በቻይና ሠራተኞችና ተማሪዎች ረመዳንን እንዳይጾሙ ተከለከለ

በርካታ ሙስሊሞች በሚገኙበት ሰሜን ምዕራብ ቻይና ሙስሉም ተማሪዎች፣ መምህራንና ሌሎች የመንግሥት ሠራተኞች ረመዳንን እንዳይጾሙ መንግሥት መከልከሉን ዘ ኢንዲፔንደንት ዘግቧል፡፡ የክልሉ መንግሥት ይህን ያደረገው ጾሙ የቤጂንግ የአመራር ብቃት ላይ አሉታዊ ተፅዕኖ ያሳድራል በማለት እንደሆነ ዘገባው ያመለክታል፡፡ ዚንጂያንግ በተባለውና ሙስሊሞች 58 በመቶ ይሆናሉ በሚባልበት ግዛት ሬስቶራንቶች መደበኛ የሥራ ሰዓታቸውን ጠብቀው ክፍት እንዲሆኑ ታዝዘዋል፡፡ ይህ የመንግሥት ትዕዛዝ የወጣበት ድረ ገጽ ላይ ‹‹የፓርቲ አባላት፣ ካድሬዎች፣ የመንግሥት ሠራተኞች፣ ተማሪዎችና ሕፃናት ረመዳንን መጾም የለባቸውም በሃይማኖታዊ ሁነቶችም ሊሳተፉ አይገባም›› የሚል ማስጠንቀቂያ ሠፍሯል፡፡ በረመዳን የጾም ወር ምግብና መጠጥ የሚያቀርቡ ቢዝነሶች መዘጋት እንደሌለባቸውም ጽሑፉ አሳስቧል፡፡ በግዛቶቹ የክልሉ መንግሥት ይህንን ክልከላ ቢያስቀምጥም የአገሪቱ መንግሥት በእስልምና ሃይማኖት ጣልቃ እንደማይገባ በግልጽ አስፍሯል፡፡

************************

በጃፓን ጫካ የተተወው ሕፃን ተረፈ

ለቀናት በጃፓን ጫካ የተተወውና ያማቶ የተባለው ሕፃን በመጨረሻ በደህና መገኘቱ ተዓምር መሆኑ እየተዘገበ ነው፡፡ ከሞላ ጐደል ድብ በብዛት ይገኝበታል በሚባለው ጫካ ሳምንት የቆየው ሕፃን በመጨረሻ በወታደሮች ሲገኝ እያለቀሰም ምንም ዓይነት ፍርኃት ውስጥም እንዳልነበር ዘገባዎች ያመለክታሉ፡፡ ሕፃኑ በመጀመሪያ ካገኘው ወታደር ለቀረበለት ጥያቄም ይመልስ የነበረው በመረጋጋት ነው፡፡ ሕፃኑ ሊጠፋ የቻለው ከወላጆቹ ጋር በጫካው በኩል በመኪና ሲያልፍ ነው፡፡ የሰባት ዓመቱ የማቶ ታኖካ የጠፋው ግን ከቤተሰብ አምልጦ ወይም በሌላ ምክንያት ሳይሆን ጥፋት አጥፍተሀል ተብሎ እንደ ቅጣት ከመኪና እንዲወርድ በወላጆቹ በመታዘዙ ነበር፡፡ ልጃቸውን በዚያ መልኩ ለመቅጣት የሞከሩት ወላጆች ግን ወዲያው ጉዳዩ እውን ነው ቅዥት በማለት ከፍተኛ ፍርኃት ውስጥ ገቡ፡፡ ከዚያም በጫካው አቅራቢያ የነበረ እዝ ወታደሮች በየአቅጣጫው በጫካው ውስጥ ሕፃኑን መፈለግ ጀመሩ፡፡ የወላጆቹ የቅጣት መንገድ ብዙዎችን አነጋግሮ ነበር፡፡ ምግብና ውኃ ያልነበረው ሕፃን ወላጆቹም እንደተውት በማመን አምስት ኪሎ ሜትር ርቀት በእግሩ ተጉዟል፡፡ በመጨረሻ ሲገኝ ግን ከመጫጫር ውጭ ምንም ዓይነት አካላዊ ጉዳት፤ የጤና እንከንም ሳያገኘው ነበር፡፡  

************************

‹‹ዝናብ ታቆማለህ ዝናብ ታዘንባለህ››

ሐቻምና (2006 ዓ.ም.) ወጣቱ ባለቅኔ ኤፍሬም ሥዩም ተሰማ ከቀደምት የኢትዮጵያ ነገሥታት እና ሊቃውንት የተወጣጡትን የግእዝ ቅኔያት አዛምዶና አፍታቶ አንድም እያለ የተረጐመበት መጽሐፉን ማውጣቱ ይታወቃል፡፡ ‹‹ተዋነይ ብሉይ የግዕዝ ቅኔያት ፍልስፍና›› በማለት በሰየመው መጽሐፉ ፵፱ኛው (49ነኛው) ደጃፍ፣ የሊቀ አእላፍ ልብሰ ወርቅ አየለ ዘደብረ መዊእ ባለ ሁለት መስመር (ስንኝ) ዕዝል ጉባኤ ቃና ‹‹ጽድቅ ውእቱ አውርዶ ወአቅሞ ዝናም በዕፅ

     በተኪለ ዕፀው ይመልዕ አኮኑ ዘዝናመ ሰማይ ሕፀፅ፡፡››

እንዲህ አፍታትቶ ተርጒሞታል፡፡

አንደኛው

‹‹በዕፅ ተጠቅሜ

እንጨት በጄ ይዤ

ዝናም አወርዳለሁ››

ዝናም አቆማለሁ አለና ነገረው፡፡

ሁለተኛው

ሐሰት ነው አልልም

ዝናብ ታቆማለህ

ዝናብ ታዘንባለህ

ዕፀዋትን ይዘህ ጥበብህ እውነት ነው፡፡

ምክንያቱም

ጥንትም ቢሆን ሰማይ ዝናብ የሚሰጠው

ከመሬት መዳፍ ላይ እንጨት ሲያይ ብቻ ነው፡፡

**********************

የወቅቱ እንቆቅልሽ

በልዊስ ካሮል ‹‹Alice in Wonderland›› በሚለው መጽሐፍ ውስጥ፣ አሊስ ከአንድ ባርኔጣ አምርቶ ከሚሸጥ የተጃጃለ እብድ ጋር ሐሳብ በማንሳት ሲከራከሩ ይታያል፡፡

አሊስ ‹‹አንድ ነገር በዚህ መልኩ ማመን አይገባህም በፍጹም የሚቻል ነገር አይደለም፡፡›› ብላ አስተያየት ስትሰጠው፡፡ ይህ ባርኔጣ አምራች ወፈፌ በኩራትና በመጀነን፤ ‹‹ከንቱ የሆንሽ ነገር!›› እኔ ሁሌም ጧት ጧት ቁርስ ከመብላቴ በፊት ቢያንስ ሁለት የማይቻሉ እምነቶች በማዳበር ለውጤት በማብቃት ልምድ አካብቻለሁ›› በማለት መልስ ስጣት፡፡

አብዛኛው አካባቢያችንና ዓለም በጠቅላላው ማለት ይቻላል የውስጥ ጥቅም ማስጠበቅን፣ ጉጉትንና መሃይምነትን አንድ ላይ ተቆራኝተው በሕዝቡ ላይ በመስፈን የዚህ ዓይነቱን የማይቻል አዋጅ ሲያስነግሩ ይደመጣል፡፡ የማይቻለው ይቻላል የማይሆነው ይሆናል ሲሉም ይታያል፡፡

*************

ፀጉራሙ ባለ መንጃ ፈቃድ

          ወጣቱ የመንጃ ፈቃድ ስላወጣ መኪናቸውን መጠቀም ይችል እንደሆነ ካህን አባቱን ጠየቃቸው፡፡ “አባቱም የትምህርት ውጤትህን ካሻሻልህ፣ መጽሐፍ ቅዱስህን ካጠናህ ፀጉርህን ከተስተካከልክ በጉዳዩ ላይ ልንገጋገር እንችላለን” አሉት፡፡

          ልጅየው ከወር በኋላ ነገሮችን አስተካክሎ መኪናቸውን መጠቀም ይችል እንደሆነ በድጋሚ ጠያቃቸው፡፡

          ውጤትህ ተሻሽሏል መጽሐፍ ቅዱስህንም በትጋት አጥንተሃል፡፡ ሆኖም ፀጉርህን አልተቆረጥክም አሉት፡፡

‹‹አባዬ፣ ስለዚህ ጉዳይ ብዙ ሳስብ ነበረ፡፡ የሳምሶን ፀጉር ረጅም አልነበረምን? ሙሴና ኖህ እንዲሁም ኢየሱስ ረጅም ፀጉር አይደል የነበራቸው?››

‹‹እዚህ ላይ እውነት አለህ፣ ልጄ አሉ አባቱ ‹‹ነገር ግን እነዚህ የጠቀስካቸው ሁሉ የሚጓዙት በእግራቸው ነበር፡፡››
                         - አረፋዓይኔ ሐጐስ ‹‹የስኮትላንዳውያን ቀልዶች›› (2005)