ክቡር ሚኒስትር

[የክቡር ሚኒስትሩ አማካሪ በተለያዩ ባለሙያዎች የተጠኑና ለአገሪቱ ጠቃሚ የሆኑ ጥናቶችን ይዞ ክቡር ሚኒስትሩ ቢሮ ገባ]
- ጤና ይስጥልኝ ክቡር ሚኒስትር፡፡
- ምንድነው ይዘህብኝ የመጣኸው?
- የሚገርሙ ጥናቶች ናቸው፡፡
- የምን ጥናት ነው?
- ክቡር ሚኒስትር እነዚህ ጥናቶች ለአገራችን በጣም ጠቃሚ ናቸው፡፡
- ማሞ ሌላ መታወቂያው ሌላ አሉ፡፡
- እንዴት ክቡር ሚኒስትር?
- ለምን ያልተጠየከውን ትዘባርቃለህ?
- አልገባኝም ክቡር ሚኒስትር?
- ስለጠቃሚነታቸው ማን ደስኩር አለህ?
- እንዴ ክቡር ሚኒስትር ስላላነበቡዋቸው ነው እንጂ እንደዚህ አይሉም ነበር፡፡
- አታነብም እያልከኝ ነው?
- ኧረ በፍጹም ክቡር ሚኒስትር፡፡
- ዙሪያ ጥምጥሙን መሄድ ትተህ፣ ለምን የተጠየከውን አትመልስም?
- እኮ ምንድነው ጥያቄዎት?
- የምን ጥናቶች ናቸው?
- ጥናቶቹ የተለያዩ ጉዳዮች ላይ የሚያተኩሩ ናቸው፡፡
- ይህ ምን ማለት ነው? አብራራው እስቲ?
- ማለቴ ስለማኅበራዊ፣ ኢኮኖሚያዊ፣ አካባቢያዊ፣ ፖለቲካዊና ሌሎችም ዘርፎች ላይ የሚያጠነጥኑ ናቸው፡፡
- ማን ነው ያጠናቸው?
- በአገራችን ውስጥ በእነዚህ ዘርፎች አሉ የሚባሉ ባለሙያዎች ናቸው ጥናቶቹን ያጠኑት፡፡
- አሉ የተባሉ ባለሙያዎች?
- አዎን ክቡር ሚኒስትር፡፡
- ይህን ባዶ ዲስኩርህን እዚያው የለመድክበት፡፡
- ባዶ ዲስኩር አይደለም ክቡር ሚኒስትር፡፡
- ታዲያ ምንድነው?
- እንዲያውም በሚገባ ልናስብበት የሚገባ ጉዳይ ነው፡፡
- ምኑን ነው የምናስብበት?
- እንደ መንግሥትም እንደ ፓርቲም ከእነዚህ ጥናቶች ብዙ ልንጠቀም እንችላለን፡፡
- ኧረ እባክህ አትዘባርቅ፡፡
- እንዴት ክቡር ሚኒስትር?
- ለመንግሥትም ሆነ ለፓርቲያችን የሚጠቅመንን ጠንቅቀን ነው የምናውቀው፡፡
- እኮ እሱ ምንድነው?
- ታማኝ ሰው ነው የሚያስፈልገን፡፡
- ታማኝነት በዕውቀት ካልተደገፈ ምን ይጠቅማል?
- የተማሩ ሰዎች ሁልጊዜ መዘዝና ነገር ይዘው ነው የሚመጡት፡፡
- እ…
- ለዚህ ነው እኔም ምን የተማረ ቢሆን ታማኝነት ከሌለው ምንም አይጠቅመንም የምለው፡፡
- ክቡር ሚኒስትር ይህ ግን ትክክል አይደለም፡፡
- እንዴት ነው ትክክል ያልሆነው?
- የተማሩ ሰዎች የግድ የፓርቲያችንና የአይዲዮሎጂያችን ደጋፊዎች ባይሆኑም፣ ለአገር የሚጠቅም ነገር የሚሠሩ እስከሆነ ድረስ ሊበረታቱ ይገባል፡፡
- አሁን ከእኛ በላይ የተማረ ኖሮ ነው?
- ቢሆንም ክቡር ሚኒስትር እነዚህ ጥናቶች እጅግ ጠቃሚ ናቸው፡፡
- ይህን ያህል ያደነቅከው ምን አግኝተህበት ነው?
- ለምሳሌ ይህን ፕሮጀክት ይመልከቱ፡፡
- ስለምን የተጠና ነው?
- ኢንዱስትሪ ዞን ላይ የተጠና ጥናት ነው፡፡
- ምን አዲስ ነገር አለው?
- የሚገርሙ ዳታዎችና ቁጥሮችን ያዘለ ጥናት ነው፡፡
- ምን የተለየ ዳታና ቁጥር አለው?
- ይኸው በግራፍ የተሠራበትን ቦታ ይመልከቱ፡፡ እነዚህን መረጃዎች ራሱ መንግሥት ያለው አይመስለኝም፡፡
- ኧረ እባክህ ይኼን ጥናት ቁጭ ብል በሦስት ቀናት ውስጥ እጨርሰዋለሁ፡፡
- አንብበውት ነው?
- ምን ነክቶሃል አንተ? በሦስት ቀናት ልሠራው እችላለሁ፡፡
- ታዲያ ለምን አይሠሩም?
- ጊዜ የለም እንጂ ጊዜማ ቢኖር…
- ለነገሩ እውነትዎትን ነው ቢዚ ነዎት፡፡
- እሱን እኮ ነው የምልህ፡፡
- ጊዜ ቢኖርዎት ግን የአገራችን ኢኮኖሚ ከኢንዱስትሪ መር ወደ ጥናትና ምርምር መር ይለወጥ ነበር ማለት ነው?
- አሽሙር መሆኗ ነው?
- ኧረ በፍጹም ለማንኛውም ጠቃሚ ጥናቶች ስለሆኑ ይመልከቷቸው፡፡
- እሺ አያቸዋለሁ፡፡
[የክቡር ሚኒስትሩ ጸሐፊ ቢሯቸው ገባች]
- እንግዳ አለ ክቡር ሚኒስትር፡፡
- የምን እንግዳ?
- ባለፈው ቀጠሮ ተይዞላቸው ነበር፡፡
- የምን ቀጠሮ ነው?
- እኛ ወዳጅዎት ናቸው፡፡
- የቤተሰብ ሥራ እኮ አይደለም የያዝኩት፣ አገርና ሕዝብን መስሎኝ ላገለግል የተቀመጥኩት?
- አይ እሱንማ አውቃለሁ፤ ባለጉዳዩን ለማስታወስ ብዬ ነው፡፡
- እሺ አስገቢው፡፡
[ባለጉዳዩ ክቡር ሚኒስትሩ ቢሮ ገባ]
- ጤና ይስጥልኝ ክቡር ሚኒስትር፡፡
- እንዴት ነህ ወዳጄ?
- ይህ ሁላ ዶክመንት ምንድነው እባክዎት?
- ምን በሥራ ተጠምደን ነው እኮ ያለነው?
- አውቃለሁ ክቡር ሚኒስትር፣ ሥራ ግን እንዴት እየሄደለዎት ነው?
- አሁንማ እጅግ በጣም ቢዚ ሆነናል፡፡
- ይህ ሁላ ዶክመንት የሚያነቡት ነው?
- ሰሞኑንማ ቢሮም ማደር ጀምሬያለሁ፡፡
- ለመሆኑ የምን ዶክመንቶች ናቸው?
- በተለያዩ ባለሙያዎች የተጠኑና ለአገሪቱ የሚጠቅሙ ጥናቶች ናቸው፡፡
- መንግሥት ያስጠናቸው ናቸው?
- የለም የለም፣ የአገራችን ባለሙያዎች አጥንተው መንግሥት ተግባራዊ እንዲያደርጋቸው ለእኛ የተሰጡ ናቸው፡፡
- በጣም የሚገርም ነገር ነው የሚነግሩኝ፡፡
- አዎን አገራችን የተያያዘችውን ዕድገት ለማስቀጠል ከእነዚህ ባለሙያዎች ጋር እጅና ጓንት ሆነህ መሥራት አለብህ፡፡
- በእርግጥ ፓርቲያችሁ የአካሄድ ለውጥ እያደረገ ነው ማለት ነው?
- የምን አካሄድ ለውጥ?
- በፊት እኮ ለአገር የሚጠቅሙ ሐሳቦችን የሚያቀርቡ ሰዎች ቢኖሩም፣ የፓርቲያችሁን ሐሳብ ካልተጋሩ አብራችሁ መሥራት ብዙም አትደፍሩም ነበር፡፡
- እሱማ ልክ ነው፤ ታማኝነት ወሳኝ ነው፡፡
- እሱ አካሄዳችሁ የተለወጠ ስለመሰለኝ ነው፡፡
- በሚገባ እንጂ ዋናው ነገር እኮ አገር ነው፡፡
- ይህ በጣም ደስ የሚል ለውጥ ነው፡፡
- የተማረ ሰው እኮ ሁሌም ሐሳቡን ይቀያይራል፡፡
- አስደናቂ ለውጥ ነው፡፡ ለመሆኑ ጥናቶቹ ምን ላይ ያተኮሩ ናቸው?
- የተለያዩ ዘርፎችን ይዳስሳሉ፡፡ ኢኮኖሚ፣ ማኅበራዊ፣ አካባቢያዊ፣ ፖለቲካዊና ሌላም ሌላም፡፡
- በጣም ጠቃሚ ጥናቶች ይመስሉኛል፡፡
- በሚገባ እንጂ እንዲያውም አንዱን ወስደህ መመልከት ትችላለህ፡፡
- በእውነት?
- አዎን እንዲያውም ይኼኛው ጥናት የኢንዱስትሪ ዞን ላይ ያተኮረ ስለሆነ ለአንተም ይጠቅምሃል፡፡
[ባለጉዳዩ ወዳጃቸው ከላይ ከላይ ጥናቱን ገረፍ ገረፍ አደረገው]
- ክቡር ሚኒስትር፡፡
- አቤት፡፡
- እርግጠኛ ነዎት ግን ልወስደው እችላለሁ?
- ምን ችግር አለው? ደግሞ ለአንተ?
- ይህን ጥናት እኔ ራሴ ላስጠናው የምፈልገው ነበር፡፡
- ስለምንድን ነው?
- ስለቴክኖ ፓርክ፡፡
- አገራችን እኮ ብዙ መናፈሻ ቦታዎች ያስፈልጓታል፡፡
- አዎን ግን ይህ ጥናት እኔ ላስጠናው ብል ከፍተኛ ወጪ ሊጠይቀኝ ይችላል፡፡
- ከፍተኛ ስትል ምን ያህል? ሁለት መቶ ሺሕ?
- ኧረ ከዚያም በላይ፡፡
- እኮ ምን ያህል?
- ምናልባት በሚሊዮኖች የሚቆጠር፡፡
- እንዲያው አያውቅም ብለህ ነው?
- እውነቴን ነው ክቡር ሚኒስትር፡፡
- ለነገሩ አንተ ወዳጄ ነህ፤ በሌላ ነገር ትጠቅመኛለህ፡፡
- ምን ችግር አለ ክቡር ሚኒስትር?
- በል በቃ ሌላ ጊዜ እንገናኛለን፤ አንድ የምሳ ቀጠሮ አለኝ፡፡
- እሺ አመሰግናለሁ ክቡር ሚኒስትር፡፡
[የክቡር ሚኒስትሩ አማካሪ ከሰዓት በኋላ ቢሯቸው መጣ]
- አንድ ደቂቃ ይኖርዎታል ክቡር ሚኒስትር?
- ምን ፈልገህ ነው?
- ስለጥናቶቹ ያልነገርኩዎት ነገር ስለነበር ነው፡፡
- አንተ ከእነዚህ ጥናቶች ጋር ተለክፈሃል? ሥራ የለህም እንዴ?
- አይ ጥናቶቹ የተላኩት ከበላይ ቢሮ ነው፡፡
- ምን?
- አዎን ክቡር ሚኒስትር፣ በተለይ የኢንዱስትሪ ዞንን አስመልክቶ የተጠናው ጥናት ላይ በአስቸኳይ ሐሳባችንን እንድንሰጥ መመርያ ተላልፏል፡፡
- ምንድነው የምሰማው?
- ምነው ደነገጡ ክቡር ሚኒስትር?
- ምንም፡፡
- ጥናቱ ሚስጥራዊ ስለሆነ ያው ከእርስዎ ውጪ ማንም እንዳይመለከተው፡፡
- ምን አልከኝ?
- ሚስጥራዊነቱ ይጠበቅ፡፡
- እሺ እሺ፣ ወይ ጣጣ፡፡
- ችግር አለ ክቡር ሚኒስትር?
- የለም የለም፡፡
[ክቡር ሚኒስትሩ ወዲያው ጸሐፊያቸው ጋ ደወሉ]
- አቤት ክቡር ሚኒስትር፡፡
- በአፋጣኝ ደውይልኝ፡፡
- ማን ጋ?
- ባለጉዳዩ ጋ፡፡
- የትኛው ባለጉዳይ?
- ቅድም ቢሮዬ የመጣው ባለጉዳይ፡፡
- ወዳጅዎት ጋ?
- ያልተጠየቅሽውን አትቀባጥሪ፡፡
- ይቅርታ ክቡር ሚኒስትር፡፡
[ጸሐፊያቸው ከባለጉዳዩ ጋር በስልክ አገናኘቻቸው]
- ፈለጉኝ ክቡር ሚኒስትር?
- በጣም በአፋጣኝ እፈልግሃለሁ፡፡
- ምን ተገኘ ክቡር ሚኒስትር?
- የቅድሟ ዶክመንት እጅህ ላይ አለች አይደል?
- እኔ አሁን አንድ ስብሰባ ላይ ነኝ፤ ዶክመንቱ ግን ቢሮዬ አለ፡፡
- በቃ በቃ በአፋጣኝ ይዘህልኝ ና፡፡
- ችግር የለውም በሰው ልላክልዎት?
- የለም የለም ሚስጥራዊ ስለሆነ ራስህ ይዘኸው ና፡፡
- እሺ ክቡር ሚኒስትር፡፡
[በነጋታው የክቡር ሚኒስትሩ የሥራ ባልደረባ የሆኑ ሌላ ሚኒስትር ስልክ ደወሉላቸው]
- ጤና ይስጥልኝ ክቡር ሚኒስትር፡፡
- ጤና ይስጥልኝ፡፡
- ምንድነው እየተደረገ ያለው?
- ምን ተደረገ?
- ከበላይ ቢሮ የተላኩላችሁ ጥናቶች ነበሩ፡፡
- ይኸው እሱን እያነበብኩ ነው የደወልክልኝ፡፡
- የትኛውን ጥናት?
- የኢንዱስትሪ ዞን ላይ የተሠራውን፡፡
- አነበቡት?
- በሚገባ፡፡
- ሐሳቡን ተረዱት?
- ያው እንደጀመርነው ዓይነት የኢንዱስትሪ ዞን መገንባት ነው፡፡
- አላነበቡትም ማለት ነው?
- ምን ማለት ነው?
- የኢንዱስትሪ ዞን ስለመገንባት አይደለማ የሚያወራው፡፡
- እ…
- ጥናቱ እኮ የሚያወራው ስለቴክኖ ፓርክ ነው፡፡
- ቴክኖ ምን አልከኝ?
- ቴክኖ ፓርክ፡፡
- አሁን አገራችን በቂ ፓርክ አላት አይደል እንዴ? ኢንዱስትሪው ቢቀድም አይሻልም?
- የለም የለም፤ በአገራችን የሚገነቡት የኢንዱስትሪ ዞኖች ውስጥ የሚገነቡ የጥናትና ምርምር ማዕከሎችን የተመለከተ ነው፡፡
- እ…
- አሁን የደወልኩት ዋናው ጉዳይ ግን፣ ይህ ጥናት ከእናንተ ቢሮ ስለመውጣቱ መረጃ ደርሶን ነው፡፡
- ጥናቱ በእርግጥ ከእኛ ወጥቷል፤ ሆኖም ግን ይህ የተደረገው ባለሙያዎች አስተያየት እንዲሰጡን ነው፡፡
- ቢሆንም ጥናቱ ሚስጥራዊ መሆኑ ተነግሯችኋል፡፡
- እ…
- ለማንኛውም ስለዚህ ጉዳይ ለበላይ አካል ማብራሪያ ይሰጣሉ፡፡
- ወይ ጣጣ፡፡
- ደህና ይዋሉ፡፡
- እሺ ቻው፡፡
[ክቡር ሚኒስትሩ ቤት ሲገቡ ሚስታቸውን አገኟቸው]
- ደህና ዋልክ?
- ወይ ደኅንነት?
- ምን ሆንክ?
- ነፍሴን አሰቃይዋት፡፡
- ማን? ደኅንነቶች?
- የለም የለም፤ ዛሬ ምነው መሬት በዋጠችኝ ነው ያልኩት፡፡
- ለምን?
- አንድ ሚስጥራዊ ዶክመንት አሳልፌ ሰጥቼ ነዋ፡፡
- ለማን?
- ለአንድ ወዳጄ፡፡
- የምን ዶክመንት ነው?
- ጥናት ነው፡፡
- የምን ጥናት?
- ስለቴክኖ ፓርክ የተጠና፡፡
- ለምን እንደሰጠኸው ልገምት?
- ለምንድነው የሰጠሁት?
- ፓርክ የሚለውን ስታይ እንትን መስሎህ ነው አይደል?
- ምን?
- መናፈሻ!