ክቡር ሚኒስትር

[ክቡር ሚኒስትሩ አማካሪያቸውን ቢሯቸው አስጠሩት]

 

  • እንዴት ነው ክቡር ሚኒስትር?
  • ዘመኑ የፌሽታ ነው፡፡
  • ሰሞኑን በበዓላት ተጨናነቅን፡፡
  • የካቲት እኮ እንደዚህ ነው፡፡
  • እንዴት ነው?
  • በቃ ታሪካዊ ወር ነው፡፡
  • ታሪካዊ ሲሉ?
  • የአድዋ በዓልን የምንዘክርበት፡፡
  • ጣሊያንን ከኢትዮጵያ ያባረርንበትን ነው የሚሉኝ?
  • ምን እሱ ብቻ?
  • ሌላ ደግሞ ምን አለ?
  • ዋናውን ረሳኸው እንዴ?
  • ዋናው ደግሞ ምንድነው?
  • እኛ የተወለድንበት ነዋ፡፡
  • በዚህ ወር ነው እንዴ የተወለዱት?
  • እኔም ለነገሩ በዚህ ወር ነው የተወለድኩት፣ ግን ያኛውን ነው ያልኩህ፡፡
  • የትኛውን?
  • ሕወሓትን ነዋ፡፡
  • እእእ….
  • በቃ የፌሽታ ወር ነው፡፡
  • ለነገሩ ፌሽታ የበዛ ይመስለኛል፡፡
  • ይብዛ እንጂ፡፡
  • ሌላም ፌሽታ ሳይኖር አይቀርም፡፡
  • ደግሞ ሌላ ምን ተገኘ?
  • አልሰማሁም እንዳይሉኝ ክቡር ሚኒስትር?
  • ኧረ በፍጹም፡፡
  • ከሁሉም የሚበልጠው ፌሽታ እንዲያውም ይኼኛው ሳይሆን አይቀርም፡፡
  • ኧረ ምን ሰምተህ ነው?
  • የሚወራውን አልሰሙም?
  • ምን ተወራ?
  • ሹመት አለ፡፡
  • ሹመት?
  • አዎን ክቡር ሚኒስትር፡፡
  • የምን ሹመት?
  • ብቻ ቃል ይግቡልኝ?
  • ምን ብዬ?
  • ይዘውኝ እንደሚሄዱ፡፡
  • የት ነው የምሄደው?
  • ሲሾሙ ነዋ፡፡
  • እኮ የት ነው የምሾመው?
  • ለከፍተኛ ኃላፊነት መታጨትዎን ሰምቻለሁ፡፡
  • የምን ከፍተኛ ኃላፊነት?
  • እንጃ ግን ከፍተኛ መሆኑን ሰምቻለሁ፡፡
  • እየቀለድክብኝ ነው?
  • የምን ቀልድ አመጡ? እውነቴን ነው፡፡
  • ኧረ እንቅልፍ አትንሳኝ?
  • እስካሁን ይተኛሉ እንዴ?
  • እሱማ መቼም እንቅልፍ ኖሮኝ አያውቅም፡፡
  • ብቻ እንዳይረሱኝ?
  • ለምን እረሳሃለሁ?
  • ሲሾሙ፡፡
  • እንደ አፍህ ያድርግልኝ፡፡
  • ሆኖልዎታል፡፡
  • አሜን!

[የክቡር ሚኒስትሩ ወዳጅ ከውጭ አገር ደወለ] 

  • ሄሎ ክቡር ሚኒስትር!
  • ሄሎ!
  • እንዴት ሰነበቱ?
  • በጣም ደህና ነኝ፡፡
  • በዓል እንዴት ነው?
  • በጣም ደስ ይላል፡፡
  • እኔም ስላልቻልኩ ነው እንጂ መምጣት ፈልጌ ነበር፡፡
  • ብትመጣ ጥሩ ነበር፡፡
  • ምን አዲስ ነገር አለ?
  • ብዙ አዲስ ነገር አለ፡፡
  • እኮ ምን አለ?
  • ሹመት እየመጣ ነው፡፡
  • ሹመት ነው ያሉኝ?
  • አዎ ወዳጄ፡፡
  • በጣም ደስ ይላል፡፡
  • እናም የምትፈልገውን ነገር ይዘህ ና፡፡
  • ምን ችግር አለ?
  • አሁን ብዙ ነገር እያሰብን ነው፡፡
  • ምን ታስቧል?
  • የኢንዱስትሪ ዞን በየቦታው እያስገነባን ስለሆነ በዚያም ላይ መሳተፍ ትችላለህ፡፡
  • በጣም ደስ ይለኛል፡፡
  • ለአንተ ብቻ ሳይሆን ለሌሎቹም ዕድሉ አለ፡፡
  • አስተባብራለሁ በቃ፡፡
  • ታሪክ መሥራት አለብን፡፡
  • ልክ ነው ክቡር ሚኒስትር፡፡
  • ብዙ ሥራ ነው ያለው፡፡
  • በቻልነው መጠን እንሳተፋለን፡፡
  • ከሠራን ደግሞ ማደጋችን አይቀርም፡፡
  • እኔ የምለው ግን ክቡር ሚኒስትር…
  • ምን አልክ?
  • ባለፈው እኮ በቃኝ ብለውኝ ነበር፡፡
  • ምኑን?
  • ሥልጣን ላይ መቀመጥ ነዋ፡፡
  • ልሾም ነዋ፡፡
  • ቢሆንስ?
  • እኔ ሕዝቡን ማገልገል ደስ ይለኛል፡፡
  • በሕዝቡ መገልገል አሉኝ?
  • ኧረ ሕዝቡን ማገልገል ደስ ይለኛል ነው ያልኩት፡፡
  • ለነገሩ ከዚያ ውጪ ምን እርካታ አለ ብለው ነው?
  • ምንም ነገር የለም፡፡
  • በጣም ታላቅ ሰው ነዎት፡፡
  • በጣም አመሰግናለሁ፡፡
  • ለማንኛውም ስላሉኝ ጉዳይ በደንብ አስብበታለሁ፡፡
  • እሱ ላይ ፍጠን፤ ተረቱ እንዳይፈጸምብን፡፡
  • የቱ ተረት?
  • ሲሾም ያልበላ፣ ሲሻር ይቆጨዋል የሚለው ነዋ፡፡
  • እ…
  • ዕድል ካተጠቀምክባት ትበድልሃለች፡፡
  • አይደል?
  • እውነቴን ነው የምልህ፡፡
  • በቃ ክቡር ሚኒስትር አመሰግናለሁ፡፡
  • በል ቻው፡፡

[ክቡር ሚኒስትሩ ወደ ቤታቸው ከሾፌራቸው ጋር እያመሩ ነው፡፡ በመኪናው ውስጥ የተከፈተውን ሙዚቃ ያንጐራጉራሉ] 

  • ምን ተገኘ ክቡር ሚኒስትር?
  • ምነው?
  • በጣም ደስ ብሎዎታል፡፡
  • እንዴት ደስ አይበለኝ?
  • እኮ ምን ተገኘ?
  • አታይም እንዴ?
  • ምኑን?
  • ባቡር በል፣ ግድብ በል፣ መንገድ በል፣ ኧረ ስንቱን ልጥራ?
  • ምን ሆኑ?
  • ይህን ነገር ሁሉ ሠርተን ካልተደሰትን ሌላ በምን እንደሰት?
  • አይ የዛሬው ለየት ያለ ይመስላል፡፡
  • እንዴት?
  • ከቅድም ጀምሮ እያንጐራጐሩ ነዋ፡፡
  • እዚች አገር ላይ ያመጣነው ለውጥ እንኳን ማንጐራጐር አያስጨፍርም ወይ?
  • ለውጥ?
  • አዎና፣ ተመልከት እንጂ ዕድገቱን?
  • ዕድገቱ ግን ሁሉንም እኮ ያማከለ አይደለም፡፡
  • እንዴት ማለት?
  • ዕድገቱ የጠቀመው ከላይ ያሉትን ብቻ ነው፡፡
  • ከላይ ካልወረደ እንዴት ታች ይደርሳል?
  • አይደል?
  • ወይስ እንደ ካሮት ወደ ታች እንደግልህ?
  • አይ እንዲያው ይኼ ዕድገት ለእኛ መቼ ይደርሳል ብዬ ነው፡፡
  • አታስብ፣ እኛን ካረሰረሰ በኋላ ወደ እናንተ ይደርሳል፡፡
  • ይሁና፡፡
  • ለማንኛውም ተዘጋጅ፡፡
  • ለምኑ?
  • ለአዲሱ ሥራ፡፡
  • የምን አዲስ ሥራ?
  • አዲስ ሹመት እየመጣ ነው፡፡
  • መቼም ያኔም እኔን ይወስዱኛል?
  • ተዘጋጅ እኮ እያልኩህ ነው፡፡
  • መቼ ነው ሹመቱ?
  • ሁሉም እንቅስቃሴዬ ወደ ሹመት ነው የሚያመራኝ፡፡
  • አይደል?
  • መንገዶች ሁሉ ወደ ሮም ያመራሉ ብሏል አሪስጣጣሊስ፡፡
  • ይኼ አሪስጣጣሊስ ስለሁሉም ነገር ተናግሯል ማለት ነው?
  • ከእሱ ውጪ ማን ይላል ብለህ ነው?
  • ያው ሁሌም እሱን ስለሚጠቅሱት ብዬ ነው፡፡
  • አሁን ሌላ ነገር አትዘባርቅ፡፡
  • ይቅርታ ክቡር ሚኒስትር፡፡

[ክቡር ሚኒስትሩ ቤት ሲገቡ ባለቤታቸውን አገኙ] 

  • ሰላም ዋልክ?
  • ሁሉ ነገር ሰላም ነው፡፡
  • ምን ተገኘ ደግሞ?
  • ምን አጥቼ አውቃለሁ?
  • ዛሬ ደስ ያለህ ትመስላለህ፡፡
  • በጣም ደስ ብሎኛል፡፡
  • እኮ ምን ተገኘ?
  • ሹመት፡፡
  • ሹመት?
  • አዎን፣ ሹመት፡፡
  • እኮ የምን ሹመት?
  • አዲስ ሹመት ነዋ፡፡
  • በቃኝ አላልክም እንዴ?
  • ማን ሲበቃው አይተሻል?
  • ከራሳችሁ ፖሊሲ ጋር ይጋጫል ብዬ ነዋ፡፡
  • ከየትኛው?
  • ይኼ መነካካት ነው መተካካት ከምትሉት ጋር ነዋ፡፡
  • ይኸው ከአንድ ቦታ ወደ ሌላው እየተዘዋወርን አይደል እንዴ?
  • ቀየራችሁት ማለት ነው?
  • ምኑን?
  • ፖሊሲውን ነዋ፡፡
  • ከምን ወደ ምን?
  • ከመተካካት ወደ መዘዋወር!