ሚኒስቴሩ ማኅበሩን ለማስተዳደር አልተረከበም

የሳይንስና ቴክኖሎጂ ሚኒስቴር በቅርቡ የእንጦጦ ኦብዘርቫቶሪና ምርምር ማዕከል በሥሩ ለማስተዳደር መረከቡ ይታወሳል፡፡ ሆኖም ሚዲያዎች ሚኒስቴር መሥሪያ ቤቱ የተረከበው የስፔስ ሳይንስ ሶሳይቲን እንደሆነ እየዘገቡ ይገኛሉ፡፡ ይህ ትክክለኛ መረጃ ላይ የተመረኮዘ ዘገባ ባለመሆኑ ማስተካከያ እንዲደረግበት ይህንን ደብዳቤ ጽፈናል፡፡

የስፔስ ሳይንስ ሶሳይቲ የሚኒስቴር መሥሪያ ቤቱ አንዱ የሕዝብ ክንፍ ሲሆን፣ ራሱን የቻለ ማኅበር መሆኑም ይታወቃል፡፡ በመሆኑም የሳይንስና ቴክኖሎጂ ሚኒስቴር የእንጦጦ ኦብዞርቫቶሪና ምርምር ተቋምን መረከቡ ብሎም በተቋሙ ደረጃ ለማቋቋም አንዳንድ ሥራዎችን እየሠራ መሆኑ ታሳቢ ተደርጎ መረጃዎቹ እንዲስተካከሉ ያስታውቃል፡፡

(በኢትዮጵያ ፌዴራላዊ ዴሞክራሲያዊ ሪፐብሊክ የሳይንስና ቴክኖሎጂ ሚኒስቴር)

********

ገዥው ፓርቲ ሌቦችን ከጉያው ያውጣ

ገዥው የኢሕአዴግ ፓርቲ በ25 ዓመታት የአገዛዝ ዘመኑ ያጠፋው ብዙ ነገር እንዳለ ሁሉ መልካም ሥራዎችም እንዳከናወነ ግልጽ ነው፡፡

በዚህች አገር በአደባባይ ሐሳብን መግለጽ ቀርቶ ጨለማን ተገን በማድረግ ወረቀት በትናችኋል እየተባሉ ያለፍርድ የተገደሉና በጥርጣሬ ተይዘው የታሰሩ ስንቱ እንደሆኑ የቅርብ ጊዜ ትዝታ ነው፡፡ ስለዚህ ህሊናችን እያወቀው የሐሳብ ነፃነት የለም ብንል ራሳችንን ከማታለል በስተቀር ትዝብት ላይም ሊጥለን ይችላል፡፡

ይህም ሆኖ ገዥው ፓርቲ ድክመቶችም አሉበት፡፡ በሥልጣን ዘመኑ በሙስናና በሌብነት የተጨማለቀው፣ ዕውቀት የሌለው ስግብግብና ሌላውን ከአንዱ ቦታ ሌላ በመቀየር ወደ ሕግ ከማቅረብ ይልቅ ራሱ ኢሕአዴግ እየሾመ የሰረቃችሁት ትንሽ ስለሆነ ወደ ሌላ ወደ ማትታወቁበት ሄዳችሁ በደንብ ስረቁ የሚል እስኪመስል ድረስ እንዲህ ያሉትን ሲሾም የነበረ ድርጅት ነው፡፡

እነዚህ በኢሕአዴግ የተሾሙ ሌቦች የከተማውን ሕዝብ በልማት ሰበብ ሲያፈናቅሉ፣ ከተማው ባለቤት የሌለው ይመስል በልማት ቋንቋ መሬት ሲቸበችቡ ሃይ የሚላቸው ጠፍቶ ለራሱ ኢሕአዴግ ፈርጥመውበት ከአቅሙ በላይ ሆነዋል፡፡ ራሱ ኢሕአዴግ ትናንት ፍትሕ አጣን ብሎ ሲጮህ የነበረ ሕዝብን መልሶ ድረስልኝ ማለት ጀመረ፡፡

ዛሬ የሚሰማው የኢሕአዴግ ጩኸት ባለሥልጣኖች የሕግ ሳጥን ውስጥ ላለመግባት የሚያሰሙት ጩኸት እንጂ መልካም አስተዳደርና የሕዝብ መሬት የሸጡ ሌቦችን በቁርጠኝነት ለመፋረድ ሳይሆን፣ እየገፋ የመጣውንና በአዲስ አበባ ዙሪያና በአንዳንድ ከተሞች የተነሳውን አመፅ በዚህ ለማስቀየርና ለማስተንፈስ የተደረገ የሞኞች ጨዋታ አስመስሎታል፡፡

ገዥው ፓርቲ ውስጥ ከፍተኛ ባለሥልጣኖች ምንም ሀብት በራሳቸው ሆነ በቤተሰቦቻቸው ያልዘረፉ ጨዋዎች እንዳሉ ሕዝብ ያውቃል፡፡ ነገር ግን ዙሪያቸውን በሌቦች የተከበቡ መሆናቸውንም ሕዝቡ ያውቃል፡፡ በተሰጣቸው ሥልጣን ተመክተው ውሎና አዳራቸው ለሕዝብና ለአገር ፍቅር ከሌላቸው ኮንትሮባንዲስቶችና ደላሎች ጋር የሆኑ ተመሳጥረው ሕንፃ እየገነቡ የንግድ መኪና በሚስቶቻቸው፣ በልጆቻቸውና በዘመዶቻቸው እያስገቡ፣ የሚነግዱ የመሬት ደላላ ባለሥልጣኖች ሞልተዋል፡፡ ፓርቲው በቁርጠኝነት እንደትጥቅ ትግሉ ወቅት መስዕዋትነት ከፍሎ ለሕግ ካላቀረባቸው አደጋው ለሁሉም ነው፡፡

እነዚህ በኢሕአዴግ ውስጥ የመሸጉ ሌቦችና የእነሱ የጥቅም ተካፋዮች በውጭ ሆነው ደላላና አጫፋሪዎች በንግድ ስም በእልፎች መስዕዋትነት የተገኘውን ዴሞክራሲ ከገዥው ፓርቲ ለመንጠቅ፣ ፓርላማውንና መንግሥትን ለማፍረስ ሕዝብን በማስጮህ የሚደረግ ሩጫ ገዥው ፓርቲ ነቅቶ በመጠበቅ ጉሮሮውን እንደነብር አላቀው ከመጣላቸው በፊት ቀድሞ ሊጥላችው ይገባል፡፡

ጠቅላይ ሚኒስትር ኃይለ ማርያም ደሳለኝ እነዚህን ሌቦች በጥርሳችንም በጥፍራችን ማድማት አለብን ማለት ብቻም ሳይሆን እጃቸው ቆርጠው ሲጥሉም ሊታይ ይገባል፡፡ እነዚህ በገዥው ፓርቲ መዋቅር ውስጥ የሸመቁ ሌቦች፣ ሕዝብ እየተራበና በየጎዳናው ያለመጠለያ በሚወድቅበት አገር ውስጥ ሆነው የተንጣለለ ሕንፃ በመሥራትና ከፍተኛ ዋጋ ያለው መኪና በማሽከርከር በሰረቁት ሀብት ሳያፍሩ ይኖራሉ፡፡ በቅርብ ጊዜ በአዲስ አበባ ዙሪያና በኦሮሚያ አካባቢ ለተፈጠረው ችግር በኢሕአዴግ አጋር ድርጅቶች  ውስጥ በጉቦና ሌብነት ሀብት ማካበታቸው ሳያንስ ፍትሕን በማዛባታቸው ሕዝቡ ለሕዝባዊ አመፅ ሊነሳ ችሏል፡፡

ገዥው ፓርቲ የተነሳለትን የመልካም አስተዳደር ግብ ሊመታ የሚችለው ከጠቅላይ ሚኒስትሩ ጀምሮ እስከታች ሹመኞች ያላቸውን የሀብት መጠን ለሕዝብ አሳውቀው፣ ሕዝብም አስተያየት ሲሰጥበት ያኔ የተጀመረው የመልካም አስተዳደርና ሌቦችን የማጥራት ዕርምጃ እውነተኛና ትክክለኛ ሊባል ይችላል፡፡

ሰሞኑን ያየነው ድራማ ግን የሕዝብን ሀብትና መሬት የዘረፉትን አንድ ቀንና ሁለት ቀን አስሮ መልቀቅ ነው፡፡ የመልካም አስተዳደር ጥያቄና የመንግሥት ኡኡታ ሌቦችን ለመቅጣት ሳይሆን በተለያዩ አካባቢዎች የተነሱትን ተቃውሞዎች አቅጣጫ ለማስቀየር የተደረገ ይመስላል፡፡ ይህ የኢሕአዴግ አቅጣጫ የማስቀየር ዘዴ ፋሽኑ ያለፈበት የሞኞች ብልጠት ነው፡፡ እንዲህ ዓይነቱ የኢሕአዴግ ጨዋታ ዛሬ ሊቆም ይገባዋል፡፡

ጨርቅ የሰረቀ ተራ ሌባ ላይ ፖሊስ ምርመራዬን አልጨረስኩም እያለ ከ21 ቀን በላይ ፍርድ ቤት ቀጠሮ ሲጠይቅበት በሚኖርበት አገር፣ የሕዝብ ሀብትና መሬት የቸበቸቡትን በሁለት ቀን አስሮ መልቀቁ ኢሕአዴግን አወዳደቅ እያሳመረና ታማኝነቱን እያሳጣው ይገኛል፡፡

ይህ ድርጊት ከኢሕአዴግ ተቀላቅለው ለደርግ ነፍሰ ገዳዮች ጀርባቸውን ሳይሰጡ በመንገድ የቀሩት አያሌ አርበኞች ከሞቱበት ተነስተው ቢያዩ፣ ከደርግ ሳይሆን ከኢሕአዴግ ጋር እንደሚዋጉ አልጠራጠርም፡፡

በደርግ ዘመን በደርግ ውስጥ ከፍተኛ ባለሥልጣንና ጄኔራል የነበሩ የ12 ብር የቀበሌ ቤት ተከራይተው የነበሩበት ጊዜ ተለውጦ ዛሬ መጠየቅ፣ መከሰስ መኖሩን ባውቅ ኑሮ ደርግ የለጠፈልኝን ኮከብ ጥዬ ህሊናዬ ሳይወቅሰኝ በሰላም ከሕዝብ ጋር በኖርኩ ነበር ያሉት አባባል ቦታ ይሰጠዋል፡፡ በኢሕአዴግ ውስጥም እጃቸው ያልተልከሰከሰ ብዙዎች አሉ፡፡ እነዚህ አጠገባቸው ያሉትን ሌቦች ከሕዝብ ጋር ሆነው ሊታገሏቸው ይገባል፡፡ አለበለዚያ ግን የማያምር ውጤት ይመጣና ሁላችንም ይቆጨናል፡፡ በደርግ ዘመን የሰሜን ሸዋ የኢሠፓ ተጠሪ የነገሩኝን እዚህ ጋ ለመጥቀስ እሞክራለሁ፡፡

ኢሕአዴግ ከሰሜን ጫፍ ተነስቶ ሰሜን ሸዋ በገባ ጊዜ የኢሠፓ ካድሬዎችና ሹመኞች ሕዝብን በመበደል ይታወቁ ስለነበር ሕዝቡ ለኢሕአዴግ ወሬ ከማቀበል አልፎ እስከመቀላቀል ደርሶ ነበር፡፡

 የጦር ኃይሎች አዛዥና ፕሬዚዳንት መንግሥቱ ኃይለ ማርያም ከደኅንነቱ ኃላፊ ተስፋዬ ወልደ ሥላሴ ጋር መጥተው ሲያነጋግሩኝ፣ ‹‹ክብር ፕሬዚዳንት መንግሥቱ ወያኔና ሻዕቢያ ከሰሜን ጫፍ ተነስተው ማዕከላዊ መንግሥታት ከተቀመጡበት ቦታ በ130 ኪሎ ሜትር ርቀት ላይ ውጊያ እየተካሄደ ነው፡፡ እርሶ ስለ ኤርትራ ሲጨነቁ በእርሶ የሚሰበሰበው ፓርላማና ድርጅት ሊፈርስ ነው፡፡ ፓርላማውና ድርጅትዎ ከፈረሰ ኤርትራ በነፃ ትሄዳለች፤›› ስላቸው፣ ስድብና ማስፈራራት ነው የደረሰብኝ ብለው የነገሩኝ ትዝ ይለኛል፡፡

ዛሬም በጠቅላይ ሚኒስትሩ የሚመራው የሚኒስትሮች ምክር ቤትና የሕዝብ እንደራሴዎች ነቅተው ካልጠበቁ፣ አጠገባቸው ያሉትን ሌቦች መንጥረው ካላወጡ ደርግ ላይ የደረሰው ዕጣ የማይደርስበት ምክንያት አይኖርም፡፡ ስለዚህ የገዥው ፓርቲ ሹመኞች የሀብት ዝርዝራቸው ለሕዝብ ሊገለጽ ይገባል፡፡

የሕዝብን ሀብት የዘረፉ ውሳኔ እስከሚያገኙ ድረስ በሕግ ጥላ ሥር ሆነው ጉዳያቸው ሊታይ ሲገባ እነሱን ለቆ ፍትሐዊ ዳኝነት ይገኛል ማለት አመኔታ ስለሌለው፣ ገዥው ፓርቲ በዚህ ጉዳይ ላይ ሊመክርበትና ሊያስብበት ይገባል ስል ጽሑፌን አጠቃልላለሁ፡፡

(ተወዳጅ አንበርብር፣ ከአዲስ አበባ)

*******

ለ40/60 ቤቶች ዶላር ብቻ አምጡ መባላችን ይቅር

መንግሥት የኅብረተሰቡን የቤት ችግር ለመቅረፍ ብዛት ያላቸውን ቤቶች ገንብቶ ለተጠቃሚው እያዳረሰ እንደሚገኝ እሙን ነው፡፡ ነገር ግን ከዛሬ ሦስት ዓመት በፊት  አገር ውስጥ ላሉና ከአገር ውጭ ላሉ ኢትዮጵያውያን የ40/60 ቤቶችን ገንብቶ ለማስረከብ አገር ውስጥ ለሚኖሩ ኢትዮጵያውያን በብር የሚቆጥቡበትን መንገድ፣ ከአገር ውጭ ላሉትም በዶላር እንዲቆጥቡ የሚያስችል ሥርዓት ሲተገበር ቆይተዋል፡፡ ከአገር ውጭ ያሉ አብዛኛዎቹ በዓረብ አገር የሚኖሩ እህቶቻችን የዚህ ዕድል ተጠቃሚ ነበሩ፡፡ እነዚህ ሴቶች ለሥራ ከአገር በሚወጡበት ወቅት ሁለት፣ ሦስትና አራት ዓመታት በኮንትራት ሲሠሩ ቆይተው ይመለሳሉ፡፡ ከአገር ውጭ እያሉ ቁጠባቸውን በዶላር ያከናውኑ የነበሩ ኮንትራታቸውን ጨርሰው ሲመለሱ እንክፈል ሲሉ ግን በዶላር ካልሆነ በብር አንቀበልም ተብለዋል፡፡ ይህንን ለማስፈጸም የባንኩን የበላይ አመራሮች ባነጋገርንበት ወቅት ብዛት ያላቸው ሰዎች እየመጡ እንዳነጋገራቸውና ጉዳዩን እያየነው ነው ለጊዜው ውሳኔ እስከሚሰጥ ድረስ በዶላር ክፈሉ በማለት ምላሽ ሰጥተውናል፡፡  

ከዚያም ከትንሽ ወራቶች በኋላ ክፍያ ለመፈጸም ወደ ባንኩ ስናመራ ውጭ ጉዳይ ሚኒስቴር እንድንሄድ ተነገረን፡፡ በውጭ ጉዳይ ሚኒስቴር የሚመለከታቸው አካላት ‹‹መፍቀድ ጀምረን ነበር፡፡ ከቤቶች ልማት ግን እንዳንፈቅድ ደብዳቤ ተጽፎልናልና ጉዳያችሁን እዛው ቤቶች ልማት ሄዳችሁ ኃላፊዎችን አነጋግሩ፤›› ብለውናል፡፡ የአዲስ አበባ ቁጠባ ቤቶች ኢንተርፕራይዝ ስለጉዳዩ ሲጠየቅ ዶላር መክፈል ካልሆነም መተው ብቸኛ አማራጭ መሆኑን  አስረግጠው ነገሩን፡፡ ለማን አቤት እንበል? የአዲስ አበባ ቤቶችና ኮንስትራክሽን ቢሮ ይመለከተዋል ተባልንና ወደዚያው አመራን፡፡ የሚመለከታቸው ሰዎችም ምላሻቸው አንድ ዓይነት ሆነ፡፡ እንደውም ብዛት ያላቸው ሰዎች መጥተው እንናወሯቸውና ምንም አማራጭ እንደሌለ እንዳስረዷቸው ነገሩን፡፡ የሚመለከተው ክፍል ይህንን አቤቱታ ከግምት ውስጥ በማስገባት ኮንትራታቸውን ጨርሰው ለሚመጡ ኢትዮጵያውያን ዜጎች ቁጠባቸውን በብር የሚከፍሉበት መንገድ ቢያመቻች፣ ዶላር መክፈል ያልቻሉ ቤት ፈላጊዎች ከቁጠባ እየወጡ መሆኑን መንግሥት ተረድቶ በብር መክፈል የሚችሉበትን መንገድ ቢያመቻችልን ስንል በትህትና እንገልጻለን፡፡

(ደረጀ፣ ከአዲስ አበባ)