ክቡር ሚኒስትር

[ክቡር ሚኒስትሩ ጠዋት ቢሮ ውለው ምሳ ለመብላት ከሾፌራቸው ጋር ወደ ቤት እያመሩ ነው፡፡ በመንገዳቸው ላይም አዲስ የተመረቀውን የባቡር መንገድ እያዩ ስለነበር ከሾፌራቸው ጋር ወሬ ጀመሩ]

 

  • አየኸው?
  • ምኑን ክቡር ሚኒስትር?
  • አሁን እዚህ ጋ ምን ሌላ ነገር ይታያል?
  • አልገባኝም ክቡር ሚኒስትር?
  • አሁን ምን ይታይሃል?
  • አሮጌ ቤቶች፡፡
  • እ…
  • የተቆፋፈረ መንገድ፡፡
  • ወይኔ?
  • ትራንስፖርት አጥቶ የተሠለፈ ሕዝብ፡፡
  • እኔ ጠፋሁ?
  • ምነው ክቡር ሚኒስትር?
  • ይኼ ብቻ ነው የሚታይህ?
  • ልቀጥል ክቡር ሚኒስትር?
  • በቃህ!
  • ይቅርታ ክቡር ሚኒስትር፡፡ ምነው ተቆጡ?
  • እንዴት አልቆጣ?
  • ኧረ ምን አጠፋሁ?
  • ልማታዊ ትመስለኝ ነበር?
  • አይደለሁም እንዴ?
  • አንተማ አፍራሽ መሆንህን ዛሬ አወቅኩ፡፡
  • እንዴት አወቁ?
  • በቃ ዕይታህ አፍራሽ መሆኑ ያስታውቃል፡፡
  • ክቡር ሚኒስትር፣ ‹‹ምን ታያለህ?›› አሉኝ፡፡ እኔ ያየሁትን ነገርኩዎት፡፡ ታዲያ ምኑ ነው ጥፋቴ?
  • ዓይንህ አፍራሽ ነው ልበል?
  • ደግሞ ከሰውነት ክፍላችንም አፍራሽና ልማታዊ የሆነ አለ ማለት ነው?
  • በሚገባ እንጂ?
  • እንግዲህ ይቅርታ፡፡
  • አሁን ይኼ የባቡር ሐዲድ አይታይህም?
  • ይታየኛል እንጂ፡፡
  • ታዲያ ቀድመህ እሱን እንዴት አልጠራኸውም?
  • ለዚያ ነው አፍራሽ ነህ ያሉኝ?
  • አፍራሽ መሆንህንማ ዛሬ አወቅኩ፡፡
  • ያው ይኼ ባቡር ስላማረረኝ እኮ ነው፡፡
  • ቢያማርርህም አሁን እኮ ይኸው ተጠናቀቀ፡፡
  • እኔም መጠናቀቂያውን ቀን በጉጉት እየጠበቅኩ ነው፡፡
  • ባለፈው ተመረቀ አይደል?
  • ማለቴ ሙሉ ለሙሉ የሚያልቅበትን ጊዜ ማለቴ ነው፡፡
  • በጥቂት ወራት ይጠናቀቃል፡፡
  • እስቲ እናያለን፡፡
  • እስካሁን አላመንክም ማለት ነው?
  • ያው ረጅም ጊዜ ስላሰቃየኝ፣ የሚጠናቀቅበት ቀን ናፍቆኝ ነው፡፡
  • ስነግርህ አትሰማም እንዴ?
  • ግን እንደታሰበው የከተማዋን የትራንስፖርት ችግር ይቀርፋል?
  • ምን ጥያቄ አለው?
  • እኔንም ገላገለኛ፡፡
  • ከአሁን በኋላማ አንተም ምን እንደሚውጥህ እናያለን፡፡
  • እንዴት ክቡር ሚኒስትር?
  • የማርፈድ ሰበብህ ሊቀር ነዋ፡፡
  • ለምን ይቀራል?
  • ይኸው ባቡሩ ሥራ ሊጀምር ነዋ፡፡
  • የባቡሩ ሥራ መጀመር ቢያስደስተኝም፣ የኃይል ጉዳይ ግን አሁንም ያሳስበኛል፡፡
  • ለምን?
  • እየመጣሁ መሀል ላይ ኃይል ቢቋረጥስ?
  • ስለእሱ አታስብ፡፡
  • መቼም ተሳፋሪው ወርዶ አይገፋው?
  • መሳለቅህ ነው?
  • ኧረ በፍጹም፡፡
  • ለማንኛውም ከአሁኑ አስብበት፡፡
  • እርስዎ ግን ባቡሩን ይጠቀማሉ?
  • ማን እኔ?
  • አዎና ምን አለበት?
  • እየቀለድክ ነው?
  • ኧረ እውነቴን ነው፡፡ እንዲያውም ባለፈው ሬዲዮ ላይ ስሰማ የጉግል መሥራች ባቡር ይጠቀማሉ እኮ?
  • እነሱ ኒዮ ሊብራሊስቶች ስለሆኑ ተዋቸው፡፡
  • እ…
  • ባቡሩን የሠራነው ለሕዝቡ ነው፡፡
  • እርስዎም የሕዝቡ አካል ነዎት ብዬ ነው፡፡
  • ለእኔ ቪ8 ይበቃኛል፡፡
  • እሺ፡፡

[ክቡር ሚኒስትሩ ቤታቸው ሲደርሱ ባለቤታቸው ጋዜጣ እያነበቡ ነበር] 

  • ምን እያደረግሽ ነው?
  • ምን እያደረኩ ይመስልሃል?
  • ማለቴ ምን ዓይነት ጋዜጣ ነው የምታነቢው?
  • የአገራችንን ጋዜጣ ነዋ፡፡
  • እኮ የትኛው?
  • ይኼው፡፡
  • እኔ የምልሽ?
  • ምንድነው የምትለኝ?
  • የሚኒስትር ሚስት መሆንሽን ትረሽዋለሽ ልበል?
  • አልገባኝም?
  • ለምንድነው የግል ጋዜጣ የምታነቢው?
  • ምን?
  • ሰምተሻል፡፡
  • አንተ ግን የምር ሚኒስትር ነህ?
  • ትጠራጠሪያለሽ እንዴ?
  • አሁን ልጠራጠርህ ነው፡፡
  • ለምን?
  • እንዴት ጋዜጣ አታንብቢ ትለኛለህ?
  • እኔ የግል ነው ያልኩት?
  • ቢሆንስ?
  • እነሱ አፍራሾች ናቸዋ?
  • ተሳስተሃል፡፡
  • እንዴት?
  • እናንተው አይደላችሁ እንዴ ሚዲያው ሊያድግ ይገባል እያላችሁ ዲስኩር የምታሰሙት?
  • ሚዲያውማ ማደግ አለበት፡፡
  • እንዴት ይደግ?
  • አገር ስታድግ ሚዲያውም ያድጋል፡፡
  • ይኸው አታንብቢ እያልከኝ?
  • እኔ የመንግሥትን አንብቢ ነው ያልኩት፡፡
  • ስማ ሚዲያ አራተኛው መንግሥት መሆኑን አታውቅም?
  • ይኼ እባክሽ የኒዮ ሊብራሊስቶች አመለካከት ነው፡፡
  • አትሳሳት፣ ሚዲያ መንግሥትና ሕዝብን የሚያገናኝ ድልድይ መሆኑን አትርሳ፡፡
  • እነዚህ ግን አፍራሾች ናቸው፡፡
  • ሥራችሁን ስለሚገመግሙና ለሕዝብ ስለሚያቀርቡ ነው አይደል እንደዚህ የምትለው?
  • የምንሠራውንማ አይዘግቡም፡፡
  • እኔ ይኼን ጋዜጣ በደንብ እከታተለዋለሁ፤ እወደዋለሁም፡፡
  • እ…
  • ለምን እንደሆነ ታውቃለህ?  
  • አላውቅልሽም፡፡
  • የሠራውን ሠራ ይላል፤ ሌባውንም ያጋልጣል፡፡
  • አየሽ አመለካከትሽን በርዞታል፡፡
  • እንዴት?  
  • በቃ አፍራሽ ሆነሻል፡፡
  • ዝም ብለህ በጭፍን አትመራ፡፡
  • እ…
  • ገደል ውስጥ እንዳትገባ፡፡
  • አሁን ጭቅጭቁን ትተሽ ምሳ አስቀርቢልኝ፡፡
  • ያው ቀርቧል፡፡
  • አንቺ አትበይም?  
  • ይኸው እየበላሁ ነው፡፡
  • ምን? ጋዜጣ?  
  • የራበኝ ሆዴን ሳይሆን ጭንቅላቴን ነው፡፡
  • ዛሬ ተነስቶብሻል፡፡
  • በል ሁለታችንም እንብላ፡፡

[ክቡር ሚኒስትሩ ቢሮ ገብተው ከአማካሪያቸው ጋር ወሬ ጀመሩ] 

  • ምን ይደረግ ነው የሚሉት?  
  • እነማን ናቸው ክቡር ሚኒስትር?  
  • እነዚህ ተቃዋሚዎች ናቸው፡፡
  • ምን አሉ ክቡር ሚኒስትር?  
  • እንዴት ነው ምርጫ ቦርድ ገለልተኛ አይደለም የሚሉት?  
  • እነሱ ብቻ አይደሉም እኮ ገለልተኛ አይደለም እያሉ ያሉት፡፡
  • ደግሞ ሌላ ማን አለ?  
  • ሕዝቡም፡፡
  • እ…
  • አዎ ምርጫ ቦርድ ለእኛ የሚጠቅመውን ፓርቲ የመምረጥ ሥልጣን የለውም እያለ ነው፡፡
  • ምርጫ ቦርድ ፍጹም ገለልተኛ ነው፡፡
  • ምን አሉኝ?  
  • ገለልተኛ ነው፡፡
  • ገለልተኛም ብቻ ሳይሆን ሆደ ሰፊም ነው፡፡
  • ማለት?  
  • ይኸው እንደዚህ ሲተች ዝም ማለቱ ሆደ ሰፊነቱን በሚገባ ያሳያል፡፡
  • ታዲያ ይህ ምርጫ ቦርድ ሆደ ሰፊ ብቻ ነው መባሉ አያንሰውም?  
  • ተቃዋሚዎችማ ሌላ ነው የሚሉት፡፡
  • እንዴት?  
  • ይኸው ምርጫ ቦርድ ሆደ ሰፊ ሆኖ ብዙ ፓርቲዎችን እየዋጠ ነው ይላሉ፡፡
  • አሁን ቢከሰሱ ደግሞ ሌላ ጣጣ ነው፡፡
  • ለምን ይከሰሳሉ?  
  • እንደዚህ እየተሳደቡ?  
  • የመናገር መብት ግን ያላቸው መሰለኝ?  
  • ማን ፈቀደላቸው?  
  • ሕገ መንግሥቱ ነዋ፡፡
  • ቢፈቀድላቸውም፣ ፈር ሲለቁ ዝም ማለት የለብንም፡፡
  • ያለበለዚያማ ምኅዳሩ ይጠባል?  
  • ሲሰፋ ሊውጠን ነው ይላሉ፣ ሲጠብ ተጨነቅን ይላሉ፣ ግራ አጋቡን እኮ?
  • ትዕግሥት ይጠይቃል፡፡
  • ለመሆኑ አሁን ምን ሊያደርጉ ነው?  
  • እነማን?  
  • ምርጫ ቦርድ ዕውቅና የነሳቸው፡፡
  • አልሰሙም እንዴ?  
  • ምኑን?  
  • በሌላ ባርኔጣ መጡ እኮ? 
  • በምን ባርኔጣ?  
  • በሰማያዊ፡፡
  • ከሰማይ ነው ያልከኝ?  
  • ያው ነው በሰማይ ቀለም መጥተዋል፡፡
  • ከሰማይም ይምጡ ከምድር፣

መቼም እንደ እኛ አይሠሩም ባቡር፡፡

  • ወቸ ጉድ?