ክቡር ሚኒስትር

[የክቡር ሚኒስትሩ ጸሐፊ ስልክ ደወለችላቸው]

 

  • ክቡር ሚኒስትር፡፡
  • አቤት?
  • ስልክ ይፈልግዎታል፡፡
  • ማንን?
  • እርስዎን ነዋ፡፡
  • እየቀለድሽ ነው?
  • ኧረ በፍጹም፡፡
  • ሥራ እንደያዝኩ እያወቅሽ?
  • አዎን ግን አስቸኳይ ነው ተብዬ ነው፡፡
  • ከበላይ አለቃ ነው እንዴ የተደወለው?
  • አይ አይደለም፡፡
  • ታዲያ ማን ነው?
  • ከተቃዋሚ ፓርቲዎች ነው፡፡
  • ምን?
  • አዎን፣ ክቡር ሚኒስትሩን እንፈልጋቸዋለን እያሉ ነው፡፡
  • ለምን ሥራ ላይ ነው አትይም?
  • ብያቸው ነበር፣ ግን በጣም አስቸኳይ ነው ብለውኝ ነው፡፡
  • እሺ አገናኚኝ፡፡
  • እሺ፡፡

[በስልክ አገናኘቻቸው]

  • ጤና ይስጥልኝ ክቡር ሚኒስትር፡፡
  • ሰላም እንዴት ናችሁ?
  • ሰላምማ እናንተ ጋ ነው እንጂ እኛ ጋ መቼ አለ?
  • ኧረ ተው አንዳንዴ እንኳን አመስግኑ፡፡
  • ማንን? እናንተን?
  • እኛን እንኳን ባታመሰግኑ ፈጣሪያችሁን አመስግኑ፡፡
  • እሱንማ ባናመሰግን ዛሬ ላይ አንደርስም ነበር፡፡
  • እሺ ምን ልርዳችሁ?
  • በጣም ጠቧል፡፡
  • ምን?
  • በጣም እየጠበበ ነው፡፡
  • ምኑ ነው የጠበበው?
  • ሁሉ ነገር፡፡
  • ይኼው እኛ እንግዲህ ሰፋፊ መንገዶች እያስገነባን ነው፡፡
  • ኧረ ፖለቲካውን ነው የምልዎት፡፡
  • ምን ሆናችሁ ደግሞ?
  • ይኸው አባሎቻችን በየጊዜው እየታሰሩ ነው፡፡
  • የትኞቹ?
  • የተቃዋሚ ፓርቲዎች አባሎች ናቸዋ፡፡
  • እኮ ምን ሲያደርጉ?
  • እ…
  • በሕጋዊ መንገድ ሲንቀሳቀሱ ነው የታሰሩት?
  • እነማን?
  • አባሎቻችሁ ናቸዋ?
  • አልሰማሁዎትም?
  • ሕግ አይከበር እያልከኝ ነው?
  • እንዴት?
  • ከሕግ ውጪ ማንም ከተንቀሳቀሰ ተጠያቂ መሆኑ አይቀርም፡፡
  • አሁን ማን ይሙት እናንተ በሕግ ነው የምትንቀሳቀሱት?
  • እንዴታ?
  • አሁን ሕግ ብትከተሉ ይህ ሁሉ ሙስና አገሪቷ ውስጥ ይኖር ነበር?
  • ይኸው ባለፈው ዕርምጃ ወሰድን አይደለ እንዴ?
  • ማን ላይ?
  • የራሳችን ሌቦች ላይ ነዋ፡፡
  • ዋናው ጥያቄው እኮ ሌቦቹ እነሱ ብቻ ናቸው ወይ? የሚለው ነው፡፡
  • እ…
  • ለነገሩ ሁሉም ሌቦች ቢታሰሩ መንግሥት አይኖርም ነበር፡፡
  • እንዴት?
  • ንፁኃን እጅግ ጥቂት ብቻ ናቸው፡፡
  • ሌባ ነህ እያልከኝ ነው?
  • እሱን እርስዎ አሉ፡፡
  • ይህ ራሱ የሚያሳየው ሆደ ሰፊነታችንን ነው፡፡
  • አይ ሆደ ሰፊነት?
  • እየሰደባችሁን ዝም እንላለን፡፡
  • ለማንኛውም ክቡር ሚኒስትር ምኅዳሩ ጠቧል፡፡
  • አንድ ነገር ልንገርህ?
  • እሺ፡፡
  • ኳስ ትወዳለህ?
  • ብዙም አይደለሁም፡፡
  • እኔ ግን በጣም እወዳለሁ፡፡
  • እሺ፡፡
  • አንድም ጨዋታ አያመልጠኝም፡፡
  • ለዚያ ነው ሥራ የማይሠሩት?
  • እንግዲህ አትዘባርቅ!
  • እሺ ይቀጥሉ፡፡
  • አርሴናልና ማንችስተር ቀንደኛ ተፎካካሪ ክለቦች ናቸው፡፡
  • አውቃለሁ፡፡
  • እናም የአርሴናል አሠልጣኝ ለማንቸስተሩ አሠልጣኝ ደውሎ የጨዋታ ፎርሜሽንህን ንገረኝ ቢለው ምን እንደሚለው ታውቃለህ?
  • አላውቅም፡፡
  • ልክ አንተ ላይ አሁን እኔ ስልኩን እንደምዘጋብህ ይዘጋዋል፡፡
  • ጢጢጢ…

[የክቡር ሚኒስትሩ አማካሪ ቢሯቸው ገባ]

  • እሺ ክቡር ሚኒስትር፡፡
  • እንዴት ነህ እባክህ?
  • እግዚአብሔር ይመስገን፡፡
  • ሥራ እንዴት ይዞሃል?
  • ይኸው የህዳሴ ግድቡ የመሠረት ድንጋይ የተጣለበትን አራተኛ ዓመት ለማክበር እየወጣን እየወረድን ነው፡፡
  • እኔም ሰሞኑን በዚሁ በህዳሴ ግድብ ዙሪያ ተወጥሬያለሁ፡፡
  • አንድ ነገር ልንገርዎት ብዬ ነው፡፡
  • ምን?
  • እርስዎን መርጬዎት ነበር፡፡
  • ለምኑ?
  • የባለሥልጣናትን የእግር ኳስ ቡድን እንዲያስተባብሩ፡፡
  • ተው ተው እባክህ?
  • እግር ኳስ በጣም ጐበዝ ስለሆኑ ነው፡፡
  • አውቃለሁ ግን…
  • በዚያ ላይ ባለፈው ዓመትም ሕዝቡ በጣም ሲያደንቅዎት ነበር፡፡
  • አዎ ቢሆንም?
  • ኳስ ደግሞ በጣም ይወዳሉ፡፡
  • ልክ ነህ ግን እኔ በአሁኑ ተቀያሪ ብሆን ደስ ይለኛል፡፡
  • ለምን ክቡር ሚኒስትር?
  • በቃ ለሌሎቹም ዕድል መስጠት አለብና፡፡
  • እ…
  • አዎ እኔ የእኛ ቡድን ሲደክም ተቀይሬ ገብቼ ባግዝ ይሻለኛል፡፡
  • እና በአሁኑ ቋሚ ተሰላፊ አይሆኑም?
  • አዎን፡፡
  • ፖለቲካውም ላይ እንዲህ ቢሆን ጥሩ ነበር፡፡
  • ምን ማለትህ ነው?
  • ያው ለአዲሱና ለወጣቱ ትውልድ ዕድል ቢሰጠው ማለቴ ነው፡፡
  • ይኸው መተካካት ላይ አይደለን እንዴ?
  • መተካካትማ ተብሎ ነበር፡፡
  • ታዲያ ምን ሆነ?
  • በርካቶች እኮ በመጪው ምርጫ አይወዳደሩም ተብሎ ነበር፡፡
  • እ…
  • ማለቴ በመተካካቱ ፖሊሲ መሠረት የቀድሞ አመራሮች በመጪው ምርጫ አይወዳደሩም ተብሎ ነበር፡፡
  • ልክ ነው፡፡
  • እና ባለፈውም ምርጫ በርካቶቹ የተጠባባቂ ወንበር ላይ ተቀምጠው ነበር፡፡
  • ምን እያልክ ነው?
  • በዚህኛው ምርጫ ግን ራሳቸውን ማግለል ሲገባቸው ቋሚ ተሰላፊ ሆነው መጥተዋል፡፡
  • እ…
  • ለዚያ ነው ምነው ፖለቲካው ላይም ተጠባባቂ ወንበር ላይ በተቀመጣችሁ ያልነው፡፡
  • አትሳሳት፡፡
  • እንዴት?
  • እነፖል ስኮልስ ራሳቸውን ከኳስ ካገለሉ በኋላም ቡድናቸው ሲቸገር ተመልሰው ይጫወቱ ነበር፡፡
  • እኮ አትሊስት ሞክረን ሲያቅተን ለምን አትረዱንም?
  • እ…
  • ለእኛም ዕድል ስጡን፡፡
  • ዛሬ ምነው እንደዚህ ለፍላፊ ሆንክ?
  • ይቅርታ ክቡር ሚኒስትር፡፡
  • ለማንኛውም እኔ የዓባይን የፖለቲካ ጉዳይ ብከታተል ይሻለኛል፡፡
  • እሺ እንዳሉ፡፡
  • መቼም አንተ የጂኦፖለቲክስ ጉዳይ አይገባህም፡፡
  • እንዴት?
  • ያለነው ቀንድ ላይ ነው፡፡
  • አውቃለሁ፡፡
  • ይህ ቦታ ደግሞ ሰላም የለበትም፡፡
  • ቀንድ ላይማ መቼ ሰላም ኖሮ ያውቃል?
  • ከሰሜን ሻዕቢያ፣ ከምሥራቅ አልሸባብ፣ ከምዕራብ ደግሞ ደቡብ ሱዳን አሉ፡፡
  • ልክ ነው፡፡
  • ስለዚህ ግብፅ እዚህ ከእኛ ጋ እየተስማማች ከጐን ልማታችንን ለማደናቀፍ ትሠራለች፡፡
  • እሱማ ልክ ነው፡፡
  • ስለዚህ የግብፅ ጉዳይ ከፍተኛ ጥንቃቄ የሚሻ ጉዳይ ነው፡፡
  • ልክ ብለዋል ክቡር ሚኒስትር፡፡

[የክቡር ሚኒስትሩ ወዳጅ ደወለ] 

  • እንዴት ነህ?
  • አለሁ ክቡር ሚኒስትር፡፡
  • ሥራ እንዴት ነው?
  • ያው በልተን ካደርን ተመስገን ነው፡፡
  • ቀልደኛ ሆነሃል ልበል?
  • እንዴት ክቡር ሚኒስትር?
  • አንተም በልተን ካደርን ትላለህ?
  • ታዲያስ?
  • አንተ በልተህ፣ አስበልተህ፣ ተበላልተህ አይደል እንዴ የምታድረው?
  • ኧረ የለም፡፡
  • ምን?
  • ምንም የለም እኮ?
  • ምኑ?
  • ዶላር፡፡
  • የምን ዶላር?
  • ይኸው ወረፋ መጠበቅ ከጀመርኩ ወራት አለፉ፡፡
  • የምን ወረፋ?
  • የዶላር ወረፋ፡፡
  • ጥፋቱ የራሳችሁ ነው፡፡
  • እንዴት?
  • ዶላሩን የምታሸሹት ራሳችሁ፡፡
  • እኔም መናገር ይፈቀድልኛል?
  • ቀጥል፡፡
  • ዶላሩን እንድናሸሽ መንገዱን የምታመቻቹልን ራሳችሁ፡፡
  • እ…
  • አዎና፣ ለማንኛውም ምንም ዶላር የለም፡፡
  • በቃ አጣራለሁ እስቲ፡፡

[የክቡር ሚኒስትሩ ሚስት ደወሉ] 

  • የለም እኮ፡፡
  • ምንድነው የሌለው?
  • ዶላር የለም፡፡
  • የምን ዶላር?
  • እህቴ ከነገወዲያ ወደ ውጭ ጉዞ እንዳላት ታውቃለህ አይደል?
  • አዎን አውቃለሁ፡፡
  • ለመንገድ እንኳን የሚሆናት ዶላር ማግኘት አልቻለችም፡፡
  • ከብላክ ማርኬት ለምን አትገዛም?
  • ምን? ትልቅ ባለሥልጣን መሆንህን ረሳኸው እንዴ?
  • እኔ የመፍትሔ ሰው እንደሆንኩ ታውቂያለሽ?
  • ቢሆንስ?
  • ችግር ነገርሽኝ፣ መፍትሔ ነገርኩሽ፡፡
  • ድንቄም መፍትሔ?
  • ሁሌም መፍትሔ ስለምናሰላስል ነው አገሪቱ እዚህ የደረሰችው፡፡
  • ሌላ የለህም?
  • ሃያ አራት ሰዓት ሠርተን፣ አገሪቷን ሃያ አራት ዓመት መርተናታል፡፡
  • እ…
  • አሁን ደግሞ አርባ ስምንት ሰዓት ሠርተን፣ አርባ ስምንት ዓመት እንመራለን፡፡
  • ያድርግላችሁ!