ክቡር ሚኒስትር

[የክቡር ሚኒስትሩ ወዳጅ እንኳን ደስ አለዎት ለማለት ደወለ] -እንኳን ደስ አለዎት ክቡር ሚኒስትር፡፡ -እንኳን አብሮ ደስ አለን፡፡ -አይ እኔ እኮ አልተሾምኩም፡፡ -ባትሾምም ቢያንስ ስምህ ተሾመ ነው፡፡ -እና በእሱ ልፅናና? -ሰው ባለው ነው ወዳጄ፡፡ -እሱማ እውነት ነው፤ ለማንኛውም እንኳን ያለዎት ነገር አልተወሰደ፡፡ -ማን  ይወስደዋል ብለህ ነው? -ክቡር ሚኒስትር ረሱት እንዴ? -ምኑን? -የግምገማውን ጊዜ፡፡ -እሱማ እንዴት ይረሳል? -ለነገሩ የወጋ ቢረሳ የተወጋ መቼ ይረሳል አይደል ነገሩ? -ተወግተሃል እያልከኝ ነው? -ዋናው ተወግተውም መቀጠልዎ ነው፡፡ -ይነሳል ብለህ ፈርተህ ነበር እንዴ? -ማን እርስዎ? -እህሳ! -እርስዎማ እንኳን ከሥልጣን ሊነሱ ፎቶ ራሱ መቼ ተነስተው ያውቃሉ? -የሚያነሳኝ አጥቼ ነዋ፡፡ -አገራችን እኮ ለዚህ አልታደለችም፡፡ -እንዴት? -እኛ አገር ሥልጣን ላይ ለመውጣትም በትግል ነው፣ ከሥልጣን ለመውረድም በትግል ነው፡፡ -የትጥቅ ትግል አቀንቃኝ ነህ ልበል? -ኧረ አልወጣኝም፡፡ -ታዲያ ምን እያልክ ነው? -ማለቴ በሌሎች አገሮች ያሉት ባለሥልጣናት ጥፋት ሲያጠፉ በራሳቸው ፈቃድ ከሥልጣናቸው ይወርዳሉ ብዬ ነው፡፡ -ማን ሲወርድ አይተናል? እስቲ አንድ ጥቀስ፡፡ -ያው የምዕራባውያን አገር መሪዎች አሉ፡፡ -የአሜሪካ ሴናተሮች በ1960ዎቹ ተሹመው እስካሁን ያገለግላሉ አይደል እንዴ? -ሕዝብ መርጧቸው ነዋ፡፡ -እኛም እኮ ሕዝብ መርጦን ነው፡፡ -እሱን እንኳን ውስጡን ለቄስ፡፡ -ውስጡንማ እኛ ተቆጣጥረነዋል፣ ከፈለጉ ውጭ ይሁኑ፡፡ -ማን? -ቄሱ፡፡ -ለማንኛውም ለውጥ ይኖራል ብዬ ነበር፡፡ -የምን ለውጥ? -ሹመቱ ላይ ነዋ፡፡ -አሁን እኔን ማን ይተካኛል? -እርስዎን ማለቴ ሳይሆን ሌሎች የአቅም ችግር የነበረባቸውን ማለቴ ነው፡፡ -በማን ይተኩ? -በወጣት መሪዎች ነዋ፡፡ -መሪ ለመሆን እኮ ልምድ ወሳኝ ነው፡፡ -አቅም ያላቸው ወጣት መሪዎች እኮ አሉ፡፡ -ለመሆኑ የትኛው ድርጅት ነው ፍሬሽ ግራጁዌት የሚቀጥረው? -እ… -እኛስ ለማን ብለን ነው መንግሥትን መለማመጃ የምናደርገው? -እና ለዘመናት እየመራችሁ ልትኖሩ ነው? -ይኸውልህ ቴዲ አፍሮ ለዘፈን እንደተፈጠረ እኔም ለመምራት ነው የተፈጠርኩት፡፡ -እና ዕድሜ ልክዎን ሲመሩ ሊኖሩ? -ዘፋኙ ዕድሜ ልኩን ሲዘፍን አይደል እንዴ የሚኖረው? -የባሰ አታምጣ አለ የአገሬ ሰው፤ እና የወጣቱ ተስፋ ምንድነው? -እኛው ነን፡፡ [የክቡር ሚኒስትሩ ጸሐፊ ቢሯቸው ገባች] -እንኳን ደስ አለዎት ክቡር ሚኒስትር፡፡ -በአምላክሽ፡፡ -እኔማ ጨንቆኝ ነበር፡፡ -ምኑ ነው የጨነቀሽ? -አዲስ አለቃ ይመጣል ብዬ ነዋ፡፡ -የምነሳ መስሎሽ ነበር? -የግምገማው ጊዜ እኮ አይጣል ነበር፡፡ -ለነገሩ ፓርቲያችን ሂስሽን ዋጪ እንጂ አይጨክንብሽም፡፡ -እሱንማ በእርስዎ አረጋገጥን፡፡ -ከዚህ በኋላ ግን በቃኝ፡፡ -ምኑ? -ሂስ መዋጥ ነዋ፡፡ -እውነት? -አዎና ሂስ ውጬ መድኃኒት ውጬ እችለዋለሁ? -እሱማ ያስቸግራል፡፡ -ስለዚህ ለውጥ ያስፈልጋል፡፡ -የምን ለውጥ? -ለውጡ ከውስጥ ነው መጀመር ያለበት፡፡ -እኮ ምን እንለውጥ? -መጀመሪያ ይኼን ምንጣፍ፣ ጠረጴዛና ወንበር ለውጭልኝ፡፡ -እሺ፡፡ -መኪናዬም ይለወጥ፡፡ -ሌላስ? -የመሥሪያ ቤቱ ሁሉም ኮምፒዩተር ይለወጥ፡፡ -እ… -የመሥሪያ ቤቱ ቀለምም ይለወጥ፡፡ -ሌላስ? -ሁሉም አሮጌ ነገር ተለውጦ አዲስ መሆን አለበት፡፡ -እነዚህን ነገሮች ግን አምና ነው የቀየርናቸው፡፡ -አሁን በአዲስ መልክ ሥራ ልንጀምር ነዋ፡፡ -ሌላ የሚቀየር የለም? -ሌላ ምን እንቀይራለን? -አዲስ አመራር ነዋ፡፡ -ሰው ክቡር ስለሆነ መቀየር አይቻልም፡፡ -ሰዎቹን መቀየር ባይቻል ቢያንስ አስተሳሰባቸው ለምን አይቀየርም? -በምንድነው የሚቀየረው? -ለዚህ ሁሉ ነገር ገንዘብ ከሚወጣ ሰዎቹ ለምን አቅማቸውን እንዲያጐለብቱ አይሠለጥኑም? -በቃ ለእሱ በጀት ይያዝለት፣ አበላቸውም ጠቀም ያለ ገንዘብ ይሁን፡፡ -እኔ ግን አበል አይከፈል ባይ ነኝ፡፡ -ለምን? -ሰዎች ከሥልጠናው የሚያገኙት ነገር እንዲለውጣቸው ነው እንጂ ማድረግ ያለብን አበል እንዲለውጣቸው ማድረግ የለብንም፡፡ -ኪራይ ሰብሳቢ ነሽ ልበል? -እንዴት ክቡር ሚኒስትር? -ሰው እንዲጠቀም አትፈልጊማ፡፡ -ኪራይ ሰብሳቢ ሆኜ እኮ አይደለም፡፡ -ምን ሆነሽ ነው ታዲያ? -ኪራይ በታኝ፡፡ [የክቡር ሚኒስትሩ ወዳጅ ባለሀብት ቢሯቸው መጣ] -እንኳን ደስ አለዎት ክቡር ሚኒስትር፡፡ -እንኳን አብሮ ደስ አለን፡፡ -እኔማ ከእርስዎ በላይ ነው የፈነደቅኩት፡፡ -በምኑ? -ሲሾሙ ነዋ፡፡ -ለምን? -ክቡር ሚኒስትር ለእርስዎ ካልዘነበ ለእኔ መቼ ያካፋል? -አሁን ለሁሉም ዜጐች እኩል ነው የሚዘንበው፡፡ -ያድርግልና፡፡ -ምን ልርዳህ አሁን? -አንድ የውጭ ኢንቨስተር ከእኔ ጋር ለመሥራት ወደዚህ እየመጣ ነው፡፡ -እሺ፡፡ -ስለዚህ ለፕሮጀክታችን ሰፊ ቦታ እንፈልጋለን፡፡ -ታዲያ የሚመለከታቸውን አካላት አናገራችሁ? -ክቡር ሚኒስትር እኔ እኮ ሁሉን ነገር በእርስዎ ነው የማስጨርሰው፡፡ -አሁን ነገሮች ተቀይረዋል፡፡ -ምን ተፈጠረ? -እንደ ወዳጅ ምን ማድረግ እንዳብህ ልመክርህ እችላለሁ፡፡ ከዚያ ውጪ ግን ሁሉን ነገር በራስህ መጨረስ አለብህ፡፡ -ለማንኛውም ክቡር ሚኒስትር አንድ ስጦታ ይዤ መጥቻለሁ፡፡ -የምን ስጦታ? -እንኩ ቼክ ነው፡፡ -በል በል በል እዚያው ያዘው፡፡ -ምነው ክቡር ሚኒስትር? -ሥራ በአዲስ መልክ ጀምረናል አልኩ እኮ፡፡ -ይኼ እኮ ስለተሾሙ የደስታ ምኞት መግለጫዬ ነው፡፡ -አሁን ሳትዋረድ ከዚህ ቢሮዬ ውጣልኝ፡፡ -እውነት ነው ማለት ነው ክቡር ሚኒስትር? -ምኑ? -የመልካም አስተዳደር ችግር አለ የሚባለው፡፡ -ለዚያ እኮ ነው ይኼን ቼክ የማልቀበልህ፡፡ -እኔም ችግር አለ ያልኩት እኮ አልቀበልም ስላሉኝ ነው፡፡ -ጭራሽ? -ያለመድኩት ሆኖብኝ ነዋ፡፡ [ክቡር ሚኒስትሩ ከሾፌራቸው ጋር ወደ ቤት እየሄዱ ነው] -በጣም ነው ደስ ያለኝ ክቡር ሚኒስትር፡፡ -በምኑ? -ደግመው በመሾምዎት፡፡ -ይኼን ያህል ሕዝቡ ይወደኛል ማለት ነው? -ከጭንቀት ነዋ የገላገሉኝ፡፡ -ከምን ጭንቀት? -አዲስ አለቃ ከመልመድ፡፡ -እ… -ምን እሱ ብቻ፡፡ -ሌላስ ምን አለ? -አዲስ የአለቃ ሚስት፣ አዲስ የአለቃ ጥበቃ፣ አዲስ የአለቃ የቤት ሠራተኛ፣ ኧረ ስንቱ? -ይኼን ያህል ተጨንቀህ ነበር? -እህሳ፡፡ -ለማንኛውም ሹመቱን እንዴት አየኸው? -ያስገረሙኝ ነገሮች ነበሩ፡፡ -ምን አስገረመህ? -በአብዛኛው እኮ ደግመው ነው የተሾሙት፡፡ -ታዲያ ምን ጠብቀህ ነበር? -አይ ያው ያ ሁሉ ችግር ተወርቶ፣ ሰዎቹ መልሰው ሲቀጥሉ ገርሞኛል፡፡ -ለውጥ በሒደት ነው የሚመጣው፡፡ -ሌላው ያስገረመኝ የአንዳንዶቹ አወቃቀር ነው፡፡ -እንዴት? -አሁን ፆም ሊገባ ስለሆነ የፆም ሚኒስቴሩ ሥራ ሊበዛበት ነው፡፡ -የምን የፆም ሚኒስቴር? -ማለቴ የዓሳ ሀብት ሚኒስቴሩ፡፡ -የፆም ብቻ አይደለም የፍስክም ነው፡፡ -እንዴት? -የእንስሳትና የዓሳ ሀብት ሚኒስቴር ነዋ፡፡ -ሌላው የገረመኝ ደግሞ አርብቶ አደር ለብቻ፣ እንስሳት ሀብት ለብቻ ተዋቅረዋል፡፡ አርብቶ አደሩ የሚያረባው እንስሳት መስሎኝ? -እ… -ሌላው ያስገረመኝ ደግሞ የማዕድን፣ የነዳጅና የተፈጥሮ ጋዝ ሚኒስቴር ነው፡፡ -ለምን? -የተፈጥሮ ጋዝ እኮ ነዳጅ ውስጥ መካተት ይችላል፡፡ -የተፈጥሮ ጋዝ እኮ ስለተገኘ ነው፡፡ -ቀጥሎ የፖታሽ ሚኒስቴርም ይመጣላ፡፡ -ለአገር የሚጠቅም ከሆነ ምን ችግር አለው? -ስለዚህ ሌላ አገር የሚጠቅም ሚኒስቴርም እንጠብቃ፡፡ -የምን ሚኒስቴር? -የዝንጅብል፣ የነጭ ሽንኩርትና የጥቁር አዝሙድ ሀብት ሚኒስቴር፡፡