ክቡር ሚኒስትር

[ክቡር ሚኒስትሩ ጉንፋን ይዟቸዋል፡፡ ቢሮ ከጸሐፊያቸው ጋር እያወሩ ነው]

 

  • ምነው ክቡር ሚኒስትር?
  • ምነው?
  • ድምፅዎት ተዘግቷል፡፡
  • ምን ይመስልሻል?
  • እዚያ ውጭ ለምርጫ ቅስቀሳው ብዙ አውርተው ነው?
  • ምን ትቀባጥሪያሽ?
  • እውነቴን እኮ ነው፡፡
  • ኧረ ጉንፋን ይዞኝ ነው፡፡
  • እንዴ እርስዎን ክቡር ሚኒስትር?
  • አዎና፣ እኔም እኮ እንደ አንቺ ሰው ነኝ፡፡
  • አይ ያው የሚውሉት ጥሩና የፀዳ ቦታ ነው ብዬ ነው፡፡
  • አሽሙር መሆኑ ነው?
  • ኧረ የምሬን ነው፡፡
  • አታይም እንዴ? አየሩ ተቀይሯል፡፡
  • ስለሱማ አያንሱ ክቡር ሚኒስትር፡፡
  • እንዴት?
  • መዓት ሊወርድብን ነው እኮ የሚመስለው፡፡
  • የምን መዓት?
  • ሙቀቱ ነዋ፡፡
  • ግሎባል ዋርሚንግ ነው፡፡
  • እሱ ብቻ ነው ብለው ነው?
  • ሌላ ታዲያ ምን አለ?
  • የፈጣሪ ቁጣ ነው እባክዎት፡፡
  • ፈጣሪ ደግሞ ማን ላይ ነው የሚቆጣው?
  • እኛ ላይ ነዋ፡፡
  • ለምን?
  • እዚህ አገር አይኖሩም እንዴ ክቡር ሚኒስትር?
  • ምን ማለት ነው?
  • እስቲ ይመልከቱ፡፡
  • ምኑን?
  • ግፉን፣ ሙስናውን፣ ጭካኔውን፣ ስግብግብነት፣ ኧረ ስንቱ ቅጡ፡፡
  • ለዚያ ነው አየሩ የተቀየረው?
  • የእግዚአብሔር ቁጣ ነው ስልዎት፡፡
  • በይ እኔ እንደሰማሁሽ ሌላ ሰው እንዳይሰማሽ፡፡
  • እ…
  • አየሩ የተቀየረው በግሎባል ዋርሚንግ ምክንያት ነው፡፡
  • በእሱ ብቻ እንደዚህ በአንዴ አይቀየርም ብዬ ነው፡፡
  • ለዚያ ነው እኮ ከምዕራቡ ዓለም መሪዎች ጋር የምንደራደረው፡፡
  • ምን እያልን?
  • ካሳ ክፈሉን ብለን ነዋ፡፡
  • ካሳ ቢከፍሉን አየሩ ካልተለወጠ ምን ይጠቅመናል?
  • ካሳውን እኮ የምንጠቀምበት ዛፍ ለመትከያ ነው፡፡
  • ካሳ ባይከፍሉንም እኮ እኛ ዛፍ መትከል እንችላለን፡፡
  • እሱማ እየተከልን ነው፡፡
  • በእሱ ዙሪያ ግን መሥራት ያለብንን ያህል እየሠራን አይደለም፡፡
  • እንዴት?
  • ዛፍ መትከል ግዴታ መሆን አለበት፡፡
  • እሱስ ልክ ብለሻል፡፡
  • የእኛ ሠፈር ለዚህ ጥሩ ማሳያ ሊሆን ይችላል፡፡
  • እንዴት?
  • ከጥቂት ዓመታት በፊት ከእኔ መኖሪያ በላይ ያለው ተራራ መላጣ ነበር፡፡
  • እሺ፡፡
  • ነፍሳቸውን በገነት ያኑረውና …
  • የማንን?
  • የጠቅላይ ሚኒስትር መለስን ነዋ፡፡
  • ለምን?
  • እሳቸው ያረፉ ጊዜ ሁሉም ሰው በስማቸው ዛፍ መትከል ጀመረ፡፡
  • እ…
  • በቃ ድርጅት በሉ፣ ግለሰብ ማን ቀረ?
  • እሺ፡፡
  • ይኸው አሁን ያ ተራራ በዛፍ ተሸፍኗል፡፡
  • በጣም ደስ ይላል፡፡
  • የዚያ አካባቢ ሰዎችም በእጅጉ ተጠቃሚ ሆነናል፡፡
  • ይህ በጣም የሚያስደስት ነገር ነው፡፡
  • ግን ክቡር ሚኒስትር፣ ሌላው አካባቢ እኮ እየነደደ ነው፡፡
  • እሱማ አሳሳቢ ነው፡፡
  • እኔማ በድጋሚ ሰው ዛፍ መትከል እንዲጀምር ሌላ መሪ መሞት አለበት ወይ እያልኩ ነው፡፡
  • ምን አልሽ?
  • እውነቴን ነው ክቡር ሚኒስትር፣ ሌላ መሪ ካልሞተ ዛፍ መትከል አንጀምርም እንዴ?
  • አንቺ አፍ ለቆብሻል፡፡
  • ዛፍ መትከል ግዴታ መሆን አለበት፡፡
  • በእሱ እስማማለሁ፡፡
  • በዚያ ላይ ደግሞ ሕንፃዎችም ሲሠሩ አየሩ ላይ ጉዳት የማያደርሱ መሆናቸው ሊረጋገጥ ይገባል፡፡
  • ትክክል፡፡
  • ባለሀብቱ ሕንፃ መትከል ብቻ ሳይሆን ዛፍ መትከልንም ይማር፡፡
  • ሌላ ፖለቲካሽን ተይ፡፡
  • ይቅርታ ክቡር ሚኒስትር፣ ሌላም የሚያሳስበኝ ነገር አለ፡፡
  • ምን?
  • የመናፈሻ ሥፍራ እኮ በከተማችን የለም፡፡
  • መኖር እንኳን አለ፡፡
  • ሰዎች ገብተው ካላረፉበት ቢኖርስ ምን ይጠቅማል?
  • እ…
  • በዚያ ላይ አምስት ሚሊዮን ሕዝብ በሚኖርበት ከተማ በጣት ብቻ የሚቆጠሩ መናፈሻዎች ይበቃሉን?
  • እሱስ አይበቁም፡፡
  • ይኼም በጣም ሊታሰብበት ይገባል፡፡
  • ሐሳብሽን ተቀብያለሁ፡፡

[የክቡር ሚኒስትሩ አማካሪ ቢሯቸው ገባ] 

  • እንዴት ነበር ጉዞ ክቡር ሚኒስትር?
  • ስኬታማ ነበር፡፡
  • ዳያስፖራው እንዴት ነው?
  • ከእኛ ጋር እንደሚሠለፉ አረጋግጠውለናል፡፡
  • በጣም ደስ ይላል፡፡
  • በርካቶች ከእኛ ጋር ለመሥራት ተስማምተዋል፡፡
  • ዋናው እዚህ ያለውን የቤት ሥራችንን መሥራታችን ነው፡፡
  • እሱማ ግድ ነው፡፡
  • አሁን ያው የምርጫ ክርክሩ ተጀምሯል፡፡
  • የእኔ ተራ መቼ ነው?
  • በቅርብ ጊዜ ነው፡፡
  • ያው እኔ የገበሬ ልጅም ስለሆንኩ ግብርናን አስመልክቼ ተቃዋሚዎችን ወጥሬ ነው የምከራከራቸው፡፡
  • እሱ ጥሩ ነው፤ ግን…
  • ግን ምን?
  • ክርክሩ ግብርና ብቻ ላይ ያተኮረ አይደለማ፡፡
  • እ…
  • በዚያ ላይ ኢኮኖሚያችን ከግብርና ወደ ኢንዱስትሪ መር ተቀይሯል፡፡
  • አውቃለሁ፡፡
  • በተጨማሪም የሰብዓዊ መብት ጉዳይም መነሳቱ አይቀርም፡፡
  • እሱ ነው እኮ የሚያስጨንቀኝ፡፡
  • እንዴት ክቡር ሚኒስትር?
  • በወረቀት ላይ ያሰፈርነውና በመሬት ላይ ያለው ሰፊ ልዩነት አለው፡፡
  • ቢሆንም ወጥተን መከራከራችን አይቀርም፡፡
  • በቃ እየሠራን ነው፣ እየተለወጥን ነው ማለት ነው ቢከፋ፡፡
  • ሌላማ ምን እንላለን?
  • ችግሩ እኮ እንዳለ እኔም አውቃለሁ፡፡
  • እንዴት?
  • ባለፈው ባለቤቴ አንድ ነገር ፈልጋ ያጋጠማትን የመልካም አስተዳደር ችግር እኔ ነኝ የማውቀው?
  • ታዲያ ለምን አንፈታውም?
  • ከምርጫው በኋላ፡፡
  • ባለፈውም ምርጫ እኮ እንዲህ ብለን ነበር፡፡
  • አሁንም እንደግመዋለና፡፡
  • ለማንኛውም ጸሐፊዬን ጥራልኝ፡፡
  • እሺ፡፡

[ጸሐፊያቸው መጣች] 

  • ፈለጉኝ ክቡር ሚኒስትር?
  • የምርጫ ካርድ አውጥተሻል?
  • አላወጣሁም፡፡
  • ለምን?
  • ጊዜው አለፈብኝ፡፡
  • ባለቤትሽስ?
  • እሱም አላወጣም፡፡
  • ሄዳችሁ አውጡ እንጂ ምንድነው የምትጠብቁት?
  • ጊዜው እኮ አልፎብናል፡፡
  • በመብትሽ ትቀልጃለሽ?
  • ያው ነው እባክዎት፡፡
  • ምኑ ነው ያው?
  • መረጥኩም አልመረጥኩም ለውጥ የለውም፡፡

[የክቡር ሚኒስትሩ ወዳጅ የሆነ ባለሀብት ቢሯቸው መጣ]

  • ሰላም ነው ክቡር ሚኒስትር፡፡
  • እንዴት ነህ ወዳጄ?
  • ምርጫ እንዴት ይዟችኋል?
  • ይኸው ተያይዘነዋል፡፡
  • እኛም ተያይዘነዋል፡፡
  • ስለሁሉም ነገር አታስብ፡፡
  • እንዴት ክቡር ሚኒስትር?
  • በቃ መሬት በል፣ የታክስ ጉዳይ በል ብቻ ሁሉንም ነገር እኛ እንጨርስልሃለን፡፡
  • ይኸው እኔም ሥራዬን ትቼ እኮ የምርጫ ዘመቻ ላይ ነው ያለሁት፡፡
  • እሱን ነው እኔ የምልህ፡፡
  • ሁሉንም ነጋዴ እየቀሰቀስኩ ነው፡፡
  • ዋናው መመረጣችን ነው፡፡
  • ስለሱ አያስቡ ክቡር ሚኒስትር፣ ዛሬ የመጣሁት ግን ለሌላ ነገር ነበር፡፡
  • ምን ገጠመህ?
  • አንድ ዘመዴ እናንተ ጋ መሥራት ይፈልጋል፡፡
  • አምጣው ችግር የለም፣ አንድ ቦታ እወሽቀዋለሁ፡፡
  • ልጁ ያለው የትምህርት ደረጃ…
  • ዝም ብለህ ላከው ስልህ?
  • እሺ ክቡር ሚኒስትር፡፡
  • በነገራችን ላይ አንድ የእኔም ዘመድ እናንታ ጋ መሥራት ይፈልጋል፡፡
  • ዝም ብለው ይላኩት፡፡
  • እሺ፡፡

[የክቡር ሚኒስትሩ አማካሪ ቢሯቸው ገባ] 

  • ይኸው ክቡር ሚኒስትር፡፡
  • ምንድነው?
  • በምርጫ ክርክሩ የሚያነሷቸው ነጥቦች፡፡
  • እኔ የምልህ ከክርክሩ በፊት አንድ ነገር ማድረግ አለብን፡፡
  • ምን?
  • የሆነ ፕሮጀክት መመረቅ አለብኝ፡፡
  • ባለፉት ጊዜያት እኮ በርካታ ፕሮጀክቶች መርቀዋል፡፡
  • አሁን ሌላ ልመርቃ፡፡
  • ምንም አዲስ ፕሮጀክት የለንማ፡፡
  • ሁሉም ተመርቀው አልቀዋል?
  • አዎን ክቡር ሚኒስትር፡፡
  • ከክርክሩ በፊት ግን የግድ መመረቅ አለብኝ፡፡
  • ታዲያ ምን ተሻለ?
  • ያንን ፕሮጀክት…
  • ምን?
  • ደግሜ ልመርቀው!