ክቡር ሚኒስትር

[ክቡር ሚኒስትሩ ቤት ውስጥ ከባለቤታቸው ጋር እያወሩ ነው]

 

  • ምን ተገኝቶ ነው ዛሬ?
  • ምን ሆነሃል?
  • እንደዚህ የዘነጥሽው?
  • ዓይን ተከፍቶ ነው እባክህ?
  • እንዴት ማለት?
  • ሁሌም ቢሆን እኔ ሚስትህ ዘናጭ ነኝ፡፡
  • እሱን ተይውና አሁን ምን ተገኘ ነው ያልኩሽ?
  • በዓላችን እኮ ነው ዛሬ?
  • የምን በዓል?
  • የእኛ በዓል ነዋ!
  • እኮ እናንተ እነማን ናችሁ?
  • እኛ ሴቶች፡፡
  • እ…
  • አዎን፣ የምን እ… ነው?
  • ገርሞኝ ነዋ!
  • ምኑ?
  • እንዲህ መዘነጥሽ፡፡
  • ምኑ ነው የሚያስገርመው?
  • ባለፈው ወር ያን ሁሉ በዓል ስናከብር ምነው እንደዚህ አልዘነጥሽ?
  • ወዴት? ወዴት?
  • የምሬን ነው፡፡
  • ያ ሌላ ይኼ ሌላ፡፡
  • እንዴት?
  • ያ የራሳችሁ ነው፤ ይኼ ደግሞ የእኔ ነው፡፡
  • እንዴት ነው የራሳችን የሆነው? የሁላችንም ነው እንጂ፡፡
  • ሰው የሚነግርህን ስማ የታገልከው ለራስህ ነው፡፡
  • ምን?
  • አዎን እና ደግሞ እንደፈለግህ ስትሆን ነበር፤ አሁን ይኼ የእኔ ነው፡፡
  • አልገባኝም፡፡
  • ምኑ ነው ያልገባህ?
  • የታገልከው ለራስህ ነው ያልሽው?
  • ታዲያስ?
  • ይኼን ከሚያሰማኝ ምነው…?
  • በል ግፍ እንዳታወራ፡፡
  • ያን ሁሉ ትግል ከንቱ አደረግሽው?
  • እኔ ከንቱ ነው አላልኩም፡፡
  • አልሽ እንጂ?
  • አልወጣኝም፡፡
  • አንድ ነገር ግን ስሚ?
  • ምን?
  • የሁሉ ነገር መሠረት የእኛ ትግል ነው፡፡
  • ማለት?
  • ዛሬ እንዲህ እንድትዘንጪ ያደረገሽ ራሱ የእኛ ትግል ነው፡፡
  • ዛሬ የዘነጥኩትማ በገዛሁት ልብስ ነው፡፡
  • የምልሽን ስሚ፡፡
  • ምን አልክ?
  • ለሴቶች እኩልነት እኮ የታገልነው እኛ ነን፡፡
  • አቤት፡፡
  • አዎን ሴቶች ከወንዶች ጋር እኩል እንዲቆጠሩ ያደረገው የእኛው ሕገ መንግሥት ነው፡፡
  • እባክህ አትሳሳት፡፡
  • እንዴት?
  • እኩልማ ያደረገን ፈጣሪያችን ነው፡፡
  • ቢሆንም የቀድሞዎቹ መንግሥታት እሱንም ነፍገዋችሁ ነበር፡፡
  • አሁንም ቢሆን ሙሉ በሙሉ መብታችንን እየተጠቀምን አይደለም፡፡
  • ቀስ በቀስ ግን ታገኙታላችሁ፡፡
  • በል ዲስኩርህን ተው፤ ለማንኛውም ዛሬ እራት ውጪ ስለምበላ እንዳትጠብቀኝ፡፡
  • ምን?
  • አዎን፣ ራት አልመጣም፡፡
  • ከማን ጋር ነው የምትበይው?
  • ከሴቶቹ ጋር፡፡
  • ለነገሩ እኔም ቢሮ አመሻለሁ፡፡
  • ለምን?
  • ብዙ ሥራ አለኝ፡፡
  • አዲስ ሥራ አለ?
  • ሰሞኑን ጉዞ አለኝ፡፡
  • የምን ጉዞ?
  • ወደ ውጭ እሄዳለሁ፡፡
  • ለምን?
  • ለምርጫ ቅስቀሳ፡፡
  • ለምርጫ ቅስቀሳ?
  • አዎና፡፡
  • መራጩ እኮ እዚህ ነው ያለው?
  • እዚያ ደግሞ አስመራጮቹ አሉ፡፡
  • አልገባኝም፡፡
  • ያው በየሶሻል ሚዲያው የሚያብጠለጥሉንን ለማለሳለስ ነዋ፡፡
  • ምን ያመጣሉ ብለህ ነው?
  • ሚዲያ ከባድ ነው፤ እኛ ወደን እኮ አይደለም ቲቪውንም፣ ሬዲዮኑንም፣ ጋዜጣውንም የያዝነው፡፡
  • እነሱ ምን ይዘዋል ታዲያ?
  • ሶሻል ሚዲያ፡፡
  • ያን ያህል ተሰሚነት አላቸው ብለህ ነው?
  • ሁሉንም ቀዳዳ መድፈን አለብሽ፡፡
  • መልካም ሥራ፡፡
  • መልካም ራት፡፡

[ክቡር ሚኒስትሩ ቢሮ ገብተው ከአማካሪያቸው ጋር እያወሩ ነው]

  • ሁሉም ነገር ተዘጋጀ?
  • በሚገባ ክቡር ሚኒስትር፡፡
  • ስንት ቀን ነው የምቆየው?
  • አሥር ቀን፡፡
  • ብዙ አይደለም?
  • ብዙ ነው፤ ግን ቢሆንም የግድ መሆን ስላለበት ነው፡፡
  • ለነገሩ አንተም ስላለህ ችግር የለውም፡፡
  • ክቡር ሚኒስትር …
  • አቤት?
  • እኔ እኮ አብሬዎት አልመጣም፡፡
  • ምን?
  • አዎን ክቡር ሚኒስትር፡፡
  • ምን ማለት ነው?
  • አያስቡ ሁሉም ነገር በሚገባ ተዘጋጅቷል፡፡
  • ብቻዬን ሜዳ ላይ ልትጥሉኝ?
  • እዚህም ያለው ሥራ መሠራት ስላለበት ነው፡፡
  •  አይይይ…
  • ምነው ክቡር ሚኒስትር?
  • ዳያስፖራው በጣም አስቸጋሪ ነው፡፡
  • አያስቡ ሁሉም ነገር ተዘጋጅቷል ስልዎት?
  • በቃ ሊወርዱብኝ ነዋ?
  • እነማን?
  • እነሱ ናቸዋ፡፡
  • የለመድነው ነገር እኮ ነው? ብዙም አያስቸግርዎትም፡፡
  • አሁንስ ሰለቸኝ፡፡
  • ምኑ?
  • ስድብ፡፡
  • አያስቡ የሚያግዝዎት ሰዎች እዚያ ተዘጋጅተዋል፡፡
  • ለማንኛውም ልደውል?
  • ማን ጋ?
  • ወዳጄ ጋ፡፡
  • ይችላሉ፡፡

[ክቡር ሚኒስትሩ ጸሐፊያቸው ጋ ደወሉ]

  • አቤት ክቡር ሚኒስትር?
  • ለምንድን ነው ስልኩን የማታነሽው?
  • እንግዶች እያስተናገድኩ ነበር፡፡
  • የማን ጸሐፊ ነሽ?
  • ማለት?
  • የእንግዶቹ ነሽ? ወይስ የእኔ?
  • ኧረ የእርስዎ ነኝ፡፡
  • ይኼኔ እዚያ ፌስቡክ ላይ ሆነሽ ነው?
  • ኧረ አይደለሁም፡፡
  • እስቲ ደውዪ እና አገናኚኝ፡፡
  • ማንን?
  • ወዳጄን፡፡
  • የትኛውን?
  • ውጭ ያለውን ወዳጄን ነዋ፡፡
  • ይቅርታ ብዙ ወዳጅ አለዎት ብዬ ነው፡፡
  • አሁን ያልተጠየቅሽውን አትቀባጥሪ፡፡
  • እሺ ይቅርታ ክቡር ሚኒስትር፡፡
  • ቶሎ በይ፡፡
  • እኔ የምለው ክቡር ሚኒስትር …
  • ውጭ ሊሄዱ ነው እንዴ?
  • አዎን ምነው?
  • አይ በየፌስቡኩ ላይ አይቼዎት ነው፡፡
  • እ…
  • አዎን ሊመጡ ነው፤ ተዘጋጁ ሲባባሉ ነበር፡፡
  • እነማን?
  • ዳያስፖራዎቹ፡፡
  • ወይ ጣጣ፡፡
  • ይቅናዎት እንግዲህ፡፡
  • አሁን ቶሎ ደውይልኝ፡፡
  • እሺ፡፡

[ክቡር ሚኒስትሩ ከወዳጃቸው ጋር በስልክ ተገናኙ]

  • ጤና ይስጥልኝ ክቡር ሚኒስትር፡፡
  • እንዴት ነህ ወዳጄ?
  • አለሁ፤ ሁሉ ሰላም ነው?
  • ልመጣ ነው፡፡
  • ምን?
  • እናንተ ጋ ልመጣ ነው፡፡
  • ምን ሊያደርጉ?
  • ለምርጫ ቅስቀሳ፡፡
  • ምርጫው እኮ አገር ቤት ነው ያለው፡፡
  • እዚያም ላሉት ዜጐች የግድ መደረግ አለበት ተብሏል፡፡
  • ይቅናዎት እንግዲህ፡፡
  • ምርቃቱን ተወውና እፈልግሃለሁ፡፡
  • ማንን? እኔን?
  • አዎን፡፡
  • ለምን?
  • እንድታግዘኝ ነዋ፡፡
  • አያስቡት ክቡር ሚኒስትር፡፡
  • ምነው?
  • ፖለቲካ ትቻለሁ፡፡
  • ምነው?
  • እዚህ እኮ ሁሉ ነገር ከሯል፡፡
  • እንዴት ማለት?
  • በቃ ከፍተኛ ጥላቻ ነው ያለው፡፡
  • እኔ የምመጣው እኮ እንድንፋቀር ነው፡፡
  • ኧረ አይቀልዱ ክቡር ሚኒስትር፡፡
  • እየቀለድኩ አይደለም፤ እውነቴን ነው፡፡
  • እኔ በየሶሻል ሚዲያው መሰደቡ ሰልችቶኛል፡፡
  • እ…
  • ቤተሰቦቼ ራሱ ተገልለዋል፡፡
  • እ…
  • ስለዚህ ፖለቲካ በቃኝ ብያለሁ፡፡
  • ምን ተሻለኝ?
  • አይምጡ፡፡
  • እ…
  • ይቅርብዎት፡፡
  • መምጣቴማ ግድ ነው፡፡
  • እንግዲያው አንድ ነገር ይቅርብዎት፡፡
  • ምን?
  • ሾፒንግ!