣ?
  • የምን ማስታወቂያ ክቡር ሚኒስትር?
  • የሥራው ማስታወቂያ ነዋ፡፡
  • ክቡር ሚኒስትር ሰው ሊቀጠር?
  • በሚገባ ነዋ፡፡
  • ተጨማሪ ሰው እኮ አያስፈልገንም፡፡
  • ሚኒስትርም ሆነሽልኛላ?
  • እንደሱ ማለቴ አይደለም፡፡
  • ያልገባሽ ነገር ስላለ ነው፡፡
  • ምንድነው?
  • በሁለተኛው ጂቲፒ ከፍተኛ ሥራ እንደሚጠብቀን ታውቂያለሽ?
  • እሱንማ ሁሌም ትላላችሁ፡፡
  • ስለዚህ ይህ ሥራ ለጂቲፒው መሳካት እጅግ አስፈላጊ ነው፡፡
  • እኔ’ኮ በርካታ ሥራ የፈቱ ሰዎች እዚህ አሉ ብዬ ነው፡፡
  • አንደኛው የጂቲፒው ዓላማ እኮ ሕዝቡ የሥራ ዕድል እንዲያገኝ ማድረግ ነው፡፡
  • ዓላማውን ቀየራችሁት እንዴ?
  • ምን ማለት ፈልገሽ ነው?
  • በጂቲፒው እኮ ሥራ ፈጣሪ እንጂ ተቀጣሪ ብዙም አይበረታታም፡፡
  • እንዳትሳሳቺ ቀጣሪና ተቀጣሪ ባላንስ ማድረግ አለባቸው፡፡
  • እንዴት ማለት?
  • ሁሉም ሥራ ፈጣሪ ከሆነ ተቀጣሪ ይጠፋላ፡፡
  • ለዚህ ነው ጥቂት መሪና ብዙ ተመሪ ያለው?
  • ታዲያ ሁሉም መሪ ይሁንልሽ?
  • ግን አንድ ዓይነት መሪ ብቻ ከሚኖር ለአማራጭ ሌሎች መሪዎችም ቢኖሩ ጥሩ ነው፡፡
  • ምን ማለት ፈልገሽ ነው?
  • ማለቴ የተለያዩ የሥራ ፈጣሪዎች ካሉ ለተቀጣሪዎችም የተለያዩ የሥራ ዕድሎች ይከፈታሉ፡፡
  • እሱ ላይ እኮ ነው እየሠራን ያለነው፡፡
  • ፖለቲካው ላይማ ከኢሕአዴግ ውጪ ምን አለ?
  • አጋር ፓርቲዎቹስ?
  • አያስቁኝ እስቲ ክቡር ሚኒስትር?
  • ምንድነው የሚያስቅሽ?
  • እኔ ተቃዋሚ የለም ለማለት ፈልጌ ነው፡፡
  • ታዲያ ሁሉም ከደገፈን ምን እናድርግ?
  • ኧረ ሰው እንዳይታዘብዎት?
  • ታዛቢ መጥራት ካቆምን እኮ ቆየን፡፡
  • አሁን ለሁለተኛው ጂቲፒ ያስፈልጋል ያሉት ሥራ ምንድነው?
  • በመጀመሪያ የምነግርሽን ጻፊ፡፡
  • እሺ፡፡
  • ይህ የሥራ ቦታ ሁለተኛውን ጂቲፒ በመሥሪያ ቤታችን ለማስፈጸም ወሳኝ ነው፡፡
  • እሺ፡፡
  • ለሥራ ቦታው የሚመጥነው የትምህርት ደረጃ አራተኛ ክፍል ነው፡፡
  • እ…
  • ያው እንደነገርኩሽ አንዱ የሁለተኛው ጂቲፒ ዓላማ ለሕዝቡ የሥራ ዕድል መፍጠር ነው፡፡
  • እሺ ስንት ሰው ነው የሚያስፈልገው?
  • አንድ፡፡
  • እንዴ ለሕዝቡ የሥራ ዕድል እንፈጥራለን አላሉኝም እንዴ?
  • አንድ ሰው ራሱ የሕዝቡ አካል መሆኑን አትርሺ፡፡
  • መቼ ነው መቀጠር ያለበት?
  • በአስቸኳይና በአፋጣኝ አልኩሽ፡፡ ሌላው…
  • ሌላው ምን?
  • የዚህን የቅጥር ሒደት እኔ ነኝ የምመራው፡፡
  • ለምን ክቡር ሚኒስትር? እርስዎ እኮ ትልቅ ኃላፊነት ያለበዎት ሚኒስትር ነዎት፡፡
  • ከዚህ በላይ ትልቅ ኃላፊነት የለም፡፡
  • አልገባኝም? ስንት የመልካም አስተዳደርና የሙስና ችግሮች እርስዎን እየጠበቅዎት፣ እዚህ የቅጥር ሒደት ውስጥ መግባት ያስፈልግዎታል?
  • በሥራ ቅጥር ሒደታችን ውስጥ በርካታ የመልካም አስተዳደርና የሙስና ችግሮች እንዳሉብን ስንተች ቆይተናል፡፡
  • ለነገሩ እርስዎ የማያውቁት ቅጥር እኮ ተፈጽሞ አያውቅም፡፡
  • ለዚህ ነው፤ አሁን ደግሞ በደንብ መሳተፍ እፈልጋለሁ፡፡
  • ለመሆኑ የሥራው ዓይነት ምንድነው?
  • ካርኒ ቆጣሪ፡፡

[የክቡር ሚኒስትሩ ጸሐፊ የሥራ ቅጥሩን ማስታወቂያ በጋዜጣ ማስወጣቷን ነገረቻቸው፡፡ እሳቸውም አንድ ዘመዳቸው ጋ ደወሉ]

  • ሰላም ክቡር ሚኒስትር፡፡
  • እንዴት ነህ አቶ ዋጣቸው?
  • አለሁ፤ ዛሬ ከየት ተገኙ?
  • ባለፈው ከገጠር የመጣችው ዘመዳችን አንተው ጋ ናት?
  • አዎን እኔው ጋ ነው ያለችው፡፡
  • ምን ያህል ጊዜ ሆናት ከመጣች?
  • አንድ ወር ሊሞላት ነው፡፡
  • ሥራ ጀመረች እንዴ?
  • ምን ትጀምራለች? በዚያ ላይ ትምህርት ራሱ የላትም፡፡
  • እንዴ በዚህ ኑሮ ውድነት ሰውን ለወር ያለሥራ መቀለብ እኮ ከባድ ነው፡፡
  • በጣም እንጂ ክቡር ሚኒስትር፡፡
  • በል እኔ ጋ ላካት፤ አንድ ሥራ አለ፡፡
  • ኧረ ክቡር ሚኒስትር እርስዎ ጋ ለመሥራት እኮ ቢያንስ ትንሽ ትምህርት ያስፈልጋታል፡፡
  • እሱን ለእኔ ተወው፡፡
  • ለነገሩ እርሶ ምን ይሳንዎታል?
  • ፈላጭም ቆራጭም እኔው ነኝ፡፡
  • ተፈላጭና ተቆራጭ ብቻ ነው የሚያስፈልግዎት፡፡

[የክቡር ሚኒስትሩ ዘመድ የላኩዋት ልጅ ቢሯቸው መጣች]

  • ሰላም ጋሼ እንዴት ነዎት?
  • እዚህ ስሜ ጋሼ አይደለም ክቡር ሚኒስትር ነው፡፡
  • እሺ ክቡር ሚኒስትር ጋሼ፡፡
  • በይ ተይው፡፡
  • ምን አሉኝ ክቡር ሚኒስትር ጋሼ?
  • ሥራ ላስቀጥርሽ ነው፡፡
  • የት ጋሽዬ?
  • እዚህ እኔ ጋ፡፡
  • አይ ጋሽዬ ከእሜቴ ጋር እስማማለሁ ብለው ነው?
  • የለም የለም፤ እዚህ እኛ መሥሪያ ቤት ነው፡፡
  • ኧረገኝ እኔ የቢሮ ሥራ ልሠራ ጋሼ?
  • ቁጥር ትችያለሽ አይደል?
  • ያው እስከ ሁለት ተምሬያለሁ፤ አያቅተኝም፡፡
  • በቃ እዚህ ካርኒ ቆጣሪ ሆነሽ ትቀጠሪያለሽ፡፡
  • አመሰግናለሁ ክቡር ሚኒስትር ጋሼ፡፡
  • ለመጀመሪያው በሁለት ሺሕ የወር ደመወዝ ትጀምሪያለሽ፡፡
  • መቼ ይሆን ውለታውን የምከፍለው ክቡር ሚኒስትር ጋሼ?
  • እናትሽ አደራ ብላኝ ነው የሞተችው፡፡
  • እሷም ከሰማይ ውለታውን ትመልስልዎታለች፡፡
  • አይ እሷ ያለችበት ቦታ እኔ እሄዳለሁ ብለሽ ነው?
  • ከዚያማ ማን ይቀራል ብለው ነው?
  • አይ እሷ መልካም ሰው ስለሆነች፣ እሷ ያለችበት ቦታ እኔ አልሄድም ብዬ ነው፡፡
  • ከዚህ በላይ መልካምነት የት አለ ብለው ነው ክቡር ሚኒስትር ጋሼ?
  • እንደ አፍሽ ያድርግልኝ፤ ለማንኛውም ሲቪሽን አዘጋጂ፡፡
  • እሱ ደግሞ ምንድነው?
  • የሥራ ማኅደርሽ ውስጥ የሚቀመጥ ዶክመንት ነው፡፡ ስለ አንቺ የሚገልጽ ማለት ነው፡፡
  • አይ ጋሽዬ ከዚህ በላይ ለእርስዎ ምን ብዬ እገልጽልዎታለሁ?
  • በይ እሺ ተይው ለአቶ ዋጣቸው እነግረዋለሁ፤ እሱ ያዘጋጅልሻል፡፡

[ክቡር ሚኒስትሩ የሰው ኃይል አስተዳደር ኃላፊውን ጠሩት] 

  • አንድ አዲስ ሰው ልንቀጥር መሆኑን ሰምተሃል?
  • አዎን ክቡር ሚኒስትር፣ የሥራ ማስታወቂያ እኮ ወጥቷል፡፡
  • የሚቀጠረውን ሰው እኔ አመጣልሃለሁ፡፡
  • እንዴ ክቡር ሚኒስትር?
  • የምን እንዴ ነው?
  • የሥራ ማስታወቂያ አውጥተን እኮ በርካቶች ሲቪያቸውን እያስገቡ ነው፡፡
  • የእነሱን ሲቪ ለሌላ ጊዜ እንጠቀመዋለን፡፡
  • ታዲያ ለምን ማስታወቂያውን አወጣን?
  • ይህ አዲስ ነገር ሆኖ ነው? ለፎርማሊቲ ነዋ፡፡
  • የኢሕአዴግ ችግር ይኼ ነው እየተባለ ነው፡፡
  • እንዴት?
  • ሰሞኑን የፕሮቪደንት ፈንድን አስመልክቶ አንድ ረቂቅ አዋጅ ወጥቶ ነበር፡፡
  • አውቃለሁ፡፡
  • ያው ረቂቁ በሕዝብ ዘንድ ጫጫታ ስላስነሳ የሕዝብ ውይይት ተደርጐ ነበር፡፡
  • እሱንም ሰምቻለሁ፡፡
  • በውይይቱ ወቅት በርካታ ቅሬታዎች የተነሱ ሲሆን፣ ከባለድርሻ አካላት ጋር ውይይት ያልተደረገበት ረቂቅ መሆኑ ተገልጾ ነበር፡፡
  • ለዚያ እኮ ነው ውይይቱ የተደረገው?
  • ውይይቱ መደረጉ መልካም ቢሆንም፣ በወቅቱ ባለድርሻ አካላቶች ረቂቁ ባለበት እንዳይፀድቅ የተለያዩ ግብዓቶችን እንዲካተቱ ሐሳብ ተሰጥቶ ነበር፡፡
  • እና አልተካተቱም?
  • ይኸው እነዚያ ግብዓቶች ሳይካተቱ ረቂቁ ፀደቀ፡፡
  • ማነው ለመሆኑ ይህን የነገረህ?
  • ባለቤቴ ናት፡፡
  • የት ነው የምትሠራው?
  • አንድ የግል ድርጅት ነው፡፡
  • ኦ ኪራይ ሰብሳቢዎቹ ጋ፡፡
  • ኧረ እነሱ ኪራይ ሰብሳቢዎች አይደሉም፡፡
  • ኪራይ ሰብሳቢዎች ስለሆኑማ ነው እንዲህ የሚንጫጩት፡፡
  • ይህ ኪራይ መሰብሰብ ከሆነ አሁን እኛም እኮ ኪራይ ሰብሳቢዎች ነን ማለት ነው?
  • ማን አንተ? እኛ?
  • እህሳ?
  • እኛ ኪራይ ሰብሳቢዎች ሳንሆን ጡረታ ሰብሳቢዎች ነን፡፡
  • እነሱም እኮ ፕሮቪደንት ሰብሳቢዎች ነበሩ?
  • አንተ ራስህ ኪራይ ሰብሳቢ ነህ ልበል?
  • እርስዎ ደግሞ ዘመድ ሰብሳቢ ነዎት ልበል?

[ክቡር ሚኒስትሩ አማካሪያቸውን ጠሩት]

  • የጂቲፒ ስብሰባው እንዴት እየሄደ ነው?
  • ኧረ ሕዝቡ አልመጣም እያለ ነው፡፡
  • ለምን?
  • ተሰብስበን ለውጥ ላናመጣ ለምን ወንበር እናሞቃለን? እያሉ ነው፡፡
  • የምትመጡት ወንበር ለማሞቅ ሳይሆን ለመሳተፍ ነው አትሏቸውም?
  • እንደዚያ ብንላቸውም አሻፈረኝ እያሉ ነው፡፡
  • እኮ ለምን?
  • ሐሳባችንን ሰምታችሁን አታውቁም፣ ስለዚህ አንመጣም ብለዋል፡፡
  • ታዲያ ሐሳባቸውን ለምን አንሰማቸውም?
  • መስማትማ እንሰማቸዋለን ግን ሁሌም አናካትተውም፡፡
  • ይካተታ ታዲያ?
  • የኪራይ ሰብሳቢ ሐሳብ ነው ስለሚባል ነዋ፡፡
  • ሕዝቡ ታዲያ ኪራይ ከሰበሰበ እኛ ምን እናድርገው?
  • ለዚህ ነው ሕዝቡ አንመጣም የሚለው፡፡
  • ለምን አበል አይሰጥም?
  • እሱንም ሞክረናል፡፡
  • እና ምን አሉ?
  • ከዚህ በኋላ ህሊናችንን በገንዘብ አንሸጥም አሉ፡፡
  • ታዲያ በነፃ ይሽጡልና?
  • በኋላ አካሄዳችን ግን ችግር እንዳያስከትልብን እንጠንቀቅ፡፡
  • የምን ችግር?
  • ሕዝቡ እኛን ማዳመጥ እንዳያቆም፡፡
  • ለምንድን ነው የሚያቆመው?
  • የማያዳምጥ መንግሥት አይደመጥም ሲባል አልሰሙም፡፡
  • ይህ የኪራይ ሰብሳቢዎች ወሬ ነው፡፡
  • ብቻ ያስቡበት፡፡

[ክቡር ሚኒስትሩ ምሳቸውን ለመብላት ቤት ሄዱ፡፡ ከሚስታቸው ጋር እየበሉ ነው]

  • እንዴት ነበር ቀንህ?
  • ዛሬ ብዙ ሥራ ነው የሠራሁት፡፡
  • ምን ሠርተህ ነው?
  • ያቺን ዘመዴን እኛ ጋ ላስቀጥራት ነው፡፡
  • ይቺን ሙስና አሁንም አልተውካትም፡፡
  • ይህ ሙስና ሳይሆን ሁለቱ ‹‹መ››ዎች ናቸው፡፡
  • ሁለቱ ‹‹መ››ዎች ምንድን ናቸው?
  • መረዳዳትና መደጋገፍ፡፡
  • ሦስተኛውን ‹‹መ›› የት ረስተኸው ነው?
  • ምንድን ነው ሦስተኛው ‹‹መ››?
  • መዝረፍ፡፡
  • ምነው አፍ ለቀቀብሽ?
  • ለመሆኑ ርቦሃል እንዴ?
  • ለምን ጠየቅሽኝ?
  • የቀረበልህን ጥርግ አርገህ በላሃው ብዬ ነው፡፡
  • ርቦኝ ሳይሆን ባህላችን ነው፡፡
  • ምንድን ነው ባህላችሁ?
  • ጠራርጐ መብላት!