ክቡር ሚኒስትር

[የክቡር ሚኒስትሩ ልጅ የብሔራዊ ፈተና ተፈትና ቤት ስትገባ አባቷን አገኘቻቸው]

 

  • ደህና ዋልክ አባዬ?
  • ደህና ነኝ፤ አንቺ እንዴት ዋልሽ?
  • እኔ በጣም ደህና ነኝ፡፡
  • ከትምህርት ቤት እየገባሽ ነው?
  • አዎን፡፡
  • ትምህርት እንዴት ነበር?
  • ሰሞኑን እኮ ፈተና ላይ ነን፡፡
  • እንዴ እና አሁን ተፈትነሽ ነው የምትመጪው?
  • አዎን፡፡
  • በእጅሽ ምንድነው የያዝሽው?
  • ዛሬ የተፈተነው የፈተና ሽት ነው፡፡
  • እስቲ አምጪው፡፡
  • እሺ እንካ፡፡

[የክቡር ሚኒስትሩ ልጅ የፈተና ሽቱ ላይ መልሶቿን አክብባ ስለነበር ማረም ጀመሩ] 

  • በጣም ደስ ይላል፡፡
  • ምኑ አባዬ?
  • እስካሁን እኮ ኤክስ አላገኘሁብሽም፡፡
  • የአባቷ ልጅ እኮ ነኝ፡፡
  • ጐበዝ፤ እውነትም በእኔ ነው የወጣሽው፡፡
  • የደፈንኩት ይመስለኛል፡፡
  • መድፈን እኮ ከዘራችን ነው፡፡
  • አንተም ትደፍናለህ እንዴ?
  • መድፈን ቢሉሽ መድፈን ነው?
  • አባዬ ግን አንተ ትማራለህ እንዴ?
  • ኧረ አልማርም፡፡
  • ታዲያ ምንድነው የምትደፍነው?
  • ምን የማልደፍነው ነገር አለ ብለሽ ነው?
  • መንግሥት ጋ ቀዳዳ አለ እንዴ?
  • የምን ቀዳዳ?
  • የሚደፈን ቀዳዳ፡፡
  • አንቺ ልጅ አይደለሽ እንዴ?
  • ብሆንስ ታዲያ?
  • እንዲህ ዓይነት አሽሙር ማነው ያስተማረሽ?
  • ትምህርት ቤት እኮ ብዙ ነገር ሲሉ እሰማለሁ፡፡
  • ምን ይላሉ?
  • እሱን ሌላ ጊዜ እነግርሃለሁ፡፡
  • እንዴ የዚህን ጥያቄ መልስ ምንድነው ያልሽው?
  • ቢ ነዋ፡፡
  • ወይኔ!
  • ምነው አባዬ?
  • መልሱ ኤ ነበራ፡፡
  • ስንተኛው ጥያቄ ላይ ነህ?
  • የመጨረሻው ላይ ነኝ፡፡
  • እኮ ስንት ኤክስ አገኘህብኝ?
  • አንድ ኤክስ፡፡
  • አሪፍ ነዋ አባዬ፡፡
  • አሪፍ አይደለም፡፡
  • ለምን?
  • መድፈን ነበረብሽ?
  • አንድ ኤክስ ስለሆነ እንደ ደፈንኩት ይቆጠራል እኮ፡፡
  • እኔማ በእኔ እንድትወጪ ፈልጌ ነው፡፡
  • እንዴት ማለት?
  • እኔ ፈተናዬን ደፍኘዋለኋ፡፡
  • አልማርም አላልከኝም እንዴ?
  • ሌላ ፈተና ነበረብኝ፡፡
  • እና ደፈንከው?
  • አዎን ደፈንኩት፡፡
  • በዚህ ዘመን ግን የሚደፍን ሰው ያለ አይመስለኝም ነበር፡፡
  • እኔ አለሁ፡፡

[የክቡር ሚኒስትሩ አማካሪ ቢሯቸው ገባ] 

  • አነበቡት እንዴ ክቡር ሚኒስትር?
  • ምኑን?
  • ጋዜጣው ይዞ የወጣውን፡፡
  • ምን ይዞ ወጣ?
  • ኦባማ እኮ ኢትዮጵያ ሊመጣ ነው፡፡
  • አታውቅም ነበር እንዴ?
  • እርስዎ ያውቁ ነበር እንዴ?
  • ባለፈው እንግዳ ይመጣል አላልኩህም ነበር እንዴ?
  • እኮ እንግዳ ይመጣል ነው ያሉኝ እንጂ መቼ ኦባማ አሉኝ?
  • ለሴኩዩሪቲ ጉዳይ ብዬ ነዋ፡፡
  • ለምን ይዋሻል?
  • ምን አልከኝ?
  • በጣም ደስ ይላል፡፡
  • ምኑ ነው ደስ የሚለው?
  • ኦባማ መምጣቱ፡፡
  • ገና ብዙዎች ወደ ኢትዮጵያ ይጐርፋሉ፡፡
  • ምን ሊያደርጉ?
  • ሊማሩ ነዋ፡፡
  • ከእኛ?
  • አዎና፡፡
  • ከእኛ ደግሞ ምን ይማራሉ?
  • አንተ ኢትዮጵያ እኮ ትልቅ አገር ናት፡፡
  • እንዴት?
  • የሰው ልጅ መገኛ ናት፡፡
  • እሱን አውቃለሁ፡፡
  • የሥልጣኔ መገኛ ናት፡፡
  • እሱማ ትክክል ነው፡፡
  • የቡናም መገኛ ናት፡፡
  • እሱንም አውቃለሁ፡፡
  • አሁን ደግሞ የአንድ አዲስ ነገር መገኛ ሆናለች፡፡
  • የምን?
  • የዲሞክራሲ፡፡
  • ምን አሉኝ?
  • የዲሞክራሲ መገኛ አልኩህ፡፡
  • እኛን ነው አሜሪካንን ነው የሚሉኝ?
  • እኛ ነን እንጂ፡፡
  • እኮ እንዴት ሆኖ?
  • ዲሞክራሲያዊ ምርጫ አካሂደን መቶ በመቶ ማሸነፍ ችለናል፡፡
  • ምን አሉኝ?
  • ስለዚህ ቻይና ያሉ ወንድሞቻችን ከዚህ መማር ይፈልጋሉ፡፡
  • ምንድነው የሚማሩት?
  • እነሱ እኮ ምርጫ ሳያካሂዱ ነው ማሸነፍ የቻሉት፡፡
  • እሱማ ይታወቃል፡፡
  • እኛ ደግሞ ምርጫ አካሂደን መቶ በመቶ ማሸነፍ ችለናል፡፡
  • አሃሃ…
  • ስለዚህ ገና ሌሎች በርካቶች እኛን ይጐበኙናል፡፡
  • እነማን ናቸው?
  • እነ ሳዑዲ ዓረቢያና ሰሜን ኮሪያ የመሳሰሉ፡፡
  • እነዚህ አገሮች እኮ ምርጫ አካሂደው አያውቁም፡፡
  • ለዛ እኮ ነው የምልህ?
  • እንዴት?
  • ምርጫ ባለማካሄዳቸው ስለሚወቀሱ፣ ምርጫ አድርገው ማሸነፍ እንደሚችሉ እናስተምራቸዋለን፡፡
  • በጣም የሚገርም ሐሳብ ነው፡፡
  • ከዚህ በኋላ የኮንፈረንስ ቱሪዝም ላይ ማተኮር አለብን፡፡
  • ለምን?
  • ዓለም ሁሉ ወደ እኛ ይጐርፋላ፡፡
  • እኮ ለምን?
  • ከእኛ ለመማር፡፡
  • እና ኦባማም የሚመጡት ለዚህ ነው?
  • እንዴታ?
  • ከእኛ ሊማሩ?
  • አሜሪካ እኮ በቅርቡ ምርጫ ታካሂዳለች፡፡
  • እውነትም የእኛ ዕድገት የኢኮኖሚ ብቻ አይደለም ማለት ነው?
  • ምን ነካህ? በኢኮኖሚ ብቻ አድገህ በዲሞክራሲ ካላደግህ እኮ ዋጋ የለውም፡፡
  • እና በዲሞክራሲውም ልክ እንደ ኢኮኖሚው 11 ፐርሰንት አድገናል ማለት ነው?
  • የዲሞክራሲው ከዛም ከፍ ይላል፡፡
  • ስንት ፐርሰንት?
  • መቶ ፐርሰንት፡፡

[የክቡር ሚኒስትሩ ወዳጅ ከውጭ ደወለ] 

  • ሰላም ክቡር ሚኒስትር፡፡
  • እንዴት ነህ ወዳጄ?
  • እንኳን ደስ አለዎት፡፡
  • ለምኑ?
  • ያው ውጤቱ መቶ ፐርሰንት መሆኑን ሰምቼ ነው፡፡
  • የሥራችን ውጤት ነው፡፡
  • የእስራችን ውጤት ነው ያሉኝ?
  • የለም የለም፤ የሥራችን ውጤት ነው፡፡
  • ለነገሩ ልክ ብለዋል፡፡
  • ከለፋህ ሁሌም ያልፍልሃል፡፡
  • ካለፉ ግን ሊያልፍብዎት ይችላል፡፡
  • ሥራህ በግልጽ ከታየ ዓለምም ያደንቅሃል፡፡
  • ዓለም መቼ አደነቀን ታዲያ?
  • ከዚህ በላይ መደነቅን በምን እንለካው?
  • ዓለም መደነቁን በምን አወቁ?
  • ይኸው ሊጐበኘን እኮ ነው፡፡
  • ማን ነው የሚጐበኘን?
  • የዓለም መሪው ኦባማ ሊጐበኘን ነው እኮ፡፡
  • ታዲያ እንዳደነቀን በምን አወቁ?
  • ስለሚጐበኘን ነዋ፡፡
  • የሚጐበኘን በሌላ ምክንያት ቢሆንስ?
  • ተደንቆብን ካልሆነ ምን ሊሆን ይችላል?
  • ታዝቦን፡፡
  • ምን?
  • ምርጫውን እንዲታዘቡ መንግሥት ስላልጋበዛቸው ከውጤቱ በኋላ ራሱ ሊታዘበን እየመጣ ቢሆንስ?
  • ተቃዋሚ ሆንክ እንዴ?
  • ክቡር ሚኒስትር ችግርዎት እኮ ይኼ ነው፡፡
  • ምንድነው ችግሬ?
  • ከእርስዎ አመለካከት ውጪ የሆነ ሁሉ ተቃዋሚ ይመስልዎታል፡፡
  • ታዲያ ይህ የተቃዋሚ እንጂ የደጋፊ ሐሳብ ነው?
  • ድጋፋችን ጭፍን መሆን የለበትም፡፡
  • ዓይንህን ካልጨፈንክ እኛን መደገፍ እንዴት ትችላለህ?
  • ለነገሩ እውነትዎትን ነው፡፡
  • እና አሁን ዓይንህን ገልጠሃል?
  • ሁለቱንም ባይሆን አንዱን ገልጫለሁ፡፡
  • እየተጣቀስክ ነዋ?
  • ሁለቱንም ከመግለጤ በፊት መስተካከል ያለበትን አስተካክሉ፡፡
  • እሺ፡፡

 [ክቡር ሚኒስትሩ ቤታቸው ሲገቡ ሚስታቸውን አገኟቸው]

  • መቼም ሰሞኑን ጉራህ አይቻልም?
  • ለምኑ?
  • ኦባማ ሊመጣ መሆኑን ሰምቼ ነዋ፡፡
  • ሥራችን ገና ብዙዎችን ያስመጣል፡፡
  • ጀመረህ ጉራህ፡፡
  • ጠንክረን እየሠራን ስለሆነ በርካታ መሪዎች ገና ይመጣሉ፡፡
  • የመጀመሪያ የአሜሪካ ፕሬዚዳንት መሆኑ ነው ኢትዮጵያን ሲጐበኝ?
  • የለም የለም፤ ከዚህ በፊት ሌሎችም ጐብኝተውናል፡፡
  • እነማን?
  • ቡሽ ብትይ፣ ክሊንተን ብትይ፣ ካርተር ብትይ፡፡
  • ይኼ እኮ ነው ችግርህ፡፡
  • እንዴት?
  • እነሱ እኮ የመጡት ከሥልጣን ከወረዱ በኋላ ነው፡፡
  • ቢወርዱስ?
  • እንደ እናንተ ከወረዱም በኋላ አገሪቱን የሚገዙ ይመስልሃል አይደል?
  • ምነው ወሬ አበዛሽ?
  • ለመሆኑ ለምንድነው የሚመጣው?
  • ለሁለት ነገር ነው፡፡
  • ለምንና ለምንድነው?
  • በመጀመሪያ ከእኛ ለመማር ነው፡፡
  • እንዴት?
  • በዴሞክራሲያዊ ምርጫ መቶ ፐርሰንት እንዴት ማሸነፍ እንደሚቻል ለመማር ነው፡፡
  • ሁለተኛውስ?
  • በዓለም መሪዎች ፊት ለዚህ የምርጫ ውጤት ሽልማት ሊሰጠን ነው፡፡
  • ለምን ይሸልማችኋል?
  • ስለደፈነው፡፡
  • ሙገሳ ስትጠብቅ ሌላ እንዳይገጥምህ፡፡
  • ሌላ ምን?
  • ሙለጫ!