ክቡር ሚኒስትር

[ክቡር ሚኒስትሩ ኦዲተር ጄኔራል መሥሪያ ቤታቸውን አስመልክቶ የላከውን ሪፖርት ካነበቡ በኋላ አማካሪያቸውን አስጠሩት]

 

  • አቤት ክቡር ሚኒስትር፡፡
  • ይህን ሪፖርት አይተኸዋል?
  • የምን ሪፖርት ነው?
  • ኦዲተር ጄኔራል የላከው፡፡
  • አዎን አይቼዋለሁ፡፡
  • የት ነው የገባው?
  • ምኑ ክቡር ሚኒስትር?
  • ይህ ሁሉ ሚሊዮን ብር፡፡
  • ምን እያሉኝ ነው ክቡር ሚኒስትር?
  • ከሁለት መቶ ሚሊዮን ብር በላይ እኮ ማወራረድ አልቻልንም፡፡
  • ልክ ነው ክቡር ሚኒስትር፡፡
  • የት ገባ ታዲያ ይኼ ሁሉ ብር?
  • የገባበትንማ ከእኔ ይልቅ እርስዎ ያውቁታል፡፡
  • ምን እያልከኝ ነው እኔ ኪስ እኮ አልገባም?
  • ሁሉም እርሶ ኪስ ባይገባም ቅሉ፣ የገባበትን ግን ያውቃሉ፡፡
  • እኮ የት ነው የገባው?
  • ክቡር ሚኒስትር በዚህ ዓመት እንኳን የነበረዎትን የውጭ ጉዞ ያስታውሱ፡፡
  • ታዲያ ለሥራ አይደል እንዴ የተጓዝኩት?
  • የሚከፈለውንም የውሎ አበል ያስቡት?
  • መቼም ምንም ሳልበላ አልመጣም?
  • እሱማ በልተው ነው የመጡት፡፡
  • ምን አልከኝ?
  • ያው በአጠቃላይ ከፍተኛ ወጪዎች ነበሩ፡፡
  • ታዲያ ምን ላድርግ?
  • በዚያ ላይ ሌሎች ወጪዎችም ነበሩ፡፡
  • የምን ወጪዎች?
  • በየጊዜው የሚደረጉትን ስብሰባዎች ያስቧቸው፡፡
  • የምን ስብሰባዎች?
  • እኛ የምናዘጋጃቸው ስብሰባዎች፡፡
  • አስፈላጊ ናቸው እኮ?
  • ቢሆንም አላስፈላጊ ወጪዎች የሚወጡባቸው ስብሰባዎች ናቸው፡፡
  • ወይ ጣጣ፡፡
  • አሁን ምን ብናደርግ ይሻላል?
  • እስቲ የፋይናንስ ኃላፊውን ጥራልኝ፡፡
  • ረሱት እንዴ የለም እኮ?
  • የት ሄደ? ዕረፍት ላይ ነው?
  • የለም ለቋል፡፡
  • ለምን ለቀቀ?
  • ይህ መሥሪያ ቤት እጅግ ብልሹ አሠራር የበዛበት ነው ብሎ አልፈልግም አለ፡፡
  • ምን?
  • ከፍተኛ ሙስና ስላለ በዚያ ምክንያት ነው የለቀቀው፡፡
  • እሱ አይበላም ነበር?
  • እሱ ታማኝና የፕሪንሲፕል ሰው ነው፡፡
  • የት ገባ?
  • የውጭ ድርጅት ነው የገባው፡፡
  • መልካም ቦታ ነው የገባው ማለት ነው?
  • መልካም ከሆኑ እኮ ሁሌም መልካም ነገር ነው የሚያገኝዎት፡፡
  • እ…
  • ሰምተዋል፡፡
  • አሁን እሺ ማን ነው ፋይናንሱን የሚመራው?
  • ምክትሉ ነዋ፡፡
  • የፓርቲ ሰው ነው?
  • አዎ የፓርቲ ሰው ነው፡፡
  • ጥሩ በቃ አሁን እሱን እናማክረው፡፡
  • ግን ክቡር ሚኒስትር ሰውዬው ብቃት የለውም፡፡
  • እንዴት?
  • ዝም ብሎ በታማኝነት የመጣ ነው እንጂ ከፍተኛ የአቅም ችግር አለበት፡፡
  • አቅሙ ለምን አይገነባም?
  • መገንባት የምንችለው እኮ የግንባታ ፈቃድ ስናገኝ ነው፡፡
  • ምን አልከኝ?
  • እኛ ብንፈልግም ሰውዬው መገንባት የሚችል አይደለም፡፡
  • ለምን?
  • ጥሪ አይቀበልም፡፡
  • የፋይናንስ ኃላፊው እንዲመለስ እናድርጋ?
  • እሱማ የማይሆን ነገር ነው፡፡
  • ሲለቅ ለምን ዝም አልነው ግን?
  • ክቡር ሚኒስትር ራስዎ እኮ ነዎት በፊርማዎ ያረጋገጡት፡፡
  • ወይ ዕድሌ፡፡

[የክቡር ሚኒስትሩ ጸሐፊ አንድ ወረቀት ይዛ ገባች]  

  • ምንድነው?
  • እንዲፈርሙት ነው ክቡር ሚኒስትር፡፡
  • እኔ ዝም ብዬ የምፈርም ይመስልሻል?
  • ኧረ እንደሱ አላልኩም፡፡
  • እኮ ምንድነው?
  • መልቀቂያ ነው፡፡
  • የምን መልቀቂያ?
  • የሰው ኃይል አስተዳደሩ ከሥራ ሊለቅ ነው፡፡
  • ለምን?
  • በመሥሪያ ቤት ውስጥ ከፍተኛ ሙስናና ብልሹ አሠራር ስላለ መሥራት አልፈልግም አለ፡፡
  • የምን ሙስናና ብልሹ አሠራር ነው?
  • ሰዎች የሚቀጠሩት በትውውቅ፣ በዘር፣ በወንዝ ነው እኮ?
  • ኧረ ወንዝ ይውሰድሽ፡፡
  • ይቅርታ ክቡር ሚኒስትር፡፡
  • አልፈርምም ብሏል በይው፡፡
  • ቢፈርሙ ይሻላል ክቡር ሚኒስትር፡፡
  • ለምን?
  • ለፎርማሊቲ ነው እንጂ ሌላ ቦታ ሥራ ጀምሯል፡፡
  • ወይ ጣጣ?
  • ክቡር ሚኒስትር እኔም…
  • አንቺ ምን?
  • ሥራ ለመልቀቅ አንድ ሦስት ቦታ ሲቪዬን አስገብቻለሁ፡፡
  • ምን?
  • ያው ሪፈረንስ ላይ ስለሞላሁዎት…
  • ኧረ ፈረስ ይርገጥሽ፣ ሂጂ ካጠገቤ፡፡

[ክቡር ሚኒስትሩ ከአማካሪያቸው ጋር ወሬያቸውን ቀጠሉ] 

  • ዛሬ ሌላው የፈለግኩህ ስለቀጣዩ በጀት እንድናወራ ነው፡፡
  • እሱንማ አዘጋጅተን ለሚኒስትሮች ምክር ቤት ልከናል፡፡
  • ተጨማሪ በጀት ማስፈቀድ አለብን፡፡
  • ተጨማሪ በጀት የሚፈቀድበት ጊዜ እኮ አሁን አይደለም፡፡
  • ለማንኛውም ተጨማሪ በጀት እፈልጋለሁ፡፡
  • ለምንድነው የሚፈልጉት?
  • ለምሳሌ መኪናዬ መቀየር አለባት፡፡
  • ክቡር ሚኒስትር ቪ8 እኮ ነው፡፡
  • ከተገዛ ሁለት ዓመት ሞላው፣ ስለዚህ ሌተስቱ ያስፈልገኛል፡፡
  • እ…
  • ቤቴም መታደስ አለበት፡፡
  • ምን ሆነ?
  • ቀለም ከተቀባ ስድስት ወራት ሆነው፡፡
  • ስድስት ዓመታት ነው ያሉኝ?
  • ምን ይላል ይኼ? ስድስት ወራት ነው እንጂ፡፡
  • ክቡር ሚኒስትር የእኔ ቤት ከተቀባ እኮ ስድስት ዓመታት አልፎታል፡፡
  • በቃ ስለዚህ የአንተም ይታደሳል፡፡
  • ሌላስ?
  • ሌላ ደግሞ ሰሞኑን ሳምሰንግ ያወጣው S6 የሚባል ስልክ አለ፡፡
  • እሺ፡፡
  • እሱን ከነሰዓቱ መግዛት እፈልጋለሁ፡፡
  • የምን ሰዓት ነው?
  • ስልኩ ጊር የሚባል ሰዓት አለው፡፡ ይህን እንኳን አታውቅም?
  • ይህ የሚሉት ስልክ እኮ የብዙ ሠራተኞቻችን ደመወዝ ነው፡፡
  • ለምን ያልተጠየቅከውን ታወራለህ? እኔ እኮ ከትልልቅ ሰዎች ጋር ነው የምውለው፡፡
  • ያው እኔም እሱን ብዬ ነው፡፡ ከኩባንያው ራሱ በስጦታ መልክ ሊሰጥዎት ይችላል፡፡
  • እኔ ስጦታ ልቀበል?
  • ምን ችግር አለው?
  • ምን ነካህ? ባለሥልጣን ስትሆን እኮ ከማንም ስጦታ መቀበል የለብህም፡፡
  • ያው ከሙስና ስጦታ ይሻላል ብዬ ነው፡፡
  • ምን አልከኝ?
  • ሙስናን ለማጥፋት ጠንክረን መሥራት አለብን፡፡
  • በቃ እንጠናከር፡፡

[ክቡር ሚኒስትሩ ከሌላ ሚኒስትር ተደውሎላቸው በአፋጣኝ እንዲመጡ ተነገራቸው]  

  • ለምን ፈለጋችሁኝ?
  • አንዳንድ ነገር ላይ እንድናወራ ነው ክቡር ሚኒስትር፡፡
  • የምን አንዳንድ ነገር?
  • ያው ከፊታችን ሹም ሽር መኖሩ አይቀሬ ነው፡፡
  • ልሻር ነው እንዴ?
  • የትኛውን ሚኒስትር መሥሪያ ቤት መምራት ይፈልጋሉ?
  • እኔ ፓርቲዬ በመደበኝ ቦታ እሠራለሁ፡፡ ዘበኛም ብታደርጉኝ ለመሥራት ፈቃደኛ ነኝ፡፡
  • አሁን ያሉበትን አልወደዱትም እንዴ?
  • አይ ወድጀዋለሁ፡፡ ግን አንድ ቦታ ላይ 20 ዓመታት መቆየት ይሰለቻል፡፡
  • እንዴ በዚህ ዓይነት 24 ዓመታት ስለቆየን ሕዝቡ እኛን ሰልችቶናል ማለት ነው?
  • እኛንማ መርጦን ነው፡፡
  • ለካ እኛ ተመርጠን ነው?
  • እና እዚያው ታስቀጥሉኛላችሁ?
  • ያው መሥሪያ ቤታችሁ ችግር አለበት፡፡
  • የምን ችግር?
  • ሙስናና ብልሹ አሠራር አለ፡፡
  • ብቻ አደራ እንዳትጥሉኝ፡፡

[ክቡር ሚኒስትሩ ወዲያው አማካሪያቸው ጋ ደወሉ]

  • እንኳን ደስ አለህ ያው ተባረርኩልህ፡፡ 
  • እንዴ ማን አባረረዎት?
  • ያው ዛሬ ጠርተው መሥሪያ ቤታችን ችግር እንዳለበት ነግረውኛል፡፡
  • ክቡር ሚኒስትር እኔም እኮ በተደጋጋሚ ነግሬዎታለሁ፡፡
  • ይኸው ልባረር እኮ ነው?
  • ክቡር ሚኒስትር ያለእርስዎ አመራር ይህ መሥሪያ ቤት የትም አይደርስም፡፡
  • እኔም እሱን ነው የምለው፡፡
  • ለማንኛውም ይፀልዩ፡፡
  • ምን ብዬ?
  • አወዳደቄን አሳምረው፡፡

[ክቡር ሚኒስትሩ ቤት ሲገቡ ሚስታቸውን አገኟቸው] 

  • ምነው ፊትህ ጠቆረ?
  • ሊያነሱኝ ነው፡፡
  • ምን? ፎቶ ነው?
  • ፎቶ ባደረገው፡፡
  • ታዲያ ክርስትና ነው?
  • በምን ዕድሌ?
  • ምንድነው ታዲያ?
  • ከቦታዬ ሊያነሱኝ ነው፡፡
  • ሥራህ ነዋ ያስነሳህ፡፡
  • አንቺ ሴትዮ ግን ከእነሱ ጋር ንክኪ አለሽ?
  • ኧረ በፍፁም፣ አንተስ አለህ እንዴ?
  • እኔ እስከማውቀው ምንም ንክኪ የለኝም፡፡
  • ንክኪ ከሌለህ መውደቂያህ አይከፋም፡፡
  • ኧረ ባደረገው፡፡

[ክቡር ሚኒስትሩ ቢሮ ሲገቡ ጸሐፊያቸው ወረቀት ይዛ ገባች] 

  • ምንድነው?
  • ከበላይ የመጣ ደብዳቤ ነው ክቡር ሚኒስትር፡፡
  • የሹመት ነው?
  • አይ የሽረት ነው፡፡
  • ወይኔ፡፡

[ክቡር ሚኒስትሩ ወዲያው ሌላኛው ሚኒስትር ጋ ደወሉ] 

  • እንደፈራሁት አወረዳችሁኝ አይደል?
  • ክቡር ሚኒስትር ለቦታው ስለማይመጥኑ ነው፡፡
  • የት መደባችሁኝ ታዲያ?
  • የትም አልተመደቡም፡፡
  • አንድ ቦታ አማካሪ እንኳን አታደርጉኝም?
  • እርስዎ አማካሪ መሆን አይችሉም፡፡
  • ምንድነው መሆን የምችለው?
  • ተመካሪ!