ክቡር ሚኒስትር

[ክቡር ሚኒስትሩ አማካሪያቸው ዘንድ ደውለው ጠሩት]

 

  • አቤት ክቡር ሚኒስትር ፈለጉኝ?
  • አንዳንድ ነገር አፕዴት እንድታደርገኝ ብዬ ነው፡፡
  • ስለምን አፕዴት ላድርግዎት?
  • በህዳሴው ግድብ ዙሪያ ስላሉት ዝግጅቶች፡፡
  • እንግዲህ ጋዜጠኞች ወደ ሥፍራው መጓዝ ጀምረዋል፡፡
  • በጣም ጥሩ፡፡
  • አራተኛ ዓመቱን ለመዘከርም የተለያዩ የእግር ኳስ ውድድሮች ተካሂደዋል፡፡
  • እሺ፡፡
  • በአጠቃላይ ነገሮች እንዳቀድናቸው እየተጓዙ ናቸው፡፡
  • ይኼ ነው የሚፈለገው፡፡
  • ክቡር ሚኒስትር ይህ እኮ ታሪካዊ ፕሮጀክት ነው፡፡
  • ምን ታሪካዊ ብቻ ተዓምራዊም ነው እንጂ፡፡
  • ይኸው እንግዲህ 40 በመቶው አካባቢ ግንባታው ተጠናቋል፡፡
  • እንደጀመርነው እንጨርሰዋለን፡፡
  • ክቡር ሚኒስትር እንኳን ይኼን ሌላም እንጀምራለን፡፡
  • እንግዲህ ጉራህን አትንፋ፡፡
  • ክቡር ሚኒስትር የእርስዎ አመራር እኮ አስደናቂ ነው፡፡
  • እስቲ ፉገራህን ተወው፡፡
  • ፉገራ አይደለም ክቡር ሚኒስትር፣ ገና ሌላ ብዙ ተዓምር መሥራት እንችላለን፡፡
  • ለነገሩ በዚህ አንታማም፣ ገና ሌላ ብዙ ነገር መሥራት እንችላለን፡፡
  • ይኼን እኮ ነው የምልዎት፡፡
  • ዓባይ ይገደባል፡፡
  • በሚገባ፡፡
  • ከዓባይ ውጪ ግን የሚገደቡ ሌሎችም አሉ፡፡
  • ደግሞ የትኛው ወንዝ ሊገደብ ነው?
  • ወንዝ አይደለም፡፡
  • ምንድነው ታዲያ?
  • ፖለቲከኞች!
  • እ…
  • ሙሰኞች!
  • እእእ…
  • እንዲሁም ሞላጮች፡፡
  • እነሱስ ይገደቡ፡፡
  • ከዚያ በቃ ይህን ሕዝብ እናንበሸብሸዋለን፡፡
  • በምን? በግድብ?
  • የአንተም አፍ ይገደባል፡፡
  • ይቅርታ ክቡር ሚኒስትር፡፡
  • ሌላ ምን ወሬ አለ?
  • ያው ጂቲፒ 2 እየተዘጋጀ ነው፡፡
  • የእኛ መሥሪያ ቤት ዕቅድ ተዘጋጅቷል?
  • ቀን ተሌት እሱ ላይ ነው የምንሠራው፡፡
  • በኋላ አመድ አፋሽ እንዳታደርገኝ፡፡
  • አያስቡ ክቡር ሚኒስትር ሁሉን ነገር እናዘጋጀዋለን፡፡
  • ብቻ እንዳታሳፍረኝ፡፡
  • እርስዎ ያለእኔ፣ እኔም ያለእርስዎ እንደማንሠራ አውቃለሁ፡፡
  • ምን አልክ?
  • ምነው ክቡር ሚኒስትር?
  • እኔ ማንም ላይ አልተደገፍኩም፣ ራሴን ችዬ ነው የቆምኩት፡፡
  • ማለቴ የቡድን ሥራ ነው ማለቴ ነው፡፡
  • የምን የቡድን ሥራ ነው?
  • እ…
  • ሁላችሁም እዚህ የደረሳችሁት በእኔ መሆኑን አትርሱ፡፡
  • እ…
  • በቃ ሰምተሃል አሥሬ እ…አትበል፡፡
  • እሺ፡፡
  • ምርጫውስ እንዴት ነው?
  • ያው እንግዲህ እሱንም ተያይዘነዋል፡፡
  • ሕዝቡ እኮ ከእኛ ጋር ነው፡፡
  • ምን አሉኝ?
  • ሕዝቡ የሚፈልገውን እየሠራን ስለሆነ ከእኛ ውጪ ማን አለው?
  • ያው እሱ የሕዝቡ ውሳኔ ነው የሚሆነው፡፡
  • ስለእሱ ሐሳብ አይግባህ፡፡
  • መቸኮል ግን አያስፈልግም፡፡

[የክቡር ሚኒስትሩ ጓደኛ የሆኑ ሌላ ሚኒስትር ደወሉ] 

  • ሰላም ክቡር ሚኒስትር፡፡
  • ሰላም እንዴት ነህ?
  • የህዳሴው ግድብ ዝግጅት እንዴት ነው?
  • እንኳን ደስ አለህ፡፡
  • ለምኑ?
  • ይኸው ሰሞኑን ከግብፅ ጋር ተፈራረምን አይደል እንዴ?
  • ምኑ ነው ደስታው አልገባኝም?
  • ከግብፅ ጋር እኮ ከአሥር ዓመት በላይ የፈጀ ድርድር አድርገናል፡፡
  • ሲኤፍኤውን ፈረመች እንዴ?
  • ኧረ በፍጹም፡፡
  • ታዲያ ከአሥር ዓመት በላይ የፈጀው ድርድር እኮ እሱን ለማስፈረም ነው፡፡
  • ቢሆንም ይኼኛው ወደዚያው መንገድ የሚወስደን ነው፡፡
  • አልመሰለኝም፡፡
  • እንዴት?
  • አዲሱ ስምምነት ማንን እንደሚጠቅም ብዙም አልገባኝም፡፡
  • እኛን ነዋ የሚጠቅመን፡፡
  • እኔ ግን አልመሰለኝም፡፡
  • እንዴት?
  • ግድቡን ለመስኖ መጠቀም አንችልም አይደል?
  • ማን አለ?
  • ይኼው በየሚዲያው ኢትዮጵያ ግድቡን ለመስኖ መጠቀም እንደማትችል አረጋገጠች እያሉ ነው፡፡
  • እንደዚያ የሚል ስምምነት አልተፈራረምንም፡፡
  • እኔም ሳነበው ግን ግድቡ ለመስኖ ጥቅም ይውላል የሚል ነገር አላገኘሁበትም፡፡
  • ለመስኖ ባንለውም ለኢኮኖሚክ ዴቨሎፕመንት ይውላል ይላል፡፡
  • ይህ ምን ማለት ነው ታዲያ?
  • መስኖ እዚህ ውስጥ ሊካተት ይችላል ማለት ነው፡፡
  • ለምን መስኖ ተብሎ አልገባም?
  • ዲፕሎማሲ ነዋ፡፡
  • እኔ ግን ብዙም አላማረኝም፡፡
  • ለምን?
  • እንደ ውጫሌ ውልና እንደ ዘ ሔግ ውሳኔ እንዳይሆን ብዬ ነው፡፡
  • ያ ሌላ ይኼ ሌላ፡፡
  • የግብፅ ፕሬዚዳንትን ንግግር ሰምተውታል?
  • በሚገባ፡፡
  • ይህ መርህ እኮ ሕግ ሆኖ እንዲፀድቅ ነው የሚፈልገው፡፡
  • እሱ ፈለገ ማለት ሕግ ይሆናል ማለት አይደለም፡፡
  • እና ይህ መርህ በፓርላማ ቀርቦ አይፀድቅም እያሉኝ ነው?
  • ፓርላማ ሊቀርብ ይችላል፡፡
  • ከቀረበማ ይፀድቃል፡፡
  • ቀርቦ ባይፀድቅስ?
  • ቀርቦ ያልፀደቀው የመጀመሪያው ሕግ ሊሆን ነው ማለት ነው?
  • እሱን ነው የምልህ፡፡
  • እንዲያ ከሆነ ጥሩ፡፡
  • በዚያ ላይ ግብፆች በአንዴ ሲኤፍኤውን ከሚፈርሙ በዚህ እያሟሟቁ ሊጠብቁን በማሰብም ሊሆን ይችላል፡፡
  • የእኔም ዋናው ጥያቄ ከሲኤፍኤው ውጪ ሌላ ስምምነት አያስፈልገንም የሚል ነው፡፡
  • በዚህ ስምምነት ያስመዘገብነውን ሌላ ድል አትርሳ፡፡
  • የምን ድል?
  • በኢንተርናሽናል ማኅበረሰብ ከፍተኛ ተቀባይነትን አትርፈንበታል፡፡
  • እሱ እንዳለ ሆኖ አሁንም ስምምነቱ ጥንቃቄ ያሻዋል፡፡
  • እንግዲህ እንዳልኩህ ይህ ስምምነት በፓርላማ ላይፀድቅ ይችላል፡፡
  • የእኔም ፀሎት እሱ ነው፡፡
  • ግድቡንማ ለፈለግነው ነገር መጠቀም እንችላለን፡፡
  • እኔም ይህን ዕድል ሳናውቅም አሳልፈን እንዳንሰጥ ብዬ ነው፡፡
  • ስለእሱ አታስብ፡፡

[ክቡር ሚኒስትሩ ከሾፌራቸው ጋር ወደ ቤት እየሄዱ ነው] 

  • ደረሰህ?
  • ምኑ ክቡር ሚኒስትር?
  • የቤት ዕጣው ነዋ፡፡
  • ኧረ በጣም ተናድጃለሁ፤ በዚህኛውም ዙር አለፈኝ፡፡
  • ዕድል የለህም ልበል?
  • ሰው ሁሉ እንዴት አልወጣልህም? ለዚያውም የሚኒስትር ሾፌር ሆነህ እያለኝ ነው፡፡
  • እኔን እኮ ሁሌም ግራ ታጋባኛለህ፡፡
  • በምን ክቡር ሚኒስትር?
  • ወደ እኛ ትሆን ወይስ ወደ ተቃዋሚዎች ጎራ?
  • ለዚያ ነው ዕጣ ያልወጣልኝ?
  • እኔ እንደዚያ አልወጣኝም፡፡
  • ታዲያ ምን እያሉ ነው?
  • የመንግሥት ሠራተኞች ኮታ ስለነበር እንዴት በዚያ አልወጣልህም ብዬ ነው?
  • አያስታውሱኝ በቃ ይተዉት፡፡
  • ለመሆኑ ምርጫው እንዴት ነው?
  • እርስዎን ልጠይቅዎት እንጂ፣ ምርጫው እንዴት ነው?
  • ያው በዚህም ምርጫ እንደምናሸንፍ ይታወቃል፡፡
  • ምንም አያስጨንቅዎትማ?
  • የሚያስጨንቀኝ ሌላ ነው፡፡
  • ምንድነው የሚያስጨንቅዎት?
  • ፐርሰንቱ፡፡
  • የምን ፐርሰንት?
  • ባለፈው 99 ነበር አሁን ስንት ይሆናል ብዬ ነዋ፡፡
  • ለምን 70/30 አትካፈሉም?
  • ምን አልክ አንተ?
  • እናንተ 70 ፐርሰንት ተቃዋሚዎች ደግሞ 30 ፐርሰንት ውሰዱ፡፡
  • ይኼን ቁጥር ከየት አመጣኸው?
  • አፌ ላይ መጥቶ ነው፡፡
  • ከማን ጋር እንደምትውል አጣራልሃለሁ፡፡
  • ወይ ጣጣ፡፡
  • 70/30 አልከኝ?
  • ኧረ ይቅርታ፡፡

[ክቡር ሚኒስትሩ ቤት ሲገቡ ሚስታቸውን አገኟቸው] 

  • ምን እያየሽ ነው?
  • ይህን የጀርመን አውሮፕላንን የከሰከሰው ሰውዬ ዜና አስገርሞኝ ነው፡፡
  • ምኑ ይገርማል?
  • አይ በአውሮፓውያን አውሮፕላን መጠቀም ራሱ እያስፈራ መጣ፡፡
  • የእኛ አየር መንገድ አለ አይደል እንዴ?
  • አሁን ከአውሮፓውያኖቹ የበለጠ ሆኖ ነው?
  • የአፍሪካ ኩራት መሆኑን እንዳትረሺ፡፡
  • ዋናው ጥያቄ እኮ ፓይለቶች እንዴት ይታመኑ የሚለው ነው?
  • የእኛ ፓይለቶች ታማኞች ናቸው፡፡  
  • ይኼው ባለፈው የእኛስ ቢሆን አውሮፕላኑን ጠልፎት አልነበር?
  • ጠለፈው እንጂ አልከሰከሰውማ?
  • ለነገሩ አሁን አዲስ ሕግ አውጥተዋል፡፡
  • የምን ሕግ?
  • 2 ለ 1 የሚል፡፡
  • ምንድነው 2 ለ 1?
  • ከሁለቱ ፓይለቶች ተጨማሪ አንድ ሌላ አብራሪ ኮክፒት ውስጥ ይኖራል፡፡
  • እኛም ለነገሩ ቀደም ብለን ሕግ አውጥተናል፡፡
  • ምን የሚሉት?
  • 1 ለ 5!