ክቡር ሚኒስትር

[የክቡር ሚኒስትሩ አማካሪ ቢሯቸው ዘው ብሎ ገባ]

 

  • ፈለከኝ?
  • ተቃውሞ እያቀረቡ ናቸው ክቡር ሚኒስትር፡፡
  • እነማን ናቸው ተቃውሞ የሚያቀርቡት?
  • የውጭ ዲፕሎማቶች፡፡
  • ደግሞ ምን ሆኑ?
  • በጣም ጠበቀብን እያሉ ነው፡፡
  • ያስፉታ ታዲያ?
  • ምኑን?
  • ያጠበቃቸውን ነገር፡፡
  • ያጠበቃቸው የእኛ ፖሊሲ ነው፡፡
  • የትኛው ፖሊሲ?
  • የቢዝነስ ቪዛ ለማግኘት ያለው ፕሮሰስ በዛብን እያሉ ነው፡፡
  • ምን አልከኝ?
  • የቢዝነስ ቪዛ ለማግኘት ተቸገርን እያሉ ነው፡፡
  • ምን ይደረግልን ነው የሚሉት?
  • ባለሀብቶች ወደ ኢትዮጵያ ለመምጣት ብዙ እየተጉላሉ ነው፡፡
  • ታዲያ እንደፈለጉ ዘው ማለት አማራቸው?
  • እንደሱ እንኳን እያሉ አይደለም፡፡
  • የእኛ ዜጐች በጣም አይደለም እንዴ የሚቸገሩት?
  • ምን ለማድረግ?
  • የእነሱን ቪዛ ለማግኘት፡፡
  • እሱማ ልክ ነው፡፡
  • ታዲያ የእነሱ ጠብቆ የእኛ ለምን ይላላል?
  • ያው እኛ እነሱን እንፈልጋቸዋለን፡፡
  • ለምንድን ነው የምንፈልጋቸው?
  • ለማደግ ነዋ፡፡
  • እነሱ እኛን አይፈልጉንም?
  • እነሱማ አድገዋል፡፡
  • ታዲያ ያደጉት በእኛ ዕርዳታ ነው?
  • ኧረ በፍጹም፡፡
  • ስለዚህ እኛም ለማደግ የእነሱን ዕርዳታ አንፈልግም፡፡
  • ይህ እንኳን ብዙ የሚያስኬደን አይመስለኝም፡፡
  • ለምን አያስኬደንም? ቻይና በዕርዳታ ነው ያደገችው?
  • አይደለም፡፡
  • አሜሪካስ ብትሆን በማን ዕርዳታ ነው እዚህ የደረሰችው?
  • እሱማ በራሷ ጥረት ነው፡፡
  • እኛም በራሳችን ጥረት ማደግ እንችላለን፡፡
  • ምን እያሉ ነው ክቡር ሚኒስትር?
  • የአገራችን ባለሀብቶች ላይ ነው ትኩረት ማድረግ ያለብን፡፡
  • አሁን እኮ የምንኖረው ግሎባላይዝድ በሆነች ዓለም ላይ ነው፡፡
  • ለምን ማርስ ላይ አንኖርም? ማደግ እንችላለን እንችላለን፡፡
  • ዕድገት እኮ በፉከራ አይመጣም፡፡
  • የምን ፉገራ ነው? እኔ ነኝ ፎጋሪው?
  • በፉገራ ሳይሆን በፉከራ ነው ያልኩት፡፡
  • ብቻ በፉከራም ቢሆን በፉገራ ማደጋችን አይቀርም፡፡
  • ለማንኛውም ብናስብበት ጥሩ ነው፡፡
  • ምንም የምናስብበት ነገር የለም፡፡
  • እ…
  • እነሱም ሉዓላዊ አገር እኛም ሉዓላዊ አገር፤ በቃ፡፡
  • እሺ እንዳሉ፡፡
  • ጨርሻለሁ፡፡

[የክቡር ሚኒስትሩ ጸሐፊ የተለያዩ ወረቀቶች ይዛ ገባች]

  • ምንድን ነው ይዘሽ የመጣሽብኝ?
  • ደብዳቤዎችና የጥሪ ወረቀት ነው፡፡
  • የምን የጥሪ ወረቀት ነው?
  • አንድ ግብዣ አለ፡፡
  • የምን ግብዣ ነው?
  • የአንድ አርቲስት ልደት ይከበራል፡፡
  • የት?
  • እዚያ ትልቁ ሆቴል፡፡
  • እና እኔ ምን አደርጋለሁ?
  • ምን ማለት ነው ምን አደርጋለሁ?
  • እኮ እኔ ምን አደርጋለሁ?
  • ግብዣው ላይ ይገኛሉዋ፡፡
  • ማን? እኔ?
  • አዎና፡፡
  • ሥራ አጥቼ ነው?
  • ይኼ እኮ ሥራ አይደለም መዝናኛ ነው፡፡
  • እኔ ብዙ ሥራ ስላለብኝ አልገኝም፡፡
  • ኧረ ክቡር ሚኒስትር በርካታ ባለሥልጣናት እኮ ይገኛሉ፡፡
  • ለምን?
  • የአርቲስቱን ልደት ሊያከብሩ ነዋ፡፡
  • ሥራ የላቸውም እንዴ?
  • ይኼ እኮ ሥራ አይደለም መዝናኛ ነው አልኩዎት፡፡
  • ታዲያ በሌላ ነገር አይዝናኑም?
  • ታዋቂ ሰው ነው፡፡
  • ማን?
  • ጋባዡ፡፡
  • እኔ ከታዋቂ ይልቅ አዋቂ ሰው ይሻለኛል፡፡
  • እና አይገኙም?
  • ኧረ አላበድኩም፡፡
  • እንዳይቀየምዎት ግን፡፡
  • በቃ ጥሩ ምክንያት ፈልጊልኝ፡፡
  • የምን ምክንያት?
  • የምቀርበት፡፡

[የክቡር ሚኒስትሩ ጓደኛ ሚኒስትር ደወሉ]

  • መቼም ክቡር ሚኒስትር ደርስዎታል?
  • ምኑ?
  • ግብዣው፡፡
  • የቱ ግብዣ?
  • የአርቲስቱ ልደት፡፡
  • አዎን ደርሶኛል፡፡
  • እንገናኛለና?
  • ትሄዳለህ ማለት ነው?
  • መጠየቁስ፡፡
  • እ…
  • ልንምነሸነሽ እኮ ነው፡፡
  • በምን?
  • በብር፡፡
  • ምን አልከኝ?
  • ሊያልፍልን ነው በቃ፡፡
  • እንዳያልፍብህ ተጠንቀቅ፡፡
  • እ…
  • የራስህንም፣ የመንግሥትንም፣ የአገርህንም ክብር ጠብቅ፡፡
  • ብር ካለ፣ ክብር አለ፡፡
  • ውርደትም አለ፡፡
  • ምን አሉኝ?
  • ብቻ ተጠንቀቅ፡፡
  • እና አይመጡም ክቡር ሚኒስትር?
  • ለምትሄዱትም አዝናለሁ፡፡
  • በሉ ይቅናህ በሉኝ፡፡
  • ምን ይቀናሃል ይንቅሃል እንጂ?

[የክቡር ሚኒስትሩ አንድ ወዳጅ ስልክ ደወለላቸው]

  • ምን እየሠራችሁ ነው ክቡር ሚኒስትር?
  • ብዙ ሥራ ነው የምንሠራው?
  • ምን እየተሠራ እንደሆነ አልገባኝም?
  • ምን ተሠራ?
  • አንድ ጥያቄ ልጠይቅዎት፡፡
  • ጠይቀኝ፡፡
  • ባለፈው ምርጫውን ማሸነፋችሁን ስትነግሩን ያልመረጠንንም እናገለግላለን ስትሉ አልነበር እንዴ?
  • ብለናል፡፡
  • በአገሪቱ የሕጐች ሁሉ የበላይ የቱ ነው?
  • ሕገ መንግሥቱ ነዋ፡፡
  • ይኸው አንዱ ወዳጄ ሕገ መንግሥታዊ መብቱን ሲፈጽም ታሰረ፡፡
  • ምን አድርጐ?
  • ለምን ምርጫው የተበላ ዕቁብ ነው አልክ? ተብሎ ታሰረ፡፡
  • ምርጫውማ የተበላ ዕቁብ አለመሆኑን ሕዝብ በራሱ ድምፅ አረጋግጧል፡፡
  • ታዲያ የእሱ መናገር ውጤቱን ይቀይረዋል?
  • አይቀይረውም፤ ሊቀይረውም አይችልም፡፡
  • ይኸው ይህን ተናገርክ ተብሎ ዘብጥያ ወርዷል፡፡
  • ይኼማ ትክክል አይደለም፤ መሆንም የለበትም፡፡
  • ግን ሆኗል፡፡
  • እስቲ አጣራለሁ፡፡
  • ክቡር ሚኒስትር በኢኮኖሚ ያስገኛችሁትን ዕድገት በሌላውም ልትደግሙት ያሻል፡፡
  • በሌላ በምን?
  • በመልካም አስተዳደር፣ በሰብዓዊ መብት፣ በሙስናና በሌላም፡፡
  • ይኸው ወገባችንን ታጥቀን እየሠራን ነው፡፡
  • ወገባችሁ ላይ ያሉትን ሞላጮች ግን አራግፉ፡፡
  • ሁሌም ሕዝባችንን ለማገልገል ጠንክረን እንሠራለን፡፡
  • የምትሰብኩትን ግን ኑሩት፡፡

[ክቡር ሚኒስትሩ ማታ ቤት ገብተው ከሚስታቸው ጋር ቴሌቪዥን እየተመለከቱ ነው፡፡ የአርቲስቱ የልደት ፕሮግራም በቀጥታ እየተላለፈ ነው]

  • አልተጠራህም እንዴ?
  • ተጠርቼ ነበር፡፡
  • ታዲያ ለምን አልሄድክም?
  • ማን? እኔ?
  • የማወራው አንተን አይደለም እንዴ?
  • እኔ እኮ የአገር መሪ ነኝ፡፡
  • ታዲያ ብትሆንስ?
  • ብዙ ሥራ አለብኝ፡፡
  • ይኼ ሥራ ሳይሆን መዝናኛ ነው፡፡
  • ኦ ሴትዮ በቃ እኔን አይመጥነኝም፡፡
  • ታዲያ እኔ ለምን አልሄድም ነበር?
  • ኪራይ ሰብሳቢ ሆነሻል ልበል?
  • የማይገኝ አጋጣሚ ነው ብዬ ነው፡፡
  • ኪራይ ለመሰብሰብ?
  • ያው ብዙ ባለሥልጣን አይደል እንዴ የተገኘው?
  • አፍሬያለሁ እባክሽ፡፡

[የክቡር ሚኒስትሩ ጓደኛ ሚኒስትር ደወሉ]

  • ቀጠሮ ነበረን እኮ ክቡር ሚኒስትር?
  • የት?
  • ግብዣው ቦታ ነዋ፡፡
  • ይኸው በቴሌቪዥን እያየኋችሁ ነው፡፡
  • አልመጣሁም እያሉኝ ነው?
  • እናንተም በመሄዳችሁ አፍሬያለሁ፡፡
  • ክቡር ሚኒስትር እንደዚህ ዓይነት ግብዣዎች እኮ የግሉና የፐብሊክ ሴክተሩን የሚያስተሳስሩ ናቸው፡፡
  • በምንድን ነው የሚያስተሳስሩት?
  • እ…
  • አገር የሚጠቅም ፕሮግራም ላይ ተገኙ ስትባሉ አትገኙም፤ እንደዚህ ዓይነት ፕሮግራም ላይ ግን ለመገኘት የሚቀድማችሁ የለም፡፡
  • ይኼም ቢሆን ለአገር ይጠቅማል፡፡
  • ይኼ ለአገር ሳይሆን ለእናንተ ነው የሚጠቅመው፡፡
  • ክቡር ሚኒስትር ሆደ ሰፊ መሆን አለብዎት፡፡
  • እናንተ ሆደ ሰፊ ብቻ አይደላችሁም፡፡
  • ታዲያ ምንድን ነን?
  • ሆዳሞች!