ክቡር ሚኒስትር

[ክቡር ሚኒስትሩ ቢሯቸው እንደገቡ አማካሪያቸውን አስጠሩት]

-እንኳን አደረስዎት ክቡር ሚኒስትር፡፡

-ለምኑ?

-ለአዲስ ዓመት ነዋ፡፡

-አንተ ሥራ ቀይረሃል እንዴ?

-እንዴት ክቡር ሚኒስትር?

-ከበዓሉ በፊት እንኳን አደረሰህ አልከኝ፡፡

-ለዋዜማው ነዋ፡፡

-የበዓል ቀን ቴክስት ላክልኝ፡፡

-ምን አጠፋሁ ታዲያ?

-በዓሉም አልፎ እንኳን አደረሰህ ትለኛለህ?

-የመልካም ምኞት መግለጫ ነዋ፡፡

-ምኞት ምን ያደርጋል? ዋናው ተግባር ነው፡፡

-ከእናንተ ተምሬ ነዋ፡፡

-ምኑን?

-ይኼን ባህሪ ነዋ፡፡

-እንዴት?

-እናንተ ሁሌም ትመኛላችሁ እንጂ ተግባር ላይ የት አላችሁበት?

-አልገባኝም እባክህ?

-ያው መልካም አስተዳደር ይሰፍናል፣ ሙስና ይቀረፋል ምናምን እያላችሁ ትመኛላችሁ እንጂ መቼ ትተገብሩታላችሁ?

-እ…

-ለዚያ ነው ከእናንተ ተምሬ ነው ያልኩት፡፡

-ለመሆኑ ሪፖርቶቹ የት አሉ?

-የምን ሪፖርት?

-አዲስ ሥራ የምንጀምርበት ዘመን መሰለኝ፡፡

-እ… እየተሠራ ነው፡፡

-ይህን የቤት ሥራ ከሰጠሁህ እኮ ወር ሆኖታል፡፡

-አዎ ግን ችግር አለ፡፡

-የምን ችግር?

-ሠራተኛው ይከፈለኝ እያለ ነው፡፡

-ደመወዝ መከፈል ቆሟል እንዴ?

-አይ ደመወዝ አይደለም፡፡

-ታዲያ ምንድነው?

-የውሎ አበል፡፡

-የምን የውሎ አበል?

-ክቡር ሚኒስትር የአንዳንድ ዲፓርትመንት ሠራተኞች የውሎ አበል ይከፈላቸዋል፡፡

-በምን ስሌት?

-በርካታ እንግዶችን ስለሚያስተናግዱ ተብሎ፡፡

-ደመወዝ ይከፈላቸዋል አይደል እንዴ?

-እንደውም በወር የሚያገኙት የውሎ አበል ክፍያ ከደመወዛቸው ጋር ሲነፃፀር የትዬለሌ ነው፡፡

-ጭራሽ?

-አዎን ክቡር ሚኒስትር፡፡

-ምን ተሻለ?

-የሚሻለውማ ለሌሎቹም መክፈል ነው፡፡

-ምንድነው የሚከፈለው?

-የውሎ አበሉ ነዋ፡፡

-እሱ ነው የአንተ ምክር?

-ከልጅ ልጅ ቢቆዩ ዓመትም አይቆዩ አይደል የሚባለው፡፡

-ዓመት አትቆይም እያልከኝ ነው?

-ያው ሹም ሽር ደርሷል ብዬ ነው፡፡

-ቢደርስስ?

-ወጥ የሆነ አሠራር ያስፈልጋላ፡፡

-አሁን ለሌላው ሠራተኛ አስበህ ነው ወይስ ለራስህ አስበህ ነው?

-እኔስ ብሆን ልጅዎት አይደለሁም?

-ስለዚህ የሪፖርቱ አለመቅረብ ዋናው ምክንያት ይኼ ነው እያልከኝ ነው?

-አዎን ክቡር ሚኒስትር፡፡

-በል በአፋጣኝ ሠራተኛውን ስብሰባ ጥራልኝ፡፡

[ክቡር ሚኒስትሩ ጸሐፊያቸውን አስጠሯት]

-ሪፖርቱን ምን አደረስሽው?

-የቱን ሪፖርት?

-ባለፈው ሳምንት ያዘዝኩሽን?

-እየሠራሁት ነው ክቡር ሚኒስትር፡፡

-እስካሁን አላለቀም?

-የሚመለከታቸው ሠራተኞች በሚገባ ስለማይተባበሩኝ ነዋ፡፡

-ለምን?

-የውሎ አበል ጉዳዩ ነዋ፡፡

-ወይ ይኼ የውሎ አበል ነገር፤ ደመወዝ ይከፈላችኋል አይደል እንዴ?

-ማን በደመወዙ ይኖራል?

-ታዲያ በምንድነው የሚኖረው?

-በደመ - አበሉ ነዋ፡፡

-ማን ነው የፈቀደላቸው ለመሆኑ?

-የክፍሉ ኃላፊዎች ናቸዋ፡፡

-እኔ ሳላውቅ?

-ክቡር ሚኒስትር የኑሮ ውድነቱ እኮ አይቻልም፡፡

-ስለዚህ መፍትሔው አበል ነው?

-ሌላ መፍትሔም አለ፡፡

-ምንድነው እሱ?

-የኑሮ ውድነቱን መቆጣጠር፡፡

-እኔ እናንተን ራሱ መቆጣጠር አቅቶኛል፡፡

-መጀመሪያ ራስዎትን ይቆጣጠሩ፡፡

-ምን አልሽ?

-አይናደዱ ማለቴ ነው፡፡

[የክቡር ሚኒስትሩ ጓደኛ ሚኒስትር ደወሉ]

-በዓል እንዴት አለፈ ክቡር ሚኒስትር?

-ድግሱ እንዴት አለፈ ማለትህ ነው?

-ለመሆኑ እየተዘጋጁ ነው?

-ለምኑ?

-ለደስታ ወይም ለሐዘን፡፡

-የምን ደስታና ሐዘን ነው?

-ወቅቱን ረሱት እንዴ?

-እኮ ምንድነው?

-ያው በዘመኑ መጀመሪያ ላይ በዓላት አሉ ከዚያም የእኛ ዋናው በዓል አለ፡፡

-የትኛው በዓል?

-ሹም ሽሩ ነዋ፡፡

-እ…

-ለማንኛውም አንድ ኮሚቴ ተቋቁሟል፡፡

-የምን ኮሚቴ?

-ተሿሚዎችን የሚመለምል፡፡

-እኔ የሌለሁበት?

-አዎን ክቡር ሚኒስትር፡፡

-እ…

-አሁን የደወልኩት ሰው እንዲጠቁሙኝ ነው፡፡

-የምን ሰው?

-ሊሾም ይገባዋል የሚሉትን ነዋ፡፡

-ከየት?

-ከእርስዎ መሥሪያ ቤት፡፡

-አንድ ሰው ነው ልጠቁምህ የምችለው፡፡

-ማን ነው እሱ?

-እኔው ነኝ፡፡

-የእርስዎ አማካሪ እንዴት ነው?

-ስለእሱ ምን እንደማስብ ታውቃለህ?

-ምንድነው የሚያስቡት?

-አህያ ታውቃለህ አህያ ነው፡፡

-አህያ የሚያማክረው እኮ አህያን ብቻ ነው፡፡

-እየሰደብከኝ ነው?

-ራስዎትን እየሰደቡ ነው እንጂ፡፡

-ለመሆኑ ምንድነው መሥፈርቱ?

-ብሔርንና ጾታን ያማከለ መሆን አለበት፡፡

-ሌላስ?

-የትምህርትና የሥራ ብቃቱ እንደተረጋገጠ ሆኖ ማለት ነው፡፡

-በቃ?

-ከዚህ በላይ ምን እንፈልጋለን?

-የፓርቲ ታማኝነትስ?

-ክቡር ሚኒስትር ከፓርቲ በፊት ያለው እኮ አገር ነው፡፡

-እ…

-ፖለቲካና ፓርቲ የሚኖረው ቅድሚያ አገር ስትኖር ነው፡፡

-እሱማ ልክ ነው፡፡

-ስለዚህ ብቃት ያላቸው ሰዎች አገሪቷን ማገልገል ከፈለጉ ቦታ ሊያገኙ ይገባል፡፡

-ለፓርቲው ታማኝ ባይሆኑም?

-ለአገርና ለሕዝብ ታማኝ ከሆኑ ይበቃል፡፡

-እና እኛን አሽቀንጥራችሁ ልትጥሉን ነው ማለት ነው?

-እሱ ወደፊት የሚታይ ጉዳይ ነው፡፡

-ይህ ጉዳይ እኮ እንቅልፍ የሚነሳኝ ነው፡፡

-ለእዚህ ነው እኮ ዕረፍት የሚያስፈልግዎት፡፡

-የምን ዕረፍት?

-መተኛት አለብዎት፤ በቂ ዕረፍት ማግኘት አለብዎት፡፡

-የዓመት ዕረፍት ልውሰድ ታዲያ?

-ሌላ ዕረፍት ቢወስዱ አይሻልም?

-ሌላ ምን ዕረፍት?

-ከሥልጣን ዕረፍት ቢወስዱስ!

[ክቡር ሚኒስትሩ ከሾፌራቸው ጋር ወደ ቤት እየሄዱ ነው]

-ክቡር ሚኒስትር በጣም ነው የገረመኝ፡፡

-ምኑ ነው የገረመህ?

-በኤርትራ ያሉት ተቃዋሚዎች ጉዳይ፡፡

-እኮ ምኑ ገረመህ?

-መጣላታቸው ነዋ፡፡

-መቼ ተስማምተው ያውቃሉ?

-ደግሞ ከመንግሥት ጋር ለዓመት ያህል ይገናኙ ነበር፡፡

-መረጃ ያቀብሉን ነበር፡፡

-መንግሥት ግን የሚገርም የስለላ አቅም ነው ያለው፡፡

-ይህ እኮ የተካንበት ነው፡፡

-ሌላ ግን ያሳዘነኝ ነገር አለ፡፡

-ምንድነው ያሳዘነህ?

-ከኤርትራ ተገንጥለው የመጡት ተቃዋሚዎች በአንዴ ጀግና ሆኑ፡፡

-ታዲያ ምኑ ነው የሚያሳዝንህ?

-እነሱ ጀግና መሆናቸው ነዋ፡፡

-ምን ችግር አለው?

-ስንቱ እዚህ ለአገሩ እየለፋ ዞር ብሎ የሚያየው የለም፣ እነሱ አገር ሲወጉ ቆይተው ሲመለሱ በአንዴ ጀግና ሆኑ፡፡

-ከጥፋታቸው ስለተመለሱ ነው ጀግና የሆኑት፡፡

-አጥፍተው የማያውቁ ጀግና አይባሉም እንዴ?

-መጽሐፍ ቅዱስ የምታነብ መስሎኝ?

-እንዴት?

-ጌታ እኮ ዘጠና ዘጠኙ በጐቹን ትቶ የጠፋበትን አንድ በግ ሊፈልግ እንደሄደ እንዳትረሳ፡፡

-ስለዚህ?

-እኛም 99 ሚሊዮኑን ሕዝብ ትተን የጠፉትን ልንፈልግ ሄድና፡፡

-ስለዚህ የጠፋው ልጅ ታሪክ ሊደገም ነዋ፡፡

-የትኛው?

-ጠፍቶ የነበረው ልጅ ሲገኝ እኮ ታላቅ ድግስ ተደርጎለታል፡፡

-እናስ?

-ስለዚህ እኛ ተስፋ የለንማ?

-ለምኑ?

-ለ40/60 ነዋ፡፡

-የምን 40/60 አመጣህ?

-ያው የጠፉት በጐች ስለተመለሱ ለእነሱ ማበረታቻ ይሰጣቸዋል ብዬ ነዋ፡፡

-ጥሩ ሐሳብ አመጣህልኝ፡፡

-እና እኔ ጀግና ለመባል ምን ላድርግ?

-ጀግንነት የሚጠይቀውን ማድረግ ነዋ፡፡

-ኤርትራ ደርሶ መምጣት ነው?

-ሞክረው እስቲ?

-ባለፈው እንዲሁ ስታስገርሙኝ ነበር፡፡

-በምኑ?

-ለዳያስፖራው እንደዚያ ስታሸረግዱ፡፡

-እንዴት?

-አገር ውስጥ ያሉ ጀግኖች ይወደሱ፡፡

-እነሱም ይወሰዳሉ፡፡

-ለመሆኑ ክቡር ሚኒስትር…

-ለመሆኑ ምን?

-ኤርትራ የቀሩት በአሥር ሺሕ የሚቆጠሩ ናቸው ይባላል፡፡

-ይህ የፕሮፓጋንዳ ሥራ ነው፡፡

-እንዴት?

-የቀሩት ጥቂቶች ናቸው፡፡

-ማናቸው የቀሩት?

-በሽተኞች፣ አቅመ ደካሞችና የኪነት አባላት ናቸው፡፡

-ስለዚህ ከኪነት አባላቱ እንጠብቃ፡፡

-ምን?

-ነጠላ ዜማ!