ክቡር ሚኒስትር

[ክቡር ሚኒስትሩ ቢሯቸው ሆነው ዜና እየተከታሉ ነው፡፡ በአልጄዚራ የሚተላለፈውን ዘገባ ግን ማመን አቅቷቸዋል፡፡ ስልካቸውን አንስተው አማካሪያቸው ጋ ደወሉ]

 

  • ሄሎ ክቡር ሚኒስትር፡፡
  • የት ነው ያለኸው?
  • ቢሮ ነኝ፡፡
  • እያየህልኝ ነው?
  • ምኑን?
  • ዜናውን ነዋ፡፡
  • ምን ላይ?
  • አልጄዚራ ላይ፡፡
  • ኧረ ቲቪ አልከፈትኩም፡፡
  • አሁን በአፋጣኝ ቢሮ ና፡፡
  • እሺ፡፡

[አማካሪያቸው ቢሮ መጣ] 

  • ሥራህን ረሳኸው እንዴ?
  • ኧረ ሥራ እየሠራሁ ነው ክቡር ሚኒስትር፡፡
  • ታዲያ ዜናውን እንዴት አላየኸውም?
  • ያው ሥራ ላይ ስለነበርኩ ቲቪ አልከፈትኩም፡፡
  • አንተ ሥራ የለህም እያልከኝ ነው?
  • ኧረ በፍጹም፡፡
  • ሥራማ ትተሃል ማለት ነው?
  • እንዴት ክቡር ሚኒስትር?
  • መረጃ መሰብሰብ እኮ የሥራህ አንዱ ክፍል ነው፡፡
  • አውቃለሁ ክቡር ሚኒስትር ግን ሌላ አጣዳፊ ሥራ ይዤ ነው፡፡
  • በጣም እኮ ነው የሚገርመው?
  • ምን ዓይተው ነው?
  • ጉድ ሊያፈሉ ነው፡፡
  • እነማን?
  • እነዚህ አልጄዚራዎች፡፡
  • እንዴት?
  • ይኼው ሚስጥራዊ ዶክመንቶች ይፋ ሊያደርጉ ነው፡፡
  • ምን?
  • አዎን አሁን ማስታወቂያውን እያሳዩ ነበር፡፡
  • ወይ ጣጣ፡፡ የምን ዶክመንት ነው ያዩት?
  • ከእኛ የደኅንነት ቢሮ የወጣ ዶክመንት ነው፡፡
  • ዊኪሊክስ ነው እንዴ?
  • ኧረ ይኼ ሌላ ነው፡፡
  • ደግሞ ማን ነው?
  • ብቻ ከደቡብ አፍሪካ የወጣ ዶክመንት መሰለኝ፡፡
  • ሚስጥራዊ ነገር ነው?
  • ማስታወቂያው ላይ እንዳየሁት ገና ብዙ ጉድ ሊያወጡ ይችላሉ፡፡
  • ምን ተሻለ?
  • ይከሰሱ፡፡
  • እነማን?
  • አልጄዚራዎች፡፡
  • እ…
  • አዎ በቃ መክሰስ አለብን፡፡
  • የት ነው የምንከሳቸው?
  • ፍርድ ቤት ነዋ፡፡
  • የትኛው?
  • እኔ እንጃ ብቻ ይከሰሱ፡፡
  • እ…
  • እኔ እኮ የሚገርመኝ አንድ ነገር ነው፡፡
  • ምንድነው ክቡር ሚኒስትር?
  • ልክ ጠብቀው ምርጫ ሲደርስ ነገር ይፈልጉናል፡፡
  • አይደል?
  • ከኒዮሊብራሊስቶች ድሮስ ምን ይጠበቃል?
  • ምንም፡፡
  • ስለዚህ ምን ይደረግ?
  • እኛም ፍርድ ቤት ቢሆን እንክሰሳቸው፡፡
  • ይመጣሉ ብለው ነው?
  • ተወካይ የላቸውም እንዴ?
  • እዚህ ተወካይ ያላቸው አይመስለኝም፤ ቢኖራቸውም ግን…
  • እሱን ብቻ አጣራልኝ እንጂ ካላቸውማ አለቀ፡፡
  • እንዴት?
  • በቃ እስር ቤት እንወረውረዋለን ከዛ ያርፉታል፡፡
  • እንደዚያማ ማድረግ አንችልም፡፡
  • እኔ የምለው አንተም ኒዮሊብራሊስት ነህ እንዴ?
  • አይ አይደለም፡፡
  • በቃ!
  • እሺ ክቡር ሚኒስትር፡፡
  • ለመሆኑ የምን ሥራ ነው የያዝከው?
  • የምርጫ፡፡
  • እኮ የምርጫ ምን?
  • አይ ለቅስቀሳ እየተዘጋጀን ነው፡፡
  • ምን እየተሠራ ነው?
  • ያው እርስዎን ላማክርዎት አስቤ ነበር፡፡
  • እኔ እኮ የሚገርመኝ ያለኔ ሥራ አትሠራም እንዴ?
  • ያው ዳይሬክሽን እንዲሰጡኝ ብዬ ነው፡፡
  • ለነገሩ እኔም ይኼ ገብቶኝ ነው ያዘጋጀሁት፤ እንካ!
  • ምንድነው?
  • የምርጫ ቅስቀሳችን ስትራቴጂ፡፡
  • እሺ ምን ምን ታስቧል?
  • አንብበዋ?
  • እሺ፡፡
  • ጥያቄ አለህ?
  • አዎ፡፡
  • ቀጥል፡፡
  • በሞባይል ቴክስት ሜሴጅ መላክ ይላል፡፡
  • አዎን፡፡
  • ቲሸርትም እናሳትማለን?
  • እንዲቀር ፈለግክ?
  • ኧረ በፍጹም፡፡
  • ታዲያ ምንድነው?
  • ቢልቦርዶችና ፖስተሮችም እናሳትማለን፡፡
  • ችግር አለ?
  • አይ ጥያቄ አለኝ፡፡
  • እኮ ምን?
  • እነዚህን ነገሮች ለማስፈጸም ከፍተኛ በጀት ነው የሚያስፈልገን፡፡
  • ሰባት ሚሊዮን አባላት እንዳሉን አትርሳ፡፡
  • በአባላት መዋጮ ነው የሚሠራው?
  • በፍፁም፤ የአባላት መዋጮ ለሌላ ነገር ነው የሚውለው፡፡
  • ታዲያ በምንድነው የሚሠራው?
  • እኔ እኮ ትገርመኛለህ፡፡
  • እንዴት ክቡር ሚኒስትር?
  • ስንቱ አይደል እንዴ የሚለምነው?
  • ምን እያለ?
  • በልማቱ መሳተፍ እንፈልጋለን እያለ፡፡
  • እ…
  • ይህቺን አገር እኛ ከመረከባችን በፊት የነበረችበትን አስታውስ፡፡
  • እ…
  • አሁን የግሉ ዘርፍ የደረሰበትን ተመልከት፡፡
  • በእርግጥ የግል ዘርፉ አድጓል፡፡
  • አገሩ ሁሉ ባንክና የቢዝነስ ተቋም ሆኗል አይደል እንዴ?
  • ታዲያ ቢሆንስ?
  • ጠይቃቸዋ፡፡
  • ምን?
  • ለቅስቀሳው ማስፈጸሚያ በጀት፡፡
  • ምን?
  • ምን አትበለኝ፡፡ ሁሌም በልማቱ ካልተሳተፍን የሚሉት ራሳቸው ናቸው፡፡
  • ይህ እኮ ልማት አይደለም፡፡
  • ምን አልክ?
  • የምርጫ ጉዳይ ነው፡፡
  • ለሕዝቡ የሚበጀውን የምናውቀው እኛ ነን፡፡
  • ኧረ ይኼ አካሄድ አያዋጣንም ክቡር ሚኒስትር?
  • ይኼን ዲስኩርህን እዚያው አረቄ ቤት አውራ፡፡
  • እ…
  • እንዲያውም የምትጠይቀውን ዋጋ ልንገርህ፡፡
  • እሺ፡፡
  • ከፍተኛ ገንዘብ የሚያንቀሳቅሱትን አንድ አንድ ሚሊዮን ጠይቅ፡፡
  • እሺ፡፡
  • መለስተኛ ገንዘብ የሚንቀሳቀሱትን 500 ሺሕ ጠይቅ፡፡
  • እሺ፡፡
  • አነስተኛ ገንዘብ የሚንቀሳቀሱትን 100 ሺሕ ጠይቅ፡፡
  • እሺ፡፡
  • አሁኑኑ ደብዳቤው ይዘጋጅ፡፡
  • የትኛው?
  • ለድርጅቶቹ የሚጻፈው፡፡
  • ግን ክቡር ሚኒስትር…
  • ግን የሚል ነገር ከዚህ በኋላ መስማት አልፈለግም፡፡
  • እሺ ክቡር ሚኒስትር፡፡

[ክቡር ሚኒስትር ቤት ሲገቡ ባለቤታቸው ቴሌቪዥን ሲመለከቱ አገኟቸው] 

  • ምን እያየሽ ነው?
  • አልጄዚራ፡፡
  • ይኼን ቲቪ አጥፊልኝ፡፡
  • ለምን?
  • የኒዮሊብራሊስት ጣቢያ ነው፡፡
  • እ…
  • አዎን እኛን ለማጥፋት የተነሱ ናቸው፡፡
  • ኧረ ተው፡፡
  • በቃ አጥፊልኝ፡፡
  • የፕሬስ ነፃነት እያልክ ትደሰኩራለህ አይደል እንዴ?
  • እነዚህ የእኛ ጠላቶች ናቸው፡፡
  • እንዴት?
  • አስተላለፉት እንዴ?
  • ምኑን?
  • የሚስጥራዊ ዶክመንቶቹን ጉዳይ?
  • እስካሁን ምንም አላየሁም፡፡
  • ለመሆኑ ውጭ ያስቀመጥነው ገንዘብ እንዴት ነው?
  • ምን ማለት ነው እንዴት ነው?
  • በማን ስም ነው ያለው?
  • በልጃችን ስም ነዋ፡፡
  • አሜሪካ ባለችው ነው?
  • አዎን፡፡
  • ባንኩ እንዴት ነው?
  • አልገባኝም፡፡
  • መቼም መረጃ አሳልፈው አይሰጡም አይደል?
  • ምነው ፈራህ?
  • ለምን አልፈራ?
  • ተው አላልኩህም ነበር?
  • ለምንድነው የምተወው?
  • ብቻ ለእኛም እንዳትተርፍ፡፡
  • እ…
  • አሁን ከአልጄዚራ ጋር ይኼ ምን አገናኘው?
  • ሚስጥራዊ ዶክመቶችን ይፋ አደርጋለሁ እያለ ነው፡፡
  • ምን?
  • አዎን፡፡
  • ከየት የመጡ?
  • እኔም ብዙ አላውቅም፡፡
  • ፈርተህ ነው?
  • ለምን?
  • እንዳያጋልጡህ፡፡
  • ምን ብለው?
  • አባ ኮራፕት!