እባብ ሲነድፍ ሊደረጉ የሚገቡ ጥንቃቄዎች

አብዛኞቹ እባቦች መርዝ የሌላቸውና ካልተተናኮሉዋቸው የማይናደፉ ቢሆንም፣ በነደፉበት ጊዜ ለሚወሰዱ እርምጃዎች ጥንቃቄ መደረግ አለበት፡፡

በካሮላይን መመረዝን የመከላከል ማዕከል እንደሚለው፣ መርዛማ በሆኑ እባቦች የተነደፈ ሰው የነደፈውን እባብ ለመምታትና ለመግደል ከመሯሯጥ ይልቅ፣ ለተነደፈው ሰውነቱ ቅድሚያ ሰጥቶ ወደ ሕክምና መሄድ አለበት፡፡ ኢትዮጵያን ጨምሮ በተለያዩ የዓለም አገሮች እባብ በነደፈ ጊዜ የሚደረጉ የተለያዩ ባህላዊ ሕክምናዎች አሉ፡፡ በእባብ የተነደፈ ሰውም በባህላዊ ሕክምናዎቹ ሲድን ይስተዋላል፡፡ ወደ ሕክምና ጣቢያ የመውሰድ ልምድም አለ፡፡

ማዕከሉ እንደሚለው፣ በእባብ የተነደፈ ሰው መጀመሪያ ማድረግ ያለበት ተረጋግቶ መቀመጥ ነው፡፡ የተነደፈውን ቦታ በሞቀ ውኃና ሳሙና መታጠብ፣ ከተነደፈው አካል አካባቢ ቀለበት ወይም እግር ላይ የተደረገ አልቦም ሆነ ጥብቅ ያለ ልብስ ማውለቅ፣ የሚቻል ከሆነ የተነደፈውን የሰውነት ክፍል ልብ ድረስ ከፍ በማድረግ ወደ ሕክምና መውሰድ ነው፡፡

ማዕከሉ መደረግ የለባቸውም ያለውንም ዘርዝሯል፡፡ መርዙን ለማውጣት ብሎ የተነደፈውን አካባቢ መቁረጥ፣ በረዶ ማድረግ፣ መርዙን ለማውጣት በመምጠጫ መጠቀም እንዲሁም መርዙ እንዳይሰራጭ በሚል የተነደፈበትን ሥፍራ ጥርቅም አድርጐ ማሰር በሳይንሳዊው መንገድ አይመከርም፡፡