ክቡር ሚኒስትር

[የክቡር ሚኒስትሩ ወዳጅ ከአሜሪካ ደወለላቸው]

 

  • እንኳን ደስ አለዎት ክቡር ሚኒስትር፡፡
  • በአምላክህ!
  • እንዴት ነው እባክዎት?
  • ይኸው ፌሽታ ላይ ነን፡፡
  • እንዴት ነበር ምርጫው?
  • ምን ጥያቄ አለው?
  • እሱማ ብዙ ጥያቄ አለው፡፡
  • የምን ጥያቄ?
  • ያው በጊዜያዊው ውጤት 100 ፐርሰንት ማግኘታችሁ ነዋ፡፡
  • ይህ እኮ የሥራችን ውጤት ነው፡፡
  • የምን ሥራ?
  • በቃ ሠራን፣ ሕዝቡ መረጠን፡፡
  • ምን አሉኝ?
  • ሕዝቡ መርጦን ነው፡፡
  • የትኛው ሕዝብ?
  • ለመምረጥ የተመዘገበው ነዋ፡፡
  • እኮ እሱም ቢሆን ሁሉም አልመረጣችሁም፡፡
  • ሳይመርጠን እንዴት እናሸንፋለን ታዲያ?
  • ማለቴ ከፍተኛ የሆነ ፖፑላር ቮት አለ፡፡
  • ምን ቮት አልከኝ?
  • ፖፑላር ቮት፡፡
  • ምንድነው እሱ?
  • ምናልባት ኢሕአዴግ ያገኘው 60 በመቶ የሚሆነውን ድምፅ ነው፡፡
  • ምን ነካህ 100 በመቶ ነው እንጂ?
  • እሱማ እንደዚያ ነው፡፡
  • ታዲያ የምን 60 በመቶ አመጣህ?
  • እሱ ፖፑላር ቮቱ ነው፡፡
  • እሱን ነገር ብታብራራልኝ?
  • አይ ክቡር ሚኒስትር በስልክ የሚብራራ ነገር አይደለም፤ ስንገናኝ በደንብ አጫውትዎታለሁ፡፡
  • ይሻላል?
  • እስከዚያ በዚህ ጉዳይ ላይ ማንበብ ይችላሉ፡፡
  • እሱን እንኳን ማድረግ እችላለሁ፡፡
  • ግን እንደፍነዋለን እንዳሉት ደፈኑት?
  • እንደፍናለን ስንል እንደፍናለን! አንቀልድም!
  • ኢሕአዴግ ቀልድ እንደማያውቅ አውቃለሁ፡፡
  • እሱን ነው የምልህ፡፡
  • እኔ የገረመኝ አንድ ነገር ነው፡፡
  • ምን?
  • ዓለም ላይ መቶ ፐርሰንት ያሸነፈ ፓርቲ ላገኝ አልቻልኩም፡፡
  • አንድ ነገር እንዳትረሳ፡፡
  • ምን ክቡር ሚኒስትር?
  • እኛ የብዙ ነገሮች ጀማሪ ነን፡፡
  • ለምሳሌ የምን?
  • የሰው ልጆች መገኛ ነን፡፡
  • እ…
  • የቡና መገኛ ነን፡፡
  • እሺ፡፡
  • የሥልጣኔ መገኛ ነን፡፡
  • እንዴት?
  • አክሱም ሐውልትንና ላሊበላን ተመልከት፡፡
  • ታዲያ አሁን የመቶ ፐርሰንት የምርጫ አሸናፊ መገኛ ነን እያሉኝ ነው?
  • ነገርኩህ እኮ የብዙ ነገር መገኛ ነን፡፡
  • ለነገሩ ሰሜን ኮሪያም በነበረው ምርጫ መሪው መቶ በመቶ ነው ያሸነፈው፡፡
  • ኧረ እባክህ?
  • አዎ ግን የእሱ የሚለየው ምንም ተወዳዳሪ አልነበረውም፡፡
  • አየህ እኛ የምንለየው ተወዳድረን በማሸነፋችን ነው፡፡
  • እኛ የምንለየው ተበዳድረን ማሸነፋችን ነው?
  • ተበዳድረን ሳይሆን ተወዳድረን፡፡
  • ለማንኛውም እንኳን ደስ አለዎት፡፡

[የክቡር ሚኒስትሩ አማካሪ ቢሯቸው ገባ] 

  • ክቡር ሚኒስትር ያው ለስብሰባው ዝግጅት እያደረግን ነው፡፡
  • ለየትኛው ስብሰባ?
  • አገራችን ከሳምንታት በኋላ ስለምታካሂደው ዓለም አቀፍ ስብሰባ ነዋ፡፡
  • የምን ዓለም አቀፍ ስብሰባ?
  • ፋይናንሲንግ ፎር ዴቨሎፕመንት የሚባለው ነዋ፡፡
  • ያን ያህል ትልቅ ስብሰባ ነው እንዴ?
  • ክቡር ሚኒስትር እጅግ ትልቅ እንጂ፡፡
  • እንዴት?
  • ስብሰባው እኮ ከተመድ ቀጥሎ የዓለማችን ትልቁ ስብሰባ ነው፡፡
  • ኧረ እባክህ?
  • አዎና ክቡር ሚኒስትር፡፡
  • ስለዚህ አገራችን ይህን ስብሰባ ማዘጋጀት መቻሏ በራሱ ትልቅ ነገር ነው እያልከኝ ነው?
  • በሚገባ ክቡር ሚኒስትር፡፡
  • ምን ላይ ነው የሚያተኩረው?
  • ያው በየአገሮቹ ያሉት የልማት ፕሮጀክቶች ፈንድ የሚደረጉበት ሒደት ላይ ነው የሚመክረው፡፡
  • ተው እንጂ?
  • አዎን ክቡር ሚኒስትር፡፡
  • እነማን ይገኙበታል?
  • በዓለማችን ያሉ ታላላቅ የፋይናንስ ተቋማትን ጨምሮ የተለያዩ አገሮች መሪዎችና በርካታ ታዋቂ ግለሰቦችም ይታደሙበታል፡፡
  • አሁን እኛን ይተቹናል ብለህ ታስባለህ?
  • ስለምን ጉዳይ?
  • ስለምርጫው፡፡
  • ምርጫውማ ሰላማዊ ስለመሆኑ ምዕራባውያኑ መስክረዋል፡፡
  • ለነገሩ ልክ ብለሃል፡፡
  • ከእነሱ ይልቅ ሌላው አካል እንዳይተቸን ነው መሥራት ያለብን፡፡
  • ሌላው አካል ደግሞ ማን ነው?
  • ሕዝቡ ነዋ፡፡
  • ሕዝቡማ መረጠን፡፡
  • ክቡር ሚኒስትር ያልመረጠንም ሕዝብ እንዳለ እንዳይረሱ፡፡
  • እሱማ ያልመረጠንም አለ፡፡
  • ስለዚህ አሁንም መልካም አስተዳደር ላይ መሥራት አለብን፡፡
  • እ…
  • የመንግሥትን አገልግሎቶች ለሁሉም በማዳረሱ ላይ መሥራት አለብን፡፡
  • ሮም እኮ በአንድ ቀን አልተገነባችም፡፡
  • እንዳይሳሳቱ ክቡር ሚኒስትር፡፡
  • እንዴት?
  • ይህን ተረት እየተረትን 24 ዓመት ሞላን፡፡
  • እ…
  • በዚያ ላይ ይህ ተረት ከተተረተ 800 ዓመታት አልፈዋል፡፡
  • ቢያልፍስ? ተረት እኮ ነው፡፡
  • በአሁን ዘመን ተረቱ አይሠራማ፡፡
  • ለምን አይሠራም?
  • አሁን ባለው ቴክኖሎጂ ሮም በአንድ ቀን ልትገነባ ትችላለች፡፡
  • ኧረ ዝም በል እባክህ፡፡
  • ለምን ክቡር ሚኒስትር?
  • አሁን ደግሞ ተቃዋሚዎች ይህን ሰምተው እንዳይተርቱብን፡፡
  • የት ይተርቱብናል ብለው ነው?
  • ፓርላማ ነዋ፡፡
  • በየትኛው ቀዳዳ ገብተው?
  • ውይ ረስቼው ደፍነነዋል ለካ?
  • መድፈን ቢሉ መድፈን ነው?
  • ለካ ሁሉንም ቀዳዳ ደፍነነዋል፡፡
  • እህሳ፡፡

[ክቡር ሚኒስትሩ ቤታቸው ሲገቡ የአክስታቸውን ልጅ አገኙዋት] 

  • ምን እያደረጋችሁ ነው ክቡር ሚኒስትር?
  • ደግሞ ምን አደረግን?
  • እኛ እኮ የመረጥናችሁ ለዚህ አይደለም?
  • ምን ሆነሻል?
  • አሁንማ ተቃዋሚዎች እንኳን ድምፃችንን እንዳይሰሙ ሙሉ ለሙሉ ነው ያሸነፋችሁት፡፡
  • ስለምንድነው የምታወሪው?
  • ጋዜጣውን አላነበቡትም ወይ?
  • የትኛውን ጋዜጣ?
  • አዲሱን የጡረታ አዋጅ አስመልክቶ የወጣውን ዜና አላነበቡትም?
  • ምን ይላል?
  • ይኸው ለፓርላማው እኮ ረቂቅ ቀርቧል፡፡
  • እኮ ምን ይላል?
  • ሁሉም የግል ሠራተኞች ወደ ጡረታ እንዲዛወሩ የሚያስገድድ ሕግ እኮ ነው የተረቀቀው፡፡
  • ለምን?
  • እሱን ምላሽ እኮ ነው እኔም ያጣሁት፡፡
  • ዜናው ላይ ምን ይላል?
  • በአገሪቱ ያሉ ሠራተኞች የማኅበራዊ ዋስትና ሽፋን ላይ ልዩነት እንዳይኖር ተብሎ ነው፡፡
  • በአገሪቱ ያሉ ሠራተኞች የማኅበራዊ ዋስትና ሽፋን እንዲኖራቸው ማድረጉ እኮ ክፋት የለውም፡፡
  • እሱማ ልክ ነው፡፡ በዚህም መንግሥት ሊመሰገን ይገባዋል፡፡
  • ታዲያ ችግሩ ምንድነው?
  • አሁን የወጣው የማሻሻያ ረቂቅ፡፡
  • ምን ይላል?
  • ሁሉም የግል ሠራተኞች ወደ ጡረታ ይዙሩ ይላል፡፡
  • ለምን?
  • እሱን የሚመልስ ነው የጠፋው፡፡
  • እንዴት?
  • ያው ረቂቁ የሚለው ወጥ ሥርዓት ለመዘርጋት ነው፡፡
  • እሺ፡፡
  • ወጥ ሥርዓት ለመዘርጋት ተብሎ ግን የዜጐች መብት መጨፍለቅ የለበትም፡፡
  • እንዴት?
  • የዛሬ አራት ዓመት ሕጉ ሲወጣ ጡረታ የሚፈልግ በጡረታ፣ ፕሮቪደንት የሚፈልግ በፕሮቪደንት ተጠቃሎ ነበር፡፡
  • በጣም ጥሩ፡፡
  • አሁን በአንዴ መንግሥት ተነስቶ ሁሉም አንድ መሆን አለበት አለ፡፡
  • ይህማ ተገቢ አይደለም፡፡
  • እግዚአብሔር ይስጥዎት ክቡር ሚኒስትር፡፡ ሲጀመር በዚህ ጉዳይ ላይ ሕዝቡ መወያየት አለበት፡፡
  • እኛ የምንሠራው እኮ ለሕዝቡ ነው፡፡
  • ከዚያም ባለፈ አማራጮች ሊቀርቡ ይገባል፡፡
  • ምን ዓይነት አማራጭ?
  • ጡረታ የሚፈልግ በጡረታ፣ ፕሮቪደንት የሚፈልግ በፕሮቪደንት እንዲታቀፍ የሚል ነዋ፡፡
  • ልክ ነሽ፡፡
  • ከዚያም ውጪ እኔን ጨምሮ ብዙ ሰዎች ይኼን ገንዘብ ጥቅም ላይ የምናውልበት ዓላማ የተቀደሰ ነው፡፡
  • ለምንድነው የሚታውሉት?
  • በርካቶቹ የጋራ መኖሪያ ቤቶች ዕጣ ሲወጣላቸው የሚከፍሉት ነው፡፡
  • እሺ፡፡
  • ሌሎች ደግሞ ለትምህርት፣ አንዳንዶችም ለወሳኝ ጉዳዮች ነው የሚያውሉት፡፡
  • ለነገሩ ይህ ሠራተኞች የለፉበት ገንዘብ ስለሆነ ለምንም ነገር ማዋል ይችላሉ፡፡
  • በዚያ ላይ መንግሥት ዘሎ ለእናንተ አውቃለሁ ሲል ከፍተኛ ቅሬታ ይፈጥራል፡፡
  • ልክ ብለሻል ልጄ፡፡
  • በዚያ ላይ እኔ ወጣት ነኝና አሁን ስለጡረታ ማሰብ አልፈልግም፡፡
  • ወጣት ቢሉ ወጣት ነሽ እንዴ አንቺ?
  • ይህ የመንግሥት አካሄድ ግን ‹‹ወጣት ጡረተኞችን›› ይፈጥራል፡፡
  • ሌላ ያላየሁትን ነገር ነው ያሳየሽኝ እባክሽ፡፡
  • በዚያ ላይ መንግሥት ይህን ገንዘብ ለተለያዩ የመንግሥት ፕሮጀክቶች ማስፈጸሚያ ሊያውለው ፈልጐ እንደሆነ ይወራል፡፡
  • ይህማ መሆን የለበትም፡፡
  • መንግሥት እንኳን ገንዘቡን ከፈለገው በባንክ ያለውን ይህን ገንዘብ ለመንግሥት ፕሮጀክቶች ማስፈጸሚያ ባንኮች እንዲያበድሩ ማድረግ ይቻላል፡፡
  • መፍትሔም ሁሉ አለኝ እያልሽኝ ነው?
  • አዎን ክቡር ሚኒስትር ይህ ሕግ እንዳይፀድቅ?
  • በፍጹም አይፀድቅም፡፡

[ክቡር ሚኒስትሩ አማካሪያቸውን ቢሯቸው ጠሩት] 

  • የግል ድርጅት ሠራተኞች የጡረታ አዋጅ አለህ እንዴ?
  • ምን ፈልገው ነው እኔ በሚገባ ስለማውቀው አብራራልዎታለሁ?
  • እሺ አዲሱ ማሻሻያ ለምን አስፈለገ?
  • በአገሪቱ ያለው የማኅበራዊ ዋስትና ሽፋን ልዩነት እንዳይኖረው ለማድረግ ነው፡፡
  • ስለዚህ ምን ይደረግ ነው የሚለው?
  • ሁሉም የግል ድርጅት ሠራተኞች ወደ ጡረታ ይዛወሩ፡፡
  • ማነው ይኼን የሚወስነው?
  • መንግሥት ነዋ፡፡
  • መንግሥትማ ይህን መወሰን አይችልም፡፡
  • ለምን ክቡር ሚኒስትር?
  • ይህ የሕዝብ ጉዳይ ነው መወሰን ያለበትም ሕዝቡ ነው፡፡
  • ይህ ውሳኔ ቢተላለፍ ግን መንግሥት እኮ ይጠቀማል፡፡
  • እኛ እዚህ ያለነው ሕዝብን ልናገለግል ነው፡፡
  • እሱማ ልክ ነው፤ ታዲያ ምን ተሻለ?
  • በዚህ ጉዳይ ላይ ሕዝቡ መወያየት አለበት፡፡
  • ልክ ብለዋል፡፡
  • በዚያ ላይ አማራጭ ሐሳቦች ለሕዝቡ መቅረብ አለባቸው፡፡
  • በአማራጭ ሐሳብማ እናምናለን፡፡

[የረቂቅ የማሻሻያ ሐሳቡ ፓርላማ ቀርቦ ውይይት ሲደረግበት ክቡር ሚኒስትሩ ረቂቁን ላዘጋጀው አካል ጥያቄ ማቅረብ ጀመሩ] 

  • ይህ ረቂቅ ለምን አስፈለገ?
  • በአገሪቱ ባሉ ሠራተኞች የማኅበራዊ ዋስትና ሽፋን ላይ ልዩነት እንዳይኖር ለማድረግ ነው፡፡
  • ስለዚህ ልዩነት እንዳይኖር ምንድነው መደረግ ያለበት?
  • ክቡር ሚኒስትር ሁሉንም በጡረታ ማቀፍ ነዋ፡፡
  • ለምን ሁሉንም በፕሮቪደንት ፈንድ አናቅፋቸውም?
  • እሱማ መንግሥትን አይጠቅመውም፡፡
  • እኛ እኮ ሕዝብን ልንጠቅም መስሎኝ እዚህ ያለነው?
  • እሱማ ልክ ነው፡፡
  • ስለዚህ ይህ ረቂቅ ሕዝብን ስለማይጠቅም መፅደቅ የለበትም፡፡
  • ፓርላማው ከወሰነ እኔም ባይፀድቅ ደስ ይለኛል፡፡

[ፓርላማው በረቂቅ አዋጁ ላይ ድምፅ እንዲሰጥ ጠየቀ]

  • ረቂቁን የምትደግፉ?
  • ማንም የለም፡፡
  • ረቂቁን የምትቃወሙ?
  • ሁሉም እጃቸውን አወጡ፡፡
  • ረቂቁ በአብላጫ ድምፅ እንዳይፀድቅ ተወስኗል፡፡
  • ረቂቁ አልፀደቀም!